Yohanes 6
6
Hi Yesu mampopopangka limo sabu lobi toaꞌ#6:0 Tandaꞌ kuasaꞌ hieꞌe nipopangkolowoi toYahudi noniuꞌ i roti to nopaꞌanikihi Pueꞌ Ala i pada woꞌoni. Basa Keluaran dolaꞌna ka-16.
(Mat. 14:13-21; Mrk. 6:32-44; Luk. 9:10-17)
1Uko tiꞌo, noloumo hi Yesu moꞌawa hante topeguruNahi pe tinaꞌ motoꞌando rano Galilea, to rotiꞌi woꞌo rano Tiberia. 2Woriꞌ mpololeke toaꞌ metuntu nturusi pe Io, alaꞌ pangkiꞌhi lekiꞌ-lekiꞌna tandaꞌ kuasaꞌ to Nowali ipampokoꞌoriꞌna to mohakiꞌ. 3Hi Yesu moneꞌmo nolou pe biri moꞌawa hante topeguruNa, hei mahura itoꞌo. 4I tempo tiꞌo, hingkiꞌ hupaꞌ ando ngkodeꞌ agama Yahudi to rotiꞌi ando Posusaꞌ Pokalintora toYahudi. 5Noꞌele hi Yesu, toaꞌ modinti-dintihi humei mangkododungkuiꞌI. Notiꞌi pe hi Pilipu, “Iꞌimboki mehili pangka, hingkeꞌna toaꞌ to woriꞌ hieꞌe topaꞌanihi mangka?” 6Kotuꞌuana, nobahaꞌmo hi Yesu hapo to hingkiꞌ Nowali. Nopeꞌitanoki hatoꞌo pe hi Pilipu, alaꞌ Nopampeꞌelei pekirina hi Pilipu.
7Notiꞌi hi Pilipu, “Kehapoꞌi ronatu doiꞌ peraꞌ#6:7 ronatu doiꞌ peraꞌ: Ihaꞌna hibali hante horoina toaꞌ ane majama ronatu ando. topopehili pangka hei topaꞌanikihi lekiꞌ-lekiꞌna toaꞌ, hawaꞌi hingkiꞌ ganaꞌ kehapoꞌi hangkiuꞌ-hangkiuꞌlu nipaꞌanikihi.”
8Uko katoꞌo, haduo ka topeguruNahi to nikokeneꞌi hi Andaria hampemomolona hi Simo Peturuꞌ, mantiꞌi, 9“Iseꞌe uwaꞌ haduo oꞌanaꞌ to mebaku limo onu depa hei rombaꞌa bouꞌ, angkana hapomoreꞌi podumbuꞌane i toaꞌ to woriꞌ hieꞌe?”
10Notiꞌi hi Yesu, “Irumbaꞌmohi mahura!” Mahuramohi mpuꞌu i womboꞌ kora. Koworiꞌra toaꞌ tiꞌo, kira-kira limo sabu tomaꞌani.#6:10 kira-kira limo sabu tomaꞌani hawaꞌi niꞌihaꞌ towoweꞌe hante oꞌana. Mat. 14:21. 11Uko katoꞌo, noroamo hi Yesu depa hante bouꞌ tiꞌo, Nopekokaeki, Nopaꞌanikimohi topeguruNa hingkeꞌna rodolaꞌ-dolaꞌi pe toaꞌ to woriꞌ to kolentuꞌara mahura. Mangkamohi lekiꞌ-lekiꞌra wutehi wohu. 12Wohumohi lekiꞌ-lekiꞌra, notiꞌi hi Yesu pe topeguruNahi, “Irampukei lobine, hingkeꞌna hawaꞌi uwaꞌ to rotube.” 13Koꞌukonalu rorampu, melobi tene hampuluꞌ merobakuꞌ ka limo onu roti to roꞌoka toaꞌ to woriꞌ hingkenia.
