LIVALIZA 4
4
Miyinzi ja vandu va Levi vinyumba ya Kohazi
1Yahova yavolera Musa na Haruni, 2vavalizi avandu vi inyumba ya Kohazi avaveeye vi ihiiri ya Levi, kolondekana ku zinyumba ziavo; 3kandi vang'ode amita ga vasaza vosi avaveeye hagati hi mihiga 30 na 50, avaveeye avadukiru kutumika mu Lihema liu kuvuganiramu. 4Vutumiki vwavo vulava kuyinzira ku viju vitakatifu ligali mu Lihema liu kuvuganiramu.
5Lwi ing'inga iduuka yu kusambula hokososa, Haruni na vayaayi veve valingila mu Lihema, vatulizi isuuka eveeye imbiri wi Lisandugu lie lilagana, ma valikuniki ni Isuuka yiyi. 6Maku vavuguli kesero chi imburi nivaviika kwigulu ma nivakunika kwigulu, ma vavambuli inguvu yi bulu kwigulu maku vaviiki misaala ju kuginga mu vogono vwajo.
7Valala komesa inguvu ya bulu kigira mugadi mutakatifu, ma vaviiki ku zisahani, viju vie vifunya mwayu, zibakuli zie sadaka kandi vikombe vie iwaini. Mugadi gulava komesa kazozo. 8Maku valakunika kuvindu yivi inguvu inzakanyu, kandi vakuniki kwigulu kesero chi imburi; maku vaviiki misaala ju kuginga mu vogono vwajo.
9Valavugula inguvu ya bulu ma vakuniki ku kinaara chi taya, harara ni zitaya ziacho, makasi, izinju, harara ni viju viosi via maguta. 10Maku valavugula kesero chi imburi ma valingili mu harara ni viju viosi; ma vaviviiki ku misaala ju kugingilaku.
11Valavugula inguvu ya bulu ma vaale ku vwali vwi zahabu, ma vakunikiku kesero chi imburi; ma vaviiki ku misaala ju kugingilaku. 12Valavugula viju viosi ivitumikaa Havundu Hatakatifu, ma valingili mu inguvu ya bulu, vakunikiku kesero chi imburi, ma vaviiki ku misaala ju kugingilaku. 13Valeya ligoke kutura ku vwali, ma vaaleku inguvu yu muzambarao. 14Valaviika ku vwali viju viosi vitumikaa: Vifuria, zibakuli, vijiko, uvwuma, kandi zibenzeni: maku valakunikaku kesero chi imburi, ma vaviiki ku misaala ju kugingilaku. 15Lwa Haruni harara na vayi vinyumba yeeye vamala kukunika Havundu Hatakatifu harara ni viju viosi vitakatifu, kandi lwa vava nivetegeki kuzia kutura a hokososera, avandu vi inyumba ya Kohazi valaza kuginga Lihema. Navuzwa gavadukiraa vavuli kugumira ku viju vitakatifu, gase valakuza. Kuginga lihema havundu hoosi halizia ni miyinzi ja vandu vi inyumba ya Kohazi.
16Elieza muyaayi wa Haruni musaalisi, alalinda maguta gu muzitaya, vifunya mwayu, kihanwa chu vuswage, maguta gu kuvaka ga kazozo, harara ni viju vindi viosi viveeye mu Lihema litakatifu lia Yahova.
17Yahova yavolera Musa na Haruni, 18“Mutaleka ihiiri ya vandu va Kohazi vadivizwi kutura ku vandu va Levi mba. 19Muvakolere vulahi kunangwa vaduuki komenya na vavuli kukuza lwa visunda ahimbi ni viju vitakatifu ligali. Haruni na vayaayi veve valazia mu Lihema nu kugavura miyinzi ku vuli mundu, kandi nu kuvavoolera agadukanaa vakole. 20Navuzwa avandu vi inyumba ya Kohazi vatazia mu lihema kohenza ku viju vitakatifu kali hakuzu mba, gase valakuza.”
