Lukas 23
23
Hi Yesu i hinarona hi Pilatu
1Uko tiꞌo, noloumohi lekiꞌ-lekiꞌna tadulako tiꞌo hei mangkomi hi Yesu pe hinarona hi Pilatu. 2Kohupaꞌralu itoꞌo, ropepongkamo mosalaꞌi hi Yesu rotiꞌi, “Kihua toaꞌ hieꞌe mampowewoꞌ toaꞌ hante mampoturuꞌ toaꞌ to woriꞌ, hingkeꞌna anioꞌhi mobaiari sima pe datunta i Roma. Hei Notiꞌi woꞌo Io haduo Datu to nikokeneꞌi Kerisitu.”
3Katoꞌo, meꞌitanomo hi Pilatu pe hi Yesu notiꞌi, “Ingkoreꞌi dature toYahudi?”
Mehoniꞌ hi Yesu, “Ingko hadoduomu to mantiꞌi.”
4Katoꞌo, notiꞌi hi Pilatu pe tutuꞌ tadulako-tadulako mpenomba hante pe toaꞌ to woriꞌ, “Hawaꞌi kuhua salaꞌne toaꞌ hieꞌe.”
5Angkana ropokaroho pesalaꞌire pe Io, rotiꞌi, “Io mampoturuꞌ toaꞌ hingkeꞌna meꞌewahi, horiana woriꞌhi to metuntu pe Io mepongka ka woiꞌ Yudea wute i woiꞌ Galilea alana wute iseꞌe.”
6Konohorinalu hi Pilatu lolitare tiꞌo, notonoihi, “Ba toGalilearope Toaꞌ hieꞌe?”
7Mehoniꞌhi, “Ioꞌ toGalilea.” Konohorinalu pehoniꞌre, io morumbaꞌmo toaꞌ mangkomi hi Yesu nolou pe Herode, alaꞌ Herode iomo gubenuru to moparenta i woiꞌ Galilea. I tempo tiꞌo woꞌo, Herode kolentuꞌana uwaꞌ i Yerusale.
Hi Yesu i hinarona datu Herode
8Motanaꞌ mpololeke Herode pangkiꞌ hi Yesu, alaꞌ moruemoꞌi dokoꞌ pangkiꞌ hi Yesu, hei moruemo nohori lolitane toaꞌ noniuꞌ Io, hei nopohinaru woꞌo hingkeꞌna Notidoꞌkiꞌi halangkaꞌ tandaꞌ kuasaꞌ to mepohele. 9Iomo hinaꞌ Herode mampowutemo woriꞌ langkaꞌ peꞌitano pe hi Yesu, angkana hawaꞌi mehoniꞌ. 10Uwaꞌhi woꞌo itoꞌo tutuꞌ tadulako-tadulako mpenomba hante guru-guru mpepoꞌohi to mosalaꞌi mpololeke hi Yesu i hinarona Herode. 11Datu Herode hante surodaduna mampopoꞌioꞌiomo hi Yesu hei mampononaꞌaꞌI. Hi Yesu robaduꞌi baduꞌ kodatua, hei rokomi huliꞌ pe hi Pilatu. 12I ando tiꞌo, Herode hante hi Pilatu mewalihi mobole, hantaro hampiha momekabiriꞌhi.
Hi Yesu nikomi huliꞌ pe hinarona hi Pilatu
13Katoꞌo, hi Pilatu morampu womo lekiꞌ-lekiꞌna tutuꞌ tadulako-tadulako mpenomba hante tomotodi-tomotodi bolaꞌ hei toaꞌ to woriꞌ, 14honiꞌi notiꞌikihi, “Toaꞌ hieꞌe ikomi womokei huliꞌ humei pe aku, hei itiꞌikei Io to moꞌoꞌaloꞌ toaꞌ to woriꞌ hingkeꞌna moꞌewa poparentaku. Ando hieꞌe kuparesaꞌmo i hinaromi, angkana hawaꞌi kuhua halangkaꞌ waliaNe to kodake hibali to isalaꞌikikei. 15Watoꞌo woꞌo pahuane Herode, hinaꞌ nopopahuliꞌlu humei pe aku. Toaꞌ hieꞌe hawaꞌi mowali hapo to masipatoꞌ nipahukuikiꞌI mahi. 16Mewaliꞌ, hingkiꞌ kurumbaꞌlu toaꞌ molabehiꞌ honiꞌi kupolohoꞌ.”
17Hi Pilatu mantiꞌi hatoꞌo alaꞌ i tempo posusaꞌ Pokalintora toYahudi, hi Pilatu hangangaa mampolohoꞌ haduo toaꞌ to nitarungkuꞌ, hintotoꞌ hante perapiꞌra toaꞌ to woriꞌ.
