LUKAS 1

Tampu'unan nu sisik

1Teofilus anu manonong,

Manjoo' na mian anu binala usahamo montulis mato-matopos mongkona hahan anu jinadimo i totonga'to. 2Aha nontulis sosok tiba apaa na anu sinisikakon hi kita nu to mia-mian anu pinosi toanyo na hahan aijo' lengkat pe'e i momonanyo, ka' lapas mae nompolele lelenyo. 3Pinoko palesangku ima-ima' iwi-iwi' aijo' lengkat pe'e i pu'unnyo, kututugi ma'ima' da montulis sa'angu' na lapulan anu ta'atun toka hi kita Tuan. 4Kubau na aijo', da i Tuan monsumbu' saba' apaa na anu ingajanakonmo hi kita Tuan, memang totu'u.

Kinahampean i Yohanes anu Mompalamandikan pinoto'imo

5 # 1Taw. 24:10 Tempo'nyo i Herodes tinimbalimo tomundo lipu' nu Yudea, daagi' ko sa'angu' na imam sanggonyo i Zakharia. Ia ninsoop i kumpulan nu to ima-imam Abia. Sanggo nu bengkele'nyo i Elisabet, suele lee' nu imam. 6Kantumuu'an moto bengkele' aijo' momposanang kinyonyoa nu Tumpu. Ua-ua'aha tulut hondo i palentah ka' Atulan nu Tumpu Allah totu-totu'u. 7Aha madi' kino anak, sabab i Elisabet lengke' tiba mule' ua-ua'aha binengkele'mo ka' i langkai'mo.

8Tempo'nyo kumpulan Abia nohumpak bahagian, i Zakharia nontoongi pangkat imam, i ahop nu Tumpu. 9Ia tinompile'i ingundiakon sumo kabiasa'an anu nubau nu to ima-imam, Zakharia tiniju' da minsoop i Laigan nu Tumpu, ka' mompapui kamangian. 10Hau-haunyo mompapui kamangian, mian da'isan binalado'a i sambiha'nyo. 11Tempo'nyo aitu Malaikat nu Tumpu nanintoa hi Zakharia. Malaikat aijo' tinuminjo i sasu koanan i meja' pompapuian kamangian. 12Salatan tinoa i Zakharia na malaikat aijo', ia biningong ka' nabuhuk. 13Panyo koonyo nu malaikat aijo', “Boli mabuhuk, Zakharia! Tumpu mohongo do'aum. Bengkele'um i Elisabet tionyo mohampeakon samian na anak mo'ane. Beleyum tionyo monsanggohi ia, i Yohanes. 14Lame' na beleyum ka' sanang na mian da'isan de anak aijo' hampemo! 15#Bil. 6:3 Pontoa nu Tumpu ia timbali daka', ka' ia madi' monginum anggur kabai inumon anu molangui. Salatanmo pe'e i hampe, ia nu kuasai nu Roh nu Tumpu. 16Manjoo' na mian nu Israel nu laya'je minsusule' hi Tumpu Allah, Tumpu nu aha. 17#Mal. 4:5-6 Ia timbali pokauhon nu Tumpu anu mahoson, ka' bala kuasa sumo i Elia. Ia mompodameje tuuma ka' anak, ka' mian anu madi' tulut nu laya'je minsusule' i jalan pikilan anu hondo. Sumo aijo' na ia momposadia mian anu sadiamo toka hi bele nu Tumpu.”

18“Mosia na kusumbu' saba' sisikon aijo' tionyo timbali?” pinokilawa i Zakharia hi malaikat aijo'. “Aku i langkai'mo, ka' bengkele'ku mule' binengkele'mo.”

19 # Dan. 8:16, 9:21 Malaikat aijo' nontaami, “Aku aiya i Gabriel. Aku mombau apaa na pinoto'i nu Tumpu, ka' iamo na nompokau aku mompotokakon lele ma'ima' aiya hi beleyum. 20Apaa na kutaloakon, tionyo tontimbali toka i tempo'nyo. Panyo kalana beleyum madi' palesaya, beleyum madi' moko ala basisik; beleyum tionyo momo' sampe apaa na anu tinaloakonku aijo' tontimbalimo.”

21Hau-haunyo aijo' to mia-mian tataap montanda'i i Zakharia. Aha binangang, kadaka' ia pininmo i Laigan nu Tumpu. 22Ka' salatan ia nosabatmo, madi'mo ia noko potatae hi aha. Ia me mompoti-potiju' nu limanyo, panyo tataap momo'. Sahingga to mia-mian nangalati'mo, tukoonyo nu aha, ia nontoamo apa-apaa kiijo' i Laigan nu Tumpu.

23Salatan ilapasmo na kalajanyo i Laigan nu Tumpu, i Zakharia ninsusule'mo i laigan. 24Mamanga madi' pinin osoanyo i Elisabet pinoboamo, olima' na bitu'on ia saja' jinojoong i laigan. 25Notatae na ia, “Ahennyo Tumpu nontulungi aku, ka' nohapusakon ka'ambanganku.”

