Lukas 22
22
Poliwo hingkiꞌ morokoꞌ hi Yesu
1Hamboaꞌmo morue hingkiꞌ mehupaꞌ ando ngkodeꞌ toYahudi to nikokeneꞌi Posusaꞌa roti to hawaꞌi niragiꞌi ba to nikokeneꞌi woꞌo ando Posusaꞌ Pokalintora toYahudi.#22:1 Pokalintora toYahudi, iomo: Mamponindi kohimpolohoꞌara toSaraeli ka konipohawiꞌra i woiꞌ Masiri. 2I tempo tiꞌo, tutuꞌ tadulako-tadulako mpenomba hante guru-guru agama mampaliꞌhi lala hingkiꞌ morokoꞌ hi Yesu hante ngkawowuni, alaꞌ motehuꞌhi ka toaꞌ woriꞌ.
Hi Yudas hingkiꞌ mapobaluꞌ hi Yesu
3Haduo ka topeguruna hi Yesu to hampuluꞌ meroduohi konaꞌna hi Yudas, to nikokeneꞌi woꞌo hi Iskarioꞌ, nokeloi Belisiꞌ. 4Io nolou pe tutuꞌ tadulako-tadulako mpenomba hante tutuꞌ-tutuꞌ topampodaꞌ Tambina Pueꞌ Ala mampetiꞌiki tungkaihana hingkiꞌ mampobaluꞌ hi Yesu pe iohi. 5Motanaꞌhi mpololeke pahori tungkaihana hi Yudas, io horiana hampekokirihi hingkiꞌ mampaꞌanihi doiꞌ pe hi Yudas. 6Nopoioꞌmo hi Yudas lolitare, mepongka katoꞌo mampaliꞌmo koholangkoa to moromiꞌ hingkiꞌ mampewei hi Yesu pe iohi hante hawaꞌi nobahaꞌ toaꞌ woriꞌ.
Pampantimomo hingkiꞌ mangka Pokalintora
7Hupaꞌmo tempona ando Posusaꞌ roti tota niragiꞌi, iomo ando to nipokodeꞌ to niporokoꞌki gimba i posusaꞌ pokalintora. 8Katoꞌo hi Yesu morumbaꞌmo hi Peturuꞌ hante hi Yohanes notiꞌi, “Noloumokei, ipatimomomokei pangka posusaꞌ Pokalintora toYahudi to hingkiꞌ toꞌoka.”
9Meꞌitanohi, “I imbo peleihaMa kipampatimomoꞌi?”
10Notiꞌi hi Yesu, “Ane mekahikei pe kota, hingkiꞌ mampohidupaꞌkikei haduo to mangkomi lawu to moꞌohi uwai. Ituntunimokei pe lali tambi to nopekahii, 11hei itiꞌikikei pe tumpu tambi tiꞌo, ‘Gurungki meꞌitano pe ingkei i umbo peꞌohaꞌangKu moꞌawa hante topegurungKu hingkiꞌ mangka Pokalintora toYahudi?’ 12Katoꞌo tumpu tambi tiꞌo mampatidoꞌkikei iomo peꞌohaꞌa to i womboꞌ liaꞌ holangko hei maganaꞌ-ganaꞌmo, itoꞌomokei mampatimomono.”
13Katoꞌo noloumohi mpuꞌu, rohua hibali to notiꞌikihi hi Yesu pe iohi. Katoꞌo iohi mampatimomomohi mpuꞌu Pokalintora toYahudi.
Pampokononto susaꞌ Pokalintora
14Wutemo tempora mangka Pokalintora toYahudi, mahuramo hi Yesu hante topeguruNa. 15Notiꞌi hi Yesu pe iohi, “Kodeꞌ kopundangKa mangka Pokalintora toYahudi hieꞌe moꞌawa-awa hante ingkei, kolentuꞌangKu tene handoaꞌi mampolala komaporiꞌ. 16Kutiꞌikikei, Aku hieꞌe hamboaꞌmoꞌA hingkiꞌ mangka Pokalintora toYahudi, wute poparentana Pueꞌ Ala tebuhoꞌi.”
