LUKAS 14
14
I Yesus nompa'alin samian anu masakit
1Daagi' ko sansinaan i sinaa nu Sabat i Yesus namba nongkaan i laigan nu samian na tu'anyo nu mian Farisi. I kiijo' to mia-mian nompalahatikanmo i Yesus totu-totu'u. 2Ka' tinoka hi Yesus na samian anu masakit bele-bele tengke ka' limanyo bangkak. 3Lantas i Yesus nompokilawamo hi to gulu-gulu' agama tiba hi to mia-mian Farisi anu daagi' i kiijo', “De atulan nu agamanto, pa' timbali na kita nompa'alin mian masakit i sinaa nu Sabat kabai madi'?”
4Gulu-gulu' agama tiba to mia-mian Farisi aijo' ola nomohokot. Lantas i Yesus nolaga mian aijo' ka' nompa'alinakon ia, ilapas pinokaunyomo na aha da mambamo. 5#Mat. 12:11 Lapas aijo' i Yesus notatae hi to mia-mian, “Ande kata samian atina' hi komiu, ko samian na anak kabai ko sa'angu' na sapi' anu manabu' i bubung i sinaa nu Sabat, pa' ia madi' sampa' mohela' lia-lia' monsabatakon anak aijo' kabai sapi' aijo' i sinaa aijo' suele?”
6Panyo samian pe'e madi' ko anu moko ala nontaami Yesus mongkona han aijo'.
Ma'ima' na kinyonyoa ka' mongka'oho' mobagi
7I Yesus nontoa daagi' ko to mia-mian anu pinaso mongkaan mompile'i tampa-tampat anu talalo ma'ima'an. Sabab aijo' Ia nombee'i pokinde' aiya hi aha iwi-iwi'. 8#Ams. 25:6-7 “De komiu opaso i bau-bauon po'osoan, boli toka sumuhang i kadela anu o angga'i. Kalana boli-boli daagi' ko samian anu lebe o adati molingkudui beleyum singkona pinaso. 9Sahingga tumpu nu laigan anu nompaso komiu ohua' aijo', boli-boli toka hi komiu ohua' ka' motatae, ‘Tabea', tampat aiya pinotoukamo hi anu pinaso aijo'.’ Desumo aitu ma'ambangmo hondo na beleyum, sahingga tionyo ahi' mamba sumuhang i tampat anu talalo hondo i hikunyo. 10Kalana aijo', de komiu opaso, pile'i na tampat anu lebe i hikunyo, da tumpu nu laigan toka, ka' motataeje hi beleyum, ‘Sangalu, imbo' suhang i tampat anu lebe ma'ima'.’ Desumo aitu yo komiu o adati i ahop nu mian anu pinaso iwi-iwi' sangga'at. 11#Mat. 23:12, Luk. 18:14 Kalana batu-batu mian anu mohangkat butongnyo, tionyo otauhakon, panyo anu mongalukakon butongnyo o hangkat.”
12Lantas koonyo i Yesus hi tumpu nu laigan, “De beleyum mompaso mian i bau-bauon mongkaan sinaa kabai mongkaan malom, boli mompaso sangalu kabai utus, kabai to tomi-tominsan, kabai sampo bebe' nu laiganum anu kaya. Kalana saidi' mae aha suele mompaso komiu, desumo aitu beleyum montalima pombalosi nu bau-bauonum. 13Jadi, de beleyum mombau bau-bauon, opaso mian kasiasi, mian panyakiton, mian lupe tiba mian mapisok. 14Beleyum obalakati, kalana mian haha aijo' madi' moko ala mombalosi ka'ima'anum. Ka'ima'anum nubalosije nu Tumpu, de to mian-mian anu ma'ima' po'ule'mo je opotumuu' mau ia silakamo.”
Pongkantuangakon bau-bauon anu daka'
(Mat. 22:1-10)
15Tempo'nyo sala'samian anu nongkaan hingga-hinggat i kiijo' nohongomo potatae i Yesus, ia notatae, “Kodale' hondo na mian anu nongkaanmo hingga-hinggat tiba Tumpu de ia tokamo sumo Tomundo!”
