Pewaliana 35
35
Hi Akoꞌ nolou womo pe Beteli
1Uko katoꞌo notiꞌi Pueꞌ Ala pe hi Akoꞌ, “Mahuliꞌmoko pe Beteli, i pampemombahangKu pe ingko i tempomu mehilai ka kokaꞌmu hi Esau, meꞌohaꞌmoko itoꞌo hei mowalimoko haꞌanu potutua popenomba pe Aku.” 2Katoꞌo mololitamo hi Akoꞌ pe halali-halalinahi hei pe lekiꞌna toaꞌ to uwaꞌ itoꞌo notiꞌi, “Itubemokei lekiꞌ-lekiꞌne totoaꞌ to niwali ka watu ba ka loti, hei ipohawamokei parewami hante to wolaꞌ. 3Hangangaa iwalikei hatoꞌo alaꞌ hingkiꞌ nolouki pe Beteli, itoꞌo hingkiꞌ moꞌaroꞌa haꞌanu potutua popenomba pe Pueꞌ Ala to mosulungiꞌa i lali komaporiꞌku hei moꞌowoniꞌa i umbo-umbo koꞌakoangku.” 4Korohorinalu lolitane, ropepaꞌanikimo pe hi Akoꞌ lekiꞌ-lekiꞌna lente to rowali ka watu ba ka loti hei hatoꞌo woꞌo dodaliꞌra. Lekiꞌ-lekiꞌna tiꞌo notawumo hi Akoꞌ i luaꞌna hapongko nunuꞌ dodungku i bolaꞌ Sike. 5Ikopolaira hi Akoꞌ hante tinonahi, Pueꞌ Ala mampoꞌuwaꞌmo komorokaꞌra lekiꞌ-lekiꞌna toaꞌ to meꞌohaꞌhi i bolaꞌ to dodungku tiꞌo, hingkeꞌna hawaꞌhi modapaꞌ anaꞌna hi Akoꞌ. 6Koꞌukoana mehupaꞌmohi hi Akoꞌ hei lekiꞌ-lekiꞌna toaꞌ to nokohiꞌoꞌaluki i woiꞌ kanaꞌa i kota Beteli to nitiꞌi woꞌo Lus. 7Itoꞌo hi Akoꞌ moꞌaromo haꞌanu potutua popenomba hei nokokeneꞌi El-Beteli, alaꞌ itoꞌomo Pueꞌ Ala mampemombaha pe hi Akoꞌ i kopehilaina ka kokaꞌna. 8Tempora itoꞌo, hi Debora toperoroa hi Ribeka mahimo, honiꞌi rotawu i luaꞌna nunuꞌ dodungku i bolaꞌ tiꞌo, io horiana loti tiꞌo nikokeneꞌi “Loti Peꞌolaha”.
Pueꞌ Ala mobarakati hi Akoꞌ i Beteli
9Ikohupaꞌnalu hi Akoꞌ i Beteli ka woiꞌ Pada-Aram, Pueꞌ Ala mampopemombahamo pe io, honiꞌi Nobarakati, 10Notiꞌi, “Konaꞌmu handoꞌiomo hi Akoꞌ, angkana nikokeneꞌimoko hi Saraeli,” palaihana, “Motudaꞌ hante Pueꞌ Ala.” Hatoꞌomo Pueꞌ Ala mowolihi konaꞌna hi Akoꞌ mewaliꞌ hi Saraeli. 11Uko tiꞌo notiꞌi womo Pueꞌ Ala, “Akumo Pueꞌ Ala to makuasaꞌ, memuleꞌmoko wute woriꞌ pemuleꞌama. Ka pemuleꞌamu hingkiꞌ Kupopewali haꞌanu roboꞌ ngkodeꞌ hei woriꞌ kodatua ntaniꞌna, hei pemuleꞌamu woriꞌ woꞌo hingkiꞌ mewali datu. 12Woiꞌ hieꞌe to kupaꞌaniki hi Burahima hei hi Isaki, hingkiꞌ Kupaꞌanikiko woꞌo wute-wute i muleꞌmuhi.” 13Uko mololita hatoꞌo Pueꞌ Ala mampolihimo hi Akoꞌ 14Uko tiꞌo hi Akoꞌ moꞌaromo haꞌanu watu to mewaliꞌ tanda popangkolowoi koꞌitoꞌonamo Pueꞌ Ala mololita pe io. Watu tiꞌo nobobohi uwai anggoroꞌ hante bokaꞌ Saitu iomo popenombane pe Pueꞌ Ala. 15Pebolaꞌa tiꞌo nokokeneꞌi Beteli, alaꞌ itoꞌomo Pueꞌ Ala mololita pe hi Akoꞌ.