14 #
Ul. 18:15-18
Koroꞌokinalu toaꞌ to woriꞌ tandaꞌ kuasaꞌ tiꞌo, mololitamohi haduo hei haduo, rotiꞌi, “Hangangaa Iomo nabi ngkodeꞌ to nopowute hi Musa hampiha, hingkiꞌ humei pe duniaꞌ” 15Mewaliꞌ, tungkaihara moparuku hi Yesu hingkeꞌna mewali datura. Konobahaꞌnalu hi Yesu tungkaihare, Io molaimo katoꞌo nolou mampohadoduo i biri.
Hi Yesu matengkaꞌ i womboꞌ uwai
(Mat. 14:22-33; Mrk. 6:45-52)
16Kononewamo, topeguruNahi munaꞌumohi nolou pe rano. 17Ando hingkiꞌ mentoriꞌmo, angkana hi Yesu hawaꞌi mehupaꞌ. Katoꞌo, meduangamohi nolou menonto bolaꞌ Kapenau. 18Kolentuꞌara meduanga, hupaꞌmo parowo to makaja, koꞌukoana mebalumba ngkodeꞌ. 19Komoꞌelara mobohe limo ba oni kilometeꞌ ka bota rano,#6:19 kokurauꞌna rano Galilea. 20 kilometeꞌ honiꞌi kokorobana 11 kilometeꞌ. roꞌokiꞌmo hi Yesu matengkaꞌ i womboꞌ uwai nolou mampohidupaꞌkihi. Morokaꞌmohi mpololeke, 20angkana notiꞌi hi Yesu, “Inioꞌkei morokaꞌ! Akulu hieꞌe.” 21Korohorinalu loaꞌNe, motanaꞌmohi mantorimo hi Yesu i duangara. I tempo tiꞌo woꞌo kaliuꞌmohi wute i bota rano to rotungkai.
Toaꞌ to woriꞌ mampaliꞌ hi Yesu
22Poꞌonina, woriꞌ toaꞌ i hanupe rano mampaliꞌ hi Yesu, rotiꞌi, “I imbomoꞌi hi Yesu? Io hawaꞌi meduanga moꞌawa-awa hante topeguruNa hiwinia. Hei hawaꞌi uwaꞌ duanga ntaniꞌne iseꞌe, ukonalu duanga to ropakeꞌ topeguruNa.” 23Uko tiꞌo, mehupaꞌmohi toaꞌ ka kota Tiberia hante duangara, hei mehorihi dodungku ikopangkahara toaꞌ to woriꞌ to mangkahi depa to nopekokaeki Pueꞌ Yesu. 24Korobahaꞌna toaꞌ to woriꞌ hi Yesu hante topeguruNahi hamboaꞌmohi uwaꞌ itoꞌo, meduangamohi woꞌo nolou pe bolaꞌ Kapenau mampaliꞌ hi Yesu.
Hi Yesu iomo pangka to mepaꞌani kotuwuꞌ
25Kowuteralu toaꞌ to woriꞌ i hanupe rano mampohidupaꞌkihi hi Yesu, ropeꞌitanoki, “Guru! Hiwaꞌimbo Ihupaꞌ?”
26Mehoniꞌ hi Yesu, “Tuꞌu mpololeke lolitangKu hieꞌe: Kubahaꞌ tungkaihami hinaꞌ humeiꞌAkei ipaliꞌ. IpaliꞌAkei alaꞌ wohumokei Kupopopangka, handoꞌio alaꞌ ibahaꞌkei palaihane tandaꞌ kuasaꞌ to Kuwali. 27Inioꞌkei majama mampaliꞌ pangka to hampihalaolu uko hei hantouꞌ wuhoni. Majamamokei mampaliꞌ pangka to hawaꞌi hohumbo wuhoni hei to mepaꞌani kotuwuꞌ to wolaꞌ to hawaꞌi mokoꞌukoa. Anaꞌ Manusiaꞌ to hingkiꞌ mampaꞌanikei pangka tiꞌo, alaꞌ Iomo to Noponiuꞌ Pueꞌ Ala.”
28Meꞌitanohi toaꞌ to woriꞌ, “Hapo to hangangaa kiwali hingkeꞌna waliangki motuntuni peleihana Pueꞌ Ala?”
