YOSUA 21
21
Kotá mita inta inogoi kon suku i Lewi
1-2 #
Pin. 35:1-8
Kon singgaimai tobatú tongguḷu mita in motoḷuadí kon bonu in suku i Lewi minayá in Silo kon butá in Kanaan, bo minayá kon tayowon i Imang Eleazar, i Yosua adí i Nun, bo tongguḷu mita in motoḷuadí in bayongan suku bangusa in Israel. Mosia noguman, “Pinongin i Musa, ki Tuhan ain nomarenta sinbá kami, intau mita in Lewi, ogoian in kotá mita pogogutunan nami bo butá mita popokaanan in bobiagon kon diugmai in kotá mita sin popokaanan in bobiagon nami.” 3Dá intau in Israel dinumudui kon parenta i Tuhan. Nongkon butá kapunyaan monia tontaní, mosia nobogoi kon intau in Lewi in kotá mita inta ain sinantú takin butá mita popokaanan in bobiagon monia.
4Inta muna-munamai totok nokouḻí kon kotánea mita in motoḷuadí mita inta nongkon inanakan i Kehat kon bonu in suku Lewi. Motoḷuadí mita nongkon buí i Imang Harun inogoian in kotá mopuḷú bo toḷu nongkon butá in suku i Yohuda, i Simeon bo i Benyamin. 5Motoḷuadí mita nongkon inanakan i Kehat inogoian in kotá mopuḷú nongkon butá in suku Epraim, suku Dan bo suku Manasye inta kon dotá in toyopan kon Ongkag in Yordan.
6Inanakan i Gerson nokouḻí kon kotá mopuḷú botoḷú nongkon butá in suku Isakhar, Asyer, Naptali bo suku Manasye inta kon dotá in pomukaan kon Ongkag in Yordan.
7Motoḷuadí mita nongkon inanakan i Merari nokouḻí kon mopuḷú bodoyowá in kotá nongkon butá in suku i Ruben, i Gad bo i Zebulon.
8Natuata in pinososilai in intau in Israel kon kotá mita tatua takin butá popokaanan kon bobiagon monia pinongin undi#21:8: pinongin undi: Indoiai 14:2. kon intau in Lewi, ná inta ain pinarenta i Tuhan pinongin i Musa.
Kotá mita inta inogoi kon inanakan i Kehat
9-19Nongkon inanakan i Kehat kon bonu in suku i Lewi, imang mita inta buí i Harun tua in muna-munamai notarima kon kotánea mita; mosia inogoian in kotá mopuḷú bo toḷu takin butá mita popokaanan in bobiagon monia, nongkon suku i Yohuda bo i Simeon, mosia notarima kon siow in kotá, tuata in: Libna, Yatir, Estemoa, Holon, Debir, Ain, Yuta, Bet-Semes bo Arba, inta sinangoian pinodudui kon tangoi i amá i Enak. Kotá tatua, inta masai naa sinangoiandon Hebron, in kotá pogogadopan tobatú inta kon buḷud in Yohuda. Gobá mita bo ḻipú mita in kotá tanaa aindon inogoi kon i Kaleb adí i Yepune sin mobaḻí butá kapunyaannea. Nongkon suku i Benyamin mosia in notarima kon opat in kotá, tuata in Gibeon, Geba, Anatot bo Almon.
20-26Motoḷuadí mita nongkon inanakan i Kehat inogoian in mopuḷú in kotá takin butá mita popokaanan in bobiagon monia. Nongkon suku i Epraim mosia in notarima doman kon opat in kotá, tuata in Bet-Horon, Kibzaim, Gezer bo Sikhem, tobatú kotá pogogadopan kon buḷud in Epraim. Nongkon suku Dan mosia in notarima kon opat in kotá, tuata in Elteke, Gibeton, Ayalon bo Gat-Rimon. Nongkon suku Manasye inta kon dotá in toyopan mosia in notarima kon doyowa in kotá, tuata in Taanakh bo Gat-Rimon.
Kotá mita inta inogoi kon inanakan i Gerson bo i Merari
27-33Suku tobatú nongkon inanakan ibanea kon bonu in suku i Lewi tuata in inanakan i Gerson. Motoḷuadí kon bonu in inanakan i Gerson tua inogoian in mopuḷú bo toḷu in kotá takin butá popokaanan in bobiagon monia. Nongkon suku i Manasye inta kon dotá in pomukaan mosia in notarima kon doyowa in kotá, tuata in Beestera bo Golan, tobatú kotá pogogadopan kon butá in Basan. Nongkon suku i Isakhar mosia in notarima kon opat in kotá, tuata in Kisyon, Dobrat, Yarmut bo En-Ganim. Nongkon suku i Asyer mosia notarima kon opat in kotá, tuata in Misal, Abdon, Helkat bo Rehob, Nongkon suku i Naptali mosia notarima kon toḷu in kotá, tuata in Hamat-Dor, Kartan bo Kedes, tobatú kotá pogogadopan kon Galilea.
34-40Inanakan inta ki agatnea kon bonu in suku i Lewi, in inanakan i Merari, mosia in inogoian in kotá mopuḷú bodoyowá takin butá mita popokaanan in bobiagon monia. Nongkon suku i Zebulon mosia in notarima kon opat in kotá, tuata in Yokneam, Karta, Dimna bo Nahalal. Nongkon suku Ruben mosia notarima kon opat in kotá, tuata in Bezer, Yahas, Kedemot bo Mepaat. Nongkon suku i Gad mosia in notarima kon opat in kotá, tuata in Mahanaim, Hesybon, Yaezer bo Ramot, tobatú kotá pogogadopan kon Gilead.
41-42Dá nongkon butá mita inta nobaḻí kapunyaan in bayongan in bangusa Israel yo opat nopuḷú bo waḷu in kotá takin butá popokaanan in bobiagon inta kon diugneamai in inogoi kon intau mita in Lewi.
Kanaan nobaḻí kapunyaan in umat Israel
43Natuata in pinobobogoi i Tuhan kon umat in Israel kon bayongan in butá inta ain pinodandi-Nea takin nongibot kon mogoguyang monia. Naonda in iḻimitú kon butá tatua, umat in Israel nogutundon notantú kon tua. 44Dá podudui kon onu inta pinodandi i Tuhan kon mogoguyang monia, butá tatua nodame sin iḷukadan i Tuhan. Musung mita monia diá in tobatúmai in mokotaḷow kon i monia, sin ki Tuhan in nobogoi in kauntungan kon intau in Israel nongkon bayongan in musung monia. 45Ki Tuhan noponotuu kon bayongan onu inta pinodandi-Nea kon umat in Israel; diábí tobatúmai in diá inintompodan-Nea.
Currently Selected:
YOSUA 21: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.