Yohanes 12
12
Kapuꞌna hi Yesu nibobohi hante minyaꞌ-minyaꞌ to mewowau i Betania
(Mat. 26:6-13; Mrk. 14:3-9)
1Oni ando romo ando Posusaꞌ Pokalintora toYahudi, hi Yesu nolou pe Betania, bolaꞌ peꞌohaꞌana hi Lasaru, to Nopotuwuꞌ huliꞌ. 2Ikohupaꞌna itoꞌo, toaꞌ mampoꞌuwaꞌhi susaꞌ, alaꞌ motanaꞌhi mantorimo hi Yesu i bolaꞌra. Hi Marta merewu, hei hi Lasaru mangka woꞌo moꞌawa hi Yesu hante toaꞌ ntaniꞌna.
3Kolentuꞌara mangka, hupaꞌmo hi Maria mangkomi habutoloꞌ minyaꞌ-minyaꞌ narwastu to mewowau. Minyaꞌ-minyaꞌ tiꞌo rowali ka uwakaꞌ loti to mewowau, hei masuliꞌ mpololeke hiline. Hi Maria mobobohi kapuꞌna hi Yesu hante minyaꞌ-minyaꞌ tiꞌo, honiꞌi nopahi hante wiloluna. Katoꞌo mewowau mpololeke i lali tambi tiꞌo. 4Haduo topeguruna hi Yesu to nikokeneꞌi hi Yudas Isikarioꞌ, to hingkiꞌ mampobaluꞌ hi Yesu pe poniꞌNa, mantiꞌi, 5“Masuliꞌ mpololeke hiline minyaꞌ-minyaꞌ tiꞌo, kira-kira tolu natu doiꞌ peraꞌ.#12:5 doiꞌ peraꞌ: Ihaꞌna hampepaꞌ doiꞌ peraꞌ hibali hante horoina toaꞌ ane majama haꞌando. Mahamporeꞌi hinaꞌ hawaꞌi nipobaluꞌ, hei hilina nipaꞌanikihi toaꞌ to merima-rima?” 6Kotuꞌuana, hi Yudas hawaꞌi mampekiri kotuwuꞌra to merima-rima, alaꞌ io to manako! Io topamporia doiꞌra moꞌawa, hei hampiha-hampiha noroa ngkawowuni.
7Notiꞌi hi Yesu, “Hapo to nowali towoweꞌe hieꞌe tedehiluiae, alaꞌ io mampatimomo ando konitawuangKu. 8Woriꞌ tene tempomi mosulungihi toaꞌ to merima-rima, angkana Aku, hamboaꞌmoꞌA morue moꞌawa-awa hante ingkei.”
Tadulako toYahudi hingkiꞌ morokoꞌ hi Lasaru
9Woriꞌ toYahudi pahori koꞌuwaꞌna hi Yesu i Betania, iomo horiana ako roꞌele. Hei dokoꞌhi woꞌo pangkiꞌ hi Lasaru to nopotuwuꞌ huliꞌ hi Yesu hampiha. 10Iomo horiana tutuꞌ-tutuꞌ tadulako mpenomba mogombomohi mampololita tungkaihara hingkiꞌ morokoꞌhi woꞌo hi Lasaru, 11alaꞌ nokomi kohiLasarusna, woriꞌ toYahudi mampolihihi tadulako agamara hei mepoꞌohihi pe hi Yesu.
Hi Yesu ropotanaꞌ toYerusale
(Mat. 21:1-11; Mrk. 11:1-10; Luk. 19:28-38)
12Kopoꞌonina, woriꞌ toaꞌ i Yerusale pahori hi Yesu kolentuꞌaNamo i lala pe Yerusale. I tempo tiꞌo, woriꞌ mpuꞌu toaꞌ hirampu i Yerusale alaꞌ hingkiꞌ hupaꞌ ando Posusaꞌ Pokalintora toYahudi. 13Morodiꞌmohi taweꞌ torangke, ropopodupaꞌ hi Yesu, tandaꞌ peꞌadaꞌira pe Io. Moloaꞌ-loaꞌhi rotiꞌi:
“Hosana! Tepokodeꞌmo Pueꞌ Ala!