Miyinzi ja Vandu va Levi vi Inyumba ya Gerishoni
21Yahova yavolera Musa, 22avalizi avandu vi inyumba ya Gerishoni avaveeye vi ihiiri ya vandu va Levi kolondekana na vaguuga vaavo. 23Vang'oda amita ga vasaza vosi avaveeye hagati hi mihiga 30 na 50, avaveeye avadukiru kokora miyinzi mu Lihema lia Yahova. 24Miyinzi jaavo jilava kuginga viju yivi. 25Valaginga lihema, vikuniku vialio viu mugati kandi vie chova, kesero chu kukunika kwigulu, isuuka yu kufuma mu vwingiliru, 26zisuka kandi migoye ju mu mugizi gwa kumberiza Lihema liu kuvuganiramu kandi uvwali, zisuka ziu mu vwingiliru vwu mugizi, harara ni vindu viosi viduukana ku miyinzi. Valakola miyinzi yiji josi jiduukanaa ni vindu yivi. 27Musa na Haruni valahenzeriza kolola ndi miyinzi josi ja Haruni na vayaayi veve vahaana ku vandu vi inyumba ya Gerishoni jikolekaa. 28Valajikola mu vwimiliri vwa Izamara muyaayi wa Haruni musaalisi.
Miyinzi ja vandu va Levi vi Inyumba ya Merari
29Yahova yavolera Musa avalizi avandu vi inyumba ya Merari, avaveeye vi ihiiri ya vandu va Levi kolondekana na vaguuga vaavo; 30kandi ang'ode amita ga vasaza vosi avaveeye hagati hi mihiga 30 na 50, avaveeye avadukiru kokora miyinzi mu Lihema liu kuvuganiramu. 31Miyinzi jaavo gilava kuginga zimbaho zie Lihema, zimbohero, zitiru, mialiru, 32zitiru ziu mugizi gukumberizaa Lihema harara ni mialiru, vivambo, ni migoye. Vuli mundu alagiinga viju viduukana naye. 33Yiji ni miyinzi ja vandu vi inyumba ya Merari mu vutumiki vwosi vwi Lihema. Vaakora miyinzi yiji mu vwimiliri vwa Izamara muyaayi wa Haruni musaalisi.
Livaliza lie Ihiiri ya Vandu va Levi
34Kolondekana ni lilago lia Yahova, Musa, Haruni na vimiliri va Isiraeli, vaavaliza avandu vi inyumba ya Kohazi, kolondekana na vaguuga vaavo. 35Vang'oda mita ga vasaza vosi avaari hagati hi mihiga 30 na 50, avaari avadukiru kutumika mu Lihema liu kuvuganilamu. 36Avandu vosi vavalizwa vaali 2,750. 37Yili nilio livaliza liosi lia vandu vi inyumba ya Kohazi avatumikaa mu Lihema liu kuvuganilamu.
38Vaavaliza vandu vi inyumba ya Gerishoni kolondekana na vaguuga vaavo. 39Vang'oda mita ga vasaza vosi avaari hagati hi mihiga 30 na 50, avaari avadukiru kutumika mu Lihema liukuvuganiramu. 40Avandu vosi vavalizwa vaali 2,630. 41Yili nilio livaliza liosi lia vandu vinyumba ya Gerishoni, avatumikaa mu lihema liukuvuganiramu, ava Musa na Haruni vaavaliza kolondekana ni lilagalia Yahova.
42Vaavaliza vandu vinyumba ya Merari kolondekana na vaguuga vaavo. 43Vang'oda mita ga vasaza vosi avaari hagati hi mihiga 30 na 50, avaari avadukiru kutumika mu lihema liukuvuganiramu. 44Avandu vosi vavalizwa vaali 3,200. 45Yava nivo avandu vosi vi inyumba ya Merari ava Musa na Haruni vavaliza kolondekana ni lilago lia Yahova.
46Kunangwa, Musa, Haruni harara na vimiliri va madaala, vaavaliza avandu vi ihiiri ya avandu va Levi kolondekana na vandu vi zinyumba ziavo kandi avaguuga vaavo. 47Avandu vosi avavalizwa, avaari hagati hi mihiga 30 na 50, avaari avadukiru kutumika mu Lihema liukuvuganiramu, 48vaali 8,580. 49Kolondekana ni lilago lia Yahova kuvitira ku Musa, avandu yava vatovolwa vuli mulala kokora vutumiki mu Lihema anoho kuginga lihema lia Yahova. Musa yavavaliza vosi ku lilaga lia Yahova.
Currently Selected:
LIVALIZA 4: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019