18Ikorohorina toaꞌ to woriꞌ lolitane, moloaꞌ-loaꞌmohi mantiꞌi, “Io hangangaa nirokoꞌ! Hi Baraba nipolohoꞌ!” (19Hi Baraba tiꞌo, nitarungkuꞌ alaꞌ perorokoꞌna hei peꞌewana i lali kota.) 20Hi Pilatu mololita tene hampiha hante loaꞌ to kodeꞌ pe toaꞌ to woriꞌ alaꞌ io dokoꞌi mampolohoꞌ hi Yesu. 21Angkana toaꞌ to woriꞌ moloaꞌhi mantiꞌi, “Pakumoꞌi i loti momehulepe! Pakumoꞌi i loti momehulepe!” 22Ikotolu mpihana, hi Pilatu mampatiꞌikihi, “Haporeꞌi salaꞌNe? Howeꞌlu halangkaꞌ salaꞌNe to hintotoꞌ nipahukuikiꞌI wute mahi hawaꞌi uwaꞌ kuhua, mewaliꞌ kulabehiꞌlu honiꞌi kupolohoꞌ.”
23Angkana toaꞌ to woriꞌ tiꞌo roperukuilu perapiꞌre hingkeꞌna hi Yesu nipaku i loti momehulepe. Koꞌukoana penanihi. 24-25Katoꞌo hi Pilatu mobutusimo hingkeꞌna hi Yesu nihuku mahi angkana hi Baraba nipolohoꞌkihi motuntuni perapiꞌra. Uko tiꞌo, io mampeweimo hi Yesu pe iohi hingkeꞌna ropopoꞌioꞌioꞌI motuntuni peleira.
Hi Yesu nipaku i loti momehulepe
26Katoꞌo, surodadu toRoma mangkomimohi hi Yesu molai ka kota, hei i lumbu lala mampohidupaꞌkihi haduo toaꞌ to mekahi pe kota iomo to nikokeneꞌi hi Simo toKirene. Hi simo roparuku mangkowaꞌ loti momehulepe metuntu i tunduna hi Yesu. 27Woriꞌ toaꞌ to motuntuni hi Yesu, uwaꞌhi woꞌo towoweꞌe to metuntu mampeꞌoloniꞌI. 28Angkana hi Yesu mehahiliꞌ pe iohi hei mantiꞌi, “InioꞌAkei ipeꞌoloni. Agina ipeꞌolonikei wotami hadoduomi hante anaꞌmi. 29Alaꞌ hingkiꞌ uwaꞌ tempone toaꞌ mantiꞌi, ‘Morasiꞌhi towoweꞌe to lalo hei tota kahampiha mepoꞌomiꞌ!’ 30I tempo tiꞌo, toaꞌ hingkiꞌ mantiꞌi pe biri-biri, ‘Agina imongkohimoka hante woiꞌ!’ 31Ane toaꞌ mowali watoꞌo i loti to tuwuꞌ, hapona tene i loti to mobani.”#23:31 Wiharo Yunani palaihana Hingkoweꞌ toaꞌ to moromiꞌ waliana hibali Aku, pahua pehuku hapo tene toaꞌ to kodake waliana.
32Uwaꞌhi woꞌo roduo toaꞌ to kodake waliara to rokomi moꞌawa hante Io hingkiꞌ nihuku mahi. 33Kohupaꞌra i biri to nikokeneꞌi Biri Bangaꞌ rouꞌ, hi Yesu nipakumo i loti momehulepe moꞌawa hante roduo toaꞌ to kodake waliara. Haduo nipaku tinaꞌ i koanana hei haduo tinaꞌ i koiriNa. 34Hi Yesu mekokae, Notiꞌi, “Umoꞌ, Iꞌampunihi, alaꞌ hawaꞌi robahaꞌ hapo to rowali.”
Surodadu to mopaku hi Yesu mampoꞌuwaꞌhi pantidoꞌ hingkeꞌna mampokononto kohihimona to pahua jubaNe. 35Toaꞌ to woriꞌ mampeꞌele lekiꞌna tiꞌo. Uwaꞌhi woꞌo tadulakone toYahudi to mampononaꞌa hi Yesu hei mantiꞌi, “Elekei! Toaꞌ ntaniꞌna Nosulungi. Ane tuꞌu-tuꞌuꞌi Io Datu Topohompoꞌ to noꞌuwiꞌ Pueꞌ Ala, dehiluiae Noposalamaꞌi wotaNe hadoduoNa!” 36Surodadu woꞌo mampokokeniꞌa hi Yesu, hei mampaꞌani maꞌinu anggoroꞌ to moꞌinsu, 37rotiꞌi, “Ane tuꞌu-tuꞌuKo datura toYahudi, iposalamaꞌmo wotaMa!”
