LUKAS 6
6
We woragwi tarem wene bem Yesus kin wok ibiga wene
6:1-5
(Mt 12:1-8; Mk 2:23-28)
1We woragwi tarem misik pem-e Yesus na mbato yagaidnak yapmu tula nggwe mborosola-ge, at owosirak-nen-e mbato mbatluk, lera nil nil mbiriga-o. 2Nonggola karuk, Parisi nap erep-nen yogolar-e: ”Kir-e noluk-nen we woragwi tarem-nen kwarurak pug-o yidnak mende kwatli-o?” luk yiga-o.
3Yogolikma-ge, Yesus-nen it yak ondosolar-e: ”Nde, Ndaud anggamirak inmin nere enpem wok yamu-nen kwariga wene-ge kir-e wonarugwi bug-a? 4Mbal Pem Nagawan amanggim pidnak oroti iri-ge tepan ombo nak-net nunggwi-t nde, Ndaud na-ge Mbal Pem Nagawan ama nggwarik, oroti iri nasolat at anggamirak na mak indid nar-o” luk yij-o.
5Yurug-e, Yesus-nen tuguruk it yak ondosolar-e: ”We woragwi tarem-e Ap Ambara inggem pidnak-nen yusu-o” luk yij-o.
Ap inggi ponok nggwe nggorak ki rak pid wene
6:6-11
(Mt 12:9-14; Mk 3:1-6)
6We woragwi tarem misik pem Yesus na-ge tepan yugwi ma nggwarik, ap mul ondosolat woragaij-o. Nde, inggi kigit nggwe nggorak nap mbi-ge iri me woragaij-o. 7Worasola-ge, imiri mbarak pidnak wene enaru nap min Parisi nap min-nen-e ”We woragwi tarem-nen ap ki rak posola-ge, at inggiri wuruwog-o” lug-e, Yesus na abut mbarogolat enlengen waruk yiga-o. 8Alat nde, Yesus na it inndi-n yebet kaidnak na aru luk-nen inggi nggorak nap na yak tosolar-e: ”Kar-e men luk, ndumu yu me men yil lobok yi-o” luk yak tosoloma-ge, ap iri na men yil mbirij-o. 9Iri lug-e, Yesus-nen it yak ondosolar-e: ”Wene yu nde kin wok kenpeyeg-o: We woragwi tarem-nen kwarurak ndag-e ngge nde perali-o? Ap yongga undurag-e op, lak? Ap meya rak unpurak nde ob-a? Ap inmiri yurak nde op, lak? Are, ap undurak nde ob-a?” luk kin wok inpij-o. 10Iri luk, it pidsa yimbinik unpurak-nen ap iri na yak tosolar-e: ”Kinggi mbung tak pi-o” yak tosoloma, at inggi mbung tak pidnggal-e, op yij-o. 11Alat nde, ir-e insilepma kwarat luk, Yesus kwat uburak wene it nak it nak mbariga-o.
Yesus-nen ap duabelas len inpid wene
6:12-16
(Mt 10:1-4; Mk 3:13-19)
12Iri na tarem-e Yesus na tepan yekluk ndobo bem lagarig-e, kubu nggwe Mbal Pem Nagawan emengen mbal tenak iri-net o nda yij-o. 13Iri luk, o nda yosoloma-ge, at imin nugwi nap yonggo unpuruk, it ennggendumu-nen ap duabelas na len inpij-o. Len unpuruk, it unnu yarosolar-e: ”Wirik unpurak nab-o” luk yij-o. 14Nde, len inpid nap iri-ge: Simon na unu misik yarij-e Peterus iri na min at owot Andereas min Yakobus min Yoanes min Pilipus min Mbatolomeus min 15Matius min Tomas min Alpius ambara Yakobus min Simon uwi nggweyak imiri yoso nab-o luk yak tugwi na min 16Yakobus ambara Yuras min Yesus iminep wisirid nap Yuras Ikariot min irit len inpij-o.
Yesus-nen ap mul ondosolat, ap ki rak inpid wene
6:17-19
(Mt 4:23-25)
17Yesus na at owosirak inmin luk ndobo bem-nen mbigarig-e, at imin nugwi nap kwarat inmin-e mbirikmu iri me mendak woraiga-o. Ap mondok kwarat ndok worogolar-e, Yurea-nen na, Yerusalem-nen na yi koma eyak pem o siri Tirus min Siron min-nen na lobok yiga-o. 18It lobok yiga iri-ge Yesus-nen yidnak wene kologolat, ki rak onposolat yuwakluk lobok yiga-o. Nde, kugi enarem lin yidnak nap na lobok yikma, ki rak inpij-o. 19Nde, at arem-nen amawi mborosolar-e, it pidsa ki rak onposo ala, ap pidsa-nen at tena buwokluk yiga-o.