17Uko tiꞌo, hi Yesu moroamo haꞌanu paꞌinua to moꞌohi anggoroꞌ hei mekokae mampowute poꞌawerasiꞌ notiꞌi, “Irodiꞌmo hei idolaꞌ-dolaꞌmokei. 18Kutiꞌikikei mepongka hinewowoꞌena, hamboaꞌmoꞌA hingkiꞌ maꞌinu anggoroꞌ wute poparentana Pueꞌ Ala mehupaꞌ.”
19Katoꞌo hi Yesu moroa roti hei moꞌawerasiꞌ, mokebiꞌ-kebiꞌ roti Nopepaꞌaniki pe iohi, Notiꞌi, “Hieꞌemola potukaꞌ wotangKu to nipewei pe ingkei, i piha-pihana iꞌokakei mewali pekolowoimi pe Aku.” 20Koꞌukonalu mangka, Io moroa paꞌinua to moꞌohi anggoroꞌ hei Notiꞌi, “Anggoroꞌ hieꞌe iomo podandia wolaꞌ ka Pueꞌ Ala hante raꞌangKu, to nibobomo pe ingkei. 21Angkana inioꞌkei hoko, toaꞌ to hingkiꞌ mampeweiꞌA uwaꞌlu moꞌawa hante Aku i meja hieꞌe. 22Anaꞌ Manusiaꞌ hangangaa mahi hibali to nipokonontomo, angkana horewuꞌmo toaꞌ to mampobaluꞌA!”
23Mepongka katoꞌo momehoniꞌ-honiꞌhi, ba himoꞌi ka lumbure to hingkiꞌ mowalia to kodake hibali tiꞌo.
Himo to masipatoꞌ mewali to kodeꞌ
24Mewalimo pemehoniꞌ-honiꞌara topeguruna hi Yesu, hihimo to masipatoꞌ mewali to kodeꞌ i lumbura. 25Notiꞌi hi Yesu pe iohi, “Datu-datu tota pebahaꞌ pe Pueꞌ moparentahi hante peleihara, hantaro dokoꞌhi niwowoi datu to moromiꞌ. 26Angkana ingkei, inioꞌkei watoꞌo! Hihimo to dokoꞌ mewali to kodeꞌ, hangangaa mewali to nipoꞌiwowoiꞌ. Hei toaꞌ topohawaꞌ hangangaa mewali dulu hibali haduo hawiꞌ. 27Mewaliꞌ, hihimo to niꞌadaꞌio, to mahura mangka, ba to melora? Haꞌioreꞌi, to mahura mangka? Angkana Aku uwaꞌ i lumbu-lumbumi mewali hibali to melora.
28Ingkeimola tota mampolihiꞌA i tempoku mampolala komaporiꞌ. 29Alaꞌ tiꞌo Aku mampaꞌanikei kodatua, hibali woꞌo UmoꞌKu mampaꞌaniꞌA kodatua. 30Ingkei hingkiꞌ mangka maꞌinu i meja moꞌawa hante Aku i lali kodatuangKu, hei ingkei hingkiꞌ mahura i womboꞌ kodatua mobutusi hampuluꞌ meroroboꞌ toSaraeli.”
Hi Yesu mampololita pesapuakana hi Peturuꞌ
31Notiꞌi hi Yesu pe hi Simo, “Simo, Simo, pehoromuaꞌi! Belisiꞌ nipaꞌanimo koholangkoa mohohongkeꞌkei hingkiꞌ mampohidakei ka Aku hibali haduo to mantopihi mampohida kolopaꞌ kina. 32Angkana Kupekokaekiko hingkeꞌna pepoꞌohimu nioꞌ mateweꞌ. Hei ane mahuliꞌmoko pe Aku, ipokarohohi woꞌo halali-halalimahi.”
33Mehoniꞌ hi Peturuꞌ, “Pueꞌ, timomoluꞌa nitarungkuꞌ hei mahi moꞌawa hante Ingko!”
34Angkana notiꞌi hi Yesu, “Peturuꞌ, ando hieꞌe handoaꞌi metantoroꞌouoꞌ manuꞌo, tolu mpihamoko intu mosapuakaꞌA, hantaro ibahaꞌluꞌA.”
Dompeꞌ hante piho
35Notiꞌi hi Yesu pe topeguruNa, “I tempomi Kurumbaꞌ hawaꞌkei mangkomi dompeꞌ, baku ba sanalaꞌmi, angkana uwaꞌreꞌi komakuraꞌmio?”
