OKHUCHIAKA 29

Yakobo yoola hango ha Labani

1Yakobo yatsilil'la noluchendolwe ma niyoola musibala siebukwe. 2Ne matetekhana yoola khusitaho siamaatsi nisili m'mukunda, ne ebiayo biamakondi bitaru nibikon'ne ahembi n'nasio. Ebiayo bianywesibwanga amaatsi okhurula musitaho tsana. Ne lichina likali liali khumunwa kwesitaho tsana. 3Ne lwosi olwe biayo biebunjikhanga khusitaho abaayi bahiinianga lichina ma banywesia ebiayo, ma khandi bakalusia lichina khumunwa kwesitaho.

4Yakobo nareeba abaayi, “Abalina banje, owenywe nihena?”

Nabo nibakalusia, “Owefwe ni Harani.”

5Nareeba, “Mwamanya Labani omwana wa Nahori?”

Nabo nibakalusia, “Yee, khwam'manya.”

6Nabareeba, “Nomulamu?”

Nabo nibakalusia, “Nomulamu. Kata lola omukhaanawe Raheli niye owitsanga okhunywesia ebiayobie ula.”

7Yakobo naboola mbu, “Sichila kusili m'basu ma inyinga yokhuchelesia ebiayo esili okhwola, kenyekhanga munywesie amakondi ma mukakalusie musikuuri kaaye.”

8Nibakalusia mbu, “Sikhunyala okhunywesia tawe okhwola ebiayo biosi bileerwe ma lichina lihiinibwe khusitaho, khe khunywesie.”

9Olwa Yakobo yali nasiboola n'nabo, Raheli niyoola nende ebiayo biasamwana. 10Olwa Yakobo yalola Raheli nende amakondi ka Labani khotsanyene, yatsia khusitaho, nasukuma lichina, ma nanywesia amakondi. 11Ma Yakobo natsunzuuna Raheli ne nalakaya khulwobusangali. 12Namubool'la, “Ise ndi omwikho wa papawo, omwana wa Rebeka.”

Raheli niyelukha natsia okhubool'la samwana. 13Olwa Labani yahul'la aka Yakobo omwiwawe, yelukha tsimbilo natsia okhumwakan'na, namukwaka ma namutsunzuuna, ma namuleera munyumba. Olwa Yakobo yabool'la Labani kosi akali nikekhol'le, 14Labani yaboola mbu, “Tooto mwene oli likumba liom'bili kwanje khandi amatsahi kanje kene.” Yakobo namenyayo omwesi mulala.

Yakobo yatiiyila Labani khulwa Raheli nende Lea

15Labani yabool'la Yakobo mbu, “Sokwan'ne okhundiyila butswa sichila oli omwikho wanje tawe. Ololanga ndakhakhurunga sina?” 16Labani yali nabakhaana babili, omukhulundu yalangwanga Lea ne omutu Raheli. 17Lea yali netsimoni tsindekhele, nebutswa Raheli yali nomubili omulahi khandi owelikondo lilahi.

18Yakobo yayanza Raheli, ma naboola mbu, “Nakhukhol'lenje emilimo emihika chine nachitaru nikali wakhambuchilil'la okhuteesia Raheli.” 19Labani nakalusia mbu, “Bwakhaba obulahi ndamuhaana khuibe okhuyomba omundu undi. Menya hano n'nase.” 20Yakobo nakhola emilimo emihika chine nachitaru khe abe onyala okhunyoola Raheli, ne nikafwana khuye singa amatukhu mati butswa, sichila yali niyamuyanza.

21Ma Yakobo nabool'la Labani mbu, “Ndamal'le amatukhu kawambelesia, luno nyenyanga okhuteesia omukhaanawo.” 22Labani nalomba lisabo lies'selelo ma nalanga abandu bosi. 23Nebutswa obutukhu yibwo musilenje siokhuhaana Raheli khu Yakobo, yahaana Lea, ma Yakobo naba n'naye. 24Labani yahelesia Lea omukholiwe owalangwa Silipa abe owokhumutiiyilanga. 25Olwa bwasia nilwo olwa Yakobo yamanya mbu aheywe Lea. Natsia khu Labani naboola mbu, “Busina niukhol'la mbwo? Ndakhutiiyiyenje khulwa Raheli. Busina niungaata?”

26Labani nakalusia mbu, “Sikakholekhangakhwo musibala siefwe sino mbu omwana mutu abakhwe omukhulundu nasili tawe. 27Linda lihonga lielisabo lihwe ma nakhuhelesie Raheli, nikali naundiyile emihika chindi chine nachitaru.”

28Yakobo nahuchiil'la, ne olwe lihonga lielisabo liali nilihweye, Labani namubakhila omukhaanawe Raheli okhuba omukhasiwe. 29Labani yahaana omukholiwe Biliha khu Raheli mbu amukhol'lenje emilimo. 30Yakobo naba nende Raheli khandi, ne namuyanza okhuyomba Lea. Ma nakhol'la Labani emilimo emihika chindi chine nachitaru

Abaana ba Yakobo yeebula

31Olwa Nyasaye yalola mbu Yakobo siyayanza Lea singa Raheli tawe, namwikul'la okhunyoola abaana, nebutswa Raheli naba omukumba. 32Lea nabelekha niyebula omwana omusiani ma naboola mbu, “OMWAMI uluutsi amanyakhano kanje, luno omusaatsa wanje nayanyanze.” Ma nakulikha omwanawe Rubeni. 33Nabelekha khandi, ma niyebula omusiani undi, naboola mbu, “OMWAMI umbelesisie omusiani uno khandi sichila yahuliye sindayanzwa tawe,” ma namukulikha Simioni. 34Khandi nabelekha ma niyebula omusiani undi. Naboola mbu, “Luno omusaatsa wanje nahambaane n'nase, sichila mwibuliye abasiani bataru,” ma namukulikha Lawi. 35Ma khandi nabelekha ne niyebula omusiani undi. Naboola mbu, “Luno nanzitsoomie OMWAMI,” ma namukulikha Yuda, ma nasinjila okhwibula abaana.

Currently Selected:

OKHUCHIAKA 29: EBAIBO

Highlight

Copy