Enalen kudtak mende min inndi puru rak mende min
6:20-26
(Mt 5:1-12)
20Iri lug-e, Yesus na at owosirak yik eneyasolat-nen yosolar-e:
”Kinsilobulo lak nap wa-e. Mbal Pem Nagawan-nen tenagaidnak wi iri-ge kit winde me, kir-e kenalen ker-o!
21Nere yawo kali nap wa-e. Kinmbit tak puwa me, kenalen ker-o!
Yawo yip tili nap wa-e. Kit abok-nen nda tugup me, kenalen ker-o!
22Ap Ambara an nebem ala, ap-nen insili rak konpogolat, ap-nen keya konpogolat, pesel konpogolat, ’Kir-e meya kwaroso nab-o’ luk kunnu mbilaro ngin tak pogolat, iri rak konpogola-ge, kenalen ker-o! 23It enlawingga-nen Mbal Pem Nagawan ene lomboksa yugwi nab-e iri nggal-et kwat inpidnak me, kit na iri nggal-et kwat konpogola-ge, aid arem-nen onggo nggulok wok kunduwa me, kenalen yogolat, kenalen-nen kot ker-o.
24Alat nde, kit yawo yi mende ndi mende ombo worali nab-e iri na bem-nen kenalen min worali me, kenabuwa-o!
25Kit yawo kinmbit worali nab-e abok nere kwarat woragup me, kenabuwa-o!
Kit yawo nda togolat worali nab-e abok kinndi puru luk, yip tugup me, kenabuwa-o!
26Nandug-e it enlawingga-nen-e enesiget siget Mbal Pem Nagawan ene lomboksa yugwi nap entembel waniga iri na nggal-et ap pidsa-nen kentembel wanili nab-e kenabuwa-o!” luk yij-o.
Kit kunuwim nab-e enabuwa kudtag-o
6:27-36
(Mt 5:38-48, 7:12a)
27Yak ondosoluk yarik, wene erep min yak ondosolar-e: ”Alat nde, kit yawo an nene kulili nab-e wene yu kenpem pusu-o: Kit kunuwim nab-e enabuwa kagolat, insili keneyagwi nap inmin na konag-et kwarogolat, 28Imbiri lamut tak kunpugwi nab-e imbiringgat tak onpogolat, meya rak kunpugwi nap na enmanggim tepan yogolat mer-o. 29Kerabengen lel kasola-ge, kerabengen ponok nggwe na lel kujwakluk nuk ki-o. Nde, kusum wanosola-ge, misik min-et wanuwakluk, wok ti-o. 30Ap-nen nde kat kebem nggi yogola-ge, nggi yuwa mende iri-ge wok turag-o. Nde, kisilobulo mbi wanuwama-ge, ’Uwi yagi-o’ luk yurak pug-o. 31Ap-nen kit kwat kunpurak perali iri nggal-et kit-nen na ap erep kwat enper-o.
32Nde, kit-nen kit kenabuwa kagwi nap nak enabuwa kagola-ge, kit-nen konak kwarugwi-ge ngge-o? Meya yugwi nap-nen na irit it enabuwa kagwi nap na enabuwa-t kagwi-o! 33Nde, kit kinmin konak yugwi nap nak inmin konak yogola-ge, kit-nen konak kwarugwi-ge ngge-o? Meya yugwi nap-nen na iri nggal-et kwarugwi-o! 34Nde, kit-nen nde uang tuguruk onggo wok kunduwakluk luru wok ondogola-ge, kit-nen konak kwarugwi-ge ngge-o? Meya yugwi nap-nen na iri nggal-et tuguruk ondolma wol unduwakluk, it unuwang-e meya yugwi nap erep luru wok undugwi-o! 35Lag-o! Kir-e kunuwim nap enabuwa kagolat, it inmin konag-et kwarogolat yugup na-e. Kunuang luru wok unduruk, uwi yagurak yebet kudtak pug-o. Iri kwarugup ala-ge, onggo nggulok wanogolat, Kek tak Woraso Mbal Pem Nagawan ilirak kwat yugub-o. Mbal Pem Nagawan-nen-e wa yugwi buk nap min meya yugwi nap min-e enabuwa nak kaso-o. 36Kit kineid-nen ap inmin indi op yoso iri nggal-et kit-nen na kinndi ob-et wolmomtag-o” luk yij-o.