36Mehoniꞌhi, “Hawaꞌi uwaꞌ.”
Notiꞌi hi Yesu, “Angkana hinewowoꞌena, hihimo to uwaꞌ doiꞌna nokomimolu hei hihimo tota uwaꞌ pihona hangangaa io mobaluꞌ baduꞌna nopopehili piho. 37Kutiꞌikikei, ohina Boo Mangkolehi hangangaa nipobuhoꞌi pe Aku, ‘Io hingkiꞌ teꞌihaꞌ i iliꞌna toaꞌ to meꞌewa alaꞌ hapo to teꞌukiꞌ noniuꞌ Aku nipobuhoꞌimo.’ ”
38Rotiꞌi topeguruNe, “Pueꞌ, hieꞌemo piho meromato.”
Mehoniꞌ hi Yesu, “Tiꞌo ganaꞌmo.”
Hi Yesu mekokae i Biri Saitu
39Katoꞌo hi Yesu molai ka kota. Hibali biasana Io nolou pe Biri Saitu hei topeguruNa woꞌo metuntuhi. 40Kowuteralu i peꞌohaꞌa tiꞌo Notiꞌi pe iohi, “Mekokaekei hingkeꞌna nioꞌkei nihohongkeꞌ.” 41Uko tiꞌo, Io mampohida ka topeguruNahi wora halubaꞌa komoꞌelane, honiꞌi Io melingkotuꞌ mekokae Notiꞌi, 42“UmoꞌKu, ane hiniꞌKo iroamo komaporiꞌ hieꞌe ka Aku angkana handoꞌio peleihangKu sangadina peleihaMu to mewalio” 43Katoꞌo mehupaꞌ malaꞌeka ka laniꞌ mampopemombaha wotana, hei mepaꞌani roho pe hi Yesu. 44Hi Yesu maporiꞌ mpololeke laline hei Io tuꞌu-tuꞌu mpuꞌu mekokae, holemuꞌNa hibali raꞌa to tidoꞌ pe woiꞌ. 45Katoꞌo Io metotiꞌimo hei mahuliꞌ pe topeguruNa, hei Nohuahi kolentuꞌaralu leꞌo alaꞌ masusahi. 46Notiꞌikihi, “Mahamporeꞌi hinaꞌ toturulukei? Peꞌarokei hei mekokaemokei, hingkeꞌna hawaꞌkei nihohongkeꞌi.”
Hi Yesu nihokiꞌ
47Kolentuꞌana tene hi Yesu mololita, mehupaꞌmo harombonga toaꞌ to woriꞌ to nopoduluki hi Yudas haduo ka topeguruna hi Yesu. Katoꞌo hi Yudas liu ako moꞌumaꞌI. 48Notiꞌi hi Yesu pe io, “Yudas, mahamporeꞌi hinaꞌ mampobaluꞌko Anaꞌ Manusiaꞌ hante peꞌoꞌumaꞌ?”
49Koroꞌokiꞌnalu topeguruNahi hapo to hingkiꞌ mewali, rotiꞌi, “Pueꞌ, hohumbo? Kiꞌewamohi hante piho?”
50Katoꞌo, haduo ka topeguruNa liu moꞌewa hawiꞌna tadulako mpenomba ngkodeꞌ hante piho horiana noniuꞌ tolina kuanane liu mopudiꞌ. 51Katoꞌo notiꞌi hi Yesu, “Hingkoreimo”. Honiꞌi Nopalaꞌ tolinane toaꞌ tiꞌo liu moꞌoriꞌ.
52Uko tiꞌo, hi Yesu mampatiꞌikihi tutuꞌ tadulako-tadulako mpenomba hante tadulako-tadulako topampodaꞌ Tambina Pueꞌ Ala hei tomotodi-tomotodi toYahudi to mehupaꞌ mohokiꞌI, Notiꞌi, “Ba ipekirikei Aku hieꞌe to kodakeꞌA, hinaꞌ ipangkomikiꞌAkei piho hante petotuꞌ? 53Ando-andona moꞌawaꞌA ingkei i lali Tambina Pueꞌ Ala, haporeꞌi hinaꞌ hawaꞌAkei ihokiꞌmo. Hieꞌemo tempone Belisiꞌ makuasaꞌ, hei hieꞌemo koholangkoami!”
