Matias 25

'Ade-'ade mangale mosolese nga nyagi moi

1“Toma 'orasa gena-ge wakutu Ngoi, Manusia ma Ngowa'a Nau'u, dadunu To sapolo moju, Soroga ma Pareta#25:1 “Soroga ma Pareta” ma tero Ma Jou'ongu Madutu 'ai Pareta. Gena-ge ma tero toma bu-bula'a 14, 34. ma tero sa'olo 'ade-'ade nena-ne: Geri molo'ara were'a 'ami me-mete'e 'o mosolese nga nyagi moi, matengo re matengo remanga 'oboro, 'aḏi tagi totoma geri molo'ara na-nau'u.#Luk. 12:35 2Ananga nga mutoara ga'a ngowa'a haga re ananga nga mutoara ḏi'i ga'a ngowa'a pahe. 3Mosolese ma haga nga mutoara, 'aḏi gasa 'oboro, mada'a ma goroho 'i pai'i ua. 4Mosolese ma pahe nga mutoara, 'aḏi gasa 'oboro rema ma goroho pai-pai'i. 5Geri molo'ara na-nau'u 'o sapolo lati, dadi mosolese mo-moini gena-ge 'aḏi kakadungu, kara 'aḏi otu.

6'Utu golona i'a, ananga gena-ge 'aḏi 'isene ngowa'a 'aḏi poa'a, ‘Geri molo'ara na-nau'u 'o sapolo. Ino ngene ma'u sanga unanga!’

7Ḏua mosolese nga nyagi moi gena-ge 'aḏi momi'i, re ya sidodahe manga 'oboro. 8Mosolese-mosolese haga 'aḏi kanau toma mosolese-mosolese pahe, ‘Ninga goroho pula'a ra ngomi ceka'a i'a, sababu minga 'oboro sa'i ri sengene.’

9Mosolese-mosolese pahe 'aḏi sangoro, ‘Gena-ge 'i yoḏu'u, sababu awa-awa ngene wo masingadolo ua mo-moini. Tagi ni tibo toma toko.’ 10Ḏua mosolese ma haga gena-ge, 'aḏi tagi tibo manga goroho. Mada'a wakutu ananga 'aḏi tagi-tagi, geri molo'ara na-nau'u 'o sapolo. Mosolese-mosolese ga'a 'aḏi pahe, 'aḏi ḏu-ḏuanga ḏua, 'aḏi osama mamete'e reo geri molo'ara na-nau'u toma laya ma ngi'i, re ma ngalana ngowa'a ya kuci!

11Togumu i'a mosolese-mosolese ma haga 'aḏi ngadolo. Ananga 'aḏi kanau, ‘Tuanga, tuanga, na welanga ma ngalana, la ngomi mi osama.’

12Mada'a geri molo'ara na-nau'u 'o sangoro, ‘Ni ngaku 'Ari demo nena-ne: Ngoi tunu nana'o ngini ua!’ ”#Luk. 13:25

13Ḏua Yesus 'a siḏo-ḏogumu 'ai 'ade-'ade so'o ne: “Sababu gena-ge ni ma'istiari, sababu ngini ni waro ua ma wangere bolo ma 'orasa, Ngoi to sapolo.”

'Ade-'ade mangale budaka nga ḏu'ange

(Luk. 19:11-27)

14“Toma 'orasa gena-ge wakutu Ngoi, Manusia ma Ngowa'a Nau'u, dadunu To sapolo moju, Soroga ma Pareta ma tero sa'olo 'ade-'ade nena-ne: Na-nau'u matengo mau tagi toma giḏanga. Dadi, unanga 'o 'aro'o 'ai budaka-budaka, re 'a siparatada 'ai 'ori i'a rana ra ananga. 15Unanga 'o pula'a tai budaka-budaka mete'e ananga manga dinga'unu. Toma ngowa'a matengo unanga 'o pula'a pipisi guraci ma ngai cala romotoa. Ra matengo ḏi'i unanga 'o pula'a pipisi guraci ma ngai cala ḏiḏi. Re matengo moju unanga 'o pula'a pipisi guraci ma ngai cala moi, kara unanga 'o tagi. 16Budaka ga'a 'o sanga pipisi guraci ma ngai cala romotoa, jau-jau unanga 'o tagi re 'a sikololo singadolo unanga 'o sanga ma 'utungu pipisi guraci ma ngai cala romotoa ḏi'i. 17So'o gena ḏi'i, budaka ga'a 'o sanga pipisi guraci ma ngai cala ḏiḏi, unanga 'o sanga ma 'utungu pipisi guraci ma ngai cala ḏiḏi ḏi'i. 18Mada'a budaka ga'a 'o sanga pipisi guraci ma ngai cala moi, unanga 'o tagi re 'o tuso'o tana'a, 'a gogono tuanga 'ai pipisi.