Nibarakatimo Io to humei i lali konaꞌNa Pueꞌ Ala!
Tebarakatimo Dature toSaraeli.”#12:13 Mopakeꞌhi toaꞌ to woriꞌ lolita ka Mas. 118, haꞌanu linga to nilingaki i ando Posusaꞌ Pokalintora toYahudi.
14Hi Yesu moroamo hambaꞌa anaꞌ kalide, honiꞌi Nopelambaꞌi nolou pe lali kota Yerusale. Nopelambaꞌi tiꞌo mampobuhoꞌi lolitana nabi hampiha to teꞌukiꞌ waheꞌe:
15“Inioꞌkei morokaꞌ, tumpu bolaꞌ Sion.
Ele! Datumi mehupaꞌ,
melambaꞌ i hambaꞌa anaꞌ kalide.” (Sak. 9:9)
16I tempo tiꞌo, topeguruNahi hawaꞌi robahaꞌ palaihane hapo to pewali tiꞌo. Angkana koꞌukona hi Yesu nipokodeꞌ moliu i komahiaNa, honiꞌi rokolowoireꞌi hapo to teꞌukiꞌ i lali Suraꞌ Mangkolehi to mampowutemo umbiꞌ hapo to hingkiꞌ mewali pe hi Yesu.
17I tempo tiꞌo, uwaꞌhi woꞌo woriꞌ toaꞌ i Yerusale to moꞌawa hante hi Yesu hampiha, i tempoNa mampatuwuꞌ huliꞌ hi Lasaru hei Nowowoi mesuwu ka lali petowua. Toaꞌhi mampololita nturusi noniuꞌ i hapo to nowali hi Yesu, 18iomo horiana woriꞌhi mpololeke toaꞌ ako mampohidupaꞌki hi Yesu, alaꞌ pahorihi koꞌIona to mowali tandaꞌ kuasaꞌ tiꞌo. 19Katoꞌo mololitamohi toParisi haduo hei haduo, rotiꞌi, “Noniamoki! Ele, woriꞌhi mpololeke toaꞌ i duniaꞌ metuntu pe Io.”
Hi Yesu mololita ikohingkiꞌ mahina
20Woriꞌhi toaꞌ nolou pe Yerusale hingkeꞌna menombahi i ando Posusaꞌ Pokalintora toYahudi. I lumbura toaꞌ tiꞌo, uwaꞌhi woꞌo haꞌumbora duo toYunani. 21ToYunani tiꞌo nolouhi pe hi Pilipu, rotiꞌi, “Tua, kikodokoꞌi mampohidupaꞌki hi Yesu.” Hi Pilipu tiꞌo ka bolaꞌ Besaida i woiꞌ Galilea.
22Katoꞌo hi Pilipu mampowute lolitara pe hi Andaria, honiꞌhi nolou pe hi Yesu mampowute lolitara tiꞌo. 23Notiꞌikihi hi Yesu, “Dodungkumo tempone Pueꞌ Ala hingkiꞌ mampokodeꞌ Anaꞌ Manusiaꞌ. 24Tuꞌu to Kutiꞌikikei hieꞌe: KotuwuꞌKu hibali halangkaꞌ tinudaꞌ. Ane tinudaꞌ hawaꞌi nihuꞌa i lali woiꞌ, hawaꞌi uwaꞌ pelaworoane. Tontona haꞌanulu. Angkana ane nihuꞌamoꞌi, hingkiꞌ membiaꞌ hei mewali woriꞌ. 25Toaꞌ to mampetuntuilu peleihana hadoduona i duniaꞌ hieꞌe, io hingkiꞌ mahi hei tekaꞌa ka Pueꞌ Ala wute nantolou-louna. Angkana toaꞌ to mampohinte peleihana i duniaꞌ hieꞌe, hingkiꞌ pahua kotuwuꞌ to wolaꞌ to hawaꞌi mokoꞌukoa. 26Himolu to dokoꞌ majama pe Aku, hangangaa metuntuhi pe Aku. Hingkeꞌna topajamangKu moꞌawa hante Aku i imbo koꞌuwaꞌangKu, hei UmoꞌKu hingkiꞌ mampokodeꞌ hihimolu to mengkoruꞌ pe Aku.