38I womboꞌ loti popakuaNa teꞌukiꞌ waheꞌe,
Hieꞌemo datune toYahudi.
39Haduo toaꞌ to kodake waliana to nipaku woꞌo i loti momehulepe i hiriNa, motaloleuꞌ hi Yesu, notiꞌi, “Itiꞌi Ingko Datu topohompoꞌ! Posalamaꞌmoꞌi wotaMa hante ingka!”
40Angkana to haduona mokamoroki awana, notiꞌi, “Mahamporeꞌi hinaꞌ mantiꞌiko hatoꞌo! Hawaꞌkoreꞌi motehuꞌ pe Pueꞌ Ala? Kehapoki nihuku mahi moꞌawa-awa hante Io, 41angkana ingkiꞌ masipatoꞌki nihuku mahi alaꞌ nokomi walianta to kodake, angkana Io, hawaꞌi uwaꞌ salaꞌNe.” 42Katoꞌo notiꞌi toaꞌ tiꞌo, “Yesu, Iponindiꞌa kaiaꞌ, ane mehupaꞌKo huliꞌ humei mewali Datu!”
43Notiꞌi hi Yesu, “Mepoꞌohimoko pe Aku, i ando hieꞌe, moꞌawako hante Aku i lali Paradesi.”
Hi Yesu mahi
44Tenteꞌ hampuluꞌ dua pohoꞌando, katoꞌo mokorindi i peꞌohaꞌa tiꞌo wute tenteꞌ tolu kononewa, 45alaꞌ ando hawaꞌi mewanta. Wida porindi Tambi to Mangkolehi mohepaꞌ merodolaꞌ. 46Hi Yesu meꞌoꞌando hante loaꞌ to kodeꞌ, “Umoꞌ, pe lali koraweMu kupetandoki kotuwuꞌKa” Koꞌukona mowiharo hatoꞌo, pudiꞌmo peꞌinohaꞌNe.
47Tadulako surodadu mampeꞌele hapo to mewali, io mampokodeꞌ Pueꞌ Ala, notiꞌi, “Tuꞌu toaꞌ hieꞌe toaꞌ tota masalaꞌ!”
48Toaꞌ woriꞌ to pangkiꞌ hapo to mewali tiꞌo, mahuliꞌmohi hante konohohoꞌ. 49Lekiꞌna toaꞌ to pobahaꞌ hi Yesu, tekahihi towoweꞌe to motuntuniꞌI ka Galilea, metotiꞌi ka moꞌela hei roꞌokiꞌ hapo to mewali tiꞌo.
Hi Yesu nitawu
50-51I tempo tiꞌo, uwaꞌ haduo tomaꞌani to nikokeneꞌi hi Yusuf to ka bolaꞌ Arimatea i woiꞌ Yudea. Hi Yusuf tiꞌo, iomo toaꞌ to moromiꞌ lalina hante mononto waliane. Moruemo mampekau kohupaꞌna poparentana Pueꞌ Ala. Io woꞌo haduo tadulako i Tambi Peparesaꞌa ngkodeꞌ pepoꞌohi toYahudi, angkana hawaꞌi noponiuꞌ pebutusire tadulako tiꞌo to mantiꞌi hi Yesu hangangaa nirokoꞌ. 52Ikomahina hi Yesu, noloumo hi Yusuf mampomehuaki hi Pilatu mamperapiꞌ wotana hi Yesu hingkeꞌna notawuꞌi. 53Uko tiꞌo, nopopengkohoumo wotane hi Yesu ka loti momehulepe, honiꞌi noputuꞌ hante wida to popuhiꞌ, hei noꞌuliꞌ i lali petowua to niwoloꞌ i biri watu. Petowua tiꞌo handoaꞌi tene kahampiha nipoꞌuliꞌi to mahi.
54Ando tiꞌo iomo ando Popatimomoa, alaꞌ poꞌonina ando penombaha. 55Hei towoweꞌe to mehupaꞌ moꞌawa hante hi Yesu ka Galilea, metuntuhi woꞌo mampeꞌele petowua tiꞌo hei hohumbo koniꞌuliꞌne hi Yesu i lali petowua. 56Uko tiꞌo, mahuliꞌmohi nolou pe bolaꞌ mampotimomo kobobau hante minyaꞌ-minyaꞌ to mewowau hingkiꞌ ropakeꞌ mobobohi wotana hi Yesu, angkana i ando penombaha hawaꞌhi majama motuntuni Aturana hi Musa.
Currently Selected:
Lukas 23: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
