MARKUS 14

Tanga'an ma'idek ka'oho' mompatei Yesus

(Mat. 26:1-5, Luk. 22:1-2, Yoh. 11:45-53)

1 # Kel. 12:1-27 Daagi' uansinaa Sinaamo nu Paskah ka' Molame'akonmo Roti anu Madi' ko Raginyo. Kapala nu to imam-imam ka' to gulu-gulu' agama hau-haunyo molio jalan da mohakop i Yesus ka' madi' ko hengge-hengge' da o patei na Ia. 2“Panyo boli kita mombau aijo' i tempo' molame'akon,” koonyo nu aha, “kalana dumo timbali na ka'idekan”.

I Yesus dinudu'an nu minya-minya' manohong

(Mat. 26:6-13, Yoh. 12:1-8)

3 # Luk. 7:37-38 Salatan i Yesus daagi'mo i Betania, i laigan hi Simon anu u'utu mae sinansala nu panyakit kilit anu monsilakai, samian na boune tinoka hi Ia. Ia nomboa sa'angu' na boton pualam ko sinyo minya-minya' manohong anu mahan hondo, bakat anu manohong na binau. Tempo'nyo i Yesus hau-haunyo suha-suhang mongkaan, boune aijo' nongukap kolop nu boton aijo' ka' dinudu'akonnyo na minya-minya'nyo i buan nu ubak hi Yesus. 4To pia-piangkuka na mian anu i kiijo' notambuha'mo ka' notatae hi samian ka' samian, “Apaa na gunanyo minya-minya' aijo' ola o ide-idei? 5Minya-minya' aijo' de opobaluk, olinyo molabih tolu'atu na doi salaka, ka' doinyo obee' hi mian kasiasi!” Sahingga aha notambuha'mo hi boune aijo'.

6Panyo i Yesus notatae, “Pojohokmo na ia! Kadaka' komiu monsusa'i ia? Ia mombau apa-apaa anu ma'ima', ka' anu o puji' hi beleng-Ku. 7#Ul. 15:11 Mian kasiasi saja' atina hi komiu. Madi' ko tempo'nyo de komiu mongka'oho'mo, komiu timbali montulungi aha. Panyo Aku madi' saja' tiba komiu. 8Boune aiya nombaumo apaa na anu timbali nu poko ala o bau. Ia nomposadiakonmo hi beleng-Ku minya-minya' manohong bau pongkubulan Aku mau ma'isa pe'e toka na tempo'nyo. 9Palesayamo! I songko-songko na dunia maumo iyayamae na Lele Ma'ima' lengkat hi Tumpu o leleakon, apaa na anu binaumo nu boune aiya saja' o sisik madi' okolilimi na ia.”

I Yudas monsangaja'imo mongkabisa'i Yesus

(Mat. 26:14-16, Luk. 22:3-6)

10Lantas i Yudas Iskariot, samian anu ninsoop sampulu' ka' ohua' na anu saja' mombatuki Yesus, namba hi kapala nu to imam-imam ko kahanda' da mongkabisa'i Yesus i ahop nu aha. 11Aha sinanang hondo na nohongo poitaon aijo', ka' binajanji' mombee'ije doi hi Yudas. Sahingga i Yudas nontampu'unimo nolio tempo' mongkabisa'i Yesus.

I Yesus nongkaan kaanon nu Paskah tiba anu saja' mombatuki Ia

(Mat. 26:17-25, Luk. 22:7-14, 21:23, Yoh. 13:21-30)

12I sinaa momoonanyo i uno nu Molame'akon Roti anu Madi' ko Raginyo – tempo'nyo aitu mian mongkolot domba Paskah – anu saja' mombatuki Yesus nompokilawa hi Ia, “Iyamae na oka'ima'i nu kita Tuuma, kami momposadiakon kaanon nu Paskah hi Tuumangku?”

13Sahingga i Yesus nonsai ua'aha na mian lengkat hi aha, “Lako'mo mokiijo' i kota, kiijo' mae samian na mo'ane anu hau-haunyo momboa sa'angu' na selekan ko isinyo uee, mompaha kabotje tiba komiu. Batukimo na ia 14mokiijo' i laigan anu nu pinsoopi, ka' taloakon hi tumpu nu laigan aijo', ‘Tuumangku Gulu' nompokilawa, iyamae na tampat anu oposadiakon hi Ia ka' anu saja' mombatuki Ia mongkaan kaanon nu Paskah.’ 15Mian aijo' mompotiju'je hi komiu sa'angu' na tampat i bawonyo anu ewa. Tampat aijo' tina'atunmo, sasadia tiba pakakasnyo. Posadiamo iwi-iwi' kiijo' mae bau kapalaluanto.”