Kinahampean i Yesus pinoto'iakon

26Tempo'nyo i Elisabet pinoboamo anomo na bitu'on, Tumpu Allah nompokau i Malaikat Gabriel da namba i Nazaret, sa'angu' na kota i da'erah Galilea. 27#Mat. 1:18 I Gabriel sinai da namba hi samian na langkoyang sanggonyo i Maria. Langkoyang aijo' no dohoimo ka' samian sanggonyo i Yusuf, lee' mae i Tomundo Daud. 28Malaikat aijo' tinoka hi Maria ka' notatae, “Tabea' hi kita anu nu balakati nu Tumpu molabi-labi! Tumpu mosangalu hi beleyum!”

29Nohongo potatae nu malaikat aijo', i Maria tinolokengkeng, ka' nompokilawa i kinyonyoanyo pa' apaa na kahanda' nu tabea' aijo'. 30Lantas malaikat aijo' notatae hi belenyo, “Boli mabuhuk, Maria, kalana beleyum nusetujui nu kinyonyoa nu Tumpu. 31#Mat. 1:21 Beleyum poboa ka' mohampeakon samian na anak, ka' tionyo nu sanggohi Yesus. 32#2Sam. 7:12, 13, 16, Yes. 9:7 Ia saidi' mae bau kasanggoan ka' osanggohi Anak nu Tumpu Allah anu Matangkas na Kuasa-Nyo. Tumpu mompotimbali Ia Tomundo, sumo i Tomundo Daud, kampue'-Nyo mae. 33Ka' Ia mompalentah sumo tomundo i katulunan Yakub sidu-sidutu'. Kalaja-Nyo madi' ko kamingkotannyo.”

34“Panyo aku ma'isa toho' no'osoa,” koonyo i Maria hi malaikat aijo', “mosia na anu sumo itina' timbali?”

35Tinaaman nu malaikat aijo', “Roh nu Tumpu tokaje hi beleyum, ka' kuasa nu Tumpu monjagaije beleyum. Mokonyo sumo aitu, anak anu o hampe'akonto atina' osanggohi Susi', Anak nu Tumpu. 36Inau': I Elisabet, tominsanum kiijo' pinoboamo anomo na bitu'on, mau mule' ia notu'amo, ka' mian nontaloakon tukoonyo nu aha, ia lengke'. 37#Kej. 18:14 Kalana hi Tumpu madi' ko sa'angu' na madi' tontimbali.”

38Lantas i Maria notatae, tukoonyo, “Aku aiya posaihon nu Tumpu; bakasmo da timbali hi belengku sumo anu tinaloakonto.” Lantas i namba na malaikat nompala'i Maria.

I Maria namba nontoa i Elisabet

39Lia-lia' ilapas aijo', i Maria namba i sa'angu' na kota i Yudea, i da'erah bungkutnyo. 40Namba na ia i laigan i Zakharia, ka' salatan ia ninsoop, ia nontabea'i Elisabet. 41Ka' salatan i Elisabet nohongomo tabea' i Maria i uno nu ma'alum hi Elisabet nongkohenggomo. Lantas i Elisabet kinuasanmo nu Roh nu Tumpu, 42lantas notatae, “Beleyum na anu talalo hondo binalakatan i totonga' nu iwi-iwi' na boune! Binalakatan na anak anu nu hampeakon aijo'! 43Ihe na aku sahingga tina nu Tumpu kona hi belengku? 44Salatan aku nohongo tabea' nu belento, anak anu i uno nu ma'alumku nongkohenggomo kalana ilame'mo. 45Kopi-kopianmo na beleyum, kalana palesaya, sabab apaa na anu tinaloakon nu Tumpu hi beleyum, atina' tionyo tondaagi'!”

Potatae i Maria nontalima kaseh

46 # 1Sam. 2:1-10 I Maria notatae,

“Kinyonyoangku mompuji' Tumpu,

47ka' santuu'ku binilahimo

kalana Tumpu Pomposalamatku.

48 # 1Sam. 1:11 Inginau'-Nyo na aku, posaihon-Nyo anu madi' talakana'!

Lengkat uuka iwi-iwi' na bansa

montaloakon aku kinopi-kopianmo.

49Kalana Tumpu Anu Matangkas na Kuasa

nombaumo anu to daka-daka' hi belengku.

Susi' na sanggo-Nyo.

50Mompolee' toka mompolee'

Tumpu mongkalibosi

mian anu mabuhuk hi bele-Nyo.

51Tiba lima-Nyo maho-mahoson

Ia momposungkehet mian anu ko bubuun,

ka' mongidei tanga'an nu aha.

52 # Ayb. 5:11, 12:19 To Tomu-tomundo tinauhakon-Nyo na pangkatnyo

ka' mian loloison i hangkatakon.

