Yohanes 11
11
Komahina hi Lasarus
1-2Haduo tomaꞌani to nikokeneꞌi hi Lasarus meꞌohaꞌ i bolaꞌ Betania moꞌawa hante hampemomolona hi Maria hante hi Marta. Hi Maria tiꞌomo to mobobohi kapuꞌna hi Yesu hante minyaꞌ-minyaꞌ to mewowau honiꞌi nopahi hante wiloluna. Hampiha tempo, hi Lasarus makaja komohakiꞌne. 3Hi Maria hante hi Marta morumbaꞌmohi toaꞌ nolou mampowute pepaha pe hi Yesu, rotiꞌi “Pueꞌ, halalingki to Ipokarima, kolentuꞌana mohakiꞌ ngkodeꞌ.”
4Konohorinalu hi Yesu kareba tiꞌo, Notiꞌi, “Hakiꞌna tiꞌo hawaꞌi hingkiꞌ mangkomiꞌi pe komahia. Tiꞌo mewali hingkeꞌna Pueꞌ Ala ropokodeꞌ, hei moliu i hapo to hingkiꞌ Kuwali, Aku anaꞌna Pueꞌ Ala hingkiꞌ ropokodeꞌ woꞌo.”
5Hi Yesu mampokarima hi Marta, hi Maria, hante hi Lasarus. 6Angkana KonohoriNalu komohakiꞌne hi Lasarus, hawaꞌi kaliuꞌ nolou, lebaꞌlu i peꞌohaꞌaNa roꞌando komoruene. 7Liumo roꞌando honiꞌi Notiꞌiki topeguruNa, “Hokeimo mahuliꞌmoki nolou pe woiꞌ Yudea.”
8TopeguNa mantiꞌi, “Guru, handoaꞌhi tene morue toYahudihi itoꞌo mangkodokoꞌihi hingkiꞌ mowatuiKo wute mahi. Mewaliꞌ, mahamporeꞌi hinaꞌ Ikodokoꞌi womo mahuliꞌ nolou?”
9Notiꞌi hi Yesu, “I lali haꞌando, hawaꞌireꞌi hampuluꞌ merojaa? Toaꞌ to matengkaꞌ andona, hawaꞌhi hingkiꞌ hiwintiꞌ. Pangkiꞌhi, alaꞌ uwaꞌ wanta ando to mampomobaro duniaꞌ hieꞌe. 10Angkana toaꞌ to matengkaꞌ i lali komokorindi, bateꞌna hingkiꞌ hiwintiꞌ, alaꞌ hawaꞌi uwaꞌ to mowantaiꞌi.”
11Hatoꞌomo lolitane hi Yesu, hei uko tiꞌo Notiꞌi womo, “Awanta hi Lasarus leꞌomo, angkana hingkiꞌ ako Kuluke.”
12-13Kotuꞌuana lolitane hi Yesu tiꞌo, palaihana hi Lasarus mahimo. Angkana hawaꞌi robahaꞌ palaihane lolitaNa tiꞌo, rotiꞌiae leꞌolu hi Lasarusꞌno. Iomo horiana rotiꞌi, “Pueꞌ, ane leꞌoluꞌi, hingkiꞌ meꞌarolu intu alaꞌ moꞌoriꞌmoꞌi.”
14Katoꞌo, Nopokonontokihi palaihane lolitaNa, Notiꞌi, “Hi Lasarus mahimo. 15MotanaꞌA alaꞌ hawaꞌA uwaꞌ itoꞌo i tempona mahi. Alaꞌ hapo to mewali, hingkiꞌ modumbuꞌ i ingkei, hingkeꞌna mepoꞌohikei pe Aku. Mewaliꞌ hokeimo noloumoki pe hi Lasarus.”
16Hi Toma, to rotiꞌi woꞌo tomoropaꞌ, mampatiꞌikihi topeguru ntaniꞌna, “Aginamo metuntuki pe hi Yesu, hingkeꞌna mahiki moꞌawa hante Io.”
Hi Yesu mampotuwuꞌ huliꞌ hi Lasarus
17Kohupaꞌralu i bolaꞌ Betania, hi Yesu pahori kareba to mantiꞌi iba andomo hi Lasarus nitawu. 18Betania tiꞌo dodungku i Yerusale, kira-kira tolu kilo komoꞌelane. 19Mewaliꞌ, woriꞌhi toYahudi hupaꞌ mampododoli hi Marta hante hi Maria alaꞌ komahina hineeꞌra.
20Ikonohorina hi Marta kohupaꞌne hi Yesu, kaliuꞌ nolou mangkohidupaꞌkiꞌI. Angkana hi Maria i tambilu nturusi. 21Notiꞌi hi Marta pe hi Yesu, “Pueꞌ, ane keꞌiseꞌeKo i tempona halalingku mohakiꞌ, kehawaꞌi hingkiꞌ mahi. 22Angkana kehapoꞌi hatoꞌo, kubahaꞌ: hapo to Iperapiꞌ pe Pueꞌ Ala hinewowoꞌena noniuꞌ i halalingku, bateꞌna hingkiꞌ Nopaꞌanikiko.”