16Panyo i Yesus notatae hi mian aijo'. “Daagi' ko sa'angu' na tempo' daagi' ko mian nombaumo bau-bauon anu daka' ka' nompaso da'isan na mian. 17Salatan tempo'nyomo bau-bauon aitu o tampu'uni, mian aijo' nonsaimo pokauhonnyo da mambamo hi to mian-mian anu pinaso ka' motatae, ‘Imbo' tokamo mae, iwi-iwi' tinatumo!’ 18Panyo aha iwi-iwi' samian ka' samian montampu'unimo momoita ampun. Anu imoona notatae hi posaihon aijo', ‘Aku sala'je nongoli sapetak na tano' palalu mamba otoa. Ampuniakon mae na aku.’ 19Sangga'at notatae, ‘Aku sala'je nongoli olima' na paan na sapi', da opisoba na sapi' haha kiijo'. Ampuniakon mae na aku.’ 20Anu sangga'at mule' notatae, ‘Aku sala'je no'osoa, kalana aitu aku madi' moko ala toka.’
21Posaihon aijo' ninsusule' ka' nompoto'i han aijo' hi tuannyo. Tuan aijo' notambuha'mo hondo ka' notatae hi pokauhonnyo, ‘Lako' lia-lia' mokiijo' i jala-jalan ka' i panga-panga' nu jalan nu kota'. Boamae na mian kasiasi, mian anu madi' sampa'na butongnyo, mian mapisok, ka' mian lupe.’ 22Lapas aijo', pokauhon aijo' notataemo, ‘Tuan, palentah i Tuan pinojalanmo, panyo tampat daagi' manjoo'.’ 23Lantas Tuan aijo' notatae, ‘Lako' i jala-jalan daka' tiba i jala-jalan anu soki i sambiha' nu kota, ka' pagala mae osai na to mia-mian toka da laiganku mobuke'. 24O inau'! Madi'mo ko samian pe'e na anu pinasomo aijo' mongkaan kaanon i bau-bauonku aiya!’ ”
Koloban nu samian anu saja' mombatuki
(Mat. 10:37-38)
25Da'isan na mian mombatuki lumajang mojajalan tiba i Yesus. I Yesus nosiloi ka' notatae hi aha, 26#Mat. 10:37 “De mian toka hi belengku panyo lebe mongkalibosi tinanyo, tuumanyo, bengkele'nyo, to ana-anaknyo, to utu-utusnyo, ka' suele posi butongnyo, ia madi' moko ala timbali mian anu saja' mombatuki Aku. 27#Mat. 10:38, 16:24, Mrk. 8:34, Luk. 9:23 Mian anu madi' mongka'oho' monsimbu salibnyo ka' mombatuki Aku, madi' bisa timbali anu saja' mombatuki Aku. 28De ko samian atina' hi komiu mongka'oho' mompotinjo menara, tantu ia sumuhang pe'e mombilang ongkosnyo, da nusumbu' pa' doinyo sampa' pompotimbali menara aijo' kabai madi'. 29Kalana de matantumo madi' nupoko potimbali, padahan betonnyo binaumo, saba' mian iwi-iwi' anu montoa ia aijo' mongkokojoimo. 30Aha motatae, ‘E mian aiya kahanda' mombau, panyo madi' moko ala mompotimbali!’ 31De samian na tomundo' ko suludadunyo sampulu' na madala mongka'oho' mahampate tiba tomundo' sangga'at anu ko suludadunyo uwalumpulu' na madala, tantu tomundo aijo' sumuhang mompotutugakon pe'e pa' ia ko kahosonan mongewa bali'nyo aijo'. 32De nusumbu' ia madi' mahoson, tantu de bali'nyo aijo' daagi' majo'on nu pokaumo na posaihonnyo mompoita da baladame.” 33Kahimpusannyo, i Yesus notatae, “Sumo aitu mule' na komiu. Madi' ko samian pe'e atina' hi komiu timbali mombatuki Aku, de ia madi' mongkulubanakon iwi-iwi na apaa.”
Timuson anu matawas
(Mat. 5:13, Mrk. 9:50)
34“Timuson aijo' ma'ima', panyo de timbalimo matawas te daagi' timbali opo' asing! 35Madi'mo daagi' ko gunanyo, mau mule' opake i ale' kabai opake pompolompo' tano'. Jadi sahanyo o alin. De ko bihing opotombihing!”
Currently Selected:
LUKAS 14: LAILOE
Highlight
Share
Copy
Want to have your highlights saved across all your devices? Sign up or sign in
