YOHANES 20
20
Poḷoḷobongan inta nokosong
(Mat. 28:1-8; Mrk. 16:1-8; Luk. 24:1-12)
1Kon singgai in Diminggu modiugpa mobayag, ki Maria Magdalena minayá in poḷoḷobongan. Inindoianneamai yo batu inta pinonaḷob noḻitoidon nongkon bubú in poḷoḷobongan tatua. 2Dá noribatuk in sia bo minayá notayak kon i Simon Petrus bo kon murí inta kinotabi totok i Yesus, bo noguman, “Ki Tuhan in ginamádon in intau nongkon poḷoḷobongan. Diá kinotaauanku mongo sinagú monia kon onda.”
3Ki Petrus bo murí-Nea ibanea tatua minayá in poḷoḷobongan. 4Taya dua tumpaḷa noribatuk, táe murí tobatú tatua in moḻika-ḻikat nongkon i Petrus, bo sia in muna nodapot kon poḷoḷobongan. 5Sia in iḷumongow kon poḷoḷobongan tatua bo inontongnea in pusí inta pinobakut noiukat mako kon tua, táe diábí in sia sinumuot. 6Bo noiangoidon in ki Petrus. Ki Petrus in baya-bayá sinumuot kon bonu in poḷoḷobongan tatua. Sia in nokoontong doman kon pusí inta pinobakut kon mayat in noiukat mako kon tua, 7táe pusí inta pinobakut kon uḷu i Yesus diábí noidiug kon tua, tua in iḻitodbí tontaní. 8Onda intua murí inta noiyaput muna tua in sinumuotdon doman. Tua inontongnea bo nopirisaya doman in sia. (9Dapot kon dodai intua diápa kino mangaḻean monia in onu inta pinais kon bonu in Buk Motusi kon Sia in mustibí mobiag nongkon kinopatoian-Nea.) 10Nopaḷut mako kon tua murí mita i Yesus tatua in nobui.
Ki Yesus nokipogontong kon i Maria Magdalena
(Mat. 28:9-10; Mrk. 16:9-11)
11Táe ki Maria Magdalena in simindogpa mako kon tayowon poḷoḷobongan tatua bo mongombaḷmai. Koyogot in sia nongombaḷ, iḷumongow kon bonu in poḷoḷobongan, 12bo inontongnea in malaekat doyowa nogiḷambung nobudó. Mosia in iḻimitú kon tampat inta pinoguḻidan kon mayat i Yesus. Tobatú kon dotá in uḷuan, bo tobatú kon dotá in sioḷan. 13Malaekat mita tatua in noḻibó, “Iná, nongonu sin mongombaḷ?”
Ki Maria in noguman, “Ki Tuhanku in ginamádon in intau, bo diá doman kinotaauanku mongo pinobayá monia in onda.”
14Naonda in nosingog mako natua, sia in nobobui ná tumi bo inontongnea in ki Yesus sinimindog kon tua. Táe diábí kinotaauannea kon ki Yesus intua. 15Ki Yesus noḻibó kon inia, “Iná, nongonu sin mongombaḷ? Ki ine in tayakon i Iná?”
Sinangka i Maria kon Sia tua in moḷoḷukadbí kon taman tatua, dá sia in noguman, “Amá, aka ki Amá in nomamping kon i-Nia nongkon naa, yo tuḷungaipa poguman kon inakó mongo kon onda in pinotagúan i Amá kon i-Nia, sinbá motaauku bayáan gamáan in Sia.”
16Ki Yesus in noguman kon inia, “Maria!”
Ki Maria inimindoi kon i Yesus bo noguman kon bonu in singog in Ibrani, “Rabuni!” (Mangaḻenea “Guru”.)
17“Dikapa kadaian in Akuoi,” guman i Yesus kon inia, “sin Akuoi in diápa namonik kon i Amá. Táe bayádon kon i utat-Ku mita, bo potaaudon kon i monia kon tanaa Akuoi in mayá kon i Amá-Ku bo kon i Amá doman monimu, kon i Allah-Ku bo kon i Allah-mu.”
