YOSUA 18
18
Pinosilaian kon ki agat in butá inta pinodandi i Tuhan
1Naonda in nopotungkud mako in butá inta pinodandi i Tuhan, bayongan umat in Israel noyosipun kon Silo, bo mosia noposindog in Ḷoḷaigan Koangoian i Tuhan. 2Pitupa nosuku in bangusa Israel in diá notarima kon tonsilai butá. 3Dá ki Yosua noguman kon umat in Israel, “Modapotpa in toonu in pogoḷatan monimu, bo bain tua moiko mayá ḻimitú kon butá inta inogoi i Tuhan, Allah in mogoguyangmu, kon inimu? 4Pomiḻídon kon intau tumototoḷu in kon batúan in suku. Potabákudon in mosia mayá monaridi kon bayongan in butá tanaa sin momais kon sigad mita in butá mita inta koibog monia mobaḻí kapunyaan monia. Mopaḷut mako kon tua, mosia in musti mobui mangoi kon inakó. 5Butá tatua in musti silaion pitu. Ki Yohuda in notantú bidon kon butánea kon dotá in toḷatan, bo ki Yusup in kon butánea inta kon dotá in utuan. 6Gambar in sigad in butá mita inta pitu notonsilai tatua in musti pomiaan, bo ogoi kon inakó. Bain pogonikku in undi#18:6: mopogonik in undi: Indoiai 14:2. sin monotaau mongo onu in sinantú i Allah kon i monimu. 7Tongá suku in Lewi in diá motarima kon tonsilai butá moyotakin monimu, sin oaidan saḷaku imang mita inta mogundoi kon i Tuhan tuatadon in nobaḻí tonsilai kon i monia. Bo aka suku i Gad, i Ruben bo tongosilai in suku i Manasye, totuu kon mosia in notarimadon kon tonsilainea kon dotá in pomukaan kon Ongkag in Yordan. Ki Musa mogogundoi i Tuhan, ain nobogoi in butá tatua kon i monia.”
8Dá ki Yosua in nobogoidon in topotundú mita tanaa kon intau mita tatua, “Bayádon taridiai in bayongan butá tanaa bo pomiaaidon kon gambar takin sigadnea mita; onda intua angoidon bui kon inakó. Bain mopogonik in akuoi in undi kon naa kon Silo sin monotaau mongo onu inta sinantú i Tuhan kon i monimu.” Naonda in notarima mako kon topotundú mita tatua nongkon i Yosua, minayádon in mosia nonaridi kon butá tatua. 9Bayongan in butá tatua iḻibu monia, bo poḷat pinais monia in sigad mita in butá inta pitu notonsilai tatua bo poḷat doman pinais monia in kotá mita inta kon bonunea. Onda intua mosia nobui kon i Yosua kon pinononḷoḷaigan kon Silo. 10Bo nopogonik in undi in ki Yosua sin monotaau kon onu in sinantú i Tuhan kon i monia. Nopaḷut mako kon tua ki Yosua nobogoi in tonsilai butá kon batúan in suku bangusa Israel inta diápa nokouḻí kon tonsilai butá.
Butá inta inogoi kon suku i Benyamin
11Tonsilai muna tuata inta noiḷabú kon motoḷuadí mita nongkon suku i Benyamin. Butá tonsilai monia tua in noiukat kon sigad in suku Yohuda bo butá in suku buí i Yusup. 12Kon dotá in utuan, sigad mita in butá monia pinangkoi kon Ongkag in Yordan, bo nopobayá ná sipangkoion mita in buḷud kon dotá in utuan kon Yerikho, onda intua nopobayá ná toyopan nongin buḷud nodapot kon butá in padang gurun Bet-Awen. 13Botok in pinosigadan tatua minayá doman ná sipangkoion in buḷud kon dotá in toḷatan Lus (inta sinangoian Betel), bo nosiḻig kon Atarot-Adar kon buḷud kon dotá in toḷatan Bet-Horon-Hilir. 14Nongkon dotá in toyopan kon buḷud tatua, botok sigad in butá tatua nomurow ná toḷatan nopobayá ná Kiryat-Baal (inta Kiryat-Yearim). Kiryat-Baal in kapunyaan in suku Yohuda. Tuata in botok sigad in butá tatua kon dotá in toyopan. 15Sigad mita kon dotá in toḷatan pinangkoi nongkon bingkí in Kiryat-Yearim bo minayá kon bokaká mita in tubig in Me-Neptoah, 16bo dongka nosiḻig kon sipangkoion in buḷud inta noyogintayow in Ḷopá in Hinom kon popod in utuan kon Ḷopá in Repaim. Onda intua botok in sigad tatua in nopobayá ná toḷatan nongin Ḷopá in Hinom kon dotá in toḷatan kon sipangkoion mita in buḷud kon butá in Yebus, nomoḷat nopobayá ná En-Rogel, 17nomurow ná utuan kon En-Semes, bo dongka nopobayá ná Gililot kon ḷoḷan in Pononakodan in Adumim. Nopaḷut mako kon tua botok sigad tatua nosiḻig kon Batu Bohan (Bohan in ki adí i Ruben), 18bodongka nongin dotá in utuan kon sipangkoion mita in buḷud inta noyogintayow in Ḷopá in Yordan, onda intua nosiḻig kon ḷopá tatua, 19nongin utuan kon sipangkoion mita in buḷud Bet-Hogla, bo sinimpod kon dotá in utuan kon Laut Mati kon minanga in Ongkag in Yordan. Tuata in sigad kon dotá in toḷatan. 20Ongkag in Yordan nobaḻí sigad kon dotá in pomukaan. Natuata in sigad mita in butá inta inogoi kon motoḷuadí mita kon bonu in suku i Benyamin sin mobaḻí kapunyaan monia.
21-24Kotá mita inta nobaḻí kapunyaan in motoḷuadí kon bonu in suku i Benyamin, kobayongnea komintan in mopuḷú bodoyowá in kotá takin ḻipú mita kon diugneamai, tuata in Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Opra, Kepar-Haamonai, Opni, bo Geba. 25-28Bo mopuḷú doman bo opat in kotá noiduduimai naa takin ḻipú mita inta kon diugneamai, Gibeon, Rama, Beerot, Mizpa, Kepira, Moza, Rekem, Yirpeel, Tarala, Zela, Elep, Yebus (inta Yerusalem), Gibea bo Kiryat-Yearim.
Tuata in butá mita inta inogoi kon motoḷuadí mita inta kon bonu in suku i Benyamin sin binaḻí kapunyaan monia.
Currently Selected:
YOSUA 18: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.