MARKUS 15

I Yesus i ahop hi Pilatus

(Mat. 27:1-2,11-14, Luk. 23:1-5, Yoh. 18:28-38)

1Daagi' subu-subu hondo, iwi-iwi Mian Kopian nu Agama ka' kapala nu to imam-imam, to pola-polaya' nu Yahudi ka' to gulu-gulu' agama nombisalakon lia-lia'. Aha nompungumo i Yesus, lapas aijo' binoa nu aha na Ia ka' binee' hi Pilatus. 2I Pilatus nompokilawa hi Yesus, “Totu'u Beleyum Tomundo' mian nu Yahudi?”

“Sumo itina' potataeum,” tinaaman i Yesus.

3Kapala nu to imam-imam nombee'i katalangan mompobau-bau i Yesus manjoo' hondo. 4Lantas i Pilatus po'ule' nompokilawa hi Yesus, “Madi'mo Beleyum mongka'oho' montaami? Soba toa pa' piangkuka na konjoo'nyo na pompobau-bau nu aha anu pinoto'i nu aha mongkona Beleyum!”

5Panyo i Yesus madi' hondo daagi' nontaami, sahingga i Pilatus binangang.

I Yesus binee'anmo hukuman mate

(Mat. 27:15-26, Luk. 23:13-25, Yoh. 18:39–19:16)

6De tokamo na tempo'nyo molame'akon Paskah, saja' nu bau i Pilatus na monsabatakon samian na anu tinalungku' mombatuki anu nu pile'i nu mian da'isan. 7I uno nu talungku' daagi' ko anu tinalungku' kalana nangamu' nompatei tempo'nyo kinahengge'an, samian sanggonyo i Barabas. 8Mian da'isan binalagombu ka' mompoita hi Pilatus da monsabatakon samian na anu tinalungku' sumo anu saja' obau. 9I Pilatus nompokilawa hi aha, “Mongka'oho' na komiu, aku monsabatakon tomundo mian nu Yahudi aijo' da komiu sanang?” 10Kalana i Pilatus tinolo inau'mo saba' kapala nu to imam-imam nombee'mo i Yesus hi ia, kalana masakit na kinyonyoa nu aha.

11Panyo kapala nu to imam-imam nonsale'i mian da'isan da mompoita hi Pilatus monsabatakon i Barabas da aha sanang. 12Sahingga i Pilatus notatae mule' hi mian da'isan aijo', “Desumo atina', apaa na tionyo kubau hi mian anu osanggohi miu tomundo' mian nu Yahudi aijo'?”

13Aha noloboo', “Salibmo na Ia!”

14“Panyo apaa na anu ma'idek hi Ia?” pinokilawa i Pilatus.

Lantas aha noloboo' lebe mahoson mule', “Salibmo na Ia!”

15I Pilatus mongka'oho' momposanang mian da'isan aijo' sahingga ia nonsabatakon i Barabas da aha sanang. Lapas aijo' ia nonsai mian momboboti i Yesus, lantas nombee' Ia da o salibkan.

To sulu-suludadu nongkabiangmo i Yesus

(Mat. 27:27-31, Yoh. 19:2-3)

16I Yesus binoa nu to sulu-suludadu nokiijo' i laigan pomputusian, i laigan daka' nu Gubernur. Lapas aijo' iwi-iwi' na gombuan nu suludadu pinalentahkonmo da balagombu. 17Lantas aha nompo pusokmo jubah mingkamumu' hi Yesus, ka' nombau makota' panga-panga' anu ko hii'nyo na binau, lapas aijo' pinosoku'nyomo i ubak i Yesus. 18Lapas aijo' aha nontabea'imo Ia. “Soosa' Tomundo Mian nu Yahudi!” na koonyo nu aha. 19Aha nombongkukmo ubak i Yesus nu tokon, lantas tinupe'an nu aha na Ia ka' nonsoosa' i ahop-Nyo. 20Pinoko kabiangan nu aha na i Yesus, aha nongukatakonmo jubah mingkamumu' aijo' lantas po'ule' pinopusokakon nu aha na posi baju-Nyo. Lapas aijo' sinabatakonmo nu aha na Ia da o salibkanmo.

I Yesus sinalibkanmo

(Mat. 27:32-44, Luk. 23:26-43, Yoh. 19:17-27)

21 # Rm. 16:13 I tonga' nu jalan aha nompakisamo samian da monsimbu salib i Yesus. Mian aijo' kakona anu sala'je lengkat mae i kampung mongkahanda'imo minsoop mokiijo' i kota. (Sanggonyo i Simon, – nolengkat mae i Kirene – tuuma i Aleksander ka' i Rufus.) 22I Yesus binoa i sa'angu' na tampat anu sanggonyo Golgota alati'nyo: “Tampat nu popoke'.” 23I kiijo' aha nompo'inumimo Ia anggur anu ko galo'nyo damak mano-manohong, panyo i Yesus madi' mongka'oho' monginum anggur aijo'. 24#Mzm. 22:19 Lapas aijo' sinalibmo nu aha na Ia, ka' nombagi-bagi baju'-Nyo binauakon undi da montantukan bagi nu toto samian. 25Pinonsalipan Ia aitu kinona i jam osio' daagi' subu. 26Aita' i salib-Nyo pinokona na tulisan mompobau-bau Ia, aijo'mo: “Tomundo' Mian nu Yahudi.” 27Nohingga-hinggat tiba i Yesus aha nonsalibkan mule' ua'aha na anu lewa' batololang; samian i sasu koanan ka' samian mule' i sasu kowi-Nyo. [ 28#Yes. 53:12 Kalana sinumo aitumo sahingga jinadimo na anu tinulis i uno nu Kitab nu Tumpu aijo'mo: “Ia sinangkamo to mia-mian anu ma'idek”.]