27Hinewowoꞌena masusa lalingKa. Hawaꞌi Kubahaꞌ hapo to hangangaa Kutiꞌi. Kukodokoꞌi mekokae waheꞌe: ‘Umoꞌ, IpohinteꞌA wokaiaꞌ ka komaporiꞌ to hingkiꞌ morumpaꞌA hieꞌe!’ Angkana hawaꞌi, alaꞌ iomo tungkaihangKu humei pe duniaꞌ, hingkeꞌna pahuaꞌA komaporiꞌ tiꞌo. 28Umoꞌ, Ipomombaha komanobaꞌMa!”
Uko tiꞌo, Pueꞌ Ala mololita ka suruga, Notiꞌi, “Ukomo Kupomombaha komanobaꞌKa hei hingkiꞌ Kupomanobaꞌ womo.”
29Toaꞌ to metotiꞌi itoꞌo to pahorihi lolita tiꞌo, hantenaꞌ mantiꞌi, “Tiꞌo boluntuꞌ!”
Angkana hantenaꞌhi woꞌo mantiꞌi, “Handoꞌio. Uwaꞌ malaꞌeka to mololita hante Io.”
30Notiꞌikihi hi Yesu, “Loaꞌ to ihorimokei hingkenia, hawaꞌi Nopowute hingkeꞌna mosulungiꞌA, angkana Nopowute hingkeꞌna mosulungikei. 31Hinewowoꞌena hupaꞌmo tempone Pueꞌ Ala hingkiꞌ mobutusi lekiꞌ-lekiꞌna komonawuꞌna toaꞌ i duniaꞌ. Hei hinewowoꞌena hupaꞌmo woꞌo tempone Belisiꞌ to mokuasaꞌi duniaꞌ hieꞌe hangangaa nitube. 32Hei Aku, ane nipoꞌiwomboꞌA i loti momehulepe, hingkiꞌ Kuruiꞌ lalire lekiꞌ-lekiꞌra toaꞌ hingkeꞌna humeihi pe Aku.” 33Lolitana hi Yesu tiꞌo mampokononto hohumbo kohingkiꞌ mahiNe.
34 #
Mas. 110:4; Yes. 9:6; Yeh. 37:27; Dan. 7:14 Rotiꞌi toaꞌ to woriꞌ, “I lali aturana Pueꞌ Ala kibasa: Datu to Mamposalamaꞌ tuwuꞌ wute nantolou-louna. Mahamporeꞌi horiana Itiꞌi Anaꞌ Manusiaꞌ hangangaa nipodingkaoꞌ i loti momehulepe? Anaꞌ Manusiaꞌ to hohumbo to Itungkai?”
35Notiꞌikihi hi Yesu, “Hampaiꞌ romo, komobaro to mampomobarokei hinewowoꞌena hamboaꞌmo hingkiꞌ uwaꞌ moꞌawa hante ingkei. Matengkaꞌkei nturusi i lali komobaro i tempona Aku uwaꞌ tene moꞌawa-awa hante ingkei, hingkeꞌna hawaꞌkei norumpa komokorindi. Toaꞌ to matengkaꞌ i lali komokorindi, hawaꞌi robahaꞌ i imbo koꞌakoare. 36Mepoꞌohimokei pe Aku to mangkomi komobaro pe ingkei, hingkeꞌna ingkei woꞌo hingkiꞌ mangkomi komobaro pe toaꞌ ntaniꞌna.”#12:36 Harafia: hingkeꞌna ingkei hingkiꞌ mewalikei anaꞌ-anaꞌ komobaro. Mat. 5:14; Eps. 5:8, 9; 1Tes. 5:5.
Koꞌukona hi Yesu mampowute lekiꞌ-lekiꞌna tiꞌo, molaimo katoꞌo, hei hamboaꞌmo mampopeꞌokiꞌ pe toaꞌ woriꞌ.
