LUKAS 4
4
I Yesus sinobaan nu Ibilis
(Mat. 4:1-11, Mrk. 1:12-13)
1I Yesus kinuasanmo nu Roh nu Tumpu tempo'nyo Ia nompala'imo Kaunyo nu Yordan. Roh nu Tumpu nolaya' Ia nokiijo' i padang bolaa. 2I kiijo' Ia sinobaanmo nu Ibilis patompulu' na sinaa na kinopinnyo. Tempo'nyo aitu, madi' toho' ko anu kinaan-Nyo. Ahennyo Ia nongoa'imo no'ohop.
3Ibilis notatae hi Ia, “Te misa' Beleyum anak nu Tumpu Allah? Jadi pokau na batu aiya da timbali roti.”
4 #
Ul. 8:3
I Yesus nontaami, “I uno nu Kitab nu Tumpu tinulis, ‘Mian madi' ola tumuu' nu roti.’ ”
5Ka' binoanyo mule' nu Ibilis na i Yesus i tampat anu matangkas, ka' ola tinolo kulap, Ibilis nompotoamo hi Ia iwi-iwi' na kalaja'an nu dunia. 6“Iwi-iwi' na kakuasa'an ka' kakaya'an aiya ku bee'je hi Beleyum,” koonyo nu Ibilis hi Yesus, “Kalana iwi-iwi' binee'mo hi belengku, sahingga aku timbali mombee' pa' hi ihe na anu ku ka'ima'i pombee'an. 7Iwi-iwi' aijo' timbali Kita na tumpu-Nyo, de Kita monsombah aku.”
8 #
Ul. 6:13
I Yesus nontaami, “I uno nu Kitab nu Tumpu tinulis, ‘O sombah na Tumpuum ka' o hongo na palentah-Nyo.’ ”
9Lapas aijo', Ibilis nomboamo i Yesus i Yerusalem, ka' pino'una'nyo i bawo nu binumbungan nu Laigan nu Tumpu, ka' notatae hi Ia, “Te misa' Beleyum Anak nu Tumpu? Jadi, pingkanabu'mo, mokaiyong lengkat i aiya. 10#Mzm. 91:11 Kalana i uno nu Kitab nu Tumpu tinulis, ‘Tumpu mompokauje to mala-malaikat-Nyo monjagai Beleyum ima-ima'.’ 11#Mzm. 91:12 Ka' mule', ‘Limaje nu to mala-malaikat na monsingkom de tengke-Um tosumpun i batu.’ ”
12 #
Ul. 6:16
I Yesus nontaami, “I uno nu Kitab nu Tumpu tinulis, ‘Boli monsobai Tumpuum.’ ”
13Salatan Ibilis lapasmo nanonsobai Yesus nu lupa-lupa na jalan, pinala'iannyomo na i Yesus, ka' nontanda'i tempo' anu ma'ima'.
I Yesus nontampu'uni kalaja-Nyo i Galilea
(Mat. 4:12-17, Mrk. 1:14-15)
14Lapas aijo', i Yesus ninsusule'mo nokiijo' i Galilea; Ia kinuasanmo nu Roh nu Tumpu. Lele mongkona butong-Nyo tinogilelemo i songko-songko na da'erah aijo'. 15Ia nongajan i to lai-laigan pogalejaan, ka' mian da'isan nompuji'mo Ia.
I Yesus madi' tinalima i Nazaret
(Mat. 13:53-58, Mrk. 6:1-6)
16I Yesus namba mule' i Nazaret, tampat pinompodaka'an Ia. I sinaa nu Sabat, sumo kabiasa'an-Nyo Ia namba i laigan pogalejaan. Ia tinuminjo nombasa' Kitab nu Tumpu, 17ka' binee'an kitab Nabi Yesaya. Ia nombuka' lulunan nu kitab aijo', ka' i humpak-Nyo na ayat aiya,
18 #
Yes. 61:1-2
“Roh nu Tumpu daagi' hi beleng-Ku,
kalana Ia nohangkatmo Aku da mompolele
Lele Ma'ima' hi mian kasiasi.
Ia nompokau Aku da mompoto'iakon
opobebasmo na mian anu i hakop
ka' kapa'alinan nu mian mapisok;
da bau pompobebas mian anu o sansala
19ka' mompolele tempo' katokaan nu Tumpu
momposalamat mian anu palesayamo hi Ia.”
20Po'ule' i lulun i Yesus na kitab aijo', ka' po'ule' sinule'akonnyo hi mian anu ko tugasnyo i kiijo', ka' Ia sinumuhang. Iwi-iwi' na mian anu i uno nu laigan pogalejaan nontoa Ia. 21Ka' i Yesus nontampu'uni notatae hi aha sumo uuka, “Aya-ayat Kitab nu Tumpu aiya, sinaa aiya ginanapanmo salatan komiu nohongomo.”
22Potatae anu tinaloakon-Nyo ma'ima' hondo, sahingga aha binangangmo ka' nompototu'umo Ia. Aha notatae, “Te misa' Ia anak i Yusuf?”