19Togumu i'a ma di'ara ino, tuanga gena-ge 'o ḏibo re ya'u sano mangale pipisi ga'a unanga 'o siparatada ḏua ra ananga. 20Budaka ga'a ro dawongo pipisi guraci ma ngai cala romotoa 'o sapolo re 'o pula'a pipisi ma ngai cala nyagi moi tai tuanga. Unanga 'o kanau, ‘Tuanga no siparatada pipisi guraci ma ngai cala romotoa ra ngoi, oḏi'i ngoi ta sikololo re ta sanga ma 'utungu pipisi guraci ma ngai cala romotoa ḏi'i.’

21'Ai tuanga 'o kanau, ‘Rousu, ngana budaka ma la-la re no setia! Ngana reno dadi ngowa'a cufala rema 'ori i'a i'a pa'i ceka'a ua. Dadi Ngoi ḏuanga i'a tini siparatada 'ori i'a i'a lebe lamo'o ma repe moju. Ino osama re no tegoro marimoi ra ngoi, re no basono 'ari sa-sanangi!’

22Ḏua budaka ga'a ro dawongo pipisi guraci ma ngai cala ḏiḏi 'o sapolo re 'o kanau, ‘Tuanga, no siparatada pipisi guraci ma ngai cala ḏiḏi ra ngoi, oḏi'i ngoi ta sikololo re ta sanga ma 'utungu pipisi guraci ma ngai cala ḏiḏi ḏi'i.’

23'Ai tuanga 'o kanau, ‘Rousu, ngana budaka ma la-la re no setia! Ngana reno dadi ngowa'a cufala rema 'ori i'a i'a pa'i ceka'a ua. Dadi Ngoi ḏuanga i'a tini siparatada 'ori i'a i'a lebe lamo'o ma repe moju. Ino osama re no tegoro marimoi ra ngoi, re no basono 'ari sa-sanangi!’

24Ḏua, budaka ga'a ro dawongo pipisi guraci ma ngai cala moi 'o sapolo, re 'o kanau, ‘Tuanga, ngoi to waro 'ani 'akala re sinyingara lai te'e. Ngana ma tero sa'olo ngowa'a 'aḏi maso'ana ua, mada'a no 'oro enanga ma hasili, re no lomu sowo'o toma guḏa ga'a tuanga na siare gisisi ua. 25Ngoi to mojongo. Dadi ngoi ta gogono 'ani pipisi toma tana'a ma dara. Ne tuanga 'ani pipisi!’

26'Ai tuanga 'o kanau, ‘Ngana budaka ma jira ga'a no busenge! Na'o ngana rena ta'ajiri mangale ngoi to so'ana ua mada'a to 'oro ma hasili re lomu sowo'o toma guḏa ga'a ta siare gisisi ua! 27Na'o so'o gena, i'a sa'olo ngana na sigare ua ngoi 'ari pipisi toma bank, la wakutu ngoi toma ḏibo, ta sanga 'ari pipisi re enanga ma rete!

28Sababu gena-ge, 'oro 'ari pipisi ra unanga re pula'a toma budaka ga'a rai pipisi guraci ma ngai cala nyagi moi. 29Sababu 'a guna ḇato ro sanga repe, Ngoi ḏuanga ta sidogo ḏi'i singadolo pai-pai'i. Mada'a 'a guna ḇato 'o sanga ua; 'oru ḇato, kalaha unanga ra sanga pa'i ceka'a ua ḇato, gena-ge ḏi'i mai sanga 'oro!#25:29 Ḏa Yesus 'ai maksudu toma 'ade-'ade gena-ge so'o ne: Budaka ga'a ro sanga ua, 'ai 'ahu 'i iranga ga'a Ma Jou'ongu Madutu ra pula'a.#Mat. 13:12; Mrk. 4:25; Luk. 8:18 30Re budaka ga'a ma faeda 'i cua gena-ge, sanga upa'a toma ngi'i hafu-hafu toma ḏuḏunu. I'a da'a, ngowa-ngowa'a ḏuanga i'a 'aḏi rerese ma gaḏi re ya doiti ma sangisara!’ ”#Luk. 19:11-27#Mat. 8:12, 22:13; Luk. 13:28

Manusia ma Ngowa'a Nau'u 'o dadi Hakimi toma Kiamata ma Wangere

31“Wakutu Ngoi, Manusia ma Ngowa'a Nau'u To sapolo moju sa'olo 'Olana rari kabasarana lamo'o, mala'ekata mo-moini 'aḏi mete'e Ngoi, re Ngoi ḏuanga i'a to tegoro tari ḏe-ḏegoro ga'a 'i mulia.#Mat. 16:27, 19:28 32Bangsa mo-moini toma dungia ma dara 'aḏi malomu ra Ngoi 'ari biono. Ḏua Ngoi ta'u siwo-wola ngowa-ngowa'a gena-ge dadi balangu romoḏiḏi, ma tero sa'olo sowohi siwo-wola doba reo 'abingi. 33Ngowa'a ga'a 'aḏi mete'e Ma Jou'ongu Madutu 'ai 'akala ma mau Ta'u lomu Tari giama ma kuwiḏa, re ngowa'a ga'a mete'e ua Ma Jou'ongu Madutu 'ai 'akala ma mau Ta'u lomu Tari giama ma kuḇali.

