YOSUA 19
19
Butá inta inogoi kon suku i Simeon
1Pinosilaian nogindua tuata in butá mita inta motoḷuadí mita inta kon bonu in suku i Simeon. Sigad in butá monia sinumuot nodapot kon bonu in sigad in butá kapunyaan in suku Yohuda. 2-6#Taw.1. 4:28-33 Mosia inogoian in kotá mopuḷú botoḷú noiduduimai naa takin ḻipú mita kon diugneamai: Bersyeba, Syeba, Molada, Hazar-Sual, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, bo Saruhen.
7Bo opat doman in kotá inta noiduduimai naa takin ḻipú mita inta kon diugneamai: Ain, Rimon, Eter, bo Asan. 8Noituot doman in bayongan ḻipú kon ḻibumai in kotá mita tatua nodapot kon Baalat-Beer (tuata in Rama) kon butá kon dotá in toḷatan. Tuata in butá inta inogoi kon motoḷuadí mita nongkon suku i Simeon sin mobaḻí kapunyaan monia. 9Popisí in butá inta inogoi kon suku Yohuda noiḻiudon in oḷad, dá tongosilai nongkon butá tatua inogoi kon suku i Simeon.
Butá inta inogoi kon suku i Zebulon
10Pinosilaian nogintoḷu tuata in butá inta kon motoḷuadí mita inta kon bonu in suku i Zebulon. Sigad in butá inta inogoi kon i monia in nodapot kon Sarid. 11Nongkon Sarid, botok in sigad kon dotá in toyopan nopobayá ná Marala, bo noisigid kon Dabeset bo tapá kon dotá in pomukaan kon Yokneam. 12Botok sigad kon dotá in pomukaan pinangkoi nongkon Sarid nopobayá ná sigad in Khislot-Tabor, bo minayá ná Dobrat, bodongka notakod kon Yapia. 13Nongkon tua botok sigad tatua minayá ná pomukaan kon Gat-Heper bo Et-Kazin, bo nomurow ná Nea nopobayá ná Rimon. 14Kon dotá in utuan, sigad in butá tatua nomurow nopobayá ná Hanaton bo nopaḷuput kon Ḷopá in Yiptah-El. 15Kon bonu in butá in suku Zebulon tatua noibonu doman: in Katat, Nahalal, Simron, Yidala bo Betlehem. Butá monia tua in mopuḷú bodoyowá in kotá takin ḻipú mita inta kon diugneamai. 16Kotánea mita bo ḻipúnea mita tatua in noiukat kon bonu in butá inta inogoi kon motoḷuadí mita inta kon bonu in suku i Zebulon sin mobaḻí kapunyaan monia.
Butá inta inogoi kon suku i Isakhar
17Pinosilaian noginggopat tuata in butá inta kon motoḷuadí mita kon bonu in suku i Isakhar. 18Noibonu kon butá monia tua in: Yizreel, Khesulot, Sunem, 19Haparaim, Sion, Anaharat, 20Rabit, Kisyon, Ebes. 21Remet, En-Ganim, En-Hada bo Bet-Pazes. 22Sigad in butá monia tua noisigid kon Tabor, Sahazima, Bet-Semes, bo nopaḷuput kon Ongkag in Yordan. Butá monia tua in mopuḷú bo onom in kotá noitakin doman in ḻipú mita inta kon diugneamai. 23Kotánea mita bo ḻipúnea tua in noiukat kon bonu in butá inta inogoi kon motoḷuadí mita kon bonu in suku i Isakhar sin mobaḻí kapunyaan monia.
Butá inta inogoi kon suku i Asyer
24Pinosilaian noginḻima tuata in butá inta kon motoḷuadí mita inta kon bonu in suku i Asyer. 25Butá monia tua in: Helkat, Hali, Beten, Akhsap, 26Alamelek, Amad bo Misal. Sigad in butá monia kon dotá in toyopan noisigid kon Buḷud in Karmel bo Ongkag in Libnat. 27Nongkon tua botok in sigad monia tua nomurow ná pomukaan kon Bet-Dagon bo noisigid kon pinosigadan in Zebulon bo Ḷopá in Yiptah-El nopobayá ná utuan kon Bet-Emek bo Nehiel. Bo botok in sigad tatua minayá nomoḷat bui ná utuan kon Kabul, 28Ebron, Rehob, Hamon, bo Kana, nodapot kon Sidon. 29Nongkon tua botok in sigad tatua nomurow ná Rama nomoḷat nodapot kon kotá in Tirus, tobatú kotá inta oyúon in benteng; onda intua botok sigad tatua nomurow bui ná Hosa bo nopaḷuput kon Dagat Toyuak. Kon sigad mita tatua noibonu in Mahalab, Akhzib, 30Uma, Apek, bo Rehob. Kobayong in butá monia tua in doyowa nopuḷú bodoyowá in kotá takin ḻipú mita kon diugneamai. 31Kotá mita takin ḻipúnea tatua noiukat kon bonu in butá inta inogoi kon motoḷuadí mita inta kon bonu in suku i Asyer sin mobaḻí butá kapunyaan monia.
