Vikolwa 8
8
1Tsindolo. Kandi Saulo ya bugirira likudza lilye.
Ku lidiku yilyo lidambidzwa linene lya duka ku livugana lya li mu Yerusalemi; navo va salanywa vosi mu kivala kye Buyuda nekya Samaria, bugira avatumwa. 2Avandu avatia Nyasaye va ta Stefano, ni va mu lirira neliverera linene. 3Navutswa Saulo yononnya livugana ligali, ni yingira mu tsinyumba tsyosi, na a hila avasatsa navakali netsingulu na a va vika mu inyumba yavahambe.
4Kigira yaga yava ava salana va vodonkana ni vilwadza likuva yili. 5Kandi Filipu ya sulunguta mu lidala lya langwa Samaria, na a vilwadzira amakuva ga Kristo. 6Viduma vya huliridza nomwoyo mulala amakuva ga Filipu ya vola, lwa va hulira ni va lola vilolekidzu vya ya kola. 7Kigira roho midamano gya twula mu vanyingi, ni gyi hanzuka ni gyi lira: navanyingi va fwogoya, na va leema, va honnywa. 8Ma bwa li ubuyanzi ubunene mu lidala yilyo.
9Navutswa ya li yo mundu mulala wa langwa Simoni, lwambiri ya kola ubusegetiri mu lidala, na a gennya ihiri ya Samaria, na a vola mwene a veye munene. 10Vosi va mu hulira, kutwula ku vakekeke nokuduka ku vanene, ni va vola, Mundu, uyu a veye tsingulu tsya Nyasaye u langwa Munene. 11Kandi va mu londa, kigira ya va gennya nobusegetiri bwibwe inyinga inene. 12Navutswa lwa va suuvira lilwadza lya Filipu lyamakuva malahi gobwami bwa Nyasaye, na gelieta lya Yesu Kristo, va batidzwa avasatsa navakali. 13Kandi Simoni mwene ya suuvira: na a batidzwa na a menya na Filipu; kandi ya genya lwa ya lola vilolekidzu nevyokugenya vinene vi kolangwa. 14Kunangwa, avatumwa va li mu Yerusalemi lwa va hulira Samaria va bugirira likuva lya Nyasaye, va va hilira Petro na Yohana. 15Yava lwa va mala kusulunguta wavo, va va saalira va hebwe Roho Mutaka tifu: 16kigira a kikiri kwika kuvo kali mulala: navutswa va mala kubatidzwa ku lieta lyo Mwami Yesu. 17Kunangwa va vika makono gavo kuvo, navo va hebwa Roho Mutakatifu. 18Ku, Simoni lwa ya lola Roho Mutakatifu a letwa nokuvikwa mu makono gavatumwa, ya va ha ifetha, 19na a vola, Mpe inze kandi tsingulu yitsi, ku vosi wa mbika kuye makono gange a duka kuvugula Roho Mutakatifu. 20Navutswa Petro ya mu volera, Ifetha yoyo i gote halala nive kigira u ganagana kunyola kihaanwa kya Nyasaye nefetha. 21Ive si u veye nelisanga kinga ikura ku likuva yili, kigira mwoyo gugwo si gu veye mulahi imbiri wa Nyasaye. 22Kigira yaga weganire ubudamano bubwo yibu, u saale Mwami, ni mbula u samefwe tsiganagani tsyomwoyo gugwo. 23Kigira nku lola u veye mu bululu kuli indulwi, kandi u veye mu libofwa lyobudamano 24Simoni ya tivula na a vola, Mu nsaalire mwinye ku Mwami, vindu yi vi vya mu vola vi ta duka ku inze.
25Kunangwa lwa va mala kulolekidza nokuvola likuva lyo Mwami, virana Yerusalemi, ni vilwadza ivangeli mu tudala tunyingi twa Vasamaria.
26Navutswa ingelosi wo Mwami ya volera Filipu, na a vola, Twula, u tsie ha luvega lwakusini kuduka ku inzira yeyo i sulunguta kutwula Yerusalemi kuduka Gaza: i veye mu kyangalangwi. 27Kandi ya twula na a tsia: kandi henza, ya lola mundu wa Ethiopia, kitsiri mwene tsingulu, mukekeke ku Kandaki, mwami wekikali wa Vaethiopia, wa li na a veye ku butugi bwibwe bwosi, naye yadza Yerusalemi kusigamira; 28kandi yirana, ni yikala ku ligari, na a soma muprofeti Isaya. 29Kandi Roho ya volera Filipu, Wisunde himbi u hambane neligari yili. 30Filipu ya nyagula na a duka kuye, na a mu hulira a soma Isaya muprofeti, na a mu teva, U hulira yaga aga u soma? 31Ya mu tivulira, Mbulira ndi, ni nta nyola mundu kunzimirira? Kandi ya saala Filipu a nine yikale naye. 32Amakuva gamang'oda ga ya soma ga li yaga:
Yimirirwa kuli ligondi kutsia ha giitirangwa
Kandi kuli mwana weligondi a kiring'ana imbiri wa uyu u kalaga ubwoya,
Naye a veye ndi, si a kunula munwa gwigwe:
33Mu lyegehidzwa lilye ya sulirwa mu kyina:
Ibwaha u li vuulira likula lilye?
Kigira livamwoyo lilye li twulldzeywi mu lirova.
34Kandi kitsiri ya tivulira Filipu na a vola, Nku saala, muprofeti a vola makuva yaga ku bwaha? Ku m wene naho ku wundi? 35Ma Filipu ya kunula munwa gwigwe na a mwilwadzira amakuva malahi ga Yesu, ya tanga ku mang'oda yaga. 36Navo lwa va li va genda ku inzira va duka ha madzi malala: kitsiri ya vola, Henza amadzi; amakuva ki ga ngayidza nta batidzwa? 37Filipu ya vola, Nu u suuvira nomwoyo gugwo gwosi, u nyala. Ya tivula, na a vola, Nsuuviye Yesu Kristo niye Mwana wa Nyasaye. 38Ya haana munwa ligari li singire: navo vombi vika mu madzi, vombi Filipu na kitsiri; na a mu batidza. 39Kandi lwa va mala kusenuka kutwula mu madzi, Roho wo Mwami ya hulula Filipu: na kitsiri si ya mu lola kandi, na ya londa inzira yeye nobuyanzi. 40Navutswa Filipu ya loleka mu Azotu: kandi ya vita ni yilwadza ivangeli mu madala gosi kuduka Kaisaria.
Currently Selected:
Vikolwa 8: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
