OKHUCHIAKA 27

Isaka yalaamila Yakobo ikhabi

1Isaka yali niyakhunguhile ma tsimonitsie nitsiabofula. Narumana mbu omusianiwe omukhulundu Esau alangwe, ma namubool'la, “Mwana wanje!”

Naye nakalusia, “Ndi hano.”

2Isaka naboola, “Singa ololanga ise ndakhunguhile, ndi ahembi okhufwa. 3Bukula obuyingobwo nende tsisele otsie m'mutsuru okhuhiima ma unzir're esolo. 4Ma witse unombele ebiakhulia ebilahi ebiandayanza, under're ndie. Nindakhalia nzia okhukhulaamila ikhabi yokhumal'likha nisili okhufwa.”

5Olwa Isaka yal'lomanga nende Esau, Rebeka yali nahul'langa. Khe olwa Esau yarula natsia okhuhiima, 6Rebeka nabool'la Yakobo mbu, “Mbuliye papawo nabool'langa Esau mbu, 7‘Under're inyama ma undekhele. Nindakhalia, nzia okhukhuhelesia tsikhabi imbeli wo MWAMI nisili okhufwa!’ 8Kho luno mwana wanje ohul'le akakhubool'la ma okhole. 9Otsie mubiayo ma wele ebimeme ebilahi b'bili ebietsimbusi, mbiteekhe, ma nombe ebiakhulia ebilahi ebia papawo yayanza okhusila. 10Witsa okhumuhil'la alie, ma akhuhelesie tsikhabitsie nasili okhufwa.”

11Nebutswa Yakobo yabool'la nyina mbu, “Ibe umanyile Esau nomundu oli nende amaswa khum'bili kukwe, ne nase ndi nende om'bili omurel'le. 12Haundi papa anyala okhumbabasiakhwo ma amanye mbu mukaatanga. Ma ndakhanyoola esilaamo musilenje siokhunyoola tsikhabi.”

13Nyina nakalusia mbu, “Esilaamo siosi esiakheetsa khu ibe sikwe khu ise, omwana wanje, ibe okhole butswa singa mbooye, ma otsie under're tsimbusi.” 14Ma natsia naleer'ra nyina tsimbusi. Ma naye nateekha ebiakhulia ebilahi ebiapapawe yayanza. 15Ma nabukula tsingubo tsia Esau tsindahi, etsiayali niyabikha munyumba nabiikha Yakobo.

16Nara amaseelo kebimeme biamakondi mumakhono ka Yakobo nende khwikosi eliali lirel'le.

17Namuhelesia ebiakhulia ebilahi, halala nende obusuma obwayali nafuchile.

18Ma Yakobo natsia khusamwana naboola, “Papa.”

Naye nakalusia mbu, “Yee, niwe wina, omwana wanje?”

19Yakobo nakalusia mbu, “Nise Esau omwanawo omukhulundu, ndakhakhola singa umbooleye. Buukha wikhale olie khunyama yakhuleereye, khe unaamile tsikhabi.”

20Isaka namureeba mbu, “Otsinyooye mbwena bwangu, mwana wanje?”

Yakobo nakalusia mbu, “OMWAMI Nyasayewo yakhonyele okhutsinyoola bwangu.”

21Isaka nabool'la Yakobo, “Yanza wesute ahembi khuhabasiekhwo. Tooto niwe Esau?” 22Yakobo niyesuta ahembi khu samwana, naye namuhabaasiakhwo ma naboola mbu, “Omwoyokwo kufwananga okwa Yakobo, nebutswa amakhono kafwananga aka Esau.” 23Siyali onyala okhumanya ni Yakobo tawe, sichila amakhonoke kalikhwo amaswa singa aka Esau. Yali nali ahembi okhumuhelesia tsikhabi, 24nebutswa namureeba khandi, “Tooto niwe Esau.”

Naye nakalusia mbu, “Yee, nise.”