Butá inta inogoi kon suku i Naptali
32Pinosilaian noginggonom tuata in butá inta kon motoḷuadí kon bonu in suku i Naptali. 33Sigad in butá monia in pinangkoi nongkon Helep, nodapot kon pangkoi in ek kon Zaananim, bo minayá kon Adami-Nekeb, bo nopobayá ná Yabneel, nodapot kon Lakum, onda intua nopaḷuput kon Ongkag in Yordan. 34Nongkon tua botok in sigad in butá tatua nomurow ná toyopan kon Aznot-Tabor, bo nongkon tua nopobayá ná Hukok. Kon dotá in toḷatan, butá tanaa noyosigad in butá in Zebulon, kon dotá in toyopan noyosigad in Asyer, bo kon dotá in pomukaan noyosigad in Ongkag in Yordan. 35Kotá mita inta oyúon in benteng in: Zidim, Zer, Hamat, Rakat, Kineret, 36Adama, Rama, Hazor, 37Kedes, Edrei, En-Hazor, 38Yiron, Migdal-El, Horem, Bet-Anat, bo Bet-Semes. Kobayong in butá monia tua in mopuḷú bo siow in kotá takin ḻipú mita inta kon diugneamai. 39Kotá mita bo ḻipúnea mita tatua in noiukat kon bonu in butá inta inogoi kon motoḷuadí inta kon bonu in suku i Naptali sin mobaḻí kapunyaan monia.
Butá inta inogoi kon suku i Dan
40Pinosilaian noginpitu tuata in butá inta kon motoḷuadí mita inta kon bonu in suku i Dan. 41Butá monia naa in Zora, Esytaol, Ir-Semes, 42Saalabin, Ayalon, Yitla, 43Elon, Timna, Ekron, 44Elteke, Gibeton, Baalat, 45Yehud, Beneberak, Gat-Rimon, 46Me-Yarkon, Rakon, bo butá doman kon diug in Yope. 47#Hak. 18:27-29 Intau mita in suku Dan ain kinobuḻian in tongosilai nongkon butá monia,#19:47: kinobuḻian … butá monia: Kon bonu in naska Ibrani in pinais butá monia iḻumuai nongkon i monia. Kon bonu in Alkitab tosingogon in Indonesia Terjemahan Mobagu in pinais butá monia nobaḻí inimintok. dá mosia in minayá kon Lesem bo nonubu kon kotá tatua. Mosia nokoagow, bo noḻimod kon intau mita inta nogutun kon tua, bo iḻitúan monia in kotá tatua. Dá nogutundon in mosia kon tua bo binaḷuaian monia in tangoi in kotá Lesem tatua nobaḻí kotá Dan, podudui in tangoi in mogoguyang monia. 48Kotá mita bo ḻipú mita tatua noiukat kon bonu in butá inta inogoi kon motoḷuadí mita inta kon bonu in suku Dan sin mobaḻí kapunyaan monia.
Pinosilaian pangabisan
49Naonda in umat Israel nopaḷut nosilai kon butá kon tua, mosia nobogoi kon i Yosua adí i Nun tongosilai in butá sin mobaḻí kapunyaannea. 50Ná inta ain pinarenta i Tuhan, mosia in nobogoi kon inia in kotá inta pinoigumnea, inta: Timnat-Serah kon buḷud in Epraim. Ki Yosua noposindog bui in kotá tatua, bodongka nogutun kon tua.
51Natuata in ki Imang Eleazar, ki Yosua adí i Nun bo tongguḷu mita in motoḷuadí kon bonu in suku mita kon bangusa Israel nosilai kon butá tatua takin nomaké in undi sin mopoigum in topotundú nongkon i Tuhan. Inaidan monia intua kon Silo kon tayowon in ngara in Ḷoḷaigan i Tuhan. Nopaḷutdon in pinosilaian kon butá tatua.
Currently Selected:
YOSUA 19: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.