16Lantas ua'aha na mian anu saja' mombatuki Yesus aijo' nambamo nokiijo' i kota. I kiijo' mae aha nontokai iwi-iwi' madi' sala' sumo anu tinaloakon i Yesus. Lantas aha mule' nomposadiamo kaanon nu Paskah.

17Pihi-pihinyo, i Yesus tinoka tiba sampulu' ka' ohua' na anu saja' mombatuki Ia. 18#Mzm. 41:10 Ka' hau-haunyo aha suha-suhang mongkaan, i Yesus notatae, “Hongo: samian anu aiya hi komiu, anu u'uka aiya mongkaan hingga-hinggat ka' Aku, daagi' ko anu mongkabisa'ije Aku.”

19Nohongo aijo', anu saja' mombatuki Yesus nolibosmo hondo. Lantas samian tiba samian nontampu'unimo nompokilawa hi Yesus, “Tantu misa' aku na anu kokoonto Tuuma?”

20Tinaaman i Yesus, “Ia sala'samian lengkat hi komiu anu sampulu' ka' ohua' aiya, anu nongkaan sa'a-sa'angu' na lean tiba Aku. 21Memang Anak nu Mian mate sumo anu tinulis i uno nu Kitab nu Tumpu. Panyo palias na ko ideknyo mian anu mongkabisa'i Anak nu Mian aijo'! Sahanyo mian aijo', ia madi' pinohampe!”

Palajamuan nu Tumpu

(Mat. 26:26-30, Luk. 22:14-20, 1Kor. 11:23-25)

22Salatan aha hau-haunyo mongkaan, i Yesus nongala roti ka' nompoita talima kaseh hi Tumpu. Lapas aijo pinuge-puge-Nyomo na roti aijo' nu lima-Nyo, lantas binee'mo hi anu saja' mombatuki Ia ka' i hinggatannyo nu potatae, “Alamo ka' kaanmo, aiyamo na butong-Ku.”

23Lapas aijo' ia nongala sa'angu' na galas nu anggur. Ia nompoita talima kaseh hi Tumpu, lantas nombee' galas aijo' hi anu saja' mombatuki Ia. Lapas aijo' aha iwi-iwi' nonginumo anggur aijo'. 24#Kel. 24:8, Yer. 31:31-34 Lapas aijo' i Yesus notatae, “Aiyamo na baso'-Ku anu mompohoson palajanjian nu Tumpu, baso' anu binubusakon bau kapentingan nu mian da'isan. 25Palesayamo: Aku madi'mo po'ule' monginum anggur aiya, sampe toka i tempo'nyo Aku monginum anggur anu bu'ou tiba komiu i Dunia Bu'ou nu Tuumang-Ku.”

26Lapas aijo' i nyanyiakon nu aha na sa'angu' na nyanyian pompuji'. Ka' ilapas aijo' aha nambamo nokiijo' i Bungkutnyo nu Zaitun.

Sisik saidi' mae i Petrus nombahakonmo i Yesus

(Mat. 26:31-35, Luk. 22:31-34, Yoh. 13:36-38)

27 # Za. 13:7 Lapas aijo' i Yesus notatae hi aha, “Komiu iwi-iwi' malai mompala'i Aku. Kalana i uno nu Kitab nu Tumpu tinulis, ‘Tumpu mompateimo anu molaya' dombanyo, ka' sampahas na dombanyo mosungkehetmo.’ 28#Mat. 28:16 Panyo salatan Aku po'ule'mo tumuu', Aku ka' komiu, Aku na mamba i moona mokiijo' i Galilea.”

29“Madi',” tinaaman i Petrus, “Mau mule' aha iwi-iwi' mompala'i kita Tuuma, aku madi' sahondo-hondonyo.”

30“Jaga,” koonyo i Yesus, “Pihimo aiya, ma'isa pe'e manuk mintutuhu' pinduan, beleyum pintolunmo na nombahakon Aku.”

31I Petrus nontaami totu-totu'u, “Pojohokmo da aku tionyo mate mohingga-hinggat tiba kita Tuuma, sahondo-hondonyo aku madi' motatae tukoongku aku madi' monsumbu' kita Tuuma!”

Ka' anu saja' mombatuki sangga'at notatae sumo aijo' suele.

I Yesus binaladoa'amo i Getsemani

(Mat. 26:36-46, Luk. 22:39-46)

32Aha tinoka i sa'angu' na tampat anu osanggohi Getzemani, ka' i Yesus notatae hi anu saja' mombatuki Ia, “Suhangmo aiya hau-haunyo Aku mamba balado'a.”

33Lantas i Yesus nongendei Petrus, i Yakobus, ka' i Yohanes mamba hingga-hinggat tiba Ia. Ia nontampu'unimo nongoa'i moliibos ka' susa'. 34“Kinyonyoang-Ku moliibos hondo,” koonyo i Yesus hi aha, “ku oa'i sumo anu mompai silakamo. Jojoongmo aiya ka' balajaga-jaga!”