23Notiꞌi hi Yesu, “Halalimu hingkiꞌ tuwuꞌlu huliꞌ.”
24Notiꞌi hi Marta, “Kubahaꞌlu kohingkiꞌ tuwuꞌne huliꞌ i ando pobutusi i kotutuana duniaꞌ, ikonipopeꞌarona lekiꞌ-lekiꞌra toaꞌ to mahi.”
25Notiꞌi hi Yesu, “Akumo hieꞌe to mampopeꞌaro to mahi, hei to mepaꞌani kotuwuꞌ. Toaꞌ to mepoꞌohi pe Aku, kehapohi mahi, hingkiꞌ tuwuꞌhi huliꞌ. 26Hei lekiꞌ-lekiꞌna toaꞌ to tuwuꞌ hei mepoꞌohi pe Aku, kotuꞌuana hawaꞌi mahi wute nantolou-louna. Ipoꞌohilu to Kutiꞌi hieꞌe?”
27Notiꞌi hi Marta, “Kupoꞌohi Pueꞌ. Tuꞌu koꞌIngkona Anaꞌne Pueꞌ Ala, Datu to Mamposalamaꞌ to nodandi Pueꞌ Ala hampiha to hingkiꞌ humei pe duniaꞌ.”
28Koꞌukona mantiꞌi hatoꞌo, noloumo hi Marta pe tambina mowowoi hi Maria, honiꞌi nowowaraꞌ notiꞌiki, “Uwaꞌ Guru inoꞌo. Nokodokoꞌi mangkohidupaꞌkiko!” 29Ikonohorinalu hi Maria lolitane, hohiꞌ-hohiꞌmo mpuꞌu nolou mangkohidupaꞌki hi Yesu. 30I tempo tiꞌo, hi Yesu handoaꞌi tene mekahi pe lali bolaꞌ, uwaꞌlu tene i pohidupaꞌara hante hi Marta hingkenia. 31ToYahudi to hupaꞌhi mepododoli i lali tambi, pangkiꞌhi hi Maria metotiꞌi kaliuꞌ molai. Rotiꞌireaꞌ io hingkiꞌ ako meꞌola i petowua. Iomo horiana metuntuhi woꞌo.
32Ikohupaꞌnalu hi Maria i koꞌuwaꞌna hi Yesu, hei noꞌokiꞌmo tiꞌo hi Yesu, melingkotuꞌ i hinaroNa honiꞌi notiꞌi, “Pueꞌ, ane keꞌiseꞌeKo i tempo tiꞌo, kehawaꞌi hingkiꞌ mahi halalingka.”
33Ikonoꞌokiꞌnalu hi Yesu hi Maria meꞌola, hante toYahudi to nopoꞌawa meꞌolahi woꞌo, io horiana hanondoiha mpololeke hei masusa laliNe. 34Nopeꞌitanoki, “I imbo nitawuꞌi?”
Rotiꞌi, “Pueꞌ, hoki, akoꞌi toꞌele.”
35Meꞌolamo hi Yesu. 36Rotiꞌi toYahudi, “Ele! Marimamo mpuꞌu pe hi Lasarus!”
37Angkana uwaꞌhi woꞌo to mantiꞌi, “Toaꞌ tobilo Nopokoꞌoriꞌ. Mahamporeꞌi hinaꞌ hi Lasarus hawaꞌi nopokoꞌoriꞌ hingkeꞌna hawaꞌi mahi?”
Hi Lasarus tuwuꞌ huliꞌ
38Katoꞌo, masusa womo laline hi Yesu, horiana nolou pe petowua. Potowua tiꞌo, iomo woloꞌ watu to i papina biri to rotutuꞌi hante watu to kodeꞌ. 39Notiꞌi hi Yesu, “Lolihakikei watu potutuꞌine tiꞌo!”
Hi Marta mantiꞌi, “Pueꞌ, inioꞌ nihungkaꞌi alaꞌ momaumoꞌi. Iba minimo nitawu.”
40Notiꞌi hi Yesu pe hi Marta, “Hawaꞌireꞌi Kutiꞌikimoko hingkenia? Ane ipoꞌohiꞌA, hingkiꞌ iꞌokiꞌi mpuꞌu komarohone kuasaꞌna Pueꞌ Ala” 41Katoꞌo toaꞌ to itoꞌohi mohungkaꞌmohi mpuꞌu watu potutuꞌina petowua. Hi Yesu menoaꞌ pe laniꞌ honiꞌi Notiꞌi, “UmoꞌKu, kutiꞌi woriꞌ komoromiꞌMa, alaꞌ perapiꞌKu poko Ipehoromua. 42Kubahaꞌ, lolitangKu bateꞌna Ihori. Aku mantiꞌiꞌA hatoꞌo hingkeꞌna toaꞌ woriꞌ mampoꞌohi koꞌIngkonamo mpuꞌu to morumbaꞌA.”
