YESAYA 56
56
Bayongan in bangusa poyoiapon umat i Allah
1Ki Tuhan in noguman kon umat-Nea,
“Aidaidon onu inta moadil
bo inta noyotombutung in hukum-Ku.
Sin topiḻikpa bo Akuoi in mamangoi moposaḷamat kon i monimu
bo koadilan-Ku in poniata.
2Barakatan-Ku in intau inta moḷukad kon singgai in Sabat
bo diá noponajis in singgai tatua.
Intau inta diá nogaid kon inta moraat
in pomiaan-Ku kopiaan.”
3Intau ango-angoi inta dinumugang kon umat i Tuhan
in diábí motaau in moguman,
“ki Tuhan in diá nobogoi kon inakó
mosumba kon i-Nia noyotakin in umat-Nea.”
Intau inta kinabiri in diábí motaau morai
“Akuoi in diábí motaau mobaḻí indugang in umat i Tuhan,
sin Akuoi in diá mokouḻí kon buí.”
4Ki Tuhan in noguman kon i monia,
“Aka moiko mohoromat kon singgai in Sabat,
aka moiko motoindudui kon dodandian-Ku
bo mogaid kon onu inta mokosanang kon gina-Ku,
5dá tangoimu in toropon kon bonu in Baḷoi-Ku
bo kon yuak in bangusa-Ku.
Tua in mopia-pia in kogadí
ḷoḷaki bo bobay.
Moiko in ogoian-Ku in tangoi mononoi
inta diábí ḻiongon.”
6Ki Tuhan in noguman kon intau mita ango-angoi
inta ain noituot kon bonu in umat i Tuhan,
inta motabi kon i Tuhan bo inta noibada kon i-Nia,
inta nohoromat kon singgai in Sabat bo nosatia kon dodandian-Nea,
7 #
Mat. 21:13; Mrk. 11:17; Luk. 19:46 “Moiko in diaan-Kubí mayá in Sion, mayá in tombuḷud-Ku inta motusi,#56:7: tombuḷud inta motusi: Indoiai 2:3.
bo ogoian-Ku in ḷunganga in gina kon Baḷoi pooibadaan-Ku.
Kuruban mita inta pinosumba monimu kon mezbah-Ku in tarimaan-Kubí.
Baḷoi-Ku in tangoionbí baḷoi pososambayangan in bayongan bangusa.”
8Nanaa in guman i Tuhan Inta Totok in moḷantud
inta nogatod kon Israel nobui nongkon pinoḷumbúan,
“Akuoi in modiabí kon intau ibanea
sin dumugang takin monia inta ain notonsipun.”
Itoi mita in Israel ihukum
9Ki Tuhan in nopotabá kon bangusa mita ibanea namangoi naonda bo biag ḻindong sin modomok kon umat-Nea. 10Guman i Tuhan, “Itoi mita in bangusa-Ku in intau mita bilog! Mosia in diábí nonotaau in onu bo onu. Mosia in naonda bo ungkú bobó inta diá mogaú, táe tongábí mosiug mako bo tumogoindop. Mosanang totok in mosia in mosiug! 11Mosia in naonda bo ungkú turá inta diá kon dodai in onda in mobotug. Itoi mita tatua in diá momangaḻe. Kon batúannea mogaid kinooibogbí in gina bo motayak kon kauntungannea tontaní. 12Intau mita moḷoḷoḷangu mita tatua in moguman, ‘Igai monginum in kita kon anggur bo monginum modapot in moorop! Ikoḷom in mopia-pia nongkon singgai naa!’ ”
Currently Selected:
YESAYA 56: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
