Vikolwa 9
9
1Navutswa Saulo ya li na a kira kuvola litihidza nelyokwiita ku vegidzwi vo Mwami, ya tsia ku musalisi munene, 2na a saava tsibaruwa a tsie natsyo Damasko mu masomero, na a va na a lola avandu ve Inzira yiyi, ni va va vasatsa kinga avakali, a duke kuvaleta Yerusalemi va boheywi. 3Kunangwa lwa ya li na a genda ya manya na a duka himbi Damasko: nonoho ubulavu bwa twula migulu bwa ng'ereng'ana kuye tsimbega tsyosi: 4na a gwa hasi na a hulira mwoyo gu mu volera, Saulo, Saulo, kigira ki u ndambidza? 5Naye ya teva, Ive ni bwaha, Mwami? Naye ya tivula, Inze ni Yesu wa ive u dambidza: kigira nobudinyu ku ive kulasa luvasi ku kivambo.
6Navutswa vuka, wingire mu lidala, na ive u la volerwa amakuva ga ku dukira u kole. 7Navo avandu va genda naye va singira makiriri, va hulira mwoyo, navutswa si va lola mundu. 8Ma Saulo ya vuka hasi, navutswa tsimoni tsitsye lwa tsya kunulwa si ya lola kindu; ni va mu gendidzira mukono, ni va mu hila Damasko. 9Kunangwa ya menya madiku gavaka na a ta lola, kandi na a ta lagira, kandi na a ta nwa. 10Ya li yo mu Damasko mwegidzwi mulala wa langwa Anania. Na Mwami ya mu volera mu maloto, Anania. Naye ya bugira, Yo, mbeye hano, Mwami. 11Na Mwami ya mu volera, Vuka, u tsie ku inzira i langwa Inungi; u teve mulala u langwa Saulo wa Tariso, mu inyumba ya Yuda: kigira a saala; 12kandi u mali kulola mundu a langwa Anania ni yingira na a vika makono kuye, a duke kulola. 13Navutswa Anania ya tivula, Mwami, mbuliye amakuva ga mundu uyu ku vandu vanyingi, vidamano vyanga vya ya kola ku vatakatifu vovo mu Yerusalemi: 14kandi hano a veye netsingulu tsi twula ku vasalisi vanene kuboha vosi avanira lieta lilyo. 15Navutswa Mwami ya mu volera, Tsia: kigira uyu a veye kiju kya tovolwa ku inze, kuhila lieta lyange imbiri we Tsihiri navami, navana va Israeli: 16kigira nda mu mannya vindu vinyingi kumusaliridza, vi la mu gwira kigira lieta lyange. 17Na Anania ya tsia ni yingira mu inyumba, na a vika makono kuye na a mu volera, Saulo amitu, Mwami u ntumi, naye ni Yesu wa loleka ku ive ku inzira ya wa tsira ku, u duke kulola, nokwizula Roho Mutakatifu. 18Nonoho vindu vya twula mu tsimoni tsitsye vi fwana magamba, ma na a lola; kandi ya singira, na a batidzwa; 19na a vugula vyokulia na a nyola tsingulu.
Naye ya li halala navegidzwi ava li mu Damasko madiku ga duki. 20Kandi nonoho yilwadza mu masomero amakuva ga Yesu na a vola a veye Mwana wa Nyasaye. 21Vosi ava mu hulira va genya, ni va vola, Uyu si a veye wa dambidza avanira lieta yili mu Yerusalemi? Kandi yadza hano kigira a duke kuvahila va boheywi imbiri wavasalisi avanene. 22Navutswa Saulo ya kira kunyola tsingulu, na a va legerera Avayuda ava menya Damasko, a vuula ligali uyu Yesu ni Kristo.
23Kunangwa lwa madiku ga duka manyingi, Avayuda na kola kyina va mwiite: 24navutswa Saulo ya duka kumanya lilagana lyavo. Kandi va linda viribwa vyelidala mbasu nobudiku va duke kumwiita: 25navutswa avegi veve va mu vugula mu budiku ni va mu siridzira ku lugaga, va mwikidzira mu kideera.
26Lwa ya duka Yerusalemi ya geridza kuhambana navegidzwi: navutswa navo va mu tia vosi, si va mu suuvira a ve mwegidzwi. 27Navutswa Baranaba ya mu vugula, na a tsia naye ku vatumwa, na a va volera kuli wa ya lola Mwami ku inzira, kandi kuli wa ya volerana naye, kandi kuli wa yilwadza ku lieta lya Yesu nobuluviriri mu Damasko. 28Naye ya li halala navo mu Yerusalemi, yingira na a twula, 29ni yilwadza ku lieta lyo Mwami nobuluviriri: na a vola na a hangalidzana na Vayuda va vola Lugreki; navutswa venya kumwiita. 30Navamitu lwa va ga manya, va mu sulungutidza Kaisaria, ni va mu tuma a tsie Tariso.
31Kunangwa mavugana mu Buyuda, na Galilaya, na Samaria ga li nemirembe ni lyombakwa; ni ga genda mu butii bwo Mwami, nomu lileminywa lya Roho Mutakatifu, ni li dasika.
32Petro lwa ya vodonkana tsimbega tsyosi, ya manya na a sulunguta ku vatakatifu va menya Luda. 33Ya nyola mundu mulala wa langwa Ainea wa gona ku kitali imihiga gyitanu na gyivaka; kigira ya li na a fwogoya. 34Kandi Petro ya mu volera, Ainea, Yesu Kristo a ku honnya: vuka, wale kitali kikyo. Kandi va vuka nonoho. 35Navo ava menya mu Luda nomu Sharoni vosi va mu lola ni va girunkana ni va yeka ku Mwami.
36Ya li mu Yopa mwegidzwi mulala wa langwa Tabitha, ligirunkanywa lyalyo ni Dorkasi, naho Kisusu: mukali uyu ya li ni yizula miyinzi milahi na gyetsimbabasi ya kola halala nokukonya vadaka. 37Mu madiku yago ya manya na a gumirwa nolukudzo na a kudza: lwa va mala kumwogidza va mwalira mu inyumba yigulu. 38Kandi kigira Luda lya li himbi na Yopa, navegidzwi va hulira Petro a veyo, va tuma avandu vaviri kuye kumusaala U ta linda, udze wetu bwangu. 39Petro ya twula na a va londa. Kandi lwa ya duka, va nina naye mu inyllmba igulu: navakunzakali vosi va singira naye ni va lira ni va mu mannya amakoti, netsingubo tsya Dorkasi ya nava lwa ya li halala navo. 40Navutswa Petro ya va hila kyova vosi, na a sigama na a saala; ma ya girunkanira mubiri, na a vola, Tabitha, vuka. Naye ya kunula tsimoni; kandi lwa ya lola Petro, yikala. 41Naye ya mu ha mukono gwigwe na a mu singeridza; kandi ya langa vatakatifu navakunzakali, na a mu vika imbiri wavo a veye mwoyo. 42Ga duka kumanywa mu lidala lyosi lya Yopa: kandi vanyingi va suuvira Mwami. 43Ma Petro ya manya na a menya Yopa madiku manyingi halala nomulala ya langwa Simoni musidza wamasero.
Currently Selected:
Vikolwa 9: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
