YESAYA 43
43
Ki Allah nodandi mopoḷuat kon umat-Nea
1Israel, nanaa in guman i Tuhan,
“Akuoibí in inta nomaḻí bo inta nomia kon inimu,
dika moondok, iko in notantú bidon kon posaḷamaton-Ku!
Akuoi in nogoinídon kon inimu pinongin tangoimu,
iko in Akuoi in kitogi.
2Aka iko ḷumoḷan kon tubig yo takinan-Ku in iko,
iko in diábí moḷomot kon bonu in rorigamu mita.
Aka mongin tuḷú, diábí in iko mopokak,
totungkuḷ mita inta mobogat in diábí mokobodito kon inimu.
3Sin Akuoibí, in ki Tuhan, Allahmu,
ki Allah mokudus in Israel, mopoposaḷamatmu.
Mesir in ogoi-Ku nobaḻí tontobutmu,
Sudan bo Syeba in nobaḻí toḻiumu.
4Moḷoben in mangaḻemu kon tayowon-Ku,
Akuoi in mohoromat bo motabi kon inimu;
dá ogoi-Ku in intau nobaḻí toḻiumu,
bangusa mita in nobaḻí toḻiu in nyawamu.
5Dika moondok,
sin Akuoi in moḷukad kon inimu.
Nongkon toyopan bo nongkon dotá in pomukaan
pinotabá-Ku in ki adí bo ki ompumu mamangoi moyosipun.
6Pinarenta-Ku kon i utuan bo kon i toḷatan,
sinbá mosia in ḷagidon buḻian.
Bá ki adímu mita ḷoḷaki in mobuidon nongkon moyayú,
bo ki adímu mita bobay in mobui nongkon popod mita in dunia.
7Sin mosia komintan ain inoiní pinodoyon kon tangoi-Ku.
Mosia in binaḻí-Ku sin mohoromat kon i-Nakó.”
Israel in nobaḻí sakusi i Tuhan
8Ki Allah in noguman, “Potabádon in mosia mamangoi in muna
bangusa-Ku inta bilog, umpaka komata;
inta bongoḷ, umpaka kobongoḷan.
9Potabádon in bayongan bangusa moyosipun
bo bayongan in suku moyodondon.
Ki ine in kon sigad in dewa mita monia
in nopotaaudon muna kon onu inta nobaḻí tanaa?
Ki ine in kon sigad monia in mokotoḻindap kon kobiagan moiduduimai?
Pomayádon mako in sakusi mita monia mamangoi in muna,
bo moponiata kon mosia in totuu,
sinbá bayongan inta nokodongog kon i monia in moguman,
kon totuubí in natua!
10Ei umat-Ku, moikobí in sakusi-Ku mita,
moiko in piniḻí-Ku nobaḻí mogogundoi-Ku mita,
sinbá monotaaudon kon i-Nakó bo mopirisaya kon i-Nakó,
bo momangaḻedon kon Akuoibí naa in Allah.
Akuoi in Allah inta totobatú tua.
Diábí in ibanea mako in noiuna bo inta moiduduimai kon i-Nakó.
11Akuoibí in Tuhan inta tuḷong tua,
koḻikud in Akuoi diábí in moposaḷamat.
12Akuoi in nopotaaudon kon inimu,
Akuoibí in inta moposaḷamat kon i monimu,
bo deemanbí ilah ango-angoi inta kon sigad monimu;
moikobí in nobaḻí sakusi-Ku mita.
Bo Akuoi, Akuoi naa in Allah,
13modapot in mononoi Akuoi in umuranbí Allah.
Diábí in mokoḷagui nongkon kawasa-Ku,
andeka moḷamboi kon tomayá-Ku.”
Pinoḷuat nongkon Babel
14Ki Tuhan in mopoposaḷamatmu, Inta Mokudus Israel, noguman,
“Popisí in moiko, Akuoi nopotabá in tontara minayá in Babel,
bo dinangatan-Ku in bonoboi mita in ngara mita in ponjara;
giow mita in intau in Kasdim binaḷuian-Ku nobaḻí amui.
15Akuoibí in Tuhan, Allahmu Inta Mokudus,
Datumu, inta nomaḻí kon inimu, ei Israel!”
16Ki Tuhan in nomiadon kon daḷan tobatú nongin dagat,
nongin tubig inta nobokoḷ.
17Sia in nopotabá in tontara bo porwira-Nea mita noparang,
bo mosia in minayá nomaké in kereta inugut in kabaḷo.
Táe noḷabú in mosia, diádon nokobangon bui,
mosia in minatoi naonda bo sumbu inta nopiong.
18Ki Tuhan in noguman, “Diá in mangaḻenea in monorop kon sempo inta ain kinotaḻiban,
diábí in mangaḻenea in monorop kon inta ain noiuna.
19Taridiaika, Akuoi in nogaidon kon inta mobagu;
tanaa in momangkoidon, diá degá inontongmu?
Akuoi in momiabí kon daḷan kon padang gurun,
bo ongkag mita kon rawang kayuon.
20Biag kaḻig in mohoromatbí kon i-Nakó;
serigala bo ḷagapan unta in modayowbí kon i-Nakó sin Akuoi in nogiḻig kon tubig kon padang gurun,
bo ongkag mita kon rawang kayuon
sin mopoinum kon umat inta piniḻí-Ku.
21Mosiabí tua in bangusa inta binaḻí-Ku kon i-Nakó:
sinbá motaau mopotaau in dodayow kon i-Nakó.”
Dosa in Israel
22Ki Tuhan in noguman,
“Táe iko Israel, diá nosumba kon i-Nakó,
bo diádon nogundoi kon i-Nakó.
23Iko in diábí nodia kon domba sin ogoi mobaḻí kuruban payongonmu,
diá nohoromat kon i-Nakó takin nobogoi in sosumbamu.
Bokaka Akuoi in diábí nopororigamai kon inimu pinongin kuruban,
andeka nopororigamai kon inimu pinongin noigum kon kamania.
24Iko in diábí notaḷui kon dupa mobondu ogoi kon i-Nakó,
diá nopoguḻí kon i-Nakó in ḷongó in kuruban inta iratámu.
Táe noyoḻiudon, iko in nokibabadon kon i-Nakó in dosamu mita,
nopororigamai kon i-Nakó takin taḷámu mita.
25Táe Akuoi in ki Allah inta nomopat kon dosamu,
Inampungan-Ku in iko sin natuabí in sipat-Ku;
Akuoi in diá bidon tantú monorop kon dosamu mita.
26Poponoropdon kon i-Nakó, igai in kita mayá in pongadilan,
pongadudon in pelekaramu sinbá moniatadon kon iko in totuu.
27Mogoguyangmu inta muna#43:27: Mogoguyangmu inta muna: inta imakusud degá ki Yakub andeka ki Abraham andeka degá ki Adam. aindon binaradosa,
itoimu mita in nomarontakdon kon i-Nakó,
28Imangmu mita in nopokotordon#43:28: podudui in terjemahan dungkuḷmai imang mita nopokotor; podudui in naska in Ibrani: Akuoi in nopokotor kon imang mita. in baḷoi-Ku.
Dá Israel in inogoi-Ku sin poompáanmai,
buí i Yakub in pinomayá-Kudon mako iyompat.”
Currently Selected:
YESAYA 43: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
