YOSUA 20
20
Kotá mita pogogadopan
1 #
Pin. 35:6-32; Ul. 4:41-43, 19:1-13 Noiduduimai kon tua ki Tuhan nopotabá kon i Yosua 2moguman nanaa kon intau in Israel, “Akuoi ain nomarenta kon i Musa sinbá mopotaau in sia kon inimu in kotá mita pogogadopan, kotá inta motaau poḷoḷaguian in intau sinbá ḷukadan. Tanaa in piḻídon in kotá mita tatua. 3Intau inta diá sinumontuon noḻimod kon intau ibanea, motaaubí in mayá mogadop kon kotá tatua sinbá moiḷagui kon intau inta moibog monuḻí kon inia. 4Sia in motaaubí in moḷagui mayá in kotá tobatú kon sigad in kotá mita tatua, bo mayá in pongadilan kon ngara moḷoben in kotá tatua, bo moginsilang kon itoi mita kon tua onu inta ain nobaḻí. Itoi mita tatua in mobogoidon kon inia tumuot in kotá tatua, bo mobogoi in tampat pogutunannea. 5Aka intau inta moibog motuḻí kon inia mogaḷow kon inia modapot intua, dá intau mita inta kon kotá tatua in diábí motaau in tongá mopobió mako natua kon inia. Mustibí ḷukadan monia, sin sia in diábí sinumontuon noḻimod, bo deemanbí popisí in yaat in gina. 6Sia in motaaubí mogutun kon kotá tatua modapot in sia sidangondon kon tayowon intau mobayong, bo modapot in intau inta nobaḻí Imang Moḷoben kon dodai intua matoi. Bain tua bo intau tatua motaaudon mobui kon ḻipúnea inta ain sinaḷáannea.”
7Dá kon butá kon dotá in toyopan kon Ongkag in Yordan umat in Israel in nonantúdon kon kotá mita noiduduimai naa nobaḻí kotá pogogadopan: Kedes kon buḷud in Naptali kon Galilea, Sikhem kon buḷud in Epraim, bo Hebron kon buḷud in Yohuda. 8Kon butá kon dotá in pomukaan kon Ongkag in Yordan kon rata moḷantud kon padang gurun kon dotá in pomukaan kon Yerikho, mosia in nonantúdon kon kotá mita noiduduimai naa nobaḻí kotá pogogadopan: kotá in Bezer kon butá i Ruben, kotá in Ramot kon Gilead butá i Gad, bo kotá in Golan kon Basan, butá i Manasye. 9Tua komintan in kotá mita pogogadopan inta ain sinantú kon bayongan in umat in Israel bo kon bayongan in intau ango-angoi inta nogutun kon yua-yuak monia. Pomuḷoi in intau inta diá sinumontuon in noḻimod kon intau ibanea, motaaubí in mayá in kotá mita tatua sin mogadop kon intau inta moibog motuḻí kon inia, sia in diábí motaau in ḻimodon aka diápa sidangon kon tayowon in intau mobayong.
Currently Selected:
YOSUA 20: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.