Marko 14

1Inyima ya madiku gaviri lipasaka nobukima bu ta li namamera bwa duka. Avasalisi vanene navang'odi venya inzira yokumugumira nobugeeri, va mwiite: 2kigira va vola, Ku ta kola inyinga yelilia, gase avandu va la kola kivihiri.

3Lwa ya li mu Betani mu inyumba ya Simoni mugere, lwa yikala kulia, mukali mulala yadza na a leta kimuga kyamaguta genardi inzere, getsishilling tsinyingi; na yatannya kimuga ni yitulula ku mutwe gwigwe. 4Navutswa avalala va kenleka mu myoyo, ni va vola, Amaguta yaga ga sundulirwa ki? 5Kioira maguta yaga nkano ga nyala kugamannywa tsyo kuvita tsishilling tsimia tsivaka, tsi hebwe avadaka. Ni va mu monya. 6Navutswa Yesu ya vola, Mu mu leke; kigira ki mu mu kupidza kivi? U nkoleye miyinzi milahi. 7Mu vedza navadaka halala kazozo, tsinyinga tsyosi tsya mu yanza mu nyala kuvakolera bulahi: navutswa si mu vedza na inze halala madiku gosi. 8U koli aga a nyala; u tangi kuduka kumbakira umubiri gwange gu tebwe. 9Ligali, mmu volera, Mu vivala vyosi ha ivangeli yiyi i lilwadzwa, ga la kilwadzirwa kandi aga mukali uyu a koli ga ve kyokumwidzulitsa.

10Yuda Iskarioti, mulala ku va li likumi navaviri, ya tsia ku vasalisi vanene a duke kumuzama va mu gumire. 11Na yava lwa va hulira va yanza, ni va mu laga kumuha ifetha. Kunangwa yenya ubwiyangu bwo kumuzama.

12Ku lidiku li kola lilala lyobukima bu ta li namamera, inyinga yelipasaka liitwa, avegidzwi veve va mu volera, Wenya ku tsie ha li ki kukulombera u lie lipasaka? 13Ya tuma vaviri ku vegidzwi veve, na a va volera, Mu tsie mu lidala, mu la vugana nomundu na a gingi isiongo yamadzi: mu mu londe; 14kandi ha na yingira, mu la volera mwene inyumba, Mwegidzi a vola, I li ha inyumba yange yokugeniha ha ndira lipasaka navegidzwi vange? 15Mwene a la mu mannya inyumba inene i veye higulu, i lombeywi kandi i tegekeywi: mu la ku lombera mu. 16Avegidzwi va twula ni va duka mu lidala ni va nyola kuli wa ya va volera: ni va lomba lipasaka.

17Lwa gwa duka mgolova, yadza halala na va li likumi na vaviri. 18Lwa vikala ni va litsa, Yesu ya vola, Ligali, mmu volera, Mulala ku mwinye a la nzama, niye u litsanga ninze halala. 19Ku, va tanga ku henda mwoyo nokumuvolera, Ni inze? 20Na a va volera, Ni mulala ku va li likumi na vaviri, uyu wa ku dongera naye mu ludavo. 21Mwana wa Adamu a tsitsanga kuli wa ya ng'odirwa: navutswa bayaye bu la va ku mundu u mu zama mundu uyu a vula kwivulwa nkano nu bulahi kuye.

22Ku, lwa va li ni va lagira, ya vugula ubukima, kandi lwa ya mala kusantidza ya megannya na a va ha na a vola. Mu vugule: yibu nu mubiri gwange. 23Kandi ya vugula kikombe, lwa ya mala kusantidza, ya va ha: kandi va nwa ku vosi. 24Na a va volera, Yiki na masahi gange gelilagana, aga sunduleywi vanyi ngi. 25Ligali mmu volera, Si nda nyala kandi kunwa ku makuyu gemizabibu, nduhe nduke lidiku lyokunwa amahya mu bwami bwa Nyasaye.

26Lwa va mala kwimba lwimbu va twula ni va tsia mu kigulu kye Mizeituni.

27Yesu ya va volera, Mwinye vosi mu likigitalidzwa: kigira ga ng'odwa Nda duya mwayi, na magondi ga la tazuka. 28Navu tswa lwa ndi simugukidzwa nda mwimirira kutsia Galilaya. 29Navutswa Petro ya mu volera, Kaliva vosi vikigitalidzwa, inze si nda nyala mba. 30Yesu ya mu volera, Ligali nku volera, Lero ndi, mu budiku yibu, idaywa ni i kikiri kulagula hali kaviri, ive u la nyambakana hali kavaka. 31Navutswa ya vola nobudinyu munonono, Ni ga ndukira kukudza nive halala, si nda nyala kukwambakana mba. Kandi vosi va vola ndiyo.