29 # Mzm. 22:8, 109:25, Mrk. 14:58, Yoh. 2:19 To mia-mian anu motulu i kiijo' ko lilo-lilokmo na ubak ka' montaloakon potatae mompopo'ambang i Yesus. Aha notatae, “Ee, Beleyum na anu mongka'oho' mongidei Laigan nu Tumpu, ka' po'ule' mompotinjo ola i uno nu tolun sinaa. 30Soba pintau'mae lengkat i salib atina' ka' posalamat na butong-Um!”

31Sumo aitu mule' na kapala nu to imam-imam ka' to gulu-gulu' agama mompopo'ambang i Yesus. Aha notatae samian ka' sangga'at, “Ia momposalamat mian sangga'at, panyo posi butong-Nyo madi' nu poko posalamat! 32De Ia Tomundo' nu Israel, Tomundo' anu Momposalamat, soba uuka aiya Ia mintau' mae lengkat i salib aijo' da kami montoa ka' palesaya hi Ia!”

To mia-mian anu sinalib hingga-hinggat ka' i Yesus suele nompopo'ambangmo i Yesus.

I Yesus sinilakamo

(Mat. 27:45-46, Luk. 23:44-49, Yoh. 19:28-30)

33Sonsu-sonsu'un na sinaa, totolu' na jam na kinopinnyo, songko-songko na lipu' aijo' pinikatmo. 34#Mzm. 22:2 Ka' i jam totolu'mo mamalom, i Yesus noloboo'mo hoso-hoson nu potatae, “Eloi, Eloi, lama sabakhtani?” anu alati'nyo, “O Tumpungku, Tumpungku, kadaka' Belento mompala'imo aku?”

35To pia-piangkuka na mian i kiijo' anu nohongo Ia tinolo sape aijo', aha notatae, “Hongo, Ia molaga i Elia!” 36#Mzm. 69:22 Samian anu aijo' hi aha nalia-lia' namba nongala bunga gahanggan, lantas pinolobongnyo i uno nu anggur malosing. Lapas aijo' bunga gahanggan aijo' pinosusuknyo i tuu' nu sa'angu' na kau', lantas pinotepesnyomo i biwi Yesus, ka' notatae, “Popea' pe'e, imbo' da otoanto pa' i Elia na toka mae montau'akon Ia i salib aijo'.”

37Lantas i Yesus noloboo'mo, ka' sinilakamo.

38 # Kel. 26:31-33 Lalanse' anu kala-kalayo' i Laigan nu Tumpu nobeak tinimbali ohua' lengkat aita' i bawonyo tinoka akaong i aluknyo. 39Suludadu anu tinuminjo i ahop nu salib aijo', nontoa mosia na i Yesus sinilaka. Suludadu aijo' notatae, “Memang totu'u mian aiya Anak nu Tumpu!”

40 # Luk. 8:2-3 I kiijo' daagi' suele ko to pia-piangkuka na boune anu hau-haunyo montanggalakon iwi-iwi' aijo' mae. Anu kiijo' hi aha ko i Salome, i Maria Magdalena, ka' i Maria tina i Yakobus, anu daagi olitau ka' i Yoses. 41Ahamo na to boboune anu mombatuki ka' montulungi Yesus salatan Ia tinoka i Galilea. Ka' daagi' da'isan suele na to boboune sangga'at i kiijo' anu tinokamo i Yerusalem nohingga-hinggat mae tiba i Yesus.

Yesus i lamunmo

(Mat. 27:57-61, Luk. 23:50-56, Yoh. 19:38-42)

42-43Sinaa ohanimo malom tempo'nyo i Yusuf tinoka mae lengkat i Arimatea. Ia minsoop, Mian Kopian Daka' nu Agama anu o angga'i. Ia suele hau-haunyo montanda'i tempo'nyo Tumpu montampu'uni mompalentah susumo Tomundo'. Sinaa aitu Sinaa nu Momposadia (aijo'mo: sinaa nu Sabat anu ota-otanda'i, malia'mo toka.) Kalana aijo' binaanimo na i Yusuf nangadap hi Pilatus ka' nompoita bangke' i Yesus. 44I Pilatus binangang taalu' i Yesus sinilakamo. Jadi, ia nolaga kapala nu tompuk nu suludadu ka' nompokilawa hi ia, pa' i Yesus pininmo na sinilaka. 45Salatan nohongo anu pinotoka nu suludadu aijo', i Pilatus nompoloasmo i Yusuf mongala bangke' i Yesus. 46Lantas i Yusuf nongolimo hude bau ponsaput, aitumo lenan anu ma'ima' ka' lapas aijo' nontau' akonmo bangke' i Yesus, sinaputnyo nu hude aijo'. Lapas aitu pino'una'nyomo na bangke' aijo' i uno nu sa'angu' na kubulan anu binau i uno nu bungkutnyo nu batu. Lapas aijo' i lingginakonnyo na sa'angu' na batu daka' pongkulubi kubulan aijo'. 47Hau-haunyo aijo' i Maria Magdalena, ka' i Maria tina i Yoses nompotomatakonmo pa' iyamae na pompo'una'an i Yesus.

Currently Selected:

MARKUS 15: LAILOE

Highlight

Copy