KALOWARAN 5
5
Mosa ban Harun ngadhep ka rato Messer, bangsa Isra'il sajan etendhes
1Mosa ban Harun pas ngadhep ka rato Messer, laju mator kantha reya, “Badha dhabuna PANGERAN, Allah se esemba Isra'il; dhabuna kadi ka'dhinto, ‘Dina Tang ommat me' olle entar ka ra-ara beddhi, me' olle mabadha paraya'an menangka baktena ka Sengko'.’ ”
2“Sapa PANGERAN jareya?” dhabuna rato Messer, “Arapa'a sengko' me' atoro'a ka parentana, ngedinana oreng Isra'il kalowar dhari dhinna'? Sengko' ta' tao ka PANGERAN jareya, ban sengko' ta' ngedinana oreng Isra'il kalowar dhari dhinna'.”
3Mosa ban Harun mator, “Allahna Ibrani adhabu ka abdidalem, makon sopaja bangsa Isra'il eparengngana edi entar ka ra-ara beddhi se jauna tello are parjalanan dhari ka'dhinto, polana ngatorragiya kurban ka PANGERAN, Allahna Isra'il. Manabi sareng junandalem ta' eedine, PANGERAN tanto madhateng panyaket otaba perrang kantos bangsa abdidalem sadaja epamate.”
4Dhabuna rato Messer ka Mosa ban Harun, “Apa maksodda ba'na me' ra'yat esoro ngenthengngagi lalakonna? Soro abali ka kalakowanna pole nor-dunor jareya! 5Bangsana ba'na sajan bannya', abannya'an dhari bangsa Messer. Sateya bi' ba'na me' pas esorowa ambu alako!”
6E are jareya keya rato Messer adhabu ka para pangawassa nor-dunor ban ka sakabbinna dhur-mandhurra bangsa Isra'il, 7“Ba'na ta' olle aberri' darameyan ka bangsa Isra'il se agabaya bata; dina reng-oreng jareya me' olle nyare darameyan dibi'. 8Tape bannya'na bata se kodu ekagabay ta' olle korange, kodu paggun papadha ban ban-sabbanna. Reng-oreng jareya males, daddi terros menta edi ka sengko' entara ngeba kurban ka Allahna! 9Tambai lakona, paberra', sopaja reng-oreng jareya ta' sempada ngedhingngagi cacana reng-oreng se lecegan.”
10Para pangawassa nor-dunor jareya ban dhur-mandhurra bangsa Isra'il padha kalowar, laju ngoca' ka reng-oreng Isra'il, “Dhabuna rato ba'na ta' eparengngana darameyan pole. 11Ba'na kodu nyare dibi', tape bannya'na bata se kodu ekagabay ba'na ta' olle korange, kodu padha ban ba'-lamba'na.” 12Daddi reng-oreng Isra'il entar nyare darameyan san-kassannagi e Messer. 13Para pangawassa nor-dunor jareya terros maksa sopaja reng-oreng Isra'il agabay bata se bannya'na e dhalem saare padha ban bannya'na e bakto eberri'i darameyan. 14Dhur-mandhurra oreng Isra'il se epassrae orosanna lalakon jareya epokole bi' para pangawassa dhur-mandhur. Ca'na para pangawas jareya, “Arapa bata se ekagabay sateya bannya'na me' ta' padha ban se ba'ari'?”
15Dhur-mandhurra oreng Isra'il jareya padha ngadhep ka rato Messer, sambi aserro kantha reya, “Aponapa abdidalem sadaja me' epakadi paneka sareng junandalem, guste? 16Abdidalem ta' eparenge darameyan namong gi' paggun epakon abadhi bata! Samangken abdidalem epokole mangkana se sala ba-ponggabana junandalem.”
17Dhabuna rato, “Ba'na reya, males; daddi jareya sababba ba'na menta edi entara ngeba kurban ka PANGERAN! 18Sateya kassa' alako pole! Ba'na paggun ta' eberri'ana darameyan, tape bannya'na bata se kodu ekagabay kodu padha ban ban-sabbanna.” 19Dhur-mandhurra bangsa Isra'il jareya apangrasa ja' bangsana badha e dhalem kasossa'an e bakto ebalai ja' kodu agabay bata se bannya'na paggun akantha ban-sabbanna.
20Sakalowarra dhari karaton reng-oreng jareya tatemmo ban Mosa sarta Harun se anante' e lowar. 21Reng-oreng jareya mator, “PANGERAN ampon ngoladi ponapa se elampa'agi sampeyan. Sampeyan tanto eokom sareng PANGERAN sabab sampeyan daddi lantaranna rato sareng ba-ponggabana baji' ka bangsa kaula, kantos padha epateyana sadaja.”
Mosa aserro ka PANGERAN
22Daddi Mosa laju ngadhep ka PANGERAN pole, pas mator, “Guste, aponapa Junandalem me' nyeksa ommadda epakadi ka'dhinto? Aponapa abdidalem me' epakon ka ka'dhinto? 23Sabab ngabidi abdidalem ngadhep ka rato manapa'a dhabuepon Junandalem, reng-oreng Isra'il eseksa sareng rato. Dineng Junandalem ta' apareng partolongan sakale.”
24Dhabuna PANGERAN ka Mosa, “Sateya ba'na bakal nangaleyana epabaramma'a rato jareya bi' Sengko'. Rato jareya bi' Sengko' epaksa'a mabebas Tang bangsa. Saongguna, bi' Sengko' rato jareya epaksa'a ngojuk Tang bangsa jareya dhari nagara reya.”
Currently Selected:
KALOWARAN 5: MAD
Highlight
Copy
Compare
Share
Want to have your highlights saved across all your devices? Sign up or sign in
