YOANA 17
17
1Otini kiwany Yeso kïmwa ngalechoni, kïtopön yïm akïlö, “Paponyu ketïta ye nyu asis. Tönö Werïngu ororyö atökumï Werïngu kïkoninyi ororyö. 2Ompöwölo kitönönyi nyinte kïpayta pich löwïr, atökumï nyinte kutö söpon pö kokay pich lapay cho ketönönyi nyinte. 3Anyï nyu söpon pö kokay, kenkïtunyi nyo ichï onkït Tororöt pö man, akenkïtï Yeso Kristo* nyo kiyonunyi. 4Kyapartan ompö ngwïny töroryengu, kyawanyan ighisyonanya kikonaninyi agh. 5Paponyu! Konante ororyö ompö tawungu ye, ororyö nyo karkegh nko nyanya kyotïngetan nko nyi kïtomö ketowï ngwïny.
6“Kyoporchan kaynengu pich cho kikonaninyi kïngetunö ngwïny. Ki cheku chane, ikonaninyi kïlïkwï chichan akïkaman chane ngölyontengu 7akakunkïtï ye nyu chane lö kingwïna kïgh anka tïkwïl nyo kikonaninyi wölo imitenyi. 8Kyomwochan chane ngalechanye kikonaninyi akakïtach chane akunkïtï nyoman lö, kyangwïnan wölo imitenyi akughan lö nyi nyo kiyokwanïn.
9“Osoghchinan chane, mosoghchinanye ngwïny, wölo osoghchinan pïchoni kikonaninyi, ompöwölo cheku chane. 10Cheku tïkwïn tïkwïl cho otïngetan akï cheku kï chichan, akonyorchan ororyö tïkuchoni. 11Kangwïnan ye wölo imitenyi, momitanye ngwïny ngat, wölo mi chane ngwïny. Paponyu nyo Tïlil! Ikamana chane owesyeto kaynengu, kaynananye kikonaninyi atökumï chane kïlïkwï akonga le wölini ichinyi akonga nko ani. 12#Tum 41:9; Yna 13:18. Kyakamanan chane atanye kitomitan nko chane ompö owesyeto kaynengu, kaynananye kikonaninyi. Kyoripön chane akimöminye nyo le ompö akonga ompö chane nyo kipot, kïpoto chichanye le kipotin atökwitïta lö man Kikirut. 13Wölo kangwïnan ye wölo imitenyi amwoghonan ngalechï ngwïny atömanyïl kïsïch chane ngörekyenyan ompö mïkulöwekwa akïsïch kïmïchï. 14Kyanetan chane ngaleku, kurey ngwïnya chane, ompöwölo möpöcha chane ngwïny, le wölini mopoyanye ngwïny. 15Mosoghanye lö techenga chane ngwïny wölo osoghinyi lö iripö chane Mwokïyontonay. 16Möpöcha chane ngwïny melö oponan ngwïny. 17Itïlil chane ompö man, ngölyontengu nyo le man. 18Kayontan chane kïpa ngwïny, le wölanye kiyonwaninyi angwïn ngwïny. 19Kotïlilön kegh ompö chane atokumï chane tïkwïl kutïlil kegh ompö man.
20“Mosoghanye ompö chane opïn, wölo osoghchinan pich tïkwïl cho ghönanïn ompö amtaghto pïchete 21asoghan lö talïkwï chane kïgh akonga. Paponyu! Ikany kïtïpï chane orincha, le wölini imitenyi orinyan omitan oringu. Ikany kïlïkwï chane kïgh akonga atökumï ngwïnya kughan lö nyi nyo kiyokwanïn. 22Kyotönön chane ororyö nyo karkegh nko nyanye kikonaninyi atökumï chane kïlïkwï kïgh akonga, le wölini ichinyi akonga nko ani, 23omitan oringwa imitenyi orinyan, atökïlïkwï chane akonga laras atökumï ngwïnya kunkïtï lö nyi nyo kiyokwanïn aichömenyi chane le wölini ichömtonaninyi.
24“Paponyu! Omökan chane choni kekonanïn kïmi nko ani atoni omitan, atökumï chane kïsïwa töroryenyan nyanye kikonaninyi, ompöwölo kichömaninyi kïtomö kegh ngwïny. 25Paponyu nyo chï tenate! Menkïtinyinye ngwïnya, wölo onkïtinyi akunkïtinyi pïchï, lö nyi nyo kiyokwanïn. 26Kyoporchan chane kaynengu atoporchinan chane kaynanoni atökumï chomnyot nyo itïngetenyi ompö ani kïtöpö oringwa, otöpan tïkwïl oringwa.”
Kakïnam Yeso
(Mat 26:47-56; Mrk 14:43-50; Luk 22:47-53)
Currently Selected:
YOANA 17: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
