LIVALIZA 25
25
Avandu va Isiraeli vasigamira Baali ha Peori
1Lwa vandu va Isiraeli vaali nivamenyi Shitimu, avasaza vatanga likora voheyi na vakali va Moabu. 2Avakali yava vaavagenihiza mu lilia lie Lisavo lie visiuviliru via vanyasaye va Moabu. Avandu va Isiraeli valia viukulia kandi vasigamira vanyasaye vaavo. 3Kunangwa avandu va Isiraeli vahambana mu lisigamira vanyasaye va Baali ha Peori. Maku Yahova yaali nu vutima navo, 4kandi na volera Musa, “Vugula aviimiliri vosi va Isiraeli, uviiti mbasu, maku sindava nu vutima ku vandu va Isiraeli mba.” 5Musa yavolera aviimiliri ndi “Vuli mulala ku munyi aliita vuli mundu mu ihiiri yeeye umali kusigamira Baali ha Peori.”
6Mulala wa Isiraeli yavugula mukali wa vandu wa Midia na muhiraa mu lihema lilie imbiri wa Musa ni kiduma choosi, lwa vaali ni vasiomaraa ha vwingiliru vwi lihema lia Yahova. 7Lwa Finiasi muyaayi wa Elieaza waali mwisukulu wa Haruni musaalisi yalora yaga, yasingira naleka kiduma, navugura litimu, 8na londa musaza nu mukali mu lihema, ma navatumita ni litimu. Muinzira yiyi, uvulwaye vuhambizana vwadivizaa vandu va Isiraeli vwa herizwa, 9navuzwa vwali nivumali kudiviza vandu 24,000.
10Yahova yavolera Musa, 11“Kigira ga Finiasi amali kokora, sindava nu vutima na vandu va Isiraeli kandi mba. Yasura kuhambana mulisigamira vanyasaye vandi, navuzwa vaasigamira; yiki nicho kigira niimbura kuvadiviza muvutima vwange. 12Kunangwa umuvolere ndi nombaa naye lilagana liange liemirembe. 13Oyo harara ni visukululwe vivie valava ni lilagana liu vusaalisi mihiga ni mihiga, kigira yaali nuvuha mulihaana luyali ku Nyasaye weve kandi yaleeta vusamiihi vwu vwoni ku vandu va Isiraeli.”
14Lieta liu mundu wa Isiraeli witwa harara nu mukali wa vandu va Midia liali Zimuri muyaayi wa Salu mwimiliri wa vandu vi ihiiri ya Simioni. 15Lieta liu mukali liali Kozibi mukaana wa Zuri waali mwimiliri wa vandu vinyumba ya vandu va Midia.
16Yahova yalaga Musa, 17“Wingiliri avandu va Midia kandi uvadivizi, 18kigira uvudamanu vwa vamukolera lwa vamugada ha Peori, kandi kigira Kozibi, uwiitwa ing'inga yu vulwaye vuhambizana ha Peori.”
Currently Selected:
LIVALIZA 25: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019