35I Yesus namba sangkiding majo'on lantas natidupumo i tano' ka' binalado'a. I uno nu do'a-Nyo pinoita-Nyo de timbali da Ia madi' mongoa'i kasansalaan aijo'. 36“Tuuma, o Tuuma,” na koo-Nyo, “madi' ko apaa anu kulang hi kita Tuuma. Pojo'onakon na kasansalaan aiya hi beleng-Ku. Panyo boli mombatuki pongka'oho'-Ku, o ala ahi' i pongka'oho' nu kita Tuuma.”

37Lapas aijo' i Yesus ninsusule', ka' nontokai anu saja' mombatuki Ia i hoyotmo. Ia notatae hi Petrus, “Simon, hoyot na beleyum? Ola sa'angu' na jam, beleyum madi' moko ala balajaga-jaga?” 38Lantas i Yesus notatae hi aha, “Balajaga-jagamo, ka' balado'a da komiu madi' mohumpak soba'an. Memang roh miu mongka'oho mombau anu totu'u, panyo komiu madi' moko ala, kalana kalakuan nu mian aijo' madi' mahoson.”

39Daagi' minsan na i Yesus namba binalado'a ka' montaloakon potatae anu pokakana. 40Lapas aijo' Ia po'ule' ninsusule' hi anu saja' mombatuki Ia ka' nontokai aha sahoyotnyo, kalana aha talalomo namatatundu'. Sahingga aha madi'mo monsumbu' apaa na anu tionyo otaloakon nu aha hi Yesus.

41Salatan i Yesus ninsusule' hi aha kinopintolunnyo, Ia notatae, “Pa' daagi' komiu hoyot ka' milawe? Tinokamo na tempo'nyo Anak nu Mian obee'mo hi lima nu to mia-mian baladosa'. 42Bulaamo, imbo' da kita mambamo. Toa! Mian anu mongkabisa' i Aku tinokamo!”

I Yesus i hakopmo

(Mat. 26:47-56, Luk. 22:47-53, Yoh. 18:3-12)

43Hau-haunyo i Yesus daagi' motatae, tinokamo na i Yudas, gampa nu aha anu sampulu' ka' ohua' na anu saja' mombatuki Ia aijo'. Nohingga-hinggat tiba ia tinoka mule' da'isan na mian anu nomboa mae bajak ka' amangkun. Aha sinai mae nu kapala nu to imam-imam, to gulu-gulu' agama, ka' to pola-polaya' nu Yahudi. 44Anu mongkabisa'i nontantukanmo sa'angu' na tanda hi aha. “Mian anu ku ooki,” na koonyo hi aha, “Iamo na mian-Nyo. Hakop na Ia ka' boa na Ia, ka' ojagai hondo-hondo.”

45Tempo'nyo i Yudas tinoka, ia lau-laus namba hi Yesus ka' notatae, “Tuumangku Gulu'!” lapas aijo' ia nongookimo i Yesus. 46Lantas to mia-mian anu tinoka nohingga-hinggat tiba i Yudas aijo' nohakopmo i Yesus ka' nompungu Ia. 47Panyo sala'samian anu daagi' i kiijo' nongkeat bajaknyo ka' nontabas posaihon nu imam daka' sampe nosamping na bihingnyo. 48Lantas i Yesus notatae hi aha, “Apaa Aku aiya mian ma'idek, sahingga komiu toka momboa mae bajak ka' amangkun bau mohakop Aku? 49#Luk. 19:47, 21:37 Toka sansina sinaa Aku mongajan i Laigan nu Tumpu i ahop nu belemiu, ka' komiu madi' mohakop Aku. Panyo memang totu'umo tionyo sumo aijo', da timbali apaa na anu tinulis i uno Kitab nu Tumpu.”

50Iwi-iwi' anu saja' mombatuki Ia nopadeka'mo nompala'i Yesus.

51Samian na olitau, anu ola nompake sambeak na hude pongkukubi butongnyo, nombatuki Yesus. Mian haha aijo' mongka'oho' mohakop ia, 52panyo tinibahakonnyo na hudenyo aijo', lantas nopadeka'mo langgo-langgo'.

