YESAYA 42
42
Mogogundoi i Tuhan
1 #
Mat. 3:17, 17:5; Mrk. 1:11; Luk. 3:22, 9:35 Guman i Tuhan, “Naa in mogogundoi-Ku inta binaba-Ku,
intau inta piniḻí-Ku inta mokosanang kon gina-Ku.
Akuoi ain nobogoi in kawasa-Ku kon inia,
sin modia kon koadilan kon batúan in bangusa. #Mat. 12:18-21
2Sia in diábí kumarak andeka momaḷú moropot,
singognea in diábí kodongogan kon daḷan.
3Aog inta noikoḷungdon diábí putoḷannea,
togá inta nokuyoyowdon diábí piongannea.
Takin satia in sia in moponiata kon inta totuu,
4Diá in gagawang andeka kobuḻian in kamang,
modapot in inta moadil in posindogon kon dunia.
Ḻipú mita inta moyayú mokotanob kon totundúnea.”
5 #
Rsl. 17:24-25
Ki Tuhan Allah in nomaḻí bo nosongká kon ḷangit;
Sia in nomia kon butá bo bayongan inta nobiag kon tudunea.
Sia in nobogoi kon intau in poginaan kobiagan bo nyawa.
Sia in nopotaau in koyow tanaa kon mogogundoi-Nea mita,
6 #
Yes. 49:6; Luk. 2:32; Rsl. 13:47, 26:23 “Akuoi, ki Tuhan, in mogoiní bo mopotabá kon inimu
sin mopobayá in inta moadil
iko in kapiton-Ku bo ḷukadan-Ku
sin mobaḻí dodandian kon umat intau,
bo sindar kon bayongan in bangusa.
7Sin mobuká kon mata in intau bilog,
bo mopoḷuat kon intau nongkon sindip in ponjara.
8Akuoibí in ki Tuhan, tuata in tangoi-Ku;
Koagungan-Ku in diábí ogoi-Ku kon i ineka;
Tangoi-Ku inta ponango-nangoian in diábí ogoi-Ku kon patong.
9Tanaa in inta sinoḻindap-Ku in noniatadon;
Akuoi in moibog mopotaau in onu inta mobagu;
kon dodai intua diápa mobaḻí, aindon muna pinoguman-Ku kon inimu.”
Dondong dodayow
10Podondong in dondong mobagu kon i Tuhan,
dayowdon in Sia ei sinangkub in dunia!
Ponggonugurdon, ei dagat#42:10: ei dagat: podudui in naska Ibrani moiko inta ḷumeag kon dagat. bo bayongan in tombonunea,
ḻipú mita inta moyayú bo bayongan in intau inta nogutun kon tua!
11Pomayádon mako in padang gurun bo kotánea mita in modayow kon i Tuhan,
bo intau in Kedar modayow kon i-Nia!
Porogiowdon in intau mita kon kotá in Sela,
bo morobaḷú nongkon tudu totok in buḷud!
12Yo mosia in mohoromatdon kon i Tuhan,
bo mopotaaudon in tangoi-Nea kon ḻipú mita moyayú.
13Ki Tuhan in mayá in muna moparang naonda bo pahlawan tobatú,
naonda bo tontara tobatú inta moibog totok moparang.
Sia in modidí in kokow in parang,
bo mopoontong in kotoyang-Nea kon musung.
Ki Allah in nodandi motuḷung kon umat-Nea
14Ki Allah in noguman, “Noonggotdon in Akuoi in diá moposingo-singog;
kibio-biómai in Akuoi bo nonahang kon gina.
Tanaa in wakutuneadon akuoi mogaid kon oaidan-Ku,
Kumarak in Akuoi naonda bo bobay inta mononggadí.
15Buḷud bo tombuḷudnea in baḻíon-Ku moḷogat,
bayongan in pinomuḷanea iḷaḷowan-Ku.
Ḷopá mita in ongkag binaḷuian-Ku
nobaḻí padang gurun,#42:15: Kamungkinan moḷoben mangaḻenea padang gurun; podudui in naska Ibrani: butá kon pintad.
Bayongan in danow iningkagan-Ku.
16Bangusa-Ku inta bilog in kapiton-Ku
pongin daḷan inta diá kinotaauan monia;
mosia in diaan-Ku
kon daḷan mita inta diá kinotaauan monia.
Sindip baḻíon-Ku bayag kon i monia,
bo daḷan inta notangkaḻembong in tondodaion-Ku.
Tuata in aidan-Ku kon i monia,
bo notantú bidon kon aidan-Ku.
17Intau inta mopirisaya kon patong berhala
bo akúon monia nobaḻí ilah monia,
in poompáanmai bo pokopooyáanmai.”
Israel doí tundúon
18Ki Tuhan in noguman, “Indongogaidon ei intau mita bongoḷ!
Indoiaidon, ei intau mita bilog!
19Ki ine degá in mobilo-bilog nongkon Israel mogogundoi-Ku?
Ki ine degá in mobongom-bongoḷ nongkon totabá-Ku?
20Israel, nobayong in inontongmu, táe diá sinaridianmumai,
bongoḷanmu in nobuká, táe iko in diá nokidongog.”
21Ki Tuhan in moibog moposaḷamat;
Ibogon-Nea hukum-Nea in horomaton bo untuon.
22Táe bangusa tatua in nodaitdon inagow;
mosia in dinakop kon bonu in yuang mita kon bonu in butá,
bo binuni kon bonu in ponjara mita
mosia in nobaḻí kuruban pinogagowan,
bo diá in namangoi notuḷung.
23Ki ine in kon sigad monimu in moibog mokidongog kon tanaa,
bo monaridi kon singgai moiduduimai?
24Ki ine in nokiagow kon Israel?
Ki Tuhanbí tontaní!
Kita naa in binaradosa kon i-Nia,
Kita in diá nobiag podudui in parenta-Nea,
bo diá dinumudui kon totundú-Nea.
25Dá binaḻí-Nea in kita notarima kon torú-Nea inta motoyang,
bo nororiga popisí in parang inta motoyang.
Torú-Nea nomokak kon Israel naonda bo tuḷú,
táe diá kinotaauan naton,
bo diá nobalajar nongkon onu inta ain kinorasaan naton.
Currently Selected:
YESAYA 42: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