43Uko tiꞌo, notiꞌi hi Yesu Nopokobue, “Lasarus! Mesuwumoko humei!” 44Mesuwumo mpuꞌu toaꞌ to mahi tiꞌo ka lali petowua. Korawena hante kapuꞌna tebungku tene hante wida popebungkuna, hei tutuꞌna tewiwiꞌ tene motuntuni adaꞌ toYahudi. Notiꞌikihi hi Yesu, “Ipopolaikei tiꞌo popebungkune hingkeꞌna moromiꞌ patengkaꞌne.”
Tadulako toYahudi moliwo hingkiꞌ morokoꞌ hi Yesu
(Mat. 26:1-5; Mrk. 14:1-2; Luk. 22:1-2)
45Woriꞌhi toYahudi to nolou mokadodoroꞌi hi Maria i tempo tiꞌo, pangkiꞌ hapo to nowali hi Yesu, iomo horiana woriꞌhi to mepoꞌohi pe Io. 46Angkana uwaꞌhi woꞌo hantenaꞌne to nolou pe toParisi mampowutekihi hapo to nowali hi Yesu. 47Horiana toParisi hante tutuꞌ-tutuꞌ tadulako mpenomba mampoꞌuwaꞌmohi pogombo ngkodeꞌ moꞌawa hante tomotodi-tomotodira toYahudi. Rotiꞌi, “Hapo to hangangaa towali, alaꞌ woriꞌmo mpuꞌu tandaꞌ kuasaꞌ to nowali hi Yesu? 48Ane topotedehiꞌi nturusi, lekiꞌ-lekiꞌna toaꞌ hingkiꞌ mepoꞌohihi pe Io. Koꞌukoana, surodadu toRoma hingkiꞌ hupaꞌ mokero Tambina Pueꞌ Ala hante leki-lekiꞌna roboꞌta.”
49Uko tiꞌo, mololitamo haduo ka lumbura to nikokeneꞌi hi Kaipa, Tadulako Mpenomba ngkodeꞌ i toꞌa tiꞌo, notiꞌi, “Hawaꞌkei ibahaꞌ hapo-hapo! 50Hawaꞌkei ibahaꞌ hapo to modumbuꞌ i ingkei. Aginamo haduo toaꞌ mahi mosulewotai lekiꞌ-lekiꞌna toaꞌ, hintina mahiki lekiꞌ-lekiꞌta.” 51-52#Yoh. 1:29; 3:16; 4:42; 12:16; 12:32Lolita tiꞌo handoꞌio ka hi Kaipa hadoduona, angkana ka Pueꞌ Ala. Hi Kaipa tiꞌo iomo Tadulako Mpenomba ngkodeꞌ i tempo tiꞌo. Tungkaihana lolitana hi Kaipa iomo hingkeꞌna hi Yesu hangangaa nihuku mahi hingkeꞌna toYahudi himpolohoꞌ ka komahia. Hei handoꞌiolu toYahudi. Nokomi komahina hi Yesu tiꞌo, lekiꞌ-lekiꞌna anaꞌna Pueꞌ Ala to mogara-garahi i humanele duniaꞌ hingkiꞌ nirampuhi huliꞌ hei nipohantiburahi.
53Mepongka ando tiꞌo, tadulakora toYahudi hampekokirihi hingkeꞌna hi Yesu rorokoꞌ. 54Iomo horiana hi Yesu hamboaꞌmo mampopeꞌokiꞌ pe toYahudi, hingkeꞌna hantaro romoꞌi roꞌokiꞌ toaꞌ to woriꞌ. Io molaimo katoꞌo nolou pe bolaꞌ to nikokeneꞌi Eparai i bota popada lori, honiꞌi meꞌohaꞌ itoꞌo hante topeguruNahi.
55I tempo tiꞌo, hingkiꞌ hupaꞌ ando ngkodeꞌ agama Yahudi to rotiꞌi ando Posusaꞌ Pokalintora toYahudi. Handoaꞌi tene ando ngkodeꞌ tiꞌo, woriꞌ toaꞌ ka bolaꞌ-bolaꞌ nolou pe Yerusale, hingkeꞌna mampomangkolehihi wotara motuntuni adaꞌ agamara. 56Toaꞌ to hirampu i Yerusale tiꞌo mampaliꞌhi hi Yesu. Kolentuꞌara hirampu i Tambina Pueꞌ Ala, mometenei-teneimohi, rotiꞌi, “Hohumbo pahuami? Ba hingkiꞌ hupaꞌi mpuꞌu hi Yesu i posusaꞌa hieꞌe?”
57Hatoꞌo pololitare toaꞌ to woriꞌ, alaꞌ tutuꞌ-tutuꞌ tadulako mpenomba hei toParisi, uwaꞌmo umbiꞌ parentare pe toaꞌ to woriꞌ to mantiꞌi, “Ane hihimo to pobahaꞌ koꞌiꞌimbona hi Yesu, hangangaa itiꞌikika, hingkeꞌna nihokiꞌI.”
Currently Selected:
Yohanes 11: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