29Notiꞌi hi Yesu, “Hieꞌemo to nolei Pueꞌ Ala hingkeꞌna iwalikei: mepoꞌohimokei pe Aku to Norumbaꞌ Pueꞌ Ala humei.”
30Iomo horiana rotiꞌi womo toaꞌ to woriꞌ, “Ane hatoꞌoꞌi, tandaꞌ kuasaꞌ hapo to Iponoꞌokiꞌkika, hingkeꞌna kipoꞌohiꞌi koka Pueꞌ AlaMa humei? Hapo to hingkiꞌ Iwali? 31#Kel. 16:15; Neh. 9:15; Mas. 78:24-25; 105:40Tododulunta hampiha mangkahi roti manna kolentuꞌara i pada lori, hibali to teꞌukiꞌ i lali Suraꞌ Mangkolehi: ‘Io mampaꞌanihi pangka to ka suruga.’ Ba ingko woꞌo hingkiꞌ mowali tandaꞌ kuasaꞌ to hatoꞌo?”
32Notiꞌi hi Yesu, “Kotuꞌuana handoꞌio nabi Musa to mepaꞌani pangka ka suruga. Hampalenareꞌi, UmoꞌKu to mampaꞌanihi pangka, hei Iomo to mampaꞌanikei pangka to tuꞌu-tuꞌu ka suruga. 33Pangka to nopaꞌanikikei Pueꞌ Ala, iomo Io to mengkohou humei ka suruga hei mampaꞌani kotuwuꞌ pe toaꞌ i duniaꞌ.”
34Rotiꞌi toaꞌ to woriꞌ, “Ane hatoꞌoꞌi, Ipaꞌanika woꞌo pangka tiꞌo ando-andona!”
35Notiꞌi hi Yesu, “Akumo hieꞌe#6:35 Akumo hieꞌe Walu mpiha hi Yesu mantiꞌi, “Akumo hieꞌe…” Basa 8:12, 9:5, 10:7, 10:9, 10:11, 14:6, 11:25, 15:1; Yoh. 4:26. pangka to mepaꞌani kotuwuꞌ. Himo to humei pe Aku hei mepoꞌohi, hamboaꞌmohi bilora hei hamboaꞌmohi mangkumaro wute nantolou-louna. 36Angkana, hibali to kutiꞌi hingkenia, kehapoꞌi iꞌokiꞌmokei tandaꞌ kuasaꞌ to Kuwali hingkenia, handoaꞌkei tene mepoꞌohi. 37Lekiꞌ-lekiꞌna toaꞌ to NopaꞌanikiꞌA UmoꞌKu, bateꞌna humei pe Aku. Hei himolu to humei pe Aku, bateꞌna Kutorimo hei hawaꞌi Kusapuaka. 38KohumeingKu ka suruga, hawaꞌA mowali peleihangKu hadoduongKu. HumeiꞌA mowali peleihana Pueꞌ Ala to morumbaꞌA. 39Hieꞌemo peleihaNe: hingkeꞌna ka lekiꞌ-lekiꞌna toaꞌ to NopaꞌanikiꞌA, hawaꞌi uwaꞌ howeꞌ haduo to moholi. Angkana Nokodokoꞌi hingkeꞌna Kupopeꞌarohi lekiꞌ-lekiꞌra ka komahia i ando pobutusi i koꞌukoana duniaꞌ. 40Hieꞌemo peleihane UmoꞌKu: hingkeꞌna hihimolu to pangkiꞌA hei mepoꞌohi pe Aku anaꞌNa, hingkiꞌ pahuahi kotuwuꞌ to wolaꞌ to hawaꞌi mokoꞌukoa, hei hingkiꞌ Kupopeꞌarohi i ando pobutusi i koꞌukoana duniaꞌ.”