53Mian mo'ohop pinopuas-Nyo nu iwi-iwi' na ka'ima'an,

mian kaya i laa'akon tiba madi' ko apa-apaa.

54Ia nontulungi Israel posaihon-Nyo,

sumo janji' anu pinodaagi'-Nyo

tiba mompolee'to.

55 # Kej. 17:7 Tumpu madi' mongkolilimi janji'-Nyo,

kinyonyoa-Nyo manonong hi Abraham

ka' lee'nyo sampe toka sidu-sidutu'.”

56Kila-kila nu kona totolu' na bitu'on na kopinnyo i Maria jinojoong hi i Elisabet, nambaje na i Maria ninsusule' i laigannyo.

Kinahampean i Yohanes anu Mompalamandikan

57Sinaanyo tinokamo i Elisabet mompohampeakonmo. Ia mohampeakon samian na anak mo'ane. 58Sampo dewe tiba to utu-utusnyo nohongo tukoonyo kino ima' na Tumpu montoa i Elisabet, aha suele ilame'mo hingga-hinggat tiba ia.

59 # Im. 12:3 Salatan anak aijo' ialunmo na umunnyo, aha tinoka da monsunat ia. Aha ka'oho' monsanggohi anak aijo' sumo sanggo nu Tuumanyo i Zakharia, 60panyo tinanyo notatae, “Madi'! Ia tionyo osanggohi Yohanes.”

61“Madi' ko samian pe'e sampoto utusanum na ko sanggo sumo atina',” koonyo nu aha hi ia. 62Lantas opoponyihingakon nu lima na aha mompokilawa hi Zakharia, pa' ihe na ponsanggohi anaknyo.

63I Zakharia nompoita sa'angu' na batu tulis, ka' tinulisnyo, “Sanggonyo, i Yohanes.” Aha iwi-iwi' binangangmo. 64Tempo' aitu mule' i Zakharia moko potataemo, ka' nompuji'mo Tumpu. 65Sampo dewe iwi-iwi' nabuhukmo, lele aijo' tinolelemo i tano' nu bungkutnyo nu Yudea. 66Iwi-iwi' mian anu nohongo nompokilawa i kinyonyoanyo, “Apaa na katimbaliannyo nu anak aijo' saidi' mae?” Kalana Tumpu monsangalui ia.

I Zakharia nompotoka lele lengkat hi Tumpu

67I Zakharia, tuuma nu anak aijo', kinuasanmo nu Roh nu Tumpu Allah, sahingga ia nompotoka potuunon nu Tumpu. Ia notatae,

68“Imbo' da kita mompuji' Tumpu,

Tumpu mian nu Israel!

Ia tinokamo montulungi mian anu palesayamo hi Ia

ka' mompobebas aha.

69Ia nombee'imo kita pomposalamat anu baani,

lee' i Daud, posaihon-Nyo.

70Naipuan mae nompake to nabi-nabi anu pinile'an-Nyo,

Tumpu nombee'mo anu jinanji'-Nyo

71da momposalamat kita i sampo bali'to

ka' lengkat i kuasa nu to mia-mian anu mongka'ideki kita.

72Da mompotoa ka'ima'an nu kinyonyoa-Nyo hi mompolee'to,

janji'-Nyo anu belesi' tionyo Nupodaagi'.

73-74Ia binasumpa' hi Abraham tuumanto,

ka' binajanji' momposalamat kita lengkat i bali'to,

da kita madi' mabuhuk monjalanakon palentah-Nyo,

75saja' tulut hi Ia

ka' momposanang kinyonyoa-Nyo

i uno nu kantumuu'anto.

76 # Mal. 3:1 Beleyum, oanakku tionyo osanggohi nabi

Tumpu Anu Matangkas na Kuasanyo.

Beleyum na momonanyo sinai nu Tumpu

da momposadia jalanan-Nyo,

77da mompoto'i hi mian anu palesayamo hi Ia

tukoonyo aha oposalamatmo,

de Tumpu mongampunimo iwi-iwi' na dosa' nu aha.

78Tumpunto manonong ka' mongkalibosi;

da momposalamat kita, sahingga Ia tinoka.

Sumo batu nu sinaa

bete' daagi' subu,

79 # Yes. 9:2 sumo aitumo na Ia mombee'i jingka-Nyo hi iwi-iwi' na mian

anu tumuu' i uno nu kapintungan ka' i kabuhukan.

Ia montaka' kita i jalan

anu mokiijo' i kadamean.”

80Anak i Zakharia kino daka-daka'nyomo, ka' kino hoso-hosonnyomo na rohnyo. Ia jinojoong i padang bolaa, sampe tinokamo na tempo'nyo ia nompotoamo butongnyo hi bansa Israel.

Currently Selected:

LUKAS 1: LAILOE

Highlight

Copy