IGHISYEWUT 11
11
1Kilenyona kïlïm nyu kiyoktoghï nko kighönï cho kimi Yudea kïmïkul lö, kikïtach pipö punton tïkwïl ngölyonto Tororöt. 2Kïkany kïpusta Petro kïwö Yerusalem, kugheghchï pich nyinte cho kimököy pipö punton kïpa rotwö, 3Kïlenchï, “Ne nyay kiwenyi kestoni pipö punton cho le sompen ilïkwï tontengwa aiyomisyö nko chane.” 4Kïlenyono kwomchï Petro chane lasiny ngalechoni kïngeta otini kitor lö,
5“Kyomitan osoghöy ompö kanasyanta Yopa, atolapay asïwan sïwïyagh. Kyasïwan kïgh nyo lata ananka nyo wow nyo kikirekunö yïm ompö sörun kwangwan, akughyongo otini lekïtenanïn. 6Arosan kïyoni lasiny, asïwan tyonkïn cho pestegho kelyön angwan nko tïpö wudïn nko cho chuto kegh ngwïny nko töritwo yïm. 7Atolapay alïman kut nyo kilenchanïn, ‘Petro, ngeta ye nyu aiyam!’ 8Wölo olenchan, ‘Ewo, Echotyon! Möminye kïgh nyo mötïlil anta nyo le sïmnyon nyo kikïlït kutinyan.’ 9Kïmwa kutinay kingwïno yïm ngat nyo pö odeny lö, ‘Memwagh lö, mötïlilnye kïgh nyo kikwanyïnit Tororöt.’ 10Kigha kïyoni lenyoni kïnyïl sömök, ato mi löt kechïchuk kïyay kïmïkul kïmïla yïm. 11Kïnyini kwitï pich sömök köyini kïmitecha cho kikiyokwï kïpka kïkuranïn cho kipkono Kaysaria. 12Kïlenchanïn Mïkulögh nyo Tïlil, ‘Wïyö nko chane, ametomtomön, nyonikïny.’ Kepecha tïkwïl nko kighönichoni pkono Yopa le mut nko akonga wölini le Kaysaria, kepecha tïkwïl ntöket köyoni pö chichoni. 13Kïmwowecha wölini kisïweghta nyinte malaykayan nyo kighyongo konyi akïlenchï, ‘Yontena chi kïwö kanasyanta Yopa kïkurï chi nyo kïkuro Simon Petro. 14Mwowunyi nyinte ngal cho sörunyi nko piko katangu.’ 15Kïkany otorön angalan, kïrökunö yïm Mïkulögh nyo Tïlil kïrökyï chane le wölanye kirökyecha otini le towunöt. 16#Ist 1:5. Atolapay anana kïgh nyo kimwa Echotyon lö, ‘Kipatisana Yoana pögh, wölo kipötisönokwa ompö Mïkulögh nyo Tïlil.’ 17Kïkany nyu kutö Tororöt pïchoni pö punton konutyononi karkegh nko nyini kikonecha otini kikighanacha Echotyon Yeso Kristo,* achan ngo nyu nyo omököy otögho Tororöt kïgh nyo mököy kwighöy!”
18Kïkany kïlïm chane ngalechoni, kïsisyö akïsal Tororöt lö, “Nkïchï kikutö Tororöt pipö punton pöroyïn nyo kötegho atökïsöpchö!”
Kanisa nyo mi Antiokia
19 #
Ist 8:1-4. Kitoyö nyu kïyasta kighönï ompö kichopata kong nyo kitï atoni kikïpar Stepano. Kïpa walaka ntökwit Poinike nko Kupro nko Antiokia, kwomchinotoy lökoyechay pipö Yaudi opïn. 20Wölo kïnget kighönï walaka, cho kipkono Kupro nko Kurene kutang Antiokia kïpa kwomchinotö pipö punton lapay, kïmwochï chane Lökoy cho Karamach cho pö Echotyon Yeso. 21Kimi owesyo Echotyon nko chane, kughan pich cho chang nyoman akïrïp Echotyon.
22Kïlïm ngaleko kighanatanoni pipö kanisa nyo kimi Yerusalem kïlenyona kïyonta Parnapa kïwö Antiokia. 23Nyini kitïta akïsïwa wölo kisoyöntö Tororöt piko wöloni, kïngarak akukil chane lapay kïrïp Echotyon ompö mïkulöwekwa kïmïkul. 24Ki chi nyo karam nyinte, akïnyïghitate Mïkulögh nyo Tïlil nko kighanat tïkwïl. Pich cho chang kughan Echotyon.
25Atolapay kïwö Parnapa kutang Tarso kïyarata Saulö. 26Nyini kinyorï, kumïtï nyinte kutöngwï Antiokia. Kumpur wöloni köny akonga kïmïkul, kuryam nko pipö kanisa akunet pich cho chang. Ki Antiokia nyo kikïtowunö kekurö pich cho kile kighönï pipö Kristo. 27Kipkana werkoy osiswechoni Yerusalem kïpka Antiokia. 28#Ist 21:10. Kughyö akong ompö chane nyo kikuro Akapus ompö owesyo Mïkulögh nyo Tïlil akïngor lö itu kömöy nyo wow ngwïny kïmïkul. (Kipïnö ngalechoni ato kipöytoghin, Klaudio.) 29Kutötö kighönichay kingarakat kïle wölo kiteno owesyengwa ompö machat akonga kïpa Yudea wölo kimi kighöni walaka. 30Kwigh nyu lenyoni, atolapay kutötö ropïyeni kutö Parnapa nko Saulö kwipchï poyi kanisa.
Katasa kichopata kong
Currently Selected:
IGHISYEWUT 11: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
