Matias 26

Ngowa'a Yahudi ma bi-biri'i disa ngo'omo di'a cako'o Yesus

(Mrk. 14:1-2; Luk. 22:1-2; Yoh. 11:45-53)

1Wakutu Yesus 'o doto'o 'ori i'a mo-moini gena-ge togumu ḏua, Unanga 'o kanau Tai me-mete'e, 2“Ngini ni waro, wangere ḏiḏi moju Paskah ma Wangere 'i ngadolo. Re Ngoi, Manusia ma Ngowa'a Nau'u sipula'a Tari lawana di'a sisalib.”#Sup. 12:1-27

3Toma 'orasa gena-ge 'imam-'imam ma sae'e re Yahudi manga bi-biri'i 'aḏi malomu toma 'imam 'agung Kayafas 'ai kadato. 4Ananga 'aḏi mafakati, la 'aḏi cako'o Yesus sigo-gogoro kara 'U sisengene Unanga. 5Mada'a ananga 'aḏi kanau, “Awa ngene wa si'a'a toma 'orasa Paskah ma Wangere, awa-awa toma rayata manga sigolona 'i dadi kaco.”

Side-dege bo-bounu ma hali madutu ra Yesus toma limau Betania

(Mrk. 14:3-9; Yoh. 12:1-8)

6Wakutu Yesus da'a toma gamu Betania, Unanga 'o tagi ra Simon 'ai wala, unanga gena-ge ma siḏa 'o sanga si-siḏi 'eno'o. 7Toma 'orasa gena-ge, we-were'a matengo mo sapolo ra Yesus, munanga mo gasa bou-bounu botol rimoi. Bou-bounu gena-ge ma ijana hali madutu. Wakutu Yesus 'o majoreke oromo moju, we-were'a gena-ge mo masiba-ba'ala bou-bounu gena-ge ra Unanga 'ai sae'e.#Luk. 7:37-38

8Wakutu Yesus 'ai me-mete'e ya oḏi'i i'a so'o gena-ge, ananga 'aḏi dadi porata re 'aḏi kanau, “Ma la 'oru munanga mo sibodiga 'ami bou-bounu simoini? 9Na'o bo-bounu gena-ge mawu'unu ma ijana lai hali, kara ma pipisi na pula'a toma ngowa-ngowa'a ma dinga'unu ua!”

10Yesus 'a waro ananga manga fikirana. Dadi Unanga 'o kanau, “I'a sa'olo ngini nimi sikangela 'ami 'akala re sinyingara?! Munanga mo 'a'a 'ori i'a ma la-la di'a mo silamo'o Ngoi. 11Ngowa'a ma dinga'unu ua 'age taninga sigolona tau-taunu, mada'a Ngoi 'age ra ngini tau-taunu ua.#Dad. 15:11 12Wakutu munanga mo siba-ba'ala bou-bounu gena-ge ra Ngoi, munanga sidodahe 'Ari lese di'a ḏuanga i'a sipalihara Ngoi. 13Ni ngaku mode-mode'e Ngoi 'ari demo nena-ne: Toma ngi'i le'a ḇato ngowa'a 'aḏi singadolo Habari Roanga, we-were'a nena-ne 'ami ga'a ma la-la, ngowa'a ḏuanga i'a ya sijarita ḏi'i, la sidaioranga munanga awa.”

Yudas mau 'o mawu'unu Yesus toma 'imam-'imam ma sae'e

(Mrk. 14:10-11; Luk. 22:3-6)

14Togumu i'a, ngowa'a matengo ra Yesus 'ai me-mete'e nga nyagi moi re nga muḏiḏi manga sigolona, ga'a silomanga Yudas Iskariot, unanga gena-ge 'o tagi toma 'imam-'imam ma sae'e. 15Unanga 'o sano ra ananga, “Na'o ngoi to sipula'a Yesus ra ngini, ngini ḏuanga i'a ni pula'a 'oru ra ngoi?” Dadi ananga ya roimi manga pipisi salaka guḏi ro'ange, kara ananga 'aḏi pula'a ra unanga.#Za. 11:12 16Dadi, mulaingi toma 'orasa gena-ge unanga disa donga, la sipula'a Yesus ra ananga.

Yesus re 'Ai me-mete'e ananga 'aḏi oromo ngo-ngoromo Paskah

(Mrk. 14:12-21; Luk. 22:7-14, 21-23; Yoh. 13:21-30)

17Toma wangere ma mulaingi toma Wangere Roti Kama Ragi Ua, Yesus 'ai me-mete'e 'aḏi sapolo ra Unanga. Ananga 'aḏi sano, “Jou no mau toma ngi'i le'a ngomi mi sidodahe ngo-ngoromo Paskah?”

18Yesus 'a sangoro, “Ngini ni tagi toma limau ma dara. I'a da'a, ngini ni ma'u sanga matengo re ni siajele ra unanga, ‘Minga Guru 'o kanau: 'Ai 'orasa 'i ngadolo ḏua. Unanga re ngomi 'Ai me-mete'e mau mi silamo'o Paskah ma Wangere ra ngana 'ani wala.’ ”

19Dadi 'Ai me-mete'e ya si'a'a ma tero sa'olo Yesus 'o soma'a. Ananga 'aḏi tagi ya sidodahe ngo-ngoromo Paskah gena-ge.