Hi Raheli mahi mpoꞌanaꞌ
16Uko tiꞌo hi Akoꞌ hante tinonahi molai womohi ka Beteli. Himboaꞌmo moꞌela ka bolaꞌ Eparata, mehupaꞌmo tempone hi Raheli moꞌanaꞌ, poꞌanaꞌna tiꞌo masusa mpololeke. 17Horiana notiꞌi sando pe io, “Hawaꞌko morokaꞌ hinewowoꞌena moꞌanaꞌ womoko tomaꞌani.” 18Hingkiꞌ ukomo inohaꞌne, nokokeneꞌi hi Raheli anaꞌne tiꞌo Ben-Oni, palaihana “anaꞌku i lali komasusangku”, angkana nokokeneꞌi hi Akoꞌ hi Benami, palaihana “Anaꞌ to morasiꞌ”. 19Mahimo hi Rahelino, katoꞌo rotawu i hiri lala pe bolaꞌ Eparata, to hinewowoꞌena nitiꞌi Beteleme. 20Itoꞌo hi Akoꞌ motindiꞌ haꞌanu watu to mewaliꞌ tandaꞌ popangkolowoi, hei potawuana hi Raheli rotandaꞌi hante watu tiꞌo wute hinewowoꞌena. 21Uko tiꞌo nopololiumo hi Akoꞌ patengkaꞌne moliu i Migal-Eder honiꞌhi moꞌaro bambaruꞌra i hambeiꞌ bolaꞌ tiꞌo. 22aKolentuꞌara itoꞌo, hi Rube mampoloꞌorimo hi Bilha to nokoroduo umoꞌna. Waliana tiꞌo nobahaꞌ umoꞌna.
Anaꞌnahi hi Akoꞌ
22bHieꞌemohi anaꞌne hi Akoꞌ tomaꞌani to hampuluꞌ meroduo. 23Anaꞌna ka hi Lea, to kokokaꞌ hi Rube, honiꞌi hi Simeo, hi Lewi, hi Yehuda, hi Isakar, hei tohinoneꞌ hi Sebulo. 24Anaꞌna ka hi Raheli iomo tokokaꞌ hi Yusuf hei tohinoneꞌ hi Benami. 25Anaꞌna ka hi Bilaꞌ hawiꞌna hi Raheli iomo hi Dan tokokaꞌ hei tohinoneeꞌ hi Natali, 26Anaꞌna ka hi Silipaꞌ hawiꞌna hi Lea iomo to kokokaꞌ hi Gati hei tohinoneeꞌ hi Aser. Iomohi anaꞌne hi Akoꞌ tomaꞌani to nipoꞌanaꞌki i Pada-Aram.
Komahina hi Isaki
27Ka bolaꞌ Migdal-Eder, noloumo hi Akoꞌ pe hi Isaki umoꞌna i Mamre dodungku i Kiriat-Arba to nitiꞌi woꞌo Hebron. Hampiha hi Burahima meꞌohaꞌ woꞌo itoꞌo mewali to mehupaꞌ. 28Hi Isaki motodimo hei tinuwuꞌna 180 ntoꞌa katoꞌo mahimo. 29Ikomahina tiꞌo to motawuꞌi iomohi anaꞌna to roduo, hi Esau hante hi Akoꞌ.
Currently Selected:
Pewaliana 35: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