23Lantas i Yesus notatae hi aha, “Tantu komiu mompake kantuang aiya hi beleng-Ku, ‘Dokoten posi opa'alin na butong-Um. Anu okabangangi i hongomo mami binauum i Kapernaum, soba baumo i posi kampung-Um.’ ” 24#Yoh. 4:44 Tinuangan i Yesus, “O inau', madi' ko nabi anu o adati i posi kampungnyo. 25#1Raj. 17:1 Panyo hongo: Tempo'nyo i Elia, tempo'nyo aitu madi' tinudun na ujan totolu' mintonga' na taun na kopinnyo, jinadimo na kapo'ohopan anu daka' i songko-songko na lipu'. Tempo'nyo aijo' manjoo' na to balu-balu i Israel. 26#1Raj. 17:8-16 Mau mule' sumo aijo', Tumpu madi' nompokau i Elia namba hi sala'samian na to balu-balu aijo', panyo ola hi samian na balu anu kiijo' i Sarfat i da'erah Sidon. 27#2Raj. 5:1-14 Sumo aitumo mule' tempo'nyo i Nabi Elisa, manjoo' na mian i Israel anu ko panyakit kilit mahumimi', panyo madi' ko samian pe'e aijo' hi aha na anu pina'alinakon, boli mompiakon i Na'aman mian nu Siria aijo'.”
28Iwi-iwi' na mian i laigan pogalejaan aijo' pinusa hondo salatan nohongo han aijo'. 29Aha tinuminjo ka' nolaa' i Yesus mosabat i kota, ka' binoa nu aha i tungebe nu bungkutnyo koko kota nu aha binau. Aha ko niat monsuulakon Ia da manabu' i tungebe. 30Panyo i Yesus noko pinggegiang hi mian da'isan ka' i namba.
Mian anu sinoku'on nu roh ma'idek
(Mrk. 1:21-28)
31Lapas aijo', i Yesus nambamo i kota Kapernaum i Galilea. I kiijo' mae ia nongajan to mia-mian i sinaa nu Sabat. 32#Mat. 7:28-29 Aha binangang nontoa Ia mongajan, kalana Ia motatae ko angga'nyo. 33I kiijo' i laigan pogalejaan daagi' ko samian anu kinuasanmo nu roh ma'idek. Mian aijo' ko kihi-kihis, 34“O Yesus, mian nu Nazaret, apaa na anu ka'oho' obaunto hi kami? Beleyum toka monsilakai kami? Kusumbu' ihe na beleyum; beleyum posaihon nu mian susi' lengkat mae hi Tumpu!”
35“Hokot!” sinegaan i Yesus na roh ma'idek aijo'. “Posabatmo lengkat hi mian aiya!” Lantas roh ma'idek aijo' nonsapahakon mian aijo' i ahop nu aha iwi-iwi', lapas aitu nosabatmo lengkat hi mian aijo', madi'mo nompasakiti.
36Iwi-iwi' na mian binangang, ka' notatae samian ka' samian, “Palias hondo na potatae-Nyo. Ko angga'nyo ka' ko kuasa-Nyo na Ia nompalentah to roh-roh ma'idek mosabat, ka' aha mule' nosabatmo!” 37Sahingga lele mongkona i Yesus tinogilelemo i da'erah aijo'.
I Yesus nompa'alin mian da'isan
(Mat. 8:14-17, Mrk. 1:29-34)
38Pinala'ian i Yesus na laigan pogalejaan aijo', ka' i namba i laigan i Simon. Tina nu bengkele' i Simon hau-haunyo masakit nusihabi, ka' to mia-mian nompoto'imo han aijo' hi Yesus. 39I Yesus namba i kahoyotan nu totina aijo', lantas nolaa'mo anu nonsihabi aijo'. Anu nonsihabi aijo' i na'alinmo, tina nu bengkele' i Simon balo nobula ka' nongatuni apa-apaa na anu palalu hi aha.
40Salatan sinaa nakakinsapmo, iwi-iwi' na mian nomboamo hi Yesus to utu-utusnyo anu mongoa'i sansala nu ngangahan nu panyakit. I Yesus nompotudu lima-Nyo i buan nu aha toto samian ka' nompa'alin aha. 41To roh-roh ma'idek nosabat hi mian da'isan ka' naha loboo'an, “Memang Beleyum Anak nu Tumpu!”
Panyo i Yesus nonsegai aha, madi' mompoloas aha motatae, kalana nusumbu' nu aha Iamo na Tomundo anu Momposalamat.
I Yesus nongajan i uno nu to lai-laigan pogalejaan
(Mrk. 1:35-39)
42Salatan sinaa nontampu'unimo binete' i Yesus nompala'imo kota aijo', ka' namba i sa'angu' na tampat anu liing. To mia-mian nontampu'unimo nolio Ia, ka' salatan i humpaknyomo, aha nompagalamo nolio jalan da Ia boli mompala'i aha. 43Panyo i Yesus notatae, “Lele Ma'ima' mongkona mosia na Tumpu mompalentah, tionyo Ku poto'i i kota-kota sangga'at, kalana aijo' na kahanda'nyo nu Tumpu nompokau Aku toka i dunia.”
44Kalana aijo', i Yesus nongajan i uno nu to lai-laigan pogalejaan i songko-songko na lipu' nu Yudea.
Currently Selected:
LUKAS 4: LAILOE
Highlight
Share
Copy
Want to have your highlights saved across all your devices? Sign up or sign in