18Dá binayá domandon i Maria pinotaau kon murí mita i Yesus, kon inontongneadon in ki Tuhan bo ki Tuhanbí doman in noguman kon tua komintan kon inia.
Ki Yesus nokipogontong kon murí-Nea mita
(Mat. 28:16-20; Mrk. 16:14-18; Luk. 24:36-49)
19Kon singgai doman in Diminggu tatua, naonda in nodoḷomdon, murí mita i Yesus noyosipun kon baḷoi tobatú bo kinunsían monia komintan in ḷoḻingkop, sin moondok kon intau mita in Yahudi. Táe ki Yesus in baḷúbí noisindog magí kon yua-yuak monia bo noguman, “Salam dodamean bo kobiagan motompia kotaki-takin monimu.”
20Nosingog mako kon natua, pinoontong-Nea in ḻima bo sian-Nea kon i monia. Nopia totok in gina monia naonda in nokoontong kon i Tuhan. 21Bo ki Yesus in noguman kon i monia bui, “Salam dodamean bo kobiagan motompia kon i monimu. Ná ki Amá nopotabá kon i-Nakó, yo natua doman in Akuoi mopotabá kon i monimu.” 22Nosingog mako natua, Sia in nopoirupdon in tompot-Nea kon i monia bo noguman, “Tarimadon in Roho i Allah. 23#Mat. 16:19, 18:18 Aka moiko in mongampung kon dosa in tobatú intau, yo ampungan doman i Allah in sia. Aka diá ampungan monimu in dosa in tobatú intau, dá diábí doman ampungan i Allah in sia.”
Ki Yesus bo ki Tomas
24Ki Tomas (inta dinonoi ki “Apang”), tobatú murí inta kon sigad in murí-Nea mopuḷú bodoyowá tua in diá koyota-yotakin monia dodai in ki Yesus namangoi. 25Dá murí mita i Yesus ibanea in noguman kon i Tomas, “Kami ain nokoontong kon i Tuhan!”
Táe ki Tomas in notubag: “Aka diápa ontongonku tontaní in paḷot in pakú kon ḻima-Nea bo kon sian-Nea tua, yo totokbí in diá mopirisaya in akuoi.”
26Naonda in todiminggu noiduduimai kon tua, murí mita i Yesus noyosipun bui kon tua, ki Tomas in oyúon domandon kon tua noyotakin monia. Komintan kinunsían monia in ḷoḻingkop, táe ki Yesus in namangoi bo sinimindog kon yua-yuak monia bo noguman, “Salam dodamean bo kobiagan motompia kotaki-takin monimu.” 27Noiduduimai kon tua, ki Yesus in noguman kon i Tomas, “Indoiaidon in ḻima-Ku, bo popoturakdon kon naa in tononuyúmu. Tonggó magí in ḻimamu bo popotudakdon kon sian-Ku. Dikadon moḻia-ḻiaw in gina, táe popirisayadon!”
28Ki Tomas in noguman kon i Yesus, “Tuhanku bo Allahku!”
29Dá ki Yesus in noguman kon inia, “Iko in nopirisaya popisí in inontongmudon toh? Kosanangdon totok in mosia inta umpaka diá nokoontong táe nopirisaya kon i-Nakó!”
Makusud in buk tanaa
30Nobayongpabí in soaḷ mita inta mokoherang in pinomia i Yesus kon tayowon in murí-Nea mita, táe diádon pinais kon bonu in buk tanaa. 31Táe onu inta pinais kon buk tanaa, makusudnea kon bá mopirisaya#20:31: mopirisaya: tongonumai in naska dungkuḷmai: umuran mopirisaya. in moiko kon ki Yesusbí tua in Datu Mopoposaḷamat, bo ki Adí i Allah, bo popisí in pirisayamu tatua dá mokouḻí i moiko kon kobiagan.
Currently Selected:
YOHANES 20: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