I Yesus i ahop nu Mian Kopian Daka' nu Agama

(Mat. 26:57-68, Luk. 22:54-55,63-71, Yoh. 18:13-14, 19:24)

53I Yesus binoa nokiijo' i laigan nu imam daka'. I kiijo' mae iwi-iwi' na kapala nu imam, polaya' nu Yahudi, ka' gulu' agama hau-haunyo balagombu. 54I Petrus aijo' mae majo'on nombatuki Yesus sampe ninsoop i kintan laigan nu imam daka'. I kiijo' mae i sinumuhang minjohu ohani apu nohingga-hinggat tiba to sulu-suludadu. 55Kapala nu to imam-imam, ka' iwi-iwi' na Mian Kopian Daka' nu Agama, mompagala molio to buku-bukuti' anu momposala' i Yesus da opokonai hukuman mate na Ia. Panyo aha madi' nohumpak sa'angu' pe'e na bukuti'. 56Da'isan na sakisi anu ilaga da mombee' i katalangan anu madi' totu'u hi Yesus, panyo katalangan nu aha madi' pokakana hi samian ka' sangga'at.

57Lantas to pia-piangkuka na sakisi tinuminjo ka' nombee'i katalangan anu madi' totu'u aiya mongkona i Yesus. 58#Yoh. 2:19 “Kami nohongo mian aiya notatae, ‘Ku hobo'akon na Laigan nu Tumpu aiya anu binau nu mian, ka' lapas ko tolun sinaanyo, po'ule' Ku potinjo na sangga'at anu misa' mian na nombau.’ ” 59Panyo katalangan nu mian haha aijo' mule' madi' pokakana samian ka' hi sangga'at.

60Sahingga imam daka' tinuminjo i ahop nu aha iwi-iwi' ka' nompokilawa hi Yesus, “Apaa Beleyum madi' montaami anu pinobau-bau nu aha hi Beleyum?”

61Panyo i Yesus ola nomohokot. Ia madi' nontaami mau pe'e pa' apaa. Lantas imam daka' aijo' po'ule' nompokilawa minsan hi Ia, “Te Beleyum Tomundo' anu Momposalamat, Anak nu Tumpu anu talalo Susi'?”

62 # Dan. 7:13 “Akumo na Ia,” tinaaman i Yesus, “ka' komiu iwi-iwi' montoaje Anak nu Mian sumuhang i sasu koanan nu Tumpu Anu Talalo Susi' ka' toka mae i uno nu sehu' lengkat i langit!”

63Sahingga imam daka' nombea-beak baju'nyo ka' notatae, “Madi' palalu ko sakisi! 64#Im. 24:16 Komiu nosi hongomo potatae-Nyo anu momposala' Tumpu. Uuka apaa na kaputusan nu belemiu?”

Aha iwi-iwi' nompotusimo i Yesus sala', ka' tionyo o hukum mate.

65Lantas to pia-piangkuka na mian nontampu'unimo nontupe'i Yesus, ka' aha nongkukubi mata-Nyo ka' nondoke Ia, lantas notatae, “Soba tili'i, ihena nondoke Beleyum?” To sulu-suludadu suele nohapa'mo i Yesus.

I Petrus nombahakonmo i Yesus

(Mat. 26:69-75, Luk. 22:56-64, Yoh. 18:15-18,25-27)

66Hau-haunyo i Petrus daagi aijo' i natan, sala'samian posaihon boune lengkat hi imam daka' tinoka i kiijo'. 67Salatan nontoa i Petrus minjohu ohani i apu, lewa'mo tinonto'annyo ima-ima' na ohup i Petrus ka' notatae, “Te misa' beleyum suele mosangalu i Yesus mian nu Nazaret aijo'?”

68Panyo i Petrus madi' mompototu'u. “Aku madi' monsumbu' ka' madi' mangalati' pa' apaa na koyum,” na koonyo hi posaihon aijo'. Lantas i Petrus namba nokiijo' i sabatan daka' nu laigan i imam daka' aijo'. [Tempo'nyo aitu manuk nintutuhu'mo.]

69Posaihon boune aijo' nontoa i Petrus mule', ka' po'ule' notatae hi to mia-mian i kiijo', “Ia memang sala'samian gampa nu aha!” 70Panyo i Petrus po'ule' madi' nompototu'u.

Madi' pinin mule', to mia-mian i kiijo' po'ule' notatae hi Petrus, “Madi'mo daagi' opoko posuluk, beleyum memang sala' samian anu aijo' hi aha, kalana beleyum nolengkat mae i Galilea!”

71Lantas i Petrus nontampu'unimo binasumpa-sumpa' ka' notatae, “Aku madi' monsumbu' mian anu okahanda'i nu belemiu aijo'!”

72Tempo'nyo aitu mule' manuk nintutuhu'mo ko pinduannyomo. Ka' i Petrus sininsumbu'mo kalana i Yesus notataemo hi ia, “Ma'isa pe'e manuk mintutuhu' ko pinduannyo, beleyum pintolunmo mombahakon Aku.” Sahingga i Petrus i humaangmo, kalana nolibosmo.

Currently Selected:

MARKUS 14: LAILOE

Highlight

Copy