25Isaka naboola mbu, “Sut'ta hano, inyama ndie. Nimal'le okhulia nekhuhelesia ikhabi yanje.” Yakobo namusut'ta inyama nalia, khandi namuhelesia ewaini, nanywa. 26Ma samwana namubool'la mbu, “Esute ahembi unzunzuune, mwana wanje.” 27Olwa yesuta ahembi okhumutsunzuuna ne Isaka nahul'la okhuhunya khwetsingubotsie, ma namulaamila tsikhabi. Naboola mbu, “Okhuhunya khwomwana wanje khufwana okhuhunya khwo omukunda okwo OMWAMI yalaamila ikhabi.#Heb. 11:20 28Nyasaye akhuhelesie liime okhurula mwikulu ma alombe lilobalio okhuba linolu. Akhuhelesie ebichese ebinji nende ewaini. 29Tsimbia tsiabandu tsilakhutiiyilenje, ne abandu bakhwinamilenje. Oruche abeekho baabo bosi ma abolwibulo lwa mamawo bakhwinamilenje. Omundu wosi nakhulaama naye alaamwe; ne omundu wosi nakhusaayila ikhabi naye asaayilwe ikhabi.”#Okhuch. 12:3

Esau yahomba Isaka amulaamile ikhabi

30Isaka yamala okhulaamila Yakobo tsikhabi, ne olwa Yakobo yarula butswa, ne omusiani wabwe Esau niyenjila okhurula muluhitsi. 31Naye khandi nateekha ebiakhulia ebilahi nahil'la samwana. Naboola mbu, “Papa, yanza obuukhe olie inyama yakhuleereye, khe unaamile tsikhabi.”

32Isaka namureeba, “Niwe wina?”

Naye namukalusia mbu, “Nise Esau, omwanawo omukhulundu.”

33Isaka nachaaka okhutechela om'bili kwosi, ma nareeba mbu, “Ne yaali wiina owir're esolo ma niyander'ra inyama? Ndiye nosili okhwitsa ma mulaamiye tsikhabi tsiosi, natsibetsenje etsisaie khasotso.” 34Olwa Esau yahul'la amang'ana ka samwana, yalakaya okhusila ma nabool'la samwana, “Nase mbeekho ikhabi, papa!”

35Isaka namukalusia mbu, “Omwana wenywe yetsele niyangaata ma ubukuuye ikhabiyo.”

36Esau naboola mbu, “Luno nolwakhabili niyanuulanga obweyangu bwanje. Yalanjilwa khubwene Yakobo. Yabukula ikhabi yanje yobukhulundu, khandi leelo ubukuuye tsikhabi tsianje. Siundekheeyekhwo ikhabi nase tawe?”#Okhuch. 25:29-34

37Isaka nakalusia mbu, “Mal'le okhumukhola okhuba omukhongowo, ma khol'le abeekho baabe bosi okhuba abakholi baabe. Muheeye ebichese nende ewaini. Ma n'nondi sindikhwo nende akanyala okhukhukhol'la tawe, mwana wanje.” 38Esau natsilil'la okhumuhombelesia samwana, “Oli butswa nende ikhabi ndala yonyene, papa? Nase saayilakhwo ikhabi, Papa.” Ma nachaaka okhulakaya.#Heb. 12:17

39Isaka namubool'la mbu,

“Liime liomwikulu siliakhabeekhwo khuibe tawe.

Khandi obunolu bwesibala siwakhabunyoolekhwo tawe.#Heb. 11:20

40Wakhamenyele olukanga lulwo,

khandi oliba omurumikhili womwana wenywe,

nebutswa olwolisuula akake ne orula muburuchibwe.”#Okhuch. 36:8; 2 Abar. 8:20

41Esau yasuula omwana wabwe Yakobo, sichila samwana yomuhelesia tsikhabi. Napaala m'mwoyokwe mbu, “Amatukhu kamasika ka papa kali ahembi, nilwo olwa nanzire Yakobo.”

42Ne olwa Rebeka yahul'la aka Esau yali nakanakananga, yalanga Yakobo ma namubool'la mbu, “Omwana wenywe Esau aloosianga okhukhwiira khulwokhurunga es'sialia. 43Luno mwana wanje okhole akakhubool'la. Rula otsie ahomusiani wefwe musibala sia Harani, 44omenye n'naye amatukhu mati; okhwola olwo oburima bwomwana wenywe buliyeela 45ma alebil'le akawamukhol'la. Ma ndakharume omundu okhwitsa okhukhwenda. Busina ngosie abaana banje babili khwitukhu elala?”

Isaka yaruma Yakobo khu Labani

46Rebeka nabool'la Isaka, “Omwoyo kwanje kwachoonya khulwabakhaana Abahiti aba Esau yaleera yaba. Yakobo niyakhateesia khubakhaana Abahiti yaba bwakhaba obukhala ise fwe.”

Currently Selected:

OKHUCHIAKA 27: EBAIBO

Highlight

Copy