Pewaliana 34
34
Hi Dina hante hi Sike
1Morue katoꞌo, hi Dina anaꞌna hi Akoꞌ hante hi Lea, ako mampomehuaki haꞌumbora towoweꞌe toKanaꞌa. 2Hi Sike anaꞌna hi Hemor toHewi to mewali datu itoꞌo. Ikonoꞌokiꞌnalu hi Sike hi Dina, nopehilaiki towoweꞌe tiꞌo hei nopogauꞌ mparuku. 3Angkana dokoꞌ rahi laline pe hi Dina, hei lalina medokiꞌmo pe hi Dina. Hei io mampaliꞌ lala hingkeꞌna noleiꞌi hi Dina. 4Alaꞌ tiꞌo hi Sike mantiꞌi pe hi Hemo, umoꞌna, “Roakiꞌa towoweꞌe tiꞌo mewali hantambingku.” 5Nohori hi Akoꞌ, hi Sike mampogauꞌ ngkodake hi Dina. Angkana anaꞌnahi tomaꞌani uwaꞌ i popada mampoꞌodaꞌ lambaꞌara, hawaꞌi notiꞌi-tiꞌi hi Akoꞌ pe iohi alaꞌ handoaꞌhi mahuliꞌ. 6Katoꞌo hi Hemo umoꞌna hi Sike, nolouhi pe hi Akoꞌ mampowiharokiꞌi. 7Kolentuꞌara mowiharo anaꞌnahi hi Akoꞌ mahuliꞌmohi ka popada, ikorohorinalu to mewali tiꞌo molalo pekirire hei koiꞌhi alaꞌ hi Sike mowalia ngkodake i lumbu-lumbuna toSaraeli hante mampogauꞌ ngkodake anaꞌna hi Akoꞌ towoweꞌe, alaꞌ walia to hatoꞌo hawaꞌi wadi nipoꞌintuꞌa. 8Mowiharomo hi Hemo pe iohi, “Hi Sike anaꞌku dokoꞌ pe anaꞌmu, ane ipeweiluꞌi, io mewali hantambina anaꞌku, 9hinamoiae anaꞌte momeroa-roahi, anaꞌmu towoweꞌe ipaꞌanikika hei anaꞌki towoweꞌe kipaꞌanikikei. 10Meꞌohaꞌmokei iseꞌe pelei-leihami, mobaluꞌ-baluꞌ wute uwaꞌ lumami iseꞌe.” 11Katoꞌo hi Sike mantiꞌi pe umoꞌna anaꞌ tiꞌo hante pe kokaꞌ-kokaꞌnahi, “Ane ipoꞌioꞌkei perapiꞌka, kupepaꞌaniki pe ingkei hapo to iperapiꞌ, 12kehapoꞌi iponolentuiꞌa woriꞌ doiꞌ hante doiꞌ pamoneꞌ, kupepaꞌaniki hapo to iperapiꞌ, hingkeꞌna ipaꞌanikiꞌa towoweꞌe tiꞌo mewali hantambingku.” 13Katoꞌo anaꞌnahi hi Akoꞌ mehoniꞌ hi Sike hante hi Hemo umoꞌna hante wuti, alaꞌ hi Sike mampogauꞌ ngkodake hi Dina, hineeꞌra tiꞌo, 14iohi mantiꞌi pe roduo toaꞌ tiꞌo, “Ingka hawaꞌka wadi mampohamoko hineeꞌki hante toaꞌ to hawaꞌi nibulabaꞌ, alaꞌ tiꞌo kodake i ingka. 15Hingkiꞌ kitorimo perapiꞌma ane ingko hibali ingka, iomo lekiꞌna tomaꞌani i iliꞌmi nibulabaꞌ, 16honiꞌi ingka mampewei towowalongki pe ingkei hei ingka moroa towowalomi, hei ingka meꞌohaꞌ i ingkei, hei ingkiꞌ mewaliki haꞌanu roboꞌ. 17Angkana ane ingkei hawaꞌi mampehoromua pantiꞌiki hei hawaꞌkei nibulabaꞌ, kiroa mahuliꞌ anaꞌ tiꞌo, hei molaika.” 18Katoꞌo hi Hemo hante hi Sike, mampoꞌioꞌ pantiꞌira. 19Hei anaꞌntomaꞌani tiꞌo hawaꞌi bata-bata mampoꞌintuꞌa, alaꞌ io dokoꞌ pe anaꞌna hi Akoꞌ, hei liaꞌ io haduo toaꞌ to niꞌadaꞌi mpololeke i lekiꞌna potinora.
