LIVALIZA 2
2
Lilohiza lie Zihiiri Havundu Hokososera
1Yahova yahaana malago yaga ku Musa na Haruni. 2Lwa vandu va Isiraeli vumbaka mahema gaavo, vuli mundu alalomba hokososera hehe isi we bendera yu muganda gwigwe harara ni vilolero via vaguuga vaavo. Valumbaka mahema gaavo kukumberiza Lihema liukuvuganiramu.
3Ihiiri yumbaka kulovega lwi Ivugwi wi liuva litongera, ilava ihiiri ye bendera yu muganda gwa Yuda. Mwimiliri wavo alava Nashoni muyaayi wa Aminadabu. 4Muganda gwigwe negoveeye vandu 74,600. 5Ihiiri ya Isakari ilumbaka himbi kuvo. Mwimiliri wavo naveeye Nezaneli muyaayi wa Zuari. 6Muganda gwigwe nigoveeye gwa vandu 54,400. 7Maku ihiiri ya Zabuloni ilava ahimbi ni ihiiri ya Isakari. Mwimiliri wavo naveeye Eliabu muyaayi wa Heloni, 8muganda gwigwe nigoveeye gwa vandu 75,400. 9Avandu vosi avaari havundu hokososa kolondekana ni miganda jaavo vaali 86,400. Yava valava vukutanga kuzia mu vulwani.
10Zihiiri ziumbaka kolovega lwi Isavaalu valava vandu ve bendera yu muganda gwa Rubeni. Mwimiliri wavo alava Elizuri muyaayi wa Shedeuri. 11Muganda gwigwe nigoveeye gwa vandu 46,500. 12Ihiiri ya Simioni ilumbaka himbi navo. Mwimiliri wavo alava Shelumieli muyaayi wa Zurishadai. 13Muganda gwigwe nigoveeye gwa vandu 59,300. 14Ihiiri ya Gadi ilumbaka himbi ni ihiiri ya Simioni. Mwimiliri wavo alava Eliasafu muyaayi wa Deyeli. 15Muganda gwigwe nigoveeye gwa vandu 45,650. 16Avandu vosi avaari havundu hokososa kolondekana ni miganda jaavo vaali 151,450. Yava valakave vakaviri kuzia mu vulwani.
17Lihema liukuvuganiramu lilumbakwa harara nohokososela hi ihiiri ya Levi hagati hi miganda jokososa. Valatura kuzia kolondekana kuli vumbaka havundu haavo hokososa, vuli muganda nigwimiriywi ne bendera yagwo.
18Zihiiri ziumbaka kolovega lwi madioli zilava vandu ve bendera yu muganda gwa Efuraimu nivimiliywi ne bendera yaavo. Mwimiliri wavo alava Elishama muyaayi wa Amihudi. 19Muganda gwigwe nigoveeye gwa vandu 40,500. 20Ihiiri ya Manase ilumbaka himbi ni ihiiri ya Efuraimu. Mwimiliri wa gwo alava Gamalieli muyaayi wa Pedahizuri. 21Muganda gwigwe nigoveeye gwa vandu 32,200. 22Ihiiri ya Benjamini ilumbaka himbi ni ihiiri ya Manase. Mwimiliri wavo alava Abidani muyaayi wa Gidioni. 23Muganda gwigwe nigoveeye vandu 35,400. 24Avandu vosi avaari havundu hokososa kolondekana ni miganda jaavo vaali 108,100. Yava valava vakavaga kuzia muvulwani.
25Zihiiri ziumbaka kolovega lwi Ivaale zilava vandu ve bendera yu muganda gwa Dani. Mwimiliri wavo alava Ahiezeri muyaayi wa Amishadai. 26Muganda gwigwe gulava gwa vandu 62,700. 27Ihiiri ya Asheri ilumbaka ahimbi ni hiiri ya Dani. Mwimiliri wavo alava Pagieli muyaayi wa Okirani. 28Muganda gwigwe nigoveeye gwa vandu 41,500. 29Ihiiri ya Nafutali ilumbaka ahimbi ni ihiiri ya Dani. Mwimiliri wavo naveeye Ahira muyaayi wa Enani. 30Muganda gwigwe nigoveeye gwa vandu 53,500. 31Avandu vosi vumuganda gwa Dani vaali 157,600. Ihiiri ya Dani ilava yu kumaliriza kutura nu kuzia.
32Avandu va Isiraeli vosi avavalizwa kolondekana ni zihiiri ziavo kandi mu miganda jaavo havundu hokososa vaali 603,550. 33Avandu vi hiiri ya Levi si vavalizwa harara na vandu va Isiraeli mba, kuli Yahova yaali nalagi Musa.
34Kunangwa, Avandu va Isiraeli vaakora vuli kindu choosi cha Yahova yaali nalagi Musa. Vumbaka hokososa haavo mu miganda, vuli muganda gwimiliywi nebendera yagwo; kandi vagenda ni vazia kolondekana na vandu vinyumba yeeye.
Currently Selected:
LIVALIZA 2: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
