LIVALIZA 1
1
Livaliza liu kutanga lia vandu va Isiraeli
1Ku lidiku liu kutanga liu mweli gwa kaviri, mu muhiga gwa kaviri, lwa vandu va Isiraeli vaali nivakatula Egebeti, Yahova yamoloma na Musa imbiri wi lihema lilie Liukuvuganira mu muchangalangwe cha Sinai. Yavoola, 2“Ivi harara na Haruni mulavaliza vandu va Isiraeli, kolondekana ni zihiiri kandi ni zinyumba ziavo. Ong'ode amita ga vasaza vosi 3kutangira ku mihiga 20, avaveeye avadukiru kutumika mu vulwani. 4Oteeve mwimiliri mulala munene kutura ku vuli ihiiri akokonye.” 5Yaga na mita ga vimiliri vatovolwa kutura mu zihiiri kokora miyinzi yiji. Kutura mu ihiiri ya Rubeni yaali Elizuri muyaayi wa Shedeuri. 6Kutura mu ihiiri ya Simioni yaali Shelumieli muyaayi wa Zurishadai. 7Kutura mu ihiiri ya Yuda yaali Nashoni muyaayi wa Aminadabu. 8Kutura mu ihiiri ya Isakari yaali Nazaneli muyaayi wa Zuari. 9Kutura mu ihiiri ya Zabuloni yaali Eliabu muyaayi wa Heloni, 10Kutura mu vana va Josefu, yatovola Efuraimu na Elishama muyaayi wa Amihudi; kutura mu ihiiri ya Manase yaali Gamalieli muyaayi wa Pedahizuri. 11Kutura mu ihiiri ya Benjamini yaali Abidani muyaayi wa Gidioni, 12kutura mu ihiiri ya Dani yaali Ahiezeri muyaayi wa Amishadai, 13kutura mu ihiiri ya Asheri yaali Pagieli muyaayi wa Okirani, 14kutura mu ihiiri ya Gadi yaali Eliasafu muyaayi wa Duyeli, 15kutura mu ihiiri ya Nafutali yaali Ahira muyaayi wa Enani. 16Yava nivo avatovolwa kutura mu muganda gwa aviimiliri vi zihiiri zia vaguuga vaavo vimiliri vi zihiiri zia Isiraeli. 17Musa harara na Haruni vaavugura vandu yava, vamita gaavo gaali ni gang'odeywi. 18Lidiku liu kutanga liu mweli gwa kaviri, vavuganyia vandu vene yava vosi harara, kandi nivag'oda, vandu vosi kolondekana ni zihiiri ziavo na vababa vaavo kandi ni zinyumba ziavo. Kutura ku mihiga 20 kuzizagilira vang'odwa kandi nivavalizwa. 19Kuli Yahova yaali nalagi Musa. Kunangwa Musa yavaliza vandu vene yava vosi mwigendanyama lia Sinai. 20Kutura mu ihiiri ya Rubeni, waali wu kutanga ku vana va Yakobo, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo mulala sa mulala kolondekana ku ihiiri yaavo kandi zinyumba ziavo. 21Amita ga vasaza kutura mu ihiiri ya Rubeni vaali avandu 46,500. 22Kutura mu ihiiri ya Simioni, avasaza vosi avaari ni mihiga 20 kuzizagilira, avaari vanyara kuzia mu vulwani vaavalizwa kandi nivang'odwa mita gaavo mulala sa mulala kolondekana ni zihiiri ziavo kandi zinyumba ziavo. 23Avandu vosi kutura mu ihiiri ya Simioni vaali 59,300. 24Kutura mu ihiiri ya Gadi, avasaza vosi avaari ni mihiga 20 kuzizagilira, avaari vanyara kuzia mu vulwani, vang'odwa mita gaavo kolondekana ku zihiiri ziavo kandi zinyumba ziavo. 25Avandu vosi kutura mu ihiiri ya Gadi vaali 45,650. 26Kutura mu ihiiri ya Yuda, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 27Avandu vosi kutura mu ihiiri ya Yuda vaali 74,600. 