Marko 15

1Mugamba mabwebwe nonoho avasalisi vanene navakulundu navang'odi nekyina kyosi, va tevana amakuva gokukola, ma va boha Yesu ni va twula naye kumuhila wa Pilatu. 2Pilatu ya mu teva, Ive nu Mwami wa Vayuda? Ya tivula na a mu volera, Ive u vola. 3Kandi avasaIisi vanene va vola vindu vinyingi kuye. 4Pilatu ya mu teva kandi, na a vola, Si u tivula kindu mba? Henza vindu vinyingi ndi vya va vola ku ive. 5Navutswa Yesu si ya tivula kindu kandi; Pilatu ya luha ya genya.

6Inyinga yelilia ya nala kuvabohololira muhambe mulala wa va tovola. 7Ya li ho mulala wa langwa Baraba, wa bofwa halala na vandi ava kola bwebaali, na aviita avandu mu bwebaali bwavo. 8Kiduma kyanegira ni va tanga kumuteva a kole kuli wa a va kolera kazozo. 9Pilatu ya va teva, na a vola, Mwenya mmu bohololire Mwami wa Vayuda? 10Kigira ya lola avasalisi vanene va mu leti nembodoka bwavo. 11Navutswa avasalisi vanene va vukidza kiduma va mu volera, No bulahi a va bohololire Baraba. 12Kandi Pilatu ya tivula na a va volera, Nda mu kolera ki uyu wa mu langa Mwami wa Vayuda? 13Kandi va hanzuka ni va vola, Mbambe. 14Pilatu ya va volera Kigira ki, a koli ubwoni ki? Navutswa va hanzuka munonono, Mbambe. 15Pilatu kigira yenya kuyanzidza kiduma, ya va bohololira Baraba, na a va ha Yesu. Lwa ya mala kumukuya nolukova a bambwe.

16Avasikari va mu hila mu inyumba ya langwa Pretorio; ni va vungidza mugaanda gwosi gwa vasikari. 17Ni va mu vika ingubo yekiforosadi, ni va nava itaji ya mafwa ni va mu vika ku mutwe. 18Ni va tanga kumuchelidza nokuvola, Mirembe, Mwami wa Vayuda 19Ni va mu nweka ku mutwe nolusi, ni va mu tudzira amate, ni va mu sigamira kumwidzominya. 20Lwa va mala kumukolera kihenyahenye va twulidza ingubo yekiforosadi, ni va mu vika tsingubo tsitsye. Ni va mu hila kumubamba.

21Mulala wa langwa Simoni Mkurene, ise Aleksandro na Rufusu na a vita ku inzira, na a twula mu mulimi, va mu niga kutsia navo, a mu gingire musalaba gwigwe.

22Va mu dukidza ha langwa Golgota, li veye kuvola, Ha kihanga. 23Ni va mu letera iwaini i sanyeywi nomuri: navutswa ya gi sula. 24Va mu bamba, ni vavukanya tsingubo tsitsye hagati havo, ni va kola tsikura kutsyo, va lole weyeye. 25Ya li isaa i kola tsivaka, ni va mu bamba. 26Ibaruwa yeliyalwa lya li kuye ya ng'odwa higulu, MWAMI WA VAYUDA. 27Va bamba halala naye avivi vaviri; mulala ha mkono mu lungi, nowundi ha mkono mmosi. 28Kandi ling'oda lya dukidzwa, li vola, Ya validzwa halala na avoni. 29Kandi ava vita va mu seka, ni va sung'usa mitwe ni va vola, Oho ive u sambula litempeli, u lyombaka kandi madiku gavaka, 30wehonnye, wike ku musalaba. 31Kandi ndiyo avasalisi vanene va mu sekerera avene halala navang'odi, va vola, Ya honnya avandi; mwene si a nyala kwehonnya. 32Kristo, Mwami wa Israeli, yike ku musalaba kalunu, ku lole kandi ku duke kusuuvira. Kandi ava bambwa naye halala va mu nyega.

33Lwa ya duka isaa i kola tsitanu nendala, kisundi kya gwa mu kivala lyosi, ya luha ya duka isaa i kola tsitanu na tsine. 34Ku isaa i kola tsitanu na tsine Yesu ya hanzuka nomwoyo munene, Eloi, Eloi, lama sabakatani? Iigirunkanywa lyago li veye kuvola, Nyasaye wange, Nyasaye wange, kigira ki u ndeki? 35Avalala kuvo ava singira himbi, lwa va ga hulira, va vola, Henza, a langa Elija. 36Mulala ya nyagula ni yizulitsa isiki kikaminyo, na a vika ku lusi na a mu ha a nwe, na a vola, Leka; ku lole Elija na a va ni yadza kumwikidza. 37Yesu ya hanzuka, na a kudza. 38Ingubo ya kinga mu litempeli ya tandulwa hagati kutwula higulu kuduka hasi. 39Munyampara, wa singira himbi naye, lwa ya lola na a kudza ndiyo, ya vola, Ligali mundu uyu ya li Mwana wa Nyasaye. 40Kandi avakali va singira ihale ni va henza: avalala kuvo va li Maria Magdalene, na Maria mama wa Yakobo mke na Yose, na Salome; 41ava mu londa lwa ya li mu Galilaya, ni va mu tumekira; navakali avandi vanyingi avanegira naye kutsia Yerusalemi.

42Isi lwa ya mwama, kigira lya li lidiku lyokwetegeke, nalyo ni lidiku li veye imbiri welisabato, 43Yosefa wa Arimathia, mukulundu mugoosi, kandi mwene wa henzerera ubwami bwa Nyasaye, yadza, ni yingira nobuluviriri wa Pilatu, na a saava umubiri gwa Yesu. 44Pilatu ya genya kuhulira u mali kukudza: na a langa munyampara, na a mu teva, a kudzi kale naho. 45Lwa ya hulira amakuva gomunyampara, ya ha Yosefa mukudzu. 46Ya gula ingubo yekatani, na a mwikidza, na a mu nadza nengubo, na a mu vika mu kilindwa kya kalagwa mu ligina; na a gomagominya ligina na a ku nika kiliango kyekilindwa. 47Maria Magdalene na Maria mama wa Yose va lola ha ya vikwa.

Currently Selected:

Marko 15: MBE

Highlight

Copy