YOSUA 1
1
Ki Yosua pinotabá i Allah nogagow kon butá in Kanaan
1Naonda in ki Musa, mogogundoi i Tuhan tua minatoi, ki Tuhan noguman kon i Yosua adí i Nun inta bobantung i Musa. 2Guman-Nea, “Mogogundoi-Ku ki Musa minatoidon. Dá tanaa iko takin bayongan in umat Israel posadiadon ḷumoḷan kon Ongkag in Yordan, bo mayá tumuot kon butá inta ogoi-Ku kon i monia. 3#Ul. 11:24-25 Pinoguman-Kudon kon i Musa kon bayongan butá inta koyitakan monimu in inogoi-Kudon kon inimu, Yosua, bo kon bayongan umat-Ku. 4Butámu in mobanat nongkon padang gurun kon toḷatan modapot kon Buḷud in Libanon kon utuan bo nongkon Ongkag in Eprat inta moḷoben kon pomukaan noitakin in butá in bangusa in Het nodapot kon Dagat Toyuak kon toyopan. 5#Ul. 31:6, 8; Ibr. 13:5 Tobatúmai in intau diábí in mokotaḷow kon inimu, Yosua, kinoouputbí in kinobiaganmu. Sin umuran-Kubí takinan in iko ná ki Musa koḻipod. Diábí in Akuoi monaḷámai kon inimu. 6#Ul. 31:6, 7, 23 Pokoyakin bo pokobarani in iko, sin ikobí in modia kon bangusa tanaa kon tungkuḷ in mosia ḻimitú kon butá inta pinodandi-Ku kon mogoguyang monia. 7Tongá, musti in iko totu-totuu moyakin bo mobarani. Musti totu-totuumu ḷukadan bo duduian in bayongan hukum inta inogoi i Musa mogogundoi-Ku tua kon inimu, dikabí taḷaanmu in topiḻikamai, dá onuka in aidanmu kodapotanbí. 8Buk in hukum tatua in mustibí umuran bacaanmu kon tayowon in umat-Ku. Balajar in buk tatua singgai bo doḷom, sinbá oaidmu umuran moitombutung kon onu inta pinais kon buk tatua. Aka aidanmu in bayongan tua, kobobiagmu in motompia totok bo bayongan onu inta aidanmu in kodapotanbí. 9Pokotorop, Akuoi ain nomarenta kon inimu sinbá totu-totuudon in iko moyakin bo mobarani! Dika in iko moondok ande mogagawang, sin Akuoi ki Tuhan Allahmu in umuranbí kotaki-takinmu kon ondakabí in bayáanmu.”
Ki Yosua nobogoi in parenta bo topotundú kon umat in Israel
10Dá ki Yosua nomarentadon kon itoi mita in umat Israel 11sinbá moḻibu kon bayongan pinononḷoḷaigan in umat Israel bo nopotaau in parenta tanaa, “Posadia kon tongkaaḷ, sin toḷupa nosinggai nongkon naa bo moiko in mustidon ḷumoḷan kon Ongkag in Yordan sin mayá ḻimitú kon butá inta inogoi i Tuhan Allahmu kon inimu.”
12 #
Pin. 32:28-32; Ul. 3:18-20; Yos. 22:1-6 Kon suku i Ruben, suku i Gad, bo tongobotak in suku i Manasye, ki Yosua noguman, 13“Pokotorop! Ki Musa mogogundoi i Tuhan tua ain noguman kon inimu kon butá inta kon dotá in pomukaan kon Ongkag in Yordan naa in ogoi i Tuhan Allahmu kon inimu mobaḻí butámu. 14Komintan ki adí, buḷoi bo bobiagonmu in motaaubí mogutun kon naa, tongá tontaramu mita in musti mosadia moparang bo umuna kon intau mita in Israel ibanea ḷumoḷan kon Ongkag in Yordan. 15Musti in moiko motuḷung kon i monia modapot in mosia moiḻitú kon butá inta kon dotá in toyopan kon Ongkag in Yordan tanaa inta inogoi i Tuhan Allahmu kon i monia. Naonda in ki Tuhan nobogoi in kaadaan mopia kon bayongan in bangusa Israel, bain tua bo moiko motaau mobui kon butámu tontaní kon dotá in pomukaan kon Yordan tanaa, inta inogoi i Musa mogogundoi i Tuhan tatua kon inimu.”
16Dá suku i Ruben, i Gad bo tongobotak in suku i Manasye tatua in notubag, “Onukabí in parentaanmu kon inami, aidanbí nami, bo kon ondakabí in popotabáanmu kon inami mayá, yo mayábí doman in kami. 17Kami in mokopotoinduduibí kon inimu, ná doman kami umuran nokopotoindudui kon i Musa. Poigumon mako ki Tuhan Allahmu umuran kotaki-takinmu ná doman pinononakin-Nea kon i Musa! 18Bayongan in intau inta doí dumudui kon parentamu bo doí mokidongog kon tosingogonmu, in hukumon matoi. Pokoyakin bo pokobarani in iko!”
Currently Selected:
YOSUA 1: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
