YESAYA 59
59
Nabi nongutuk kon dosa mita in bangusa tatua
1Dika morai kon ki Tuhan in moiḻiudon in yangkó in moposaḷamat kon i monimu, andeka bongoḷan totok in mokidongog kon kuanimu. 2Popisí in aidmubí inta moraat dá doí in Sia mokidongog kon tungkuḷ in moiko nosambayang kon i-Nia. Dosamubí mita inta nopotondí kon i monimu nongkon i Allah. 3Moiko in kotaḷá popisí in nonguboḷ bo nonombogá, sin ain nogaid kon inta moraat bo noḻimod.
4Moiko in nopongadu in pelekara takin diá in dodoyonan bo nohakim takin diá moadil. Moiko in nonguboḷ bo mopongata kon inta diá in mangaḻenea, moiko in momia kon tomayá sin mopobodito kon intau ibanea bo mogaid kon inta moraat. 5-6Tomayámu mita inta moraat modia kon popatoi naonda bo natu in uḷag mobisa. Aka natu tatua ḷosion, yo ḷumuaidon in uḷagnea. Tomayá tatua in totokbí in diá in mangaḻenea kon inimu, naonda bo pakeang inta ginaboḷ nongkon pugad in tontoḷawá 7#Rm. 3:15-17 Moiko in umuranbí monomayá kon inta moraat, bo moibogdon ḷagi mogaid kon tua. Diábí in ondok moiko in moḻimod kon intau inta diá kotaḷá. Kon ondakabí in bayáanmu, moiko in monaḷámaidon kon inta morumbun bo inta mokoyopú. 8Moiko in diábí moramuji kon kobiagan mopopiaan, bo bayongan in aidmu diá moadil. Daḷanmu in mobelu-belung, bo intau inta dumudui kon daḷan tatua in diábí mosanang.
Bangusa tatua in nongaku kon dosa monia
9Bangusa tatua in moguman kon i Allah,
“Tanaa in kinotaauandon nami
kon nongonu sin Iko in diábí noposaḷamat kon inami
nongkon intau mita inta nondorot kon inami.
Kami in mogoḷat mako kon bayag,
táe tongábí oyúon in sindip.
10Kami in mongokap naonda bo intau bilog;
kon noutu in singgai kami in moipintud naonda bo moonggot kon doḷom;
kon yuak in intau nobiag kami in naonda bo intau minatoi.
11Kami in inangoian in ondok bo morobonoḷ in dodob;
kami in motayak kon inta moadil, táe diá onda;
kami in moharap kon kasaḷamatan táe diá in mangaḻenea.
12Totuu mobayong in aid moraat nami kon ini-Mu;
dosa mita nami mopotaḷá kon inami.
Kami in totu-totuudon nonotaau kon aid nami moraat;
bo nonotaau kon dosa mita nami.
13Kami in nonguboḷdon bo nomarontak kon i Tuhan,
bo doí dumudui kon i Allah nami.
Kami in nondorotdon kon intau ibanea bo nobaḷui in raian;
raian nami in noiḷaḻedon, bo tosingogon mita nami in uboḷ.
14Hukum inta moadil in pinosídon,
bo inta moadil in pinoyayúdon.
Aid motuḻid in diádon pinandungmai kon tampat mita poyoyodungkuḷan,
bo gina motuḻid in diádon pinandungmai.
15Diádon in intau inta mojujur,
bo ki ine in yumayú kon inta moraat
siadon tontaní in mobaḻí kuruban in aid moraat.”
Ki Tuhan in taḷaoḷat sin moposaḷamat kon umat-Nea
Ki Tuhan in nokoontongdon bo diábí nopia in gina-Nea kon diádon in koadilan. 16#Yes. 63:5 Noherang in Sia kon diádon in mamangoi bo diá in moduḷu. Dá nomaké in Sia in kawasa-Nea tontaní sin moposaḷamat bo mobogoi kon i monia in kountungan. 17#Ep. 6:14, 17; Tes.1. 5:8 Sia in mopomaké in koadilan bo kasaḷamatan nobaḻí ḷambung uatoi bo sapoyo uwaja. Sia in moḷongasi mopoguḻí kon kaadaan bo motuḻí kon aid diá moadil. 18Sia in motuḻí kon musung-Nea mita podudui in aid monia. Nodapot in bangusa mita kon ḻibuton mita inta moyayú in diábí kotaḻiban in hukuman-Nea. 19Kawasa bo koagung-Nea in koondokbí in bayongan in intau nongkon pomukaan nodapot in toyopan. Sia in mamangoibí naonda bo ongkag inta motoḷog inta pinondoradak mako in tompot inta moropot.
20 #
Rm. 11:26
Ki Tuhan in noguman kon umat-Nea, “Akuoi in mamangoibí in Yerusalem sin moposaḷamat kon i monimu komintan inta nogogaidon in nogaid kon dosamu mita. 21Akuoi in momia kon dodandian takin i monimu: Moiko in ogoian-Ku in kawasa-Ku bo totundú-Ku modapot in mononoi. Tundúdon kon i adímu mita sinbá mosia in motaau doman motundú kon tua kon adí bo ompu tanaa mako modapot in mononoi.”
Currently Selected:
YESAYA 59: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
