OKHUCHIAKA 28

1Isaka yalanga Yakobo, namulaamila ikhabi ma namubool'la mbu, “Orakhateesiakhwo omukhaana Omukanaani tawe. 2Otsie Mesopotamia, munyumba yakuukawo Betsweli, ma oteesie mulala khubakhaana bebwene yio, khubaana ba khotsawo Labani. 3Ne Nyasaye Wokhunyala Biosi akhuhelesie tsikhabi ma akhuhe abaana abenji, khe olabe samwana tsinzibulo tsinyinji. 4Akhuhelesie ikhabi nende olwibulo singa yahelesia Aburahamu ikhabi, ne obukule esibala sino, esiawamenyangamwo ma khandi esia Nyasaye yahelesia Aburahamu.”#Okhuch. 17:4-8 5Isaka nasebula Yakobo okhutsia Mesopotamia, khu Labani, omwana wa Betsweli Omuaramu, omusiani wanga Rebeka, nyina Yakobo nende Esau.

Esau yateesia omukhasi undi

6Esau yahul'la mbu Isaka ulaamiye Yakobo ikhabi ma umurumile Mesopotamia okhunyoolayo omukhasi. Khandi nahul'la mbu olwa Isaka yamulaamila ikhabi yam'bool'la alekhe okhuteesia omukhaana Omukanaani. 7Ma khandi nahul'la mbu Yakobo ahuliye akasamwana nende nyina ma natsia Mesopotamia. 8Esau yamanya nalola mbu Isaka samwana sayanzanga abakhaana Bakanaani tawe. 9Yamala natsia khu Ishimaeli omwana wa Aburahamu ma nateesia omukhaanawe owalangwa Mahalatsi, owali mbotsonyene Nebayotsi.

Lilooro lia Yakobo nali Betseli

10Yakobo yarula Berisheba ma nachaaka oluchendo lwokhutsia Harani. 11Olwa bwali m'bwiil'le yoola habundu hatsienukhu ma nahakamilaho. Nakona hasi ne nasichikha omurwekwe khwichina. 12Naloora mbu alolanga esirandaalo nisisinjiiye okhurula khusibala okhwola mwikulu, ne abamalaika nibaniinangakhwo ne nibeekha.#Yoh. 1:51 13Ne Omwami yali nasinjiiye hekulu khusirandaalo tsana, naboola mbu, “Ise nise OMWAMI, Nyasaye wa Aburahamu nende Isaka. Khuhelesianga ibe nende olwibulolwo esibala siokon'nekhwo sino.#Okhuch. 13:14-15 14Olwibulolwo lwakhabe olwinji singa olukuukhi lwokhusibala. Lwakhalande tsimbeka tsiosi, ne mu ibe nende mulwibulolwo, ndakhalaamile tsinzibulo tiosi tsikhabi.#Okhuch. 12:3; 22:18 15Witsul'le mbu ndakhabe n'nawe, ma ndakhakhulinde hosi aholiba notsia, ma ndakhakhukalusie khwiloba yili. Sindikhulekhakhwo tawe okhwola olwandiba nimbesisie akandakhusubisia.”

16Yakobo yasimukukha mundoolo ma naboola mbu, “Khane OMWAMI ali habundu hano, nase simanyilekhwo tawe.” 17Naria okhusila, ma naboola mbu, “Habundu hano nahokhuriisia muno. Sihakhachweya okhuba inyumba ya Nyasaye tawe, khandi sino sifwananga esilibwa siomwikulu.”

18Yakobo yabuukha mukamba tsuli, nabukula lichina eliayali niyesichikhilenjekhwo omurwe, nalisinjisia singa esitsusio. Ma natsukhil'lakhwo amafura khulwa okhulihaana khu Nyasaye. 19Nakulikha habundu tsana Betseli#28:19 Betseli Eliira lino mu Luheburania liboolanga “Inyumba ya Nyasaye.”. Litaala yilio lialangwanga khale Lusi. 20Ma Yakobo nalomba esietsubo khu Nyasaye, naboola mbu, “Niwakhaba n'nase ma nauninde muluchendo lwanje lwandikhwo luno ma khandi naumbelesie ebiakhulia nende ebiokhwebiikha, 21ne nindakhakalukha hango ha papa wanje nomulembe, ibe wakhaba Nyasaye wanje. 22Lichina liesitsusio eliasinjisisie lino liakhabe habundu hokhukhwekayakayila, ne ndakhakhuhelesie esielikhumi siabuli esindu esiawakhambelesie.”

Currently Selected:

OKHUCHIAKA 28: EBAIBO

Highlight

Copy