41Uko katoꞌo, monau-naumohi tadulakore toYahudi, alaꞌ notiꞌi hi Yesu koꞌIonamo pangka to mengkohou humei ka suruga. 42Mololitamohi, rotiꞌi haduo hei haduo, “Hi Yesu tiꞌo handoꞌioreꞌi anaꞌnalu hi Yusuf? Tobahaꞌ mpololeke inoꞌNe hei umoꞌNe. Mahamporeꞌi hinaꞌ Notiꞌi koꞌIona ka suruga?”
43Notiꞌi hi Yesu, “Inioꞌmokei monau-nau.
44Hawaꞌi uwaꞌ haduo to wadi humei pe Aku, ane hawaꞌi nokomi UmoꞌKu to morumbaꞌA. Hei himolu to humei pe Aku, hingkiꞌ Kupopeꞌaro ka komahia i ando pobutusi i kotutuana duniaꞌ. 45I lali suraꞌ nabi-nabi hampiha teꞌukiꞌ waheꞌe: ‘Pueꞌ Ala hingkiꞌ mopaguru lekiꞌ-lekiꞌna topetuntuNa.’ (Yes. 54:13)
Mewaliꞌ, lekiꞌ-lekiꞌna toaꞌ to pahori hei mantorimo poturuꞌna UmoꞌKu, bateꞌna hingkiꞌ humeihi pe Aku. 46Inioꞌ ipekirikei uwaꞌhi to pangkiꞌ UmoꞌKu. Bateꞌnalu Aku to pangkiꞌo, alaꞌ Aku hupaꞌA ka Pueꞌ Ala. 47Tuꞌu mpololeke lolitangKa hieꞌe: himo to mepoꞌohi pe Aku, pahuahi kotuwuꞌ to wolaꞌ to hawaꞌi mokoꞌukoa. 48Akumo hieꞌe pangka to mepaꞌani kotuwuꞌ. 49Tododulumi hampiha i pada lori mangkahi roti manna, angkana tontoralu woꞌo mahi. 50Angkana hawaꞌi hibali hante pangka to mengkohou humei ka suruga. Himolu to mangka pangka hieꞌe, hawaꞌhi hingkiꞌ mahi. 51Akumo hieꞌe pangka to mengkohou humei ka suruga, pangka to mepaꞌani kotuwuꞌ pe toaꞌ! Himolu to mangka pangka hieꞌe hingkiꞌ pahuahi kotuwuꞌ to hawaꞌi mokoꞌukoa. Pangka ngkotuwuꞌ hieꞌe, palaihana wotangKu to Kupewei hingkeꞌna toaꞌ i duniaꞌ pahua kotuwuꞌ.”
52Korohorina toYahudi lolitane hi Yesu tiꞌo, mometonoi-tonoihi haduo hei haduo, rotiꞌi, “Hohumbo hinaꞌ Io wadi mampewei wotaNa pe ingkiꞌ hingkeꞌna toꞌokaꞌi?”
53Iomo horiana Notiꞌikihi, “Ipehoromuakei moromiꞌ-romiꞌ: ane hawaꞌkei iꞌoka wotane Anaꞌ Manusiaꞌ, hei hawaꞌkei iꞌinu raꞌaNe, hawaꞌkei hingkiꞌ pahua kotuwuꞌ wute nantolou-louna. 54Toaꞌ to mangka wotangKu hei maꞌinu raꞌangKu, hingkiꞌ pahuahi kotuwuꞌ to wolaꞌ to hawaꞌi mokoꞌukoa, hei hingkiꞌ Kupotuwuꞌhi ka komahia i ando pobutusi i koꞌukoana duniaꞌ. 55Alaꞌ wotangKu tuꞌu-tuꞌu mpuꞌu pangka, hei raꞌangKu tuꞌu-tuꞌu inua. 56Toaꞌ to mangka wotangKu hei maꞌinu raꞌangKu, hingkiꞌ mohaꞌanuhi nturusi hante Aku, hatoꞌo woꞌo Aku hante iohi.
