YOHANES 21
21
Ki Yesus nokipogontong kon murí-Nea taya pitu
1Nopaḷut mako kon tua ki Yesus in bui nokipogontong kon murí-Nea taya pitu kon Danow Tiberias. Nanaa in kino bobaḻínea: 2Kon singgai tobatú, ki Simon Petrus, ki Tomas inta donoionmai “Apang”. ki Natanael inta nongkon Kana kon Galilea, ki adí mita i Zebedeus, bo murí doman mita i Yesus taya dua in namangoi noyosipun. 3#Luk. 5:5 Ki Simon Petrus in noguman kon i monia: “Akuoi mayá modomok kon toyá.”
“Kami in dumudui,” tubag monia kon inia. Dá minayádon in mosia kon uangga. Táe tonggobii tua mosia in diábí nokoaḷap kon toyá tobatúmai. 4Wakutu mata in singgai momangkoidon momuká, ki Yesus in sinimindogdon kon pintad, táe diábí kinotaauan monia kon ki Yesus intua. 5Ki Yesus in noḻibó kon i monia, “Adí-Ku mita, oyúon degá in toyá kon i monimu?”
“Diá,” tubag monia.
6 #
Luk. 5:6
Ki Yesus in noguman kon i monia, “Pogarabdon in landarámu kon dotá in koḷanan uangga, dá mokoaḷapbí in moiko kon toyá.” Dá pinogarabdon monia in landará tatua, bo mosia in diádon nokougut bui sin nobarong totok in toyá kon bonunea.
7Dá murí inta totok in kinotabi i Yesus in noguman kon i Petrus, “Ki Tuhan intua!” Naonda in kinotaauan i Petrus kon ki Tuhan intua, nogiḷambungdon in sia (sin diá nogiḷambung in sia) bo iḷumabú in sia kon tubig. 8Murí mita ibanea in dinumudui kon inia nopobayá in toba takin uangga bo kougu-ugut doman in landará inta nopuḻing in toyá, sin diábí noyayú in mosia nongkon toba, degá tongá mogatutmai nometer. 9Naonda in mosia noponagdon kon toba, inontongdon monia baga in tuḷu kon tua bo oyúon doman in toyá bo roti kon tudunea. 10Ki Yesus in noguman kon i monia, “Podiaka mangoi kon tongonumai nobungá in toyá inta bagu dinomok monimu nion.”
11Ki Simon Petrus in sinumakoi kon uangga bo nogugut kon landará bo pinobayá in toba. Landará tatua in nopuḻing in toyá mongoḷoben, mogatut bo ḻima nopuḷú botoḷú in kobayongnea. Táe umpaka natua in kobayong toyá, yo diábí nobisik in landará. 12Ki Yesus in noguman kon i monia, “Koḻigai mongaandon.” Diá tobatúmai in kon sigad monia tua in nokobaḻí noḻibó, “Mongo ki ine in ki Amá!” Sin kinotaauandon monia kon Tuhan in Sia. 13Onda intua ki Yesus in dinimiug kon i monia bo nogamá kon roti bo nobogoi kon i monia. Ná doman tua, Sia in nobogoi doman in toyá.
14Naa in kon intoḷuneadon in ki Yesus nokipogontong kon murí-Nea mita naonda in biniagdon bui in Sia nongkon sigad in intau mita minatoi.
Koyow i Yesus kon i Petrus
15Nopaḷut mako mosia nongaan, ki Yesus in noguman kon i Simon Petrus, “Simon, adí i Yohanes, degá tabimu in moḷobe-ḷoben nongkon tabi monia kon i-Nakó?”
“Totuu, Tuhan,” tubag i Petrus, “Kinotaauanbí i Tuhan kon akuoi in motabibí kon i Tuhan.”
Ki Yesus in noguman kon inia, “Ḷukadaidon in ki adí mita in domba-Ku.”
16Ki Yesus in bui noḻibó nogindua, “Simon adí i Yohanes, degá motabi iko kon i-Nakó?”
“Totuu, Tuhan,” tubag i Petrus, “Kinotaauanbí i Tuhan kon akuoi in motabibí kon i Tuhan.”
Ki Yesus in noguman kon inia, “Ḷukadaidon in domba-Ku mita.”
17Intoḷuneadon ki Yesus in noḻibó kon inia, “Simon adí i Yohanes, motabi degá in iko kon i-Nakó?”
Moajardon totok in gina i Petrus sin ki Yesus nodapot in kotoḷu in noḻibó kon inia. Dá ki Petrus in notubag bui, “Tuhan, kinotaauanbí i Tuhan in bayongan yagi-yagi. Kinotaauanbí i Tuhan kon akuoi in motabibí kon i Tuhan!”
Bo ki Yesus in noguman kon inia, “Ḷukadaidon in domba-Ku mita. 18Naa in poguman-Ku kon inimu: Wakutu in iko noguodpa, ikodon tontaní in nogakod kon ogotanmu, bo mayábí in onda in koibogmu. Táe aka iko moguyangdon, yo potuntunmubí in ḻimamu bo intaudon ibanea in mogakod kon inimu bo diaannea kon tampat inta kodoímu bayáan.” 19(Singog mita i Yesus mopotaaubí kon naonda in kopopatoi i Petrus kon singgai moiduduimai sin mopomulia kon i Allah.) Nopaḷut mako kon tua ki Yesus in noguman kon i Petrus, “Duduidon kon i-Nakó!”
Ki Yesus takin dumodudui-Nea ibanea
20 #
Yoh. 13:25
Wakutu in ki Petrus nobobui, sia in nokoontong kon tumineamai in murí inta totok in kinotabi i Yesus. (Sia tua inta iḻimitú kon diug i Yesus kon wakutu in nongaan bo sia doman inta noḻibó kon i Yesus, “Ki ine in moposarakan kon i-Nia?”) 21Nokoontongmai kon inia, ki Petrus in noḻibó kon i Yesus, “Tuhan, naonda in sia naa?”
22Ki Yesus in notubag, “Aka moibog in Akuoi kon sia in umuranpa mobiag modapot in Akuoi mamangoi bui, yo tua in deemanbí iko in kitogi totaau. Táe iko in duduidon kon i-Nakó!”
23Dá noisiardon in habar kon sigad in dumodudui mita i Yesus, kon murí-Nea tatua in diábí mato-matoi. Bokaka diábí in ki Yesus noguman, kon diá matoi in murí-Nea tatua, ki Yesus in tongábí noguman, “Aka moibog in Akuoi kon sia in umuranpa mobiag modapot in Akuoi mamangoi bui, yo tua in deemanbí iko in kitogi totaau.”
24Murí tatuata inta nobogoi in kosakusian kon soaḷ mita inta ain nobaḻí tanaa. Sia domandon tatua inta ain nomais kon naa. Bo kinotaauanbí naton kon onu in pinogumannea tatua in totuubí.
Singog Pinonangkup
25Nobayongpabí in soaḷ mita ibanea inta inaidan i Yesus, táe aka daiton paison intua, yo rasaanku dunia naa in diábí tugatan potagúan kon onu in paison tatua.
Currently Selected:
YOHANES 21: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
