KALOWARAN 6

Allah nembali Mosa

1Dhabuna Allah ka Mosa, “Sengko' reya PANGERAN. 2#Kal. 3:13-15 Sengko' la ngaton ka Ibrahim, Ishak ban Yakub, Allah Se Mahakobasa; tape ka oreng se katello jareya Sengko' gi' ta' ngennallagi ja' Tang nyama ‘PANGERAN’.#6:2 PANGERAN: Baca 3:14. 3Sengko' mabadha parjanjiyan bi' se katello jareya. Sengko' ajanji se katello jareya bi' Sengko' eberri'ana tana Kana'an, se sabbanna ekennengnge bi' se katello jareya menangka oreng manca. 4Sengko' la ngedhing serrona oreng Isra'il se ekadunor bangsa Messer, Sengko' enga' ka parjanjiyan jareya. 5Daddi kabala ka bangsa Isra'il ja' Sengko' ngoca' kantha reya, ‘Sengko' reya PANGERAN; Sengko' mabebasa ba'na kabbi dhari kakobasa'anna bangsa Messer sopaja ba'na ta' ekadunor pole. Sengko' noduwagiya Tang kakobasa'an se talebat rajana kaangguy masalamedda ba'na, ban Sengko' ngokoma bangsa Messer epaberra'a. 6Ba'na bi' Sengko' epadaddiya Tang ommat, ban Sengko' daddiya Allahna ba'na. Sopaja ba'na padha'a tao ja' Sengko', PANGERAN, Allahna ba'na, se mabebas ba'na dhari kakobasa'anna bangsa Messer sopaja ba'na ta' ekadunora terros. 7Sengko' ngeba'a ba'na ka nagara se bi' Sengko' la ejanjiyagi kalaban sompa ka Ibrahim, Ishak ban Yakub; tana jareya bi' Sengko' ebagiya ka ba'na, epadaddiya andhi'na ba'na. Sengko' reya PANGERAN.’ ” 8Dhabuna PANGERAN jareya bi' Mosa epanapa' kabbi ka oreng Isra'il, tape oreng Isra'il padha ta' ngedhingngagi kabbi, reng-oreng jareya padha potos asa polana ros-terrosan ekadunor ban eseksa.

9PANGERAN pas adhabu ka Mosa, 10“Kassa' ngadhep ka rato Messer, kabala bangsa Isra'il soro edine kalowar dhari nagarana.”

11Tape Mosa mator ka PANGERAN, “Oreng Isra'il dibi' ta' poron merengngagi abdidalem. Ponapa pole rato Messer? Abdidalem ta' oneng acaca, Guste.”

12Daddi PANGERAN pas ngotos Mosa ban Harun abala ka oreng Isra'il ban ka rato Messer ja' PANGERAN marenta'agi aba'na sopaja mimpina oreng Isra'il kalowar dhari nagara Messer.

Silsilahna Mosa ban Harun

13Areya' silsilahna Mosa ban Harun: Ruben, pottra sareyangnga Yakub, andhi' ana' lalake' kaempa, iya areya: Henokh, Palu, Hezron ban Karmi. Jareya bangatowana om-kaom e dhalem suku Ruben. 14Simeyon ban binena se dhari Kana'an andhi' ana' lalake' kaennem, iya areya: Yemuwel, Yamin, Ohad, Yakhin, Zohar ban Saul. Jareya bangatowana om-kaom e dhalem suku Simeyon. 15Lewi andhi' ana' lalake' katello: Gerson, Kehat ban Merari; jareya bangatowana om-kaom e dhalem suku Lewi. Omorra Lewi sampe' saratos tello polo petto' taon. 16#Et. 3:17-20, 26:57-58; 1Bbd. 6:16-19 Gerson andhi' ana' lalake' kadhuwa: Libni ban Simei; se kadhuwa jareya bannya' toronanna. 17Kehat andhi' ana' lalake' kaempa: Amram, Yizhar, Hebron ban Uziyel. Omorra Kehat sampe' saratos tello polo tello' taon. 18Merari andhi' ana' lalake' kadhuwa: Mahli ban Mosi. Jareya om-kaom e dhalem suku Lewi ban toronanna bang-sebang.

19Amram abine ale'na eppa'na, nyamana Yokhebed. Yokhebed babar lalake', iya areya Harun ban Mosa. Yuswana Amram sampe' saratos tello polo petto' taon.

20Yizhar andhi' ana' lalake' katello, iya areya: Korah, Nefeg ban Zikri. 21Ana'na Uziyel lalake' katello keya, iya areya: Misa'el, Elsafan ban Sitri.

22Harun abine Eliseba, pottrana Aminadab; Eliseba jareya sataretan ban Nahason. Eliseba kaagungan pottra Nadab, Abihu, Eleyazar ban Itamar. 23Korah andhi' ana' lalake' katello, iya areya: Asir, Elkana ban Abiyasaf. Jareya para bangatowana kaomma Korah. 24Eleyazar, pottrana Harun, abine sala settong dhari pottrana Putiyel, pas kaagungan pottra Pinehas. Jareya para kapalana kaom kalowarga e dhalem suku Lewi.

25Harun ban Mosa jareya se epakon PANGERAN abakta oreng Isra'il kalowar dhari Messer. 26Se kadhuwa jareya ngadhep ka rato Messer sopaja oreng Isra'il epabebasa.

Papakonna PANGERAN ka Mosa ban Harun

27E bakto PANGERAN abu-dhabu ka Mosa e Messer, 28dhabuna kantha reya, “Sengko' reya PANGERAN. Kabala ka rato Messer sabarang se ekoca'agi Sengko' ka ba'na.”

29Tape Mosa mator, “Junandalem ngagali dibi' ja' abdidalem ta' oneng acaca. Kadi ponapa rato se meyarsa'agiya ka abdidalem?”

Currently Selected:

KALOWARAN 6: MAD

Highlight

Copy

Compare