LUKAS 2
2
Kinahampean i Yesus
(Mat. 1:18-25)
1Tempo'nyo aijo' i Tomundo Agustus nompalentahkon da iwi-iwi' na layat nu kalaja'an Roma mombee' sanggo o tulis da o bilang na konjoo'nyo. 2Pombilangan anu momonanyo binau tempo'nyo i Kirenius tinimbali gubernur i lipu' nu Siria. 3Iwi-iwi' na mian tempo'nyo aitu namba da o tulis i posi kota'nyo toto samian.
4I Yusuf mule' namba lengkat i Nazaret i Galilea, namba i Betlehem i Yudea, tampat kinahampean i Tomundo Daud; kalana i Yusuf lee' i Daud. 5I Yusuf nompotulis sanggo ka' dohoinyo i Maria anu hau-haunyo poboa. 6Tempo'nyo kiijo' na aha i Betlehem, tinokamo na tempo'nyo i Maria mompohampemo. 7Ia nohampeakon samian na anak mo'ane, anaknyo anu tumpe. Anak aijo' sinabutannyo nu hude, ka' pinomale'nyo i tampat pompo'una'an hemput; kalana aha madi' nohumpak panumpangan.
Polaya' binatang ka' malaikat
8Pihi-pihi aijo' daagi' ko polaya' binatang anu hau-haunyo monjagai domba-dombanyo i hemput padang i da'erah aijo'. 9Monti-montiik malaikat nu Tumpu nompotoamo butongnyo hi aha ka' jingka lengkat hi Tumpu nonjingkai aha, ka' aha talalomo mabuhuk. 10Panyo koonyo nu malaikat, “Boli mabuhuk! Kalana aku toka momboa lele ma'ima' hi komiu – lele anu talalo mompolame' iwi-iwi' mian. 11Sinaa aiya i kota Daud i hampemo na Tomundo anu Momposalamat komiu, aijo'mo i Kristus, Tumpu. 12Aiyamo na tandanyo: Komiu mambaje montoa samian na bungamea' anu sinabutan nu hude, ka' pinomale' i uno nu pompakanan domba.”
13Monti-montiik malaikat aijo' sinangaluan nu malaikat manjoo' sangga'at, mompuji' Tumpu. Aha notatae,
14“Puji' na Tumpu i langit anu matangkas hondo!
Ka' i bawo nu dunia, salamatmo na mian anu momposanang kinyonyoa nu Tumpu!”
15Salatan mala-malaikat nompala'imo aha ka' ninsusule'mo i suluga', to pola-polaya' aijo' notatae hi samian ka' samian, “Imbo' da kita mamba i Betlehem montoa pa'apaa na anu tinimbalimo kiijo', anu pinoto'i nu Tumpu hi kita.”
16Lia-lia' na aha namba, ka' nonsingkaboti i Maria tiba i Yusuf, tiba mule' bungamea' anu pinomale' i pompakanan domba.
17Salatan to pola-polaya' domba nontoa bungamea' aijo', sinisikmo nu aha na anu tinaloakon nu to mala-malaikat mongkona bungamea' aijo'. 18Ka' binangang na mian da'isan no hongo sisik nu to pola-polaya' domba aijo'. 19Panyo i Maria nonguna' sisik iwi-iwi' aijo' i kinyonyoanyo ka' lewa' nompotutugakon. 20Ninsusule' na to pola-polaya' domba i hemput padang, ka' aha nompuji' ka' nompopodaka' Tumpu, kalana iwi-iwi' na tinoa ka' i hongo nu aha, madi' sala' sumo anu tinaloakonmo nu malaikat.
I Yesus binee'an sanggo
21 #
Luk. 1:31, Im. 12:3 Salatan umunnyo ingialunmo na sinaa, anak aijo' sinunatmo. Ka' sinanggohan nu aha i Yesus, sanggo anu binee' nu malaikat hi Ia, ma'isa pe'e pinoboa na tina-Nyo.
I Yesus binee' hi Tumpu i Laigan nu Tumpu
22 #
Im. 12:6-8
Tinokamo na tempo'nyo i Yusuf ka' i Maria nompojalanmo adat da oposusi' susumo atulan i Musa. Jadi binoa nu aha na Anak aijo' i Yerusalem da obee' hi Tumpu. 23#Kel. 13:2, 12 Kalana i uno nu Atulan nu Tumpu tinulis sumo uuka, “Batu-batu anak tumpe mo'ane, tionyo obee' hi Tumpu.” 24Aha mule' ko niat monsombahkon koloban, atina'mo beheenyo ka' lakinyo, tomonsi' sapatau, kabai ohua' na tomonsi' malapati' anu daagi' bata'nyo, sumo anu tinantukanmo nu Atulan nu Tumpu.
25Tempo'nyo aijo' i Yerusalem daagi' ko samian sanggonyo i Simeon. Ia mian anu ma'ima', anu mabuhuk hi Tumpu, ka' hau-haunyo montanda'i tempo'nyo Tumpu momposalamat Israel. Roh nu Tumpu monsangalui ia, 26ka' Roh nu Tumpu nompoto'imo hi ia, saba' ia ma'isa silaka de ma'isa pe'e montoa Tomundo anu Momposalamat, anu jinanji'mo nu Tumpu. 27Kuasa nu Roh nu Tumpu na nonggai-gai' i Simeon ninsoop nokiijo' i Laigan nu Tumpu. Tempo'nyo aijo' i Yusuf ka' i Maria nomboa i Yesus ninsoop anu daagi' ise' aijo' da mombau atulan anu nu palentahkon nu atulan nu agama. 28Ingala i Simeon na Anak aijo' ka' tinangkung-Nyo, ka' pinuji'nyo na Tumpu,
29“Uuka, Kita Tumpu nongganapimo janji'-To.