34Togumu i'a, Ngoi 'Olana gena-ge, to kanau toma ngowa-ngowa'a Tari giama ma kuwiḏa, ‘Ino, ngini mo-moini ga'a 'Ari Ḇaḇa renu sibarakati. Ni osama toma Soroga ma Pareta ga'a Ngoi ta sidodahe ḏua di'a ngini wakutu dungia 'i dadi nyangu. 35Sababu wakutu Ngoi to sawini, ngini rini pula'a 'omo. Ngoi 'ari camala dudungu, ngini pula'a ka'e. Kalaha ngoi ngowa'a tagi-tagi ino, ngini dawongo Ngoi taninga wala. 36Ngoi 'ari pakeanga 'i cua, ngini rini pula'a pakeanga ra Ngoi. Ngoi to siḏi, ngini rini kadiarata Ngoi. Ngoi toma bui ma dara, ngini rini sapolo tutumu Ngoi.’

37Ḏua ngowa'a loasa re banari gena-ge 'aḏi kanau, ‘Ngomi mi oḏi'i Ma Jou no sawini 'au ngau, ḏua ngomi mi pula'a 'omo, bolo Ma Jou 'ani camala dudungu, ḏua ngomi mi pula'a ka'e. 38Ngomi oḏi'i Ma Jou sa'olo ngowa'a tagi-tagi ino tola'a taminga wala 'au ngau, kara ngomi dawongo Ma Jou taminga wala? 'Au ngau Ma Jou 'ani pakeanga 'i cua, ḏua ngomi mi pula'a pakeanga ra Ma Jou? 39Ngomi oḏi'i Ma Jou no siḏi 'au ngau kara ngomi kadiarata Ma Jou; bolo Ma Jou no osama bui 'au ngau, ḏua ngomi tutumu?’

40Re Ngoi, 'Olana gena-ge 'o sangoro, ‘Ni ngaku mode-mode'e Ngoi 'Ari demo nena-ne: 'Oru ḇato ngini reni 'a'a di'a riono 'Ari ioronongoḏu nena-ne ga'a ngowa'a mapake ua, Ngoi ta 'oro ino ma tero ḇato sa'olo ngini na riono Ngoi!’

41Gena ḏua, Ngoi 'Olana gena-ge to kanau toma ngowa-ngowa'a Tari kuḇali, ‘Ngini ngowa'a ma jira, ni tagi. Ni osama toma u'u ma lejanga ga'a kama sora-sora ua ga'a sidodahe ḏua di'a 'Iblisi re enanga ma mala'ekata-mala'ekata! 42Sababu wakutu Ngoi to sawini, ngini pula'a oromo ua. Wakutu Ngoi 'ari camala dudungu, ngini pula'a ka'e ua. 43Ngoi ngowa'a tagi-tagi ino, ngini dawongo Ngoi ua taninga wala. Ngoi 'ari pakeanga 'i cua, ngini pula'a pakeanga ra Ngoi ua. Ngoi to siḏi re to osama bui, ngini tutumu Ngoi ua.’

44Ananga 'aḏi kanau ḏi'i, ‘ 'Au ngau ngomi oḏi'i Ma Jou no sawini, bolo 'Ani camala dudungu, bolo sa'olo ngowa'a tagi-tagi ino, bolo 'Ani pakeanga 'i cua, bolo No siḏi re No osama bui, ḏua ngomi riono Ma Jou ua?’

45Re Ngoi, 'Olana gena-ge ta sangoro, ‘Ni ngaku mode-mode'e Ngoi 'ari demo nena-ne: Wakutu ngini ni oḏu'u riono ngowa-ngowa'a ma pake ua nena-ne, ma tero ḇato sa'olo ngini ni oḏu'u riono Ngoi.’

46Ḏua ngowa'a gena-ge ga'a Tari kuḇali, ananga 'aḏi tagi toma ngi'i di'a sanga hukumu kasingado-ngadolo i'a. Mada'a ngowa'a loasa re banari ga'a Tari kuwiḏa, ananga gena-ge 'aḏi tagi toma ngi'i lelegu di'a sanga 'ahu kasingado-ngadolo i'a.”#Dan. 12:2

Currently Selected:

Matias 25: SNT

Highlight

Copy