Lukas 21

Popenombana haduo tobembaꞌ to merima-rima

1I lali Tambina Pueꞌ Ala, hi Yesu pangkiꞌ haꞌumbora toaꞌ tosugiꞌ mokahi doiꞌra to woriꞌ pe lali petiꞌ pebolaꞌana doiꞌ popenomba. 2Noꞌokiꞌ woꞌo haduo towoweꞌe tobembaꞌ to merima-rima tuwuꞌna mokahi doiꞌ popenombana. To nopopekahi tiꞌo, rompepaꞌ doiꞌ see to hangkiuꞌlu ihaꞌne. 3Notiꞌi hi Yesu, “Ipehoromuakei to Kutiꞌi, tobembaꞌ to merima-rima tuwuꞌna hieꞌe, meliu kokodeꞌne popenombana ka popenombara lekiꞌ-lekiꞌna toaꞌ to ntaniꞌna, 4alaꞌ iohi mampeweihi ka lobina kosugiꞌara. Angkana towoweꞌe tiꞌo, kehapoꞌi merima-rima tuwuꞌne, angkana io mampewei lekiꞌ-lekiꞌna to uwaꞌ i io.”

Hi Yesu mampololita kohingkiꞌ mokerona Tambina Pueꞌ Ala

5I tempo tiꞌo, uwaꞌ haꞌumbora duo toaꞌ to mamperenaki komanobaꞌna tambina Pueꞌ Ala rotiꞌi, “Maranga mpuꞌu Tambine Pueꞌ Ala hieꞌe, alaꞌ nipomarangaiꞌi hante watu-watu to maranga hei parewa to ropopenomba pe Pueꞌ Ala.”

Katoꞌo notiꞌi Yesu, 6“Tuꞌu Tambine Pueꞌ Ala maranga. Angkana Kutiꞌikikei, hingkiꞌ hupaꞌ tempona, hawaꞌi hingkiꞌ uwaꞌ haꞌanu watu to melobi i pebolaꞌana hibali to iꞌokiꞌkei hinewoꞌena. Bateꞌna hingkiꞌ mokero lekiꞌ-lekiꞌne.”

Komasusa hante komaporiꞌ

7Uko tiꞌo, meꞌitanomohi topeguruNe pe hi Yesu rotiꞌi, “Guru, hiwaꞌimbo pewaliane to Itiꞌi hingkeꞌenia? Hei tandaꞌ hapo to hingkiꞌ mewali ane wutemoꞌi i tempo Pewaliana?”

8Notiꞌi hi Yesu, “Majaga-jagakei, hingkeꞌna hawaꞌkei nipowewoꞌ, alaꞌ woriꞌ toaꞌ hingkiꞌ hupaꞌ hei mantiꞌi koꞌioramo mpuꞌu Datu Topohompoꞌ hei ando pebutusi dodungkumo. Angkana inioꞌkei ipoꞌohi. 9Ane pahorikei kareba tomagaru hante mpoponiꞌ, inioꞌkei motehuꞌ, alaꞌ lekiꞌ-lekiꞌna tiꞌo hangangaa mewali dulu, angkana hawaꞌi mopalaiha koꞌukoanamo duniaꞌ.”

10Katoꞌo, nopololiumo hi Yesu lolitaNe notiꞌi, “I tempo tiꞌo, toharoboꞌ hingkiꞌ moponiꞌ moꞌewa roboꞌ ntaniꞌna hante kodatua to haꞌanu hingkiꞌ moꞌewa kodatua to haꞌanuna. 11I umbolu hingkiꞌ uwaꞌ luanoko to makaja, hakiꞌ hante kobiloraha. Hei hingkiꞌ mewali woꞌo tandaꞌ i laniꞌ to mekototehuꞌi. 12Angkana handoaꞌi tene mewali tiꞌo, ingkei hingkiꞌ nihokiꞌ hei nipoperima-rima. Hingkiꞌ nisalaꞌikei hei niparesaꞌkei i lali tambi-tambi penombaha hei nitarungkuꞌkei. Nokomi petuntumi pe Aku, hingkiꞌ niparukukei mehinaro pe datu hante pe topoparenta. 13Itoꞌomola koholangkoami mampowute noniuꞌ Kareba Moromiꞌ to ka Pueꞌ Ala. 14Inioꞌkei motehuꞌ hei komomaꞌa noniuꞌ hapo to hingkiꞌ itiꞌikei. 15Alaꞌ Aku hingkiꞌ mampaꞌanikei pehoniꞌmi to mononto alana hawaꞌi robiaꞌ poniꞌmi mohoniꞌ hapo to itiꞌikei. 16I tempo tiꞌo, hingkiꞌ nopobaluꞌkei tomotodimi, halalimi, hante awa-awami. Hei haꞌumbora duo ka lumbumi hingkiꞌ nirokoꞌ. 17Alaꞌ nokomi petuntumi pe Aku, hingkiꞌ nokabiriꞌkei lekiꞌ-lekiꞌna toaꞌ. 18Angkana hangkaru wilolu ka tutuꞌmi hawaꞌi hingkiꞌ moholi. 19Ane ingkei tontona mepoꞌohi hei sabaraꞌ, ingkei hingkiꞌ pahua kosalamaꞌa.”

