LIVALIZA 3
3
Avayaayi va Haruni
1Yivi ni visukululwi via Haruni na Musa ku ing'inga ya Yahova yamoloma na Musa ku kiguru cha Sinai. 2Haruni yaali navayayi vane: Nadabu muyaayi wukutanga, Abihu, Eliaza, na Izamara. 3Yaga na mita gavayaayi va Haruni, avavakwa maguta, nukuviikilwaku amakono kutumika kuli avasaalisi. 4Navuzwa Nadabu na Abihu vakuzira mu changalangwi cha Sinai lwa vatumikira muliru gwavula kuvugilirwa mulihaana visiuviliru ku Yahova. Na kigira Nadabu na Abihu sivali navana vayaayi mba, Eliaza na Izamara vaatumika kuli vasaalisi lwa baba wavo yaali nakikiri mwoyo.
Avandu va Levi vatovolwa kutumikira Avasaalisi
5Yahova yavolera Musa, 6“Oleete avandu vi ihiiri ya Levi ma uvatovole kuva kuli avatumikiri vu musaalisi Haruni. 7Valakole miyinzi ji Lihema liange kandi nokokolera avasaalisi miyinzi navandu vosi imbiri wi lihema liu kuvuganiramu. 8Valalinda viju viosi vie Lihema nokokolera avandu vandi vosi va Isiraeli miyinzi lwavatumika mulihema. 9Miyinzi ja vandu vi ihiiri ya Levi jilava kutumikira Haruni navayayi veve. 10Ivi ulatovola Haruni harara na vayaayi veve kokora miyinzi juvusaalisi; wundi mundu woosi ogeliza kokora miyinzi yiji aliitwa.”
11Yahova yavolera Musa, 12“Inzi mali kuvugura vandu vi ihiiri ya Levi kutura hagati ha vandu va Isiraeli havogono vwavuli mwana wukutanga wa vandu va Isiraeli. Avandu vi ihiiri ya Levi valava vandu vange, 13Kigira avana vukutanga vosi vaveeye avange. Lidiku lia ndiita avana vukutanga vosi mu kivala cha Egebeti, ndatakasa vuli lwivulu lwu kutanga mu Isiraeli kigira inze kandi zinyama; valava avange. Inzi mbeeye Yahova.”
Livaliza lia Vandu va Levi
14Yahova yavolera Musa mu changalangwi cha Sinai, 15valizi avandu vi ihiiri ya Levi kolondekana nizinyumba zia vababa vaavo kandi niviliango viavo; vuli musaza kutulaku mweli mulala nukuzizagilira, yava vosi valavalizwa. 16Kunangwa Musa yavavaliza kolondekana ni likuva lia Yahova yamulaga. 17Levi yaali na vayaayi vavaga Gerishomu Gohazi na Merari: 18Gerishoni yaali na vayaayi vaviri: Libini na Shimei. 19Kohazi yaali na vayaayi vane; Amuramu, Izihari, Heburoni na Uzieli. 20Merari yaali na vayaayi vaviri; Mahili na Mushi. Yava na vandu vi ihiiri ya vandu va Levi, kolondekana nizinyumba zia vababa vaavo.
21Ihiiri ya Gerishoni yaali ya vandu vi inyumba ya Libini na Shimei. 22Livalizwa lia vandu vasaza kutura ku mweli mulala kuzizagilira vaali 7,500. 23Ihiiri yiyi yumbaka havundu hokososa kolovega lwi Imadioli, inyima wi Lihema. 24Mwimiliri wavo yaali Eliasafu mwana wa Laeli. 25Ihiiri yiyi yalinda Lihema, inguvu yu kufuma mugati, inguvu yu kufuma ichova, isuuka yu kufuma mu vwingiliru, 26zisuka ziu kufuma mugizi, isuuka yu kufuma mu vwingiliru vwu mugizi gwakumberiza lihema nu vwali, kandi vwingiliru vwu mugizi miyinzi jaavo jaali kulinda vindu yivi viosi.