32Ma va duka mu mulimi gwa langwa Getsemane: na a volera avegidzwi veve, Mwikale hano, ntsie kusaala. 33Ya hila Petro na Yakobo na Yohana, na a tanga kugenya munonono, nokuhenda mwoyo ligali. 34Na a va volera, Mberera ligali kali kuduka ku likudza: mu tigala hano, mu linde. 35Yisunda hambiri hakekeke, na a gwa hasi ku marova, na a saala, Ni ga nyalika, inyinga yiyi i mbite. 36Kandi ya vola, Abba, Dada, ive u nyala vindu vyosi; u twulidze kikombe yiki ku inze: navutswa ga ta va kuli wa inze ndalira, navutswa ga ve kuli wa ive u lalira. 37Yadza na a va nyola va gona tsindolo, na a volera Petro, Simoni, u gonanga? Si u nyala kulinda isaa indala? 38Lindi, mu saale, mu tingira mu ligeridzwa: ligali mwoyo gu bugirira, navutswa mubiri gu dekerana. 39Kandi ya tsia na a saala, na a vola kandi amakuva ga li gembiri. 40Kandi yirana, na a va nyola va gona tsindolo, kigira tsimoni tsyavo tsya li tsi li duhi ligali; kandi si va manya gokumutivulira. 41Yadza kuvo hali kavaka, na a va volera, Mu gone kalunu, mu sose: ga duki; isaa i duki; henza Mwana wa Adamu a zamwa mu makono gavoni. 42Singiri, ku tsie: henzi, u nzami a veye himbi.

43Nonoho, na a ki vola, Yuda mulala ku va li likumi na vaviri, ya duka, kandi halala naye kiduma, va ginga vivavi netsimpimbo, va twula wa vasalisi vanene navang'odi navakulundu. 44Mzami ya li na a mali kuvaha kyokuvamannyira, na a vola, Wa na mbuse, uyu niye; mgumire, mu mu hile bulahi. 45Lwa ya duka, nonoho yadza kuye na a vola, Mwegidzi; na a kira kumubusa. 46Va mu gumira, ni va mu hila. 47Navutswa mulala ku yava ava li ni va singira himbi ya somola kivavi kikye, na a tema mutumekiri womu salisi munene, na a mu kalaga gutu gwigwe. 48Yesu ya tivula, na a va volera, Mu ntwulira nevivavi netsi mpimbo kungumira kuli mu tsia kugumira mwiguliri? 49Madiku gosi nda li namwinye halala mu litempeli nzegidzanga, si mwa ngumira mba: navutswa ga koleywi ndi mang'oda ga dukidzwe. 50Ma va mu leka vosi, ni viruka.

51Muyai mulala ya mu londa, yivika ingubo yekatani inziyuhira yeng'ine: ni va mu gumira; 52navutswa ya leka ingubo yekatani ni yiruka kyahonyo.

53Va hila Yesu ku musalisi munene: kandi va vugana halala naye avasalisi vanene vosi navakulundu navang'odi. 54Kandi Petro ya li na a mu londa ihale, kali kuduka mu hamgidzi ha musalisi munene; ni yikala halala na vanyampara, ni yota muliru. 55Avasalisi vanene nekyina kyosi venya amakuva ku Yesu va duke kumwiita; navutswa va vula kuganyola. 56Kigira vanyingi va mu gina, navutswa amakuva gavo si ga hambana. 57Avalala va si ngira, ni va mu gina, ni va vola, 58Kwa mu hulira na a vola, Nda sambula litempeli yili lyombakwa namakono, ma na nyombaka lindi mu madiku gavaka li tombakwa namakono. 59Kaliva ni va vola ndiyo ubugini bwavo si bwa hambana mba. 60Ku, musalisi munene ya singira hagati, na a teva Yesu, na a vola, Ive si u tivula kindu mba? Ni kindu ki kya yava va vola ku ive? 61Navutswa ya kiring'ana, si ya tivula kindu mba. Kandi musalisi munene ya mu teva, na a mu volera, Ive ni Kristo, Mwana wo Mugasu? 62Yesu ya vola, Inze niye: kandi mu la lola Mwana wa Adamu ni yikaye ha mukono mulungi gwo Wetsingulu, ni yidza mu malesi gegulu. 63Musalisi munene ya tandula tsingubo tsitsye, na a vola, Kwenyera ki avaloli avandi? 64Mu huliye manyego: mu vola ki? Vosi va mu kalagira, no bulahi a kudze. 65Valala va tanga kumutudzira amate, nokumukunika tsimoni, nokumuduya, nokumuvolera, Profeta: kandi avasikari va mu vugula ni va mwala ne tsimpya tsyavo.

66Petro lwa ya li hasi hamgidzi, mukana mulala mtugwa womusalisi munene yadza; 67na a lola Petro ni yota muliru, ya henza, na a vola Ive kandi wa li halala na Munazareti Yesu. 68Navutswa yambakana, na a vola, Si mmanya kandi si mbuli ranga ga u vola. Ma ya twula na a tsia ku lusimbu; nedaywa ya lagula. 69Mkana ya mu lola, na a tanga kandi kuvolera avasingira himbi, Uyu nu mulala kuvo. 70Navutswa yambakana kandi. Inyima hakekeke ava singira himbi va volera Petro, Ligali ive nu mulala kuvo; kigira ive u veye Mugalilaya. 71Navutswa ya tanga kusasama nokunyega, Si mmanya mundu uyu wa mu tala. 72Nonoho idaywa ya lagula kaviri. Kandi Petro yidzulitsa likuva lya Yesu ya mu volera, Idaywa ni i kikiri kulagula hali kaviri, ive u la nyambakana hali kavaka. Lwa ya ganagana amakuva yago, ya lira.

Currently Selected:

Marko 14: MBE

Highlight

Copy