ToYahudi hawaꞌi mepoꞌohi pe hi Yesu
37Kehapoꞌi woriꞌ tandaꞌ kuasaꞌ to nowali hi Yesu i hinarora toYahudi, angkana woriꞌ tene to hawaꞌi mepoꞌohi pe Io, 38hingkeꞌna tebuhoꞌimo lolitane nabi Yesaia hampiha to mantiꞌi:
“Pueꞌ, hawaꞌhi mepoꞌohi i kareba to kipowutekihi.
Kehapohi Iponoꞌokiꞌkihi kuasaꞌMa, hawaꞌhi woꞌo mepoꞌohi.” (Yes. 53:1)
39Mewaliꞌ, hawaꞌhi hingkiꞌ mepoꞌohi, alaꞌ i lali suraꞌna Yesaia, Pueꞌ Ala mantiꞌi waheꞌe:
40“Kutungkaihi Kupobilo, hingkeꞌna hawaꞌhi pangkiꞌ
Kupomorintodi lalire, hingkeꞌna hawaꞌhi pobahaꞌ peleihangKu.
Koꞌukoana hawaꞌhi mahuliꞌ pe Aku,
hei dosara hawaꞌi teꞌampuni.” (Yes. 6:10)
41Lolita tiꞌo nopowute nabi Yesaia hampiha noniuꞌ hi Yesu, alaꞌ noꞌokiꞌmo umbiꞌ kuasaꞌNe.#12:41 Yesaia mahi kira-kira 700 ntoꞌa ka handoaꞌi tene hi Yesu nipoꞌanaꞌki.
42Kehapoꞌi hatoꞌo, woriꞌhi woꞌo tadulakore toYahudi to mepoꞌohi pe hi Yesu. Angkana hawaꞌhi hiniꞌ mampomombaha pepoꞌohira pe hi Yesu, alaꞌ morokaꞌhi hawaꞌhi hingkiꞌ ropoliu toParisi mekahi pe lali tambi penombaha. 43Rolei tene pepokodeꞌ to ka toaꞌ, hintina pepokodeꞌ to ka Pueꞌ Ala.
Lolitana hi Yesu koꞌukoana pe toaꞌ woriꞌ
44Hampiha tempo, hi Yesu mololita Nopokobue, Notiꞌi, “Toaꞌ to mepoꞌohi pe Aku, handoꞌio Akulu to ropoꞌohi, angkana mepoꞌohi woꞌo pe Pueꞌ Ala to morumbaꞌA. 45Toaꞌ to pangkiꞌA, hibalimo woꞌo pangkiꞌ Pueꞌ Ala to morumbaꞌA. 46HumeiꞌA pe duniaꞌ hieꞌe mewaliꞌA komobaro, hingkeꞌna lekiꞌ-lekiꞌna toaꞌ to mepoꞌohi pe Aku hamboaꞌmohi meꞌohaꞌ i lali komokorindi.
47Toaꞌ to mampehoromua lolitangKu angkana hawaꞌi ropetuntui, handoꞌio Aku to hingkiꞌ mohukuhi. Alaꞌ tungkaihangKu humei pe duniaꞌ hieꞌe, hawaꞌA humei mohuku toaꞌ, angkana humeiꞌA mamposalamaꞌhi ka pehuku dosa. 48Toaꞌ to hawaꞌi mantorimoꞌA hante lolitangKu, uwaꞌmo to hingkiꞌ mohukuhi. Kareba to Kupowute, tiꞌomo to hingkiꞌ mohukuhi i Ando Pobutusi i koꞌukoana duniaꞌ. 49Alaꞌ lolitangKu handoꞌio ka peleihangKu hadoduongKu. Kupowute hei Kupololita hapo to nohowoꞌikiꞌA UmoꞌKu, alaꞌ Iomo to morumbaꞌA humei. 50Hei Kubahaꞌ: himo to mampetuntui hawaꞌNa tiꞌo hingkiꞌ pahua kotuwuꞌ to wolaꞌ to hawaꞌi mokoꞌukoa. Mewaliꞌ, hapo to Kutiꞌi hieꞌe, bateꞌna lolita to NopowutekimoꞌA umbiꞌ UmoꞌKu.”
Currently Selected:
Yohanes 12: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