Pobee'mo na posaihon-To aiya
silaka hoko-hokot.
30Kalana posi matangku, aku nontoamo
Anu Momposalamat lengkat hi Belento.
31Anu Momposalamat aijo' Pinosadiantomo
bagi nu iwi-iwi' na bansa:
32 #
Yes. 42:6, 49:6, 52:10 Sumo jingka anu monjingkai jalan bagi nu to bansa-bansa sangga'at,
da toka hi Belento;
aijo'mo jingka anu mompotoka mae kadaka'an
bagi nu mian-To anu palesayamo Israel.”
33Tuuma ka' tina nu Anak aijo' binangang nohongo apaa na anu tinaloakon i Simeon kona hi anak nu aha. 34I Simeon nombalakati aha, ka' notatae hi Maria tina nu Anak aijo', “Anak aiya pinile'anmo nu Tumpu da mombahayai ka' momposalamat manjoo' na mian nu Israel. Ia timbalije tanda lengkat mae hi Tumpu, anu nugagakon nu mian da'isan, 35ka' salatan sumo aitu, otoamo na isi nu kinyonyoa nu aha. Kasusa'an monsusuk kinyonyoaum sumo bajak anu matajom.”
36Daagi' mule' ko samian na nabi boune anu binengkele'mo hondo. Sanggonyo i Hana, anak i Fanuel, lengkat mae lee' i Asyer. Ilapas popitu' na taun no'osoa, 37i Hana binalumo, ka' uuka umunnyo uwalumpulu'mo opat na taun. Madi' toho' ia mompala'i Laigan nu Tumpu. Sinaa ka' malom, ia monsombah i kiijo' hi Tumpu balado'a ka' bapuasa'. 38Pas tempo' aitu mule' ia tinokamo, lantas nompuji'mo Tumpu Allah, ka' nonsisik Anak aijo' kona hi iwi-iwi' na mian anu montanda'i tempo'nyo Tumpu mompobebas Yerusalem.
Ninsusule' i Nazaret
39 #
Mat. 2:23
Salatan i Yusuf ka' i Maria nombaumo anu nu tuntut nu Atulan nu Tumpu, ninsusule'mo na aha nokiijo' i Nazaret Galilea. 40Anak aijo' kino daka-daka'nyomo ka' nahosonmo. Ia pande hondo ka' talalo nukalibosi nu Tumpu.
I Yesus i Laigan nu Tumpu
41 #
Kel. 12:1-27, Ul. 16:1-8 Sataun toka sataun tu'anyo i Yesus namba i Yerusalem molame'akon Sinaa Daka' Paskah. 42Ka' tempo'nyo i Yesus umun sampulu'mo ohua' na taun, aha namba i lamean aijo' susumo anu saja' nubau nu aha. 43Salatan ilapas na nolamean aijo' aha ninsusule'mo, panyo i Yesus, Anak aijo', daagi' jinojoong i Yerusalem, ka' madi' sinumbu' nu tina tuuma-Nyo. 44Sinangka nu aha Ia nombatukimo mian da'isan. Salatan sinansinaamo na i lumajang, atina'je ka' aha nolio hi sampoto utusannyo ka' to sanga-sangalu nu aha. 45Panyo madi' i humpak-Nyo nu aha, jadi po'ule'mo aha ninsusule' i Yerusalem nolio Ia. 46Kino itolunnyo na nolio, i humpakje nu aha na Ia i uno nu Laigan nu Tumpu. Ia hau-haunyo suha-suhang mohongo gulu-gulu' agama, ka' mompoki-pokilawa. 47Iwi-iwi' na anu nohongo Ia binangang kalana pontaami-Nyo minsoop i akan. 48Tu'anyo-Nyo mule' suele bangangmo na montoa Ia. Tina-Nyo notatae hi Ia, “Anak, kadaka' nu bau na kami sumo aiya? Tuuma-Um ka' tina-Um binata-batamo na nolio Beleyum!”
49Tinaaman i Yesus, “Kadaka' kita tuuma ka' kita tina molio Aku? Apaa kita tuuma ka' tina madi' monsumbu' saba' Aku tionyo daagi' i uno nu Laigan nu Tuumang-Ku?” 50Panyo aha madi' mangalati' anu pinontaami i Yesus.
51Lapas aijo' i Yesus nambamo hingga-hinggat ka' aha ninsusule' nokiijo' i Nazaret, ka' nohongo-hongomo aha. Iwi-iwi' aijo' pino'una' nu tina-Nyo i uno nu kinyonyoanyo. 52#1Sam. 2:26, Ams. 3:4 I Yesus kinodaka-daka'nyomo, ka' kino pande-pandenyomo, tiba mule' nukalibosi nu Tumpu, ka' nuka'ima'i nu mian.
Currently Selected:
LUKAS 2: LAILOE
Highlight
Share
Copy
Want to have your highlights saved across all your devices? Sign up or sign in