Hi Peturuꞌ mosapuaka hi Yesu
54Katoꞌo hi Yesu nihokiꞌ hante nikomi pe tambina Tadulako Mpenomba Ngkodeꞌ hei hi Peturuꞌ metuntu mengkomoꞌelalu. 55I tanobaꞌa tambi tiꞌo, uwaꞌhi haꞌumbora duo toaꞌ to mampatuwuꞌ api ropanirui mantuleliꞌ. Hi Peturuꞌ mahuramo woꞌo moꞌawa-awa hante iohi maniru. 56Haduo towoweꞌe to majama i tambina Tadulako Mpenomba Ngkodeꞌ pangkiꞌ hi Peturuꞌ kolentuꞌana maniru. Nopomoꞌoꞌele honiꞌi notiꞌi, “Toaꞌ hieꞌe uwaꞌ moꞌawa-awa hante hi Yesu hingkeꞌenia!”
57Angkana hi Peturuꞌ mesapu notiꞌi, “Toaꞌ tiꞌo hawaꞌi kubahaꞌki!”
58Hawaꞌi morue uko tiꞌo, uwaꞌ womo to moꞌitonoi hi Peturuꞌ notiꞌi, “Ingko woꞌo haduo aware?”
Angkana hi Peturuꞌ mehoniꞌ, “Aa, handoꞌiokae aku!”
59Ba hajaaꞌi uko tiꞌo uwaꞌ womo haduo mantiꞌi, “Tuꞌu, toaꞌ hieꞌe topetuntuna hi Yesu, alaꞌ io woꞌo toaꞌ toGalilea.”
60Angkana hi Peturuꞌ mehoniꞌ, “Hawaꞌi kubahaꞌ hapo to itiꞌi tiꞌo!”
Kolentuꞌana hi Peturuꞌ mololita, mentaroꞌoꞌuoꞌmo manuꞌno, 61Hei mehahiliꞌmo hi Yesu mampenotoꞌ hi Peturuꞌ. I tempo tiꞌo, noponindimo hi Peturuꞌ lolitane Pueꞌ to mantiꞌi, “Ikohandoaꞌana tene mentaroꞌoꞌuoꞌ manuꞌ, tolu mpihamoko hingkiꞌ mosapuakaꞌA.” 62Katoꞌo molai hi Peturuꞌ pe huwali ako meꞌola alaꞌ hanondoihaꞌi mpololeke.
Hi Yesu nipopoꞌioꞌio hante nikondo
63Toaꞌ to mampoꞌodaꞌ hi Yesu mampopoꞌioꞌioꞌI hante rokondo. 64Rotutuꞌi mataNe hei meꞌitanohi, himo to mokondoKo! 65Hei woriꞌ mampopengaa lolita to kodake rotiꞌikiꞌI.
Hi Yesu i hinarona tadulako topotiko lala agama.
66Poꞌonina mehoꞌolu lekiꞌ-lekiꞌna tutuꞌ tadulako-tadulako mpenomba hei guru-guru agama hante tomotodira toYahudi morampumohi i Tambi Peparesaꞌa Ngkodeꞌ Agama toYahudi, hei hi Yesu nikomi pe hinarora. 67Rotiꞌi tadulako tiꞌo pe hi Yesu, “Itiꞌikika hinewowoꞌena, ba Ingko mpuꞌu Datu Topohompoꞌ?”
Mehoniꞌ hi Yesu, “Kehapoꞌi Kutiꞌikikei, bateꞌna hawaꞌkei ipoꞌohi. 68Hei ane meꞌitanoꞌA pe ingkei, bateꞌna hawaꞌAkei hingkiꞌ ihoniꞌ. 69Angkana mepongka hinewowoꞌena Anaꞌ Manusiaꞌ hingkiꞌ mahura i tinaꞌ kuanana Pueꞌ Ala to makuasaꞌ.”
70Rotiꞌi pe hi Yesu, “Ane watoꞌoꞌi Ingko hieꞌe Anaꞌnako Pueꞌ Ala?”
Mehoniꞌ hi Yesu, “Ingkei hadoduomi mantiꞌi koꞌakuna Anaꞌne Pueꞌ Ala.”
71Katoꞌo rotiꞌi, “Hampoliꞌmo uwaꞌ sabiꞌ tohorimo Io hadoduona mantiꞌi!”
Currently Selected:
Lukas 22: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