Hi Yesu mampololita kohingkiꞌ mokerona kota Yerusale

20Nopololiu hi Yesu Notiꞌi, “Ane iꞌokiꞌkei Yerusale nolimbuꞌ surodadu ibahaꞌmokei kota tiꞌo hamboaꞌmo morue hingkiꞌ nikero. 21I tempo tiꞌo, toaꞌ to meꞌohaꞌ i Yudea, hangangaa mehilaihi nolou pe biri. Toaꞌ to i lali kota, hangangaa mehilaihi ka kota tiꞌo. Hei toaꞌ to i huwali kota, inioꞌhi mekahi pe lali kota. 22Alaꞌ i ando tiꞌo, hingkiꞌ mehupaꞌ ando pehukune Pueꞌ Ala i kota tiꞌo, hingkeꞌna tebuhoꞌimo lekiꞌ-lekiꞌna to teꞌukiꞌ i lali Suraꞌ Mangkolehi. 23Hingkiꞌ maporiꞌ mpuꞌu tuwuꞌre towoweꞌe to kolentuꞌana mohinonaꞌi hei inoꞌ to mampoꞌomiꞌ anaꞌra. Alaꞌ i tempo tiꞌo toaꞌ hingkiꞌ maporiꞌhi mpololeke hei Pueꞌ Ala hingkiꞌ mohuku roboꞌ hieꞌe. 24Uwaꞌ to hingkiꞌ nirokoꞌ hante piho, uwaꞌhi woꞌo to hingkiꞌ nikomi mewali to nitawaniꞌ pe bolaꞌ-bolaꞌna toaꞌ, hei toaꞌ-toaꞌ tota pobahaꞌ Pueꞌ Ala hingkiꞌ mopariwoiꞌ Yerusale wute uko tempo to Nopokononto Pueꞌ pe iohi.”

Kohupaꞌna huliꞌ Anaꞌ Manusiaꞌ

25“I ando, i wula hei i betueꞌ, hingkiꞌ uwaꞌ tandaꞌ-tandaꞌ to mepohele. Lekiꞌ-lekiꞌna toaꞌ i duniaꞌ, hingkiꞌ motehuꞌ hei wulihi pangkiꞌ balumba tahiꞌ hante pahori pewoona tahiꞌ. 26Alaꞌ komotehuꞌra pangkiꞌ lekiꞌ-lekiꞌna to mewali i humanele duniaꞌ, uwaꞌhi toaꞌ to hingkiꞌ molimpu, alaꞌ to makuasaꞌ i raoha hingkiꞌ mokawewoꞌ. 27I tempo tiꞌo, toaꞌ hingkiꞌ pangkiꞌ Anaꞌ Manusiaꞌ mehupaꞌ noputuꞌ kini hante kuasaꞌ to manobaꞌ. 28Ane mepongkamoꞌi tiꞌo mewali, meꞌaromokei hei ipatimomokei lalimi, alaꞌ hupaꞌmoꞌi kosalamaꞌa.”

Pandiriꞌ noniuꞌ i loti ara

29Hi Yesu mampowute lolita pandiriꞌ hieꞌe pe topeguruNa notiꞌi, “Ipoꞌilalikei loti ara hante loti-loti ntaniꞌna. 30Ane iꞌokiꞌkei daꞌane motimbeꞌ ba motaweꞌ, ibahaꞌmokei kohingkiꞌ hupaꞌna tempo pokoꞌando. 31Watoꞌo woꞌo, ane iꞌokiꞌkei lekiꞌ-lekiꞌne to Kutiꞌikikei hingkeꞌenia, ibahaꞌmokei dodungkumo poparentane Pueꞌ Ala.

32Ibahaꞌmokei lekiꞌ-lekiꞌne tiꞌo hingkiꞌ mewali kolentuꞌana toaꞌ to tuwuꞌ hinewowoꞌena handoaꞌi mahi. 33Laniꞌ hante duniaꞌ hingkiꞌ moholi, angkana pohawaꞌKu tontona uwaꞌ wute nantolou-louna.”

Hangangaa matimomoki

34“Matimomokei anioꞌkei wewoꞌ hante posusaꞌ hei anioꞌkei maꞌinu to melolanu, ba mampekiri kotuwuꞌmi i duniaꞌ koꞌukoana lembeꞌkei, horiana hawaꞌkei timomo i ando pehupaꞌNa to hangkaꞌ-hangkaꞌ, 35alaꞌ ando tiꞌo hingkiꞌ mehupaꞌ hangkaꞌ-hangkaꞌ pe toaꞌ to i womboꞌ duniaꞌ hieꞌe hibali torobumbu to mopangku hangkaꞌ-hangkaꞌ. 36Matimomomo hei mekokaekei pe Pueꞌ Ala, hingkeꞌna himpolohoꞌkei ka lekiꞌ-lekiꞌna komaporiꞌ to hingkiꞌ mewali, hei hingkeꞌna ibiaꞌkei metotiꞌi mehinaro pe Anaꞌ Manusiaꞌ niparesaꞌ.”

37Ane andoꞌi, hi Yesu mepoturuꞌ i Tambina Pueꞌ Ala. Ane winiꞌi, Io nolou mohamini i huwali kota i Biri Saitu. 38Hampihoꞌolu-hampihoꞌolu woriꞌ toaꞌ morampu i Tambina Pueꞌ Ala hingkiꞌ mampehoromua pepoturuꞌNa.

Currently Selected:

Lukas 21: LAILJE

Highlight

Copy