MARKUS 16
16
I Yesus po'ule'mo tinumuu'
(Mat. 28:1-8, Luk. 24:1-12, Yoh. 20:1-10)
1Salatan sinaa nu Sabat tinoliwasmo, i Maria Magdalena, i Maria tina i Yakobus, ka' i Salome nambamo nongoli posadiaon da polanya'i bangke' i Yesus. 2Daagi' subu-subu hondo tempo'nyo sinaa bete'mo, i sinaa momoonanyo nu minggu aitu aha nambamo i kubulan. 3-4I tonga' nu jalan aha notatae samian ka' hi sangga'at, “Ihe na moko ala montulungi kita mohangkatakon batu pontumban bolo' nu kubulan?” Kalana batu aijo' daka' hondo. Panyo sinaintoka na aha i kiijo', tinoa nu aha batu aijo' nolingginmo. 5Lantas aha ninsoopmo i uno nu kubulan aijo'. I unonyo sasu koanannyo aha nontoa samian na olitau mimbaju' jubah mopute', hau-haunyo suha-suhang, sahingga aha tinolokengkengmo.
6Mian olitau aijo' notatae, “Boli mabuhuk! Kusumbu' komiu molio i Yesus mian nu Nazaret anu sinalibmo. Ia madi'mo i aiya. Ia po'ule'mo tinumuu'! Toa, aiya na tampat pinompomale'an nu aha Ia. 7#Mat. 26:32, Mrk. 14:28 Uuka lako'mo, potokakon na lele aiya hi anu saja' mombatuki Ia, sala'samian aijo'mo i Petrus. Taloakon, ‘Ia nambamo imoona nokiijo' i Galilea. I kiijo' mae komiu montoaje Ia, susumo anu tinaloakon-Nyomo hi komiu.’ ”
8Sahingga aha nosabatmo lengkat i kubulan aijo' lantas nopadeka'mo kalana tinolokengkengmo ka' nabuhukmo. Aha madi' nompoto'i apa-apaa mau pe'e hi hee, kalana nabuhukmo.
KAHIMPUSAN NU ANU TINULIS I MARKUS INGALA I TULISAN ANU NAIPUAN MAE
I Yesus nompotoa butongnyo hi Maria Magdalena
(Mat. 28:9-10, Yoh. 20:11-18)
[ 9Salatan i Yesus po'ule'mo tinumuu' i kasilakaannyo daagi' subu-subu sinaa nu Duminggu, Ia momoonanyo nompotoa butong-Nyo hi Maria Magdalena. (Hi Maria aijo' toho' i Yesus nonsabatakon popitu' na roh ma'idek.) 10Sahingga i Maria Magdalena namba nompoto'i apaa na tinimbali aijo' hi sanga-sangalu i Yesus, anu daagi' hau-haunyo moliibos ka' humaang. 11Panyo salatan aha nohongo taalu' i Yesus tinumuu'mo, ka' taalu' i Maria nontoamo Ia, aha madi' palesaya.
I Yesus nompotoa butongnyo hi ua'aha na mian anu saja' mombatuki Ia
(Luk. 24:13-35)
12Lapas aijo' i Yesus nompotoa butongnyo hi ua'aha na anu saja' mombatuki Ia, panyo bau-baunyo madi' pokakana. Aijo' tinimbali tempo'nyo ua'aha na mian aijo' hau-haunyo lumajang mokiijo' i sa'angu' na kampung. 13Jadi aha ninsusule' ka' nonsisik han aijo' hi anu sangga-sangga'atannyo. Panyo aha madi' palesaya.
I Yesus nanintoa hi anu saja' mombatuki Ia
(Mat. 28:16-20, Luk. 24:36-49, Yoh. 20:19-23, Kis. 1:6-8)
14Kahimpusannyo, i Yesus nompotoa butongnyo hi aha sampulu' ka' sa'angu' na anu saja' mombatuki Ia, tempo'nyo aha hau-haunyo mongkaan. Ia nompokinde'i aha, kalana aha ma'isa talalo palesaya ka' talalo panggaga, sahingga madi' palesaya hi mian anu nontoamo i Yesus, tinumuu'mo. 15#Kis. 1:8 Lantas i Yesus notatae hi aha, “Lako'mo i songko-songko na dunia aiya, ka' polele na Lele Ma'ima' lengkat mae hi Tumpu aijo' hi iwi-iwi' na mian. 16Mian anu madi' palesaya o hukum. Panyo mian anu palesaya o palamandikan, da salamat. 17Salaku bukuti' aha pinalesayamo, mian haha aijo' molaa' roh ma'idek kalana mompake sanggong-Ku; aha basisik nu potatae anu madi' nusumbu' nu aha. 18De aha montoongi ulo kabai monginum lasung, aha madi' mohumpak kasilaka'an. De aha mompotiik lima i to mia-mian masakit, mian haha aijo' ma'alin.”
I Yesus i hangkatmo nokiita' i suluga'
(Luk. 24:50-53, Kis. 1:9-11)
19 #
Kis. 1:9-11
Noko potatae na i Tumpu Yesus tiba aha, Ia i hangkatmo nokiita' i suluga'. I kiita' mae Ia nompalentahmo hingga-hinggat tiba Tumpu. 20Lantas anu saja' mombatuki Ia nambamo ka' nompolele lele lengkat mae hi Tumpu iyayamae. Ka' Tumpu suele mokalaja mohingga-hinggat tiba aha ka' nompotoamo bukuti', i hahan anu okabangangi, saba' apaa na anu pinotokamo nu aha aijo' memang totu'u.]
KAHIMPUSAN NU TULISAN ANU NAIPUAN MAE SANGGA'AT
[ 9To boboune haha aijo' nambamo hi Petrus tiba hi to sanga-sangalunyo, lantas nonsisikakon kodo-kodo' iwi-iwi' apaa na anu noko poto'imo hi aha nu olitau aijo'. 10Lapas aijo' posi i Yesusmo na namba nompolele Ia nonggunakon, anu saja' mombatuki Ia namba nompolele lengkat mae i kabete'an nokiijo' i kinsoban lele anu Susi' ka' madi' ko kamingkotannyo mongkona kasalamatan anu sampe toka sidu-sidutu', anu pinotunmo i Yesus.] 71
Currently Selected:
MARKUS 16: LAILOE
Highlight
Share
Copy
Want to have your highlights saved across all your devices? Sign up or sign in