57UmoꞌKu to morumbaꞌA, Iomo pongkane kotuwuꞌ, hei Aku tuwuꞌ ka Io. Hatoꞌo woꞌo toaꞌ to mangka wotangKu, pahuahi kotuwuꞌ ka Aku. 58Akumola to nipandiriꞌ pangka to mengkohou ka suruga. Pangka tiꞌo hawaꞌi hibali roti manna to roꞌoka tododulumi hampiha. Kehapomohi mangka roti manna tiꞌo, tontoralu mahihi. Angkana toaꞌ to mangka pangka hieꞌe, hingkiꞌ tuwuꞌhi wute nantolou-louna.”
59Hi Yesu mampowute lekiꞌ-lekiꞌna tiꞌo i tempona mepoturuꞌ i tambi penombaha i Kapenau.
Woriꞌ toaꞌ maꞌoruꞌ ka petuntura pe hi Yesu
60Korohorinalu topetuntuna lolitaNe, woriꞌhi to mantiꞌi, “Ee! Poturuꞌ tiꞌo madori rahi! Himoreꞌi to pobiaꞌ mampetuntui?”
61Angkana i laliNa nobahaꞌ hi Yesu ponau-naure topetuntuNa. Iomo horiana Notiꞌikihi, “Ba poturuꞌKu to ihorikei hingkenia mampomoledeꞌ pepoꞌohimi? 62Hohumbo pekirimi ane iꞌokiꞌkei intu Anaꞌ Manusiaꞌ mengkaꞌoreꞌ nolou pe peꞌohaꞌaNa to uluꞌ-uluꞌna? 63Komarohona toaꞌ hawaꞌi modumbuꞌ. Inohaꞌnamo Pueꞌ Ala to mepaꞌani kotuwuꞌ. LolitangKu to Kupowutekikei mesuwu ka Inohaꞌna Pueꞌ Ala hei mepaꞌani kotuwuꞌ to hawaꞌi mokoꞌukoa. 64Angkana kehapoꞌi hatoꞌo, uwaꞌ mpuꞌu hantenaꞌ ka lumbumi to hawaꞌi mampoꞌohi.” Notiꞌi hi Yesu hatoꞌo alaꞌ Nobahaꞌmo mpololeke ka uluꞌ-uluꞌna kohihimora to hawaꞌi hingkiꞌ mepoꞌohi pe Io, hei Nobahaꞌ woꞌo kohihimona to hingkiꞌ mampobaluꞌ wotaNa pe poniꞌNa. 65Notiꞌi womo hi Yesu, “Iomo horiana Kutiꞌi hingkenia, hawaꞌi uwaꞌ haduo to wadi humei pe Aku ane hawaꞌi nopoꞌioꞌ UmoꞌKu.”
66Mepongka i tempo tiꞌo, woriꞌmohi topetuntuNe to mampolihiꞌI. Hamboaꞌmohi hiniꞌ metuntu i Io.
Hi Peturuꞌ mampetotuꞌu lolitana hi Yesu mepaꞌani kotuwuꞌ
67Katoꞌo, hi Yesu meꞌitano womo pe topegurunahi to hampuluꞌ meroduo, Notiꞌi, “Ba hingkiꞌ ipolihiꞌAkei woꞌo?”
68Notiꞌi hi Simo Peturuꞌ, “Ane kipolihiKo Pueꞌ, pe hihimo kiꞌako? Ingkolu to mampasuwu lolita to mepaꞌani kotuwuꞌ to wolaꞌ wute nantolou-louna. 69Ingka, kipoꞌohimo hei kibahaꞌ koꞌIngkona Rumbaꞌa to Mangkolehi to ka Pueꞌ Ala.”
70Notiꞌi hi Yesu, “Akumo to moꞌuwiꞌkei to hampuluꞌ meroduo hieꞌe, angkana uwaꞌ haduo ka ingkei to kodake lalina hibali Belisiꞌ.” 71To notungkai hi Yesu iomo hi Yudas anaꞌna hi Simo Isikarioꞌ. Alaꞌ kehapoꞌi hi Yudas haduo to ka hampuluꞌ meroduo topeguruNa, iomo to hingkiꞌ mampobaluꞌ hi Yesu pe poniꞌNa.
Currently Selected:
Yohanes 6: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
