LUKAS 15
15
Domba anu nolapus
(Mat. 18:12-14)
1 #
Luk. 5:29-30
Daagi' ko sansinaan, da'isan na anu topo tage hasin tiba to mia-mian anu osangka madi' ma'ima' nu mian da'isan, tinokamo mohongo i Yesus. 2To mia-mian Farisi ka' to gulu-gulu' agama mulaimo nompisala'i. Aha notatae, “Se', na mian aiya montalima to mia-mian anu madi' ma'ima', ka' aijo' mongkaanmo hingga-hinggat tiba aha!” 3Mokonyo sumo aijo' i Yesus nonsisikakonmo kantuangan aiya hi aha,
4“De ko samian anu itina' hi komiu daagi' ko sa'atu na domba, lantas nolapus na sa'angu' – apaa na tionyo nubau? Tantu nu pala'i na domba siompulu' ka' osio', aijo' i hemput padang, ka' mamba molio anu i nolapusmo sampe o humpak. 5Ka' de po'ule'mo nu humpak na domba aijo', ia sanangmo sahingga sinimbunyomo na domba aijo' i bikoangnyo, 6lantas binoanyomo ninsusule'. Ka' ilapas aijo' i laganyomo na to sanga-sangalunyo tiba anu mompaha ohani laigannyo ka' notatae, ‘Imbo' da kita balame-lame'. Dombangku anu inolapus po'ule'mo kinabotku!’ 7Jadi, sumo aitumo na i suluga' ko kalame'an anu daka' hondo kalana samian anu baladosa' binala tobatmo, nolingkuduimo anu siompulu' ka' osio', na mian anu na'ima'mo ka' madi'mo palalu balatobat.”
Doi anu nolapusmo
8“Kabai de samian na boune daagi' ko doi sampulu' na doi salaka, lantas nolapusmo na sambatu – apaa na anu tionyo nubau? Nututungi na sulu' ka' monsapui laigannyo ka' molio iyayamae sampe nu humpak na doinyo aijo'. 9Salatan i humpaknyomo na doi aijo', nu laganmo na to sanga-sangalunyo tiba anu mompaha ohani laigannyo, lantas notatae, ‘Aku sinanangmo hondo po'ule'mo i humpakku na doingku anu nolapusmo. Imbo' da kita balame-lame'!’ 10Sumo aitumo na malaekat nu Tumpu lame' de daagi' ko samian anu ma'idek balatobatmo i dosa-dosa'nyo. Palesayamo!”
Anak anu nolapusmo
11I Yesus po'ule' notatae, “Daagi' ko samian na tuuma anu ko anak mo'ane ua'aha. 12Anu tatampalui' notatae hi ia, ‘Papa, bee'akonmo mae uuka aiya na bahagianku nu kakaya'anto.’ Sahingga papanyo nombagimo kakaya'annyo hi ua-ua'aha na anaknyo. 13Madi' pinin lengkat i aitu pinobaluknyomo nu anak tatampalui' aijo' na pusaka' anu binagimo, ka' i namba i lipu' majo'on. I kiijo' mae ia nombeasakonmo doinyo ka' tumuu' moluluk. 14Salatan doinyo ningkotmo iwi-iwi' i lipu' aijo', tinokamo na tempo' nu ohop isongko-songko na lipu', sahingga ia nontampu'unimo kinasiasi. 15Lantas ia nambamo nongala tamboo hi samian na tumpu nu lipu' i kiijo', anu nompokau ia namba i ale' monjagai bau'nyo. 16Ia talalomo no'ohop, mompai isimo kompongnyo nu kaanon nu bau' haha aijo'. Mau ia talalomo no'ohop, madi' ko samian pe'e nombee'i kaanon hi ia. 17Kinahimpusannyo ia sininsumbu'mo ka' notatae, ‘To mia-mian anu mokalaja hi tuumangku molabi-labi na kaanonnyo, jo aku i aiya mompai patemo nu ohop! 18Aku molengkatmo ka' mamba hi tuumangku, ka' motatae hi ia: Papa, aku binala dosa'mo i ahop nu Tumpu ka' i ahop nu kita tuumangku. 19Madi'mo nukona na aku osanggohi anak nu kita tuuma. Sanggohimo mae na aku samian anu mongala tamboo hi kita Tuuma.’ 20Saba' ia nolengkat ka' ninsusule' hi tuumanyo.
Daagi' jo'o-jo'on aijo' mae i laigan, ia tinoamo nu tuumanyo. Liibos nu tuumanyo tahahumo, nopadeka' nonsingkaboti, lantas nontanggogoli ka' nongooki ia. 21‘Papa,’ tukoonyo nu anak aijo', ‘aku binala dosa'mo i ahop nu Tumpu tiba hi Papa. Madi'mo nukona na aku osanggohi anak i Papa.’ 22Panyo papanyo nolaga to poka-pokauhonnyo ka' notatae, ‘Lia-lia'! Alamae na baju' anu talalo ma'ima' ka' popusok hi ia. Posolutakon na sinsing i kangkamnyo, ka' sapatu i tengkenyo. 23Lapas atina' hakop na anak nu sapi' anu molompo' ka' kolot. Da kita mongkaan ka' balame-lame'. 24Kalana anakku aiya i natemo, aiya tinumuu'mo mule'; ia nolapusmo, uuka i humpakkumo mule'.’ Balo aha nombau bau-bauon.
25Hau-haunyo aijo' anak tumpe-tumpe daagi' kiijo' mae i ale'. Salatan ia ninsusule'mo ka' malia'mo toka i laigannyo i hongonyomo na onyi' nu musiik ka' anu monsalelei. 26I laganyomo na sala'samian pokauhon, lantas pinokilawanyomo, ‘Ko apaanyo na uutu i laigan?’ 27Pokauhon aijo' nontaami, ‘Utus ise' i Tuan ninsusule'mo mae! Ka' tuuma i Tuan noki kolotmo anak nu sapi' anu molompo', kalana po'ule'mo i humpaknyo na anaknyo ninsusule'mo mae ma'i-ma'ima'.’
28Anak tumpenyo aijo' pinusamo hondo, sahingga madi'mo mongka'oho' minsoop i laigan. Lantas tuumanyo nosabat ka' nongindeeko' da ia minsoop. 29Panyo ia notatae, ‘Notau-taunmo na kopinnyo aku nokalaja mate-matemo bau kapalaluan i Papa. Madi' toho' aku nonggagakon apaa na pinokauhakon i Papa. Yo apaamo na binee' i Papa hi belengku? Sa'angu' pe'e na mee' ma'isa toho' binee' i Papa hi belengku, da aku mombau bau-bauon tiba to sanga-sangalungku! 30Anak i Papa aitu nombeasakonmo kakaya'an i Papa tiba boune masala', panyo salatan ia ninsusule'mo mae, kita Tuuma nongkolotimo anak nu sapi' anu molompo' polame'akon ia!’ 31‘Anakku,’ tinaaman nu Papanyo, ‘beleyum saja' aiya tiba aku. Iwi-iwi' na anungku, aijo' suele beleyum na tumpunyo. 32Panyo kita tionyo mombau-bauon ka' balame-lame', kalana utusum ise' aijo' sinilakamo, panyo uuka po'ule'mo tinumuu'; ia nolapusmo, panyo uuka po'ule'mo kinabot.’ ”
Currently Selected:
LUKAS 15: LAILOE
Highlight
Share
Copy
Want to have your highlights saved across all your devices? Sign up or sign in