20Katoꞌo molaimohi hi Hemo hante hi Sike, anaꞌna tiꞌo, pe wambaꞌ bente kotara hei iohi mowiharo pe tumpu kota tiꞌo, 21“Toaꞌ toSaraeli tiꞌo awantahi, tedehiluiae iohi meꞌohaꞌ i roboꞌ hieꞌe hante pelei-leira, hawaꞌireꞌi roboꞌ hieꞌe ganaꞌ roꞌpeꞌohaꞌi? Katoꞌo ingkiꞌ moroa anaꞌ ntowowalora to topohantambi, hei towowalonta topepaꞌaniki pe iohi. 22Hante lala hieꞌe toaꞌ tiꞌohi mampoꞌioꞌ moꞌawa-awa hante ingkiꞌ, honiꞌi ingkiꞌ mewaliki haꞌanu roboꞌ, iomo lekiꞌna tomaꞌani i lumbunta nibulabaꞌ hibali iohi. 23Rewuara, lumara hei lekiꞌna pinatuwuꞌra, hareꞌi intu lekiꞌna tiꞌo toꞌompui woꞌo? Aginamo topoꞌioꞌ perapiꞌre, hingkeꞌna iohi tontohi moꞌawa hante ingkiꞌ.” 24Hatoꞌo pahuane hi Hemo hante hi Sike anaꞌna tiꞌo, nopehoromua lekiꞌna toaꞌ to morampu i wambaꞌ bente kota tiꞌo, katoꞌo nibulabaꞌmo lekiꞌna tomaꞌani to uwaꞌ i kota tiꞌo. 25I ando katolu, ikolentuꞌara iohi maporiꞌ nokomolaloi, mehupaꞌ roduo anaꞌne hi Akoꞌ, iomo hi Simeo hante hi Lewi, kokaꞌna hi Dina, katoꞌo haduo-haduohi moroa pihora hei menonongkoꞌhi mekahi i kota hante hawaꞌhi motehuꞌ, morokoꞌ lekiꞌna tomaꞌani, hei hawaꞌi uwaꞌ to moꞌewahi. 26Hi Hemo hante hi Sike woꞌo rorokoꞌ hante piho, hei iohi moroa hi Dina ka tambina hi Sike, honiꞌi ropolaiki. 27Katoꞌo mehupaꞌhi anaꞌne hi Akoꞌ to ntaniꞌna morompoꞌi toaꞌ-toaꞌ to nirokoꞌ hei morompoꞌi woꞌo lekiꞌna to uwaꞌ i kota tiꞌo, alaꞌ hineeꞌra nipogauꞌ ngkodake. 28Bekeꞌ, gimba, gapiꞌ, kalidena hante lekiꞌna to i lali hei to i howali kota tiꞌo roroa rokomi. 29Hinangkana kosugiꞌara, lekiꞌna anaꞌra hei towoweꞌera nitawaniꞌ hei lekiꞌna woꞌo to uwaꞌ i tambira rorompoꞌi. 30Hi Akoꞌ mantiꞌi pe hi Simeo hante pe hi Lewi, “Ingkei mokodekeiꞌa hei mampokodakekei konaꞌku pe lekiꞌna toaꞌ to uwaꞌ i roboꞌ hieꞌe, pe toKanaꞌa hante toFeris, hantaro ingkiꞌ hangkokiuꞌluki, ane mohintuwuꞌhi moꞌewaki, monontomo hingkiꞌ ronaniki, hei hingkiꞌ roporopuꞌki, aku hante lekiꞌna ohina tambingku.” 31Angkana mehoniꞌhi, “Hawaꞌi kipotedehi hineeꞌki nipohibali towoweꞌe to bantomaꞌania!”
Currently Selected:
Pewaliana 34: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
