LIVALIZA 24
24
1Kuduuka lwene yilwo Baalamu yamanya ndi Yahova yenya aduuki kugasiza vandu va Isiraeli, kunangwa si yazia kwenyeleriza vudamanu kuli yaali naakori maziambiri mba. Yagilung'ana nahenza lovega lwi changalangwi, 2ma nalora vandu va Isiraeli ni vasoosa mu viduma kolondekana ni zihiiri ziavo. Mwoyo gwa Nyasaye gwaza kuye, 3ma naativula voporofeti yivu.
“Amakuva ga Baalamu muyaayi wa Boeri,
amakuva gu mundu unyala kolola vulahi,
4uyu unyala kuhulira ga Nyasaye avoora,
ni zimoni ziumika ndolaa mumalola,
amalola kutura ku Nyasaye Wuvunyali.
5Amahema ga vandu va Isiraeli gaveeye malahi,
6kuli zimbaso zindambi zia makindu,
naho milimi ku luginga lwu mugera,
kuli misaala ja Yahova yasimika,
anaho midaragwa ahimbi na mazi.
7Valava ni imbura inyingi
kandi valataga vumwu vwavo mu milimi giveeye na mazi manyingi.
Mwami wavo alava no vukumi kuvita vwa Agagi
uvwamihi vwivwe vulavambalalizwa kuduuka ihale na himbi.
8Nyasaye yavatuliza Egebeti,
Avalwaaniraa kuli igiriki imbalava vamilaa avasigu vaavo,
vamenenaa vigumba viavo, kandi vavunanyia vuta vwavo.
9Ihiiri eveeye kuli isimba yi zinguru;
lwegonaa siaveeye ho no mulala
unyala kuluvilira kugivukiza mba.
Uyu ugasizaa vandu va Isiraeli alagasizwa,
na uyu ulaama vandu va Isiraeli alalaamwa.”
10Balaki yaduyanyia zingundi zizie muvutima navolera Baalamu, “Ndaakulanga kulaama vasigu vange, navuzwa uvagaasizi haali kavaga. 11Kalunu tula uzie yengo! Ndaali nindagi ndakutunga, navuzwa Yahova umali kwigalira konyoora mutungu yigu.”
12Baalamu yativura navoora, “Ndaavoolera vatumwa vawatuma ku inzi ndi, 13kali niiva ulamba ifeza kandi izahabu eveeye munyumba yooyo yu vwami, sindaali nyara kuhing'ana na malago ga Yahova no kokora kindu inzi mwene mba. Ndavoora cha Yahova amboleraa mbore.”
Voporofeti vwa Baalamu vwo Kumaliriza
14Baalamu yavolera Balaki, “Kalunu nzirana ku vandu vange, navuzwa ningikiri kuzia, ngovolera ga vandu va Isiraeli valikolera vandu vovo mu zing'inga ziza.” 15Maku yativura uvuporofeti yivu:
“Makuva ga Baalamu muyaayi wa Boeri,
makuva gu mundu ololaa vulahi,
16uyu uhulira ga Nyasaye avoora;
na onyoora vogeri vuturaa ku uyu oveeye igulu ligali.
Ndolaa malola, ni zimoni ziumika,
amalola kutura ku Yahova Wuvunyali.
17Mbenzaa mu zing'inga ziza,
na ndolaa ihiiri ya Isiraeli.
Umwami kuli ing'ereng'ani yu vulavu,
alatonga kutura mu ihiiri yeyo.
Alatula mu vandu va Isiraeli, kuli ing'ereng'ani.
Alakuya aviimiliri va Moabu kandi alaguuta vandu vosi va Sezu.
18Alaguuta vasigu veve mu kivala cha Edomu,
kandi avuguli kivala chavo kuva mwandu gwigwe,
lwa Isiraeli izizagilira kuguuta.
19Avandu va Isiraeli valavasienela hasi,
kandi valadiviza avahononoka.”
20Maku mumalolo, Baalamu yalora
Avandu va Maliki, na vola ovoporofeti yivu:
“Ava Maliki yaali ihiiri yi zinguru ligali kuvita zihiiri zindi,
navuzwa mu limalirika iladivizwa mihiga ni mihiga.”
21Mumalolo geege yalora kandi
vandu va Keniti ma navoora ovoporofeti yivu:
“Havundu ha mumenyi haveeye ni likingwa,
halindwa kuli inyumba ye linyonyi haveeye igulu kulwanda.
22Navuzwa munyi avandu va Keniti muladivizwa,
lwa vandu va Siria vamuvugura kuli avahambe.”
23Baalamu yavoola ovoporofeti yivu,
“Yava ni vandu ki vivungikiza Ivaale?
24Aviguliri valaza kutura Saipurasi
valaguuta vandu va Siria na vandu va Eberi,
Navuzwa yavo valakadivizwi mihiga ni mihiga.”
25Maku Baalamu yetegeka ma niyiirana yengo, na Balaki yazia kunzira yeeye umwene.
Currently Selected:
LIVALIZA 24: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019