27Ihiiri ya Kohazi yaali ya vandu vinyumba ya Amuramu, Izihari, Heburoni, na Uzieli. 28Avasaza vosi avaari kutura mweli mulala noho kuvita vaali 8,600. Yava nivo avaari mu vulindi vwa havundu Hatakatifu. 29Ihiiri yiyi yumbaka ahokososa haavo kolovega lwi isavaalu wi Lihema. 30Mwimiliri wavo yaali Elisafani muyaayi wa Uzieli. 31Valinda Lisandugu lie lilagana, emesa, kinaara chi Taya, uvwali, viju via vasaalisi vaatumikira havundu Hatakatifu, harara ni Isuuka yafumaa havundu Hatakatifu ligali miyinzi jaavo jaali kulinda vindu yivi viosi.
32Elieza muyaayi wa Haruni Musaalisi, yaali mwimiliri munene wi ihiiri ya Levi. Yimilira vandu vayinzira havundu Hatakatifu.
33Ihiiri ya Merari yaali ya vandu vi inyumba ya Mahili na Mushi. 34Livaliza lia vasaza vosi kutura mweli mulala kuzizagilira vaali 6,200. 35Ihiiri yiyi yumbaka ahokososa haavo kolovega lwi Ivaale wi Lihema. Mwimiliri wavo yaali Zurieli muyaayi wa Abihaili. 36Vatovolwa kulinda zimbaho zie Lihema, zimbohero zialio, vigutu vialio, mialiru jalio harara niviukuwumbakila viosi. 37Kandi valinda zitiru, malilu, vigutu, kandi migoye ju mugizi gwichova.
38Musa na Haruni harara na vana veve, vumbaka hokososa haavo kolovega lwi Ivugwi, imbiri wi Lihema. Vasingilira miyinzi jakolelwa Havundu Hatakatifu kulwa vandu va Isiraeli. Mundu woosi waza ahimbi na Havundu Hatakatifu yitwa. 39Avasaza vosi vi ihiiri ya Levi kutura mweli mulala kuzizagilira, ava Musa na Haruni vaavaliza kolondekana ni zinyumba ziavo ku lilaga lia Yahova vaali 22,000.
Avandu vi Ihiiri ya Levi vavugura Vogono vwa Vayaayi vu Kutanga
40Yahova yavolera Musa, “Uvalizi avasaza vosi va Isiraeli vukutanga kwivulwa, kutura mweli mulala kuzizagilira. Ong'ode amita gaavo. 41Uvuguli avandu vi ihiiri ya Levi vave avange havogono ha vandu va Isiraeli vukutanga kwivulwa; kandi mitugu josi ja va Levi jive havogono hi mitugu josi ja Isiraeli ju kutanga kwivulwa. Inzi mbeeye yahova.” 42Maku Musa yavaliza vasaza vosi va Isiraeli vu kutanga kwivulwa, kuli Yahova yamulaga. 43Livaliza lia vasaza vosi vu kutanga kwivulwa, kutura mweli mulala kuzizagilira vaali 22,273.
44Yahova yavolera Musa, 45“Usaalisi avandu vihiri ya Levi vave avange havogono ha vasaza vosi va Isiraeli vukutanga kwivulwa, kandi usaalisi mitugu ja vandu va Levi jive havogono himitugu jukutanga kwivulwa ja va Isiraeli, Inzi mbeeye Yahova. 46Kigira vasaza va Isiraeli vukutanga kwivulwa vaavitile vandu va Levi, avandu 273, kuduuka muguli avandu vaveeyeku igulu yava. 47Ulatuunga vidonye 5 vie ifeza ku vuli mulala, kolondekana nuvuguli vwavugililwa. 48Kandi muhaane mabesa yaga ku Haruni na vayaayi veve.” 49Kunangwa Musa yakola kuli Nyasaye yamulaga manaavugura. 50Vidonye 1,365 vie ifeza kolondekana ni ligera lia Hatakatifu. 51Maku Musa yahaana mabesa yaga ku Haruni na vayaayi veve.
Currently Selected:
LIVALIZA 3: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019