”Nin nap enpem wene mbarurak pug-o” yidnak wene
6:37-42
(Mt 7:1-5)
37Yuruk, at-nen yosolar-e: ”Mbal Pem Nagawan-e kit kenpem wene mbaruwa naru, kit-nen ap enpem wene mbarurak pug-o. Nde, Mbal Pem Nagawan-nen kit meya yidnak onggo kenpem puwa naru, kit-nen na it nin meya yidnak onggo enpem purak pug-o. Mbal Pem Nagawan-nen kit meya yidnak amberam tak puwakluk, kit-nen na nin nap meya yidnak kenmberam tak per-o. 38Kinsilobulo-ge nin nap wok ondogola-ge, Mbal Pem Nagawan-nen na silobulo wok kunduwa-o. Wok kondosolar-e, ndak wosa wanugwi iri na ndemeret kobongsa, nggilara kininggem puwa-o. Kit-nen ap wok undugup iri na nggal ndak ndag-et Mbal Pem Nagawan-nen wok kunduwa-o” luk yij-o.
39Yurug-e, Yesus-nen nden karuk wene yu yak ondosolar-e: ”Enlengen ngguru-nen ap enlengen ngguru ininggi waruk mbururag-e op kali-a? Iri nggal kwarogola, enmbereg-et yoboksa mbuwa-o. 40Mul ondogola kulugwi nap-nen-e it mul undugwi nap nggal kek tag-e lag-o. Alat nde, mul indidnak wene na pidsa enaru luk-nen perak nde, it mul undugwi nap inmin ndak ndak kwat yugwi-o.
41Kit kenambik kenlengen ma-ge e ebis nggugurik worasu na yebet kagit lag-et nde, kir-e noluk-nen kenggam erengen ma nggwidnak kopkap marik iri nde kali-o? 42Kit kenlengen ma nggwidnak e ebis nggugurik na limbinigit lak-net nde, kir-e kennggam yak togolar-e: ’Nanggam wa-e. Kopkap kerengen ma nggwidnak iri-ge wabeyeg-o’ luk nggesa-nen yak tugub-o? Kenesiget siget yugwi nap wa-e. Nandug-et kit kenlengen ma e ebis nggugurik na wabogoluk-nen kit kennggam erengen ma nggwidnak kopkap iri-ge kwara kagolat-nen waburag-o” luk yij-o.
”Engen-nen e yenggerak pugwi-o” yidnak wene
6:43-45
(Mt 7:16-20, 12:33-35)
43Yuruk, at-nen yosolar-e: ”Nde, e konak-nen-e engen meya poso bug-o. Iri nggal-et e meya-nen na engen konak poso bug-o. 44E pidsa-ge engen pidnak pem-net yenggerak pugwi-o. Isile worak mende-nen-e engen-e tona poso bug-o. Nde, linggat-nen-e engen-e tomate poso bug-o. 45Ap enarem worasu iri na wirik pusu me, konak nap-nen-e at arem-e konak nak kobong tak worasola me, konak wene nag-et wirik poso-o. Nde, meya yoso nap-nen-e at arem-e meya mende nak kobong tak me, meya wene nak wirik poso-o” luk yij-o.
O woroso aru nap min o woroso aru buk nap min-nen o wiriga wene
6:46-49
(Mt 7:24-27)
46Yuruk, at-nen yosolar-e: ”Kir-e an-nen yidnak yidnak kwatli bug-et nde, noluk-nen ’Nit Nagawan Indo wa-e. Nit Nagawan Indo wa-e’ yak nitli-o? 47An neram lobok luk, an-nen yidnak wene kuluruk, kulidnak na ndak ndak kwatli nab-e ’Iri kwaroso nab-e yu nggal-o’ luk yak kendeyeg-o. 48Iri kwaroso nab-e o wiridnak nap misik nggal-nen yusu-o. O wereyeklug-e, nggweyak lilara mbid mbij-e o mabin-e kerep pem puruk wirij-o. Worak puruk worasoma-ge, yi ebe wasolar-e, o na wat kagaij-et nde, o iri-ge paro kerep pem pidnak me, landera mbud tak pigit lag-o. 49Alat nde, an-nen yidnak wene kulurug-et nde, iri na ndak-ndak kwarusu buk nab-e, o wirid nap mbi nggal-nen yusu-o. Ap iri-nen o worosolar-e, o mabin pigit lak, we nggweyak pem wiridnak me, yi ebe wasolar-e, o iri na wat kasolar-e, ndag-et nak tud tak pij-o. Tud tak posola-ge, mijara nari warisa labuk yij-o!” luk yij-o.
Currently Selected:
LUKAS 6: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
