LIVALIZA 23
23
1Baalamu yavolera Balaki, “Nyumbakira uvwali saba, kandi ondeetere zigiriki saba na mamigu saba.” 2Balaki yakola kuli yavolerwa; oyo harara na Baalamu vahaana kihanwa chigiriki ni limigu ku vuli vwali. 3Maku Baalamu yavolera Balaki, “Singira hano himbi ni kihanwa chicho chu kusambwa, ninzi ndazia kulola niiva Yahova alavugana ninzi. Ndakovolera choosi chaava naambuulila.” Kunangwa yazia yeng'ine kondongozi yi kiguru, 4na Nyasaye yavugana naye. Baalamu yamuvolera, “Mali kwumbaka uvwali saba ma mbaani kihanwa chi giriki ni limigu ku vuli vwali.” 5Yahova yavolera Baalamu cho kovora ma naamutuma kwirana ku Balaki kumuha makuva geege. 6Kunangwa Baalamu yirana nanyoora Balaki na akisingiyi himbi ni kihanwa chiche chu kusambwa harara na vimiliri vosi va Moabu.
7Baalamu yavoola voporofeti yivu;
“Balaki mwami wa Moabu yandeti,
kutura Siria, mukivala chi vigulu vie Ivugwi.
Yavoola, ‘Hamba omolomere,
ulaame avandu va Isiraeli.’
8Nyara ndi kulaama cha Nyasaye akikiri kulaama,
naho nyalandi kudiviza,
lwa Yahova akikiri kuvoola ndio?
9Nyara kuvalola kutura kondongozi yi kiguru;
nyara kuvahenzeriza kutura ku vigulu.
Vaveeye ihiiri emenyi yeng'ine
vamanyi ndi na vandu vagasizwa kuvita zihiiri zindi.
10Visukululwi via Isiraeli viveeye kuli luguchi
viveeye vinyingi ligali kuvalizwa;
leka mbelizi madiku gange kuli mulala ku vandu va Nyasaye.
Leka nguzi nu murembe kuli mundu mulungi.”
11Maku Balaki yavolera Baalamu, “Ongoleeye ki? Ngoleti hano kunamila vasigu vange, navuzwa cha okoli ni kuvagasiza.”
12Baalamu yamutivulira navoora, “Nyara kovora vutswa aga Nyasaye amboleraa kovora.”
Ovoporofeti vwa Kaviri vwa Baalamu
13Maku Balaki yavolera Baalamu, “Hamba ninzi kuzie havundu handi hunyala kololera valala ku vandu va Isiraeli. Uvanaamili kutura hene yaho.” 14Balaki yaahira Baalamu mu kiguti cha Zofimu kondongozi yi kiguru cha Pisiga. Hene yaho yumbaka kandi vwali saba ma nahaana kihanwa chi giriki ni limigu ku vuli vwali.
15Baalamu yavolera Balaki, “Singira hano himbi ni vihaanwa vivyo vyo kusamba, ninzi ndavugana na Nyasaye havundu hala.”
16Yahova yavugana na Baalamu namuvolera chokovoora, ma niyiirana naamutuma ku Balaki kuhaana makuva ga Yahova.
17Kunangwa yirana nanyoora Balaki akisingiyi himbi ni kihanwa chiche chu kusambwa na vimiliri va Moabu. Balaki yateeva kumanya cha Yahova yaali navooye, 18na Baalamu yativura uvoporofeti yivu:
“Hamba, Balaki muyaayi wa Zipori,
ma uhulirizi ganziiza kovora.
19Nyasaye siaveeye kuli avandu, unyala koveha mba;
siaveeye ho nu mundu unyala kugirung'anyia zing'anagani zizie mba.
Choosi chalagaa, akolaa;
amolomaa, ma gekoleka.
20Inzi ndavoolerwa ngasizi,
na Nyasaye nagasizi sinyala kwilanyia munwa mba.
21Ndolaa madiku gaaza imbiri ga Isiraeli,
sialavaleetela vudamanu naho vudinyu mba;
Yahova Nyasaye wavo aveeye navo;
valandiza ndi Yahova nu mwami wavo.
22Nyasaye yavatuliza Egebeti;
Avalwaaniraa kuli igiriki imbalava
23sihaveeye ne vyokwikingira,
kandi vusigitiri mba;
vinyala kutumikilwa kulwaana ihiiri ya Isiraeli.
Kalunu vandu valavoora kigira Isiraeli,
‘Henza ku ga Nyasaye amali kokora!’
24Ihiiri ya Isiraeli eveeye kuli isimba yi zinguru:
Siesosaa kuduuka lwa itandula nu kudiviza mba,
kuduuka lwa inwa masahi ga imali kwita.”
25Maku Balaki yavolera Baalamu, “Usuyi kulaama vandu va Isiraeli, navuzwa nuyanza utavagasiza mba!”
26Baalamu yativura navoora, “Sindakuvoolera ndi ndakora choosi cha Yahova yambolera?”
Uvoporofeti vwa Kavaga vwa Baalamu
27Balaki yavolera Baalamu, “Hamba ninzi na ndakuhila havundu handi kutura yaaha, mbula galayaanziza Nyasaye uvanaamili.” 28Kunangwa Balaki yaahira Baalamu kondongozi yi kiguru cha Peori kihenzana ni changalangwi. 29Baalamu yavolera Balaki, “Nzumbakila vwali saba hano ma ondetere zigiriki saba na mamigu saba.” 30Balaki yakola kuli vamuvolera, na ahaanaa vihaanwa vie giriki ni limigu ku vuli vwali.
Currently Selected:
LIVALIZA 23: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019