28Kutura mu ihiiri ya Isakari, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo, kolondekana ni zihiiri ziavo kandi zinyumba ziavo 29Avandu vosi kutura mu ihiiri ya Isakari vaali 54,400. 30Kutura muhiiri ya Zabuloni, avasaza vosi avaari ni mihiga 20 kuzizagilira avaari vanyara kuzia mu vulwani, vang'odwa mita gaavo kolondekana ni zihiiri ziavo kandi zinyumba ziavo. 31Avandu vosi kutura mu ihiiri ya Zabuloni vaali 57,400 32Kutura ku vana va Josefu vi ihiiri ya Efuraimu, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 33Avandu vosi kutura mu ihiiri ya Efuraimu vaali 40,500. 34Kutura mu ihiiri ya manase, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 35Avandu vosi kutura mu ihiiri ya Manase vaali 32,200. 36Kutura mu ihiiri ya Benjamini, avasaza vosi avaari ni mihiga 20 kuzizagilira avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 37Avandu vosi kutura mu ihiiri ya Benjamini vaali 35,400. 38Kutura mu ihiiri ya Dani, avasaza vosi avaari ni mihiga 20 kuzizagilira, avaari vanyara kuzia mu vulwani, vang'odwa mita gaavo kolondekana ni zihiiri ziavo kandi zinyumba ziavo. 39Avandu vosi kutura mu ihiiri ya Dani vaali 62,700. 40Kutura mu ihiiri ya Asheri, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 41Avandu vosi kutura mu ihiiri ya Asheri vaali 41,500. 42Kutura ku ihiiri ya Nafutali, avasaza vosi avaari ni mihiga 20 kuzizagilira, avaari vanyara kuzia mu vulwani vang'odwa mita gaavo kolondekana ni zihiiri ziavo kandi zinyumba ziavo. 43Avandu vosi kutura mu ihiiri ya Nafutali vaali 53,400. 44Yava na vandu va Musa na Haruni vaavaliza nivanywa na vimiliri kutura mu vandu va Isiraeli avasaza likomi na vaviri, vuli mulala yasingiliraa inyumba ya baba weve. 45Avandu vosi va Isiraeli avaari ni mihiga 20 kuzizagilira, avaari vanyara kuzia mu vulwani vwa Isiraeli, vaavalizwa kolondekana ni zinyumba ziavo. 46Avandu vosi avavalizwa mu Isiraeli vaali 603,550.
47Navuzwa vandu vi ihiiri ya Levi si vavalizwa harara ni zihiiri zindi mba, 48kigira Yahova wavo yaali navoleeye Musa, 49“Lwa uvaliza avasaza avanyala kuzia mu vulwani, utavaliziramu ihiiri ya Levi mba. 50Havogono hene yaho, otovole ihiiri ya vandu va Levi vasingiliri Lihema liange harara ni viju vialio. Valaginga lihema yili harara ni viju vialio, vatumiki mulio, kandi vumbake havundu hokososera kundulu kwa lio. 51Lwa mwisunda havundu handi avandu vi hiiri ya Levi valasambula lihema ma valigingi kuhila havundu hoosi hamuzia hahia, valiumbake kandi. Mundu woosi uzia himbi ni lihema yili aliitwa. 52Avandu va Isiraeli valumbaka mahema gaavo mu miganda jaavo. Vuli mundu alava hokososera hehe mwene, hasi he bendera yeye. 53Avandu vi ihiiri ya Levi valumbaka havundu hokososera haavo kukumberiza lihema nukulilinda, kunangwa uvutima vwange vuvuli kuduuka ku livugana lia vandu va Isiraeli.” 54Kunangwa, avandu va Isiraeli vaakora vindu viosi kuli Yahova yaali nalagi Musa.
Currently Selected:
LIVALIZA 1: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019