20Wakutu lobi'i 'i ngadolo ḏua, Yesus re 'Ai me-mete'e nga nyagi moi re nga muḏiḏi ananga 'aḏi majoreke 'aḏi oromo. 21Re wakutu ananga 'aḏi oromo moju, Yesus 'o kanau, “Ni ngaku mode-mode'e Ngoi 'Ari demo-demo nena-ne: 'Age rema ngowa'a matengo taninga sigolona ḏuanga i'a 'o sipula'a Ngoi Tari lawana.”

22Wakutu ananga ya 'isene i'a so'o gena, manga 'akala re sinyingara 'i kangela. Dadi matengo re matengo 'aḏi sano ra Yesus, “Ma Jou, tantu ḇato ngoi ua?!”

23Yesus 'a sangoro, “Ngowa'a ga'a sitono 'ai roti toma sawo'o ma dara mamete'e ra Ngoi, unanga gena-ge ḏuanga i'a 'o sipula'a Ngoi Tari lawana.#Nya. 41:10 24Mode'e Ngoi, Manusia ma Ngowa'a Nau'u, balasu To sengene, ma tero sa'olo 'i silefo ḏua toma Boku 'Ofi-'Ofi ma dara. Mada'a ngowa'a ga'a sipula'a Ngoi, Manusia ma Ngowa'a Nau'u, unanga gena-ge 'o sanga bahala lamo'o. Jobilaha unanga gena-ge ma ngina mo sibuoro awa ḇato!”

25Ḏua Yudas ga'a ḏuanga i'a 'o sipula'a Yesus 'o kanau, “Guru, tantu ḇato ngoi ua?!”

Yesus 'a sangoro, “Mode'e ngana nena-ne!”

Ma Jou 'ai Perjamuan

(Mrk. 14:22-26; Luk. 22:14-20; 1Kor. 11:23-25)

26Wakutu ananga gena-ge 'aḏi 'omo moju, Yesus 'a 'oro ma roti re 'O sibere ie murasa ma la ra Ma Jou'ongu Madutu kara 'A poti-poti ma roti gena-ge 'A pula'a Tai me-mete'e re 'O kanau, “ 'Oro re na oromo, nena-ne Ngoi 'ari lese.”

27Gena ḏua, Unanga 'a 'oro ḏi'i ma sawo'o ma dara rema 'anggur re 'O sibere ie murasa ma la ra Ma Jou'ongu Madutu kara 'A sipula'a Tai me-mete'e re 'O kanau, “Ngini mo-moini na ka'e. 28Sababu nena-ne Ngoi 'ari ngaunu ga'a sitotomo Ma Jou'ongu Madutu 'ai jaji. 'Ari ngaunu nena-ne 'i pa'ala di'a singi-ngiranga ngowa'a repe manga ḏosa.#Sup. 24:8; Yer. 31:31-34 29Ngoi to siajele ra ngini nena-ne: Ngoi ta ka'e riwara 'anggur singadolo 'Ari Ḇaḇa 'ai dungia su-sungi 'i ngadolo, kara Ngoi ta ka'e 'anggur su-sungi mamete'e ra ngini.”

30Gena ḏua, ananga 'aḏi manyanyi rimoi di'a puji re silamo'o Ma Jou'ongu Madutu togumu i'a, ananga 'aḏi tagi toma Polono Zaitun.

Nubuata mangale Petrus 'o soloto Yesus

(Mrk. 14:27-31; Luk. 22:31-34; Yoh. 13:36-38)

31Ḏua Yesus 'o kanau i'a Tai me-mete'e, “Toma lobi'i nena-ne, ngini mo-moini ni wiḏi sisoi'i tala Ngoi. Sababu toma Boku 'Ofi-'Ofi ma dara Ma Jou'ongu Madutu 'o kanau so'o ne:

‘Ngoi ḏuanga i'a Tu sisengene sowohi gena-ge,

re 'Ai doba-doba matai are.’#Za. 13:7

32Mada'a wakutu Ngoi dadunu To 'ahu moju, Ngoi to tagi siḏa toma daeraha Galilea.”#Mat. 28:16

33Petrus 'o kanau ra Yesus, “Kalaha ananga mo-moini 'aḏi sisoi'i tala Jou, ngoi tini sisoi'i tala yoḏu'u!”

34Yesus 'o sangoro, “No ngaku mode-mode'e Ngoi 'Ari demo-demo nena-ne: Toma utu nange-ne ḏua, namo 'i solene nyangu, ngana masiretene no soloto Ngoi soi ro'ange ḏua.”

35Petrus 'a sangoro, “Kalaha ngoi to sengene mamete'e ra Jou, ngoi tini soloto Jou ua!” Re 'Ai me-mete'e ma lelegu 'aḏi kanau so'o gena ḏi'i.

Yesus 'o manyiata toma Getsemani

(Mrk. 14:32-42; Luk. 22:39-46)

36Togumu i'a, Yesus re 'Ai me-mete'e ananga 'aḏi tagi toma ngi'i rimoi ma lomanga Getsemani. Toma ngi'i gena-ge Yesus 'o kanau ra ananga, “Ni tegoro 'ane ngomasa moi, Ngoi tagi i'a da'a, di'a to manyiata.” 37Ḏua Yesus 'o sigaro'o pa'i 'a Petrus re 'a Zebedeus 'ai ngowa'a nau'u nga muḏiḏi ḇato, ananga 'aḏi tagi mamete'e ra Unanga. Re Yesus mulaingi basono 'ai 'akala re sinyingara 'i kangela masala. 38Unanga 'o kanau Tai me-mete'e nga ḏu'ange gena-ge, “'Ari 'akala re sinyingara 'i kangela masala singadolo ta basono sa'i to sengene. Totoma 'ane-ne re ni ma'istiari ino.”

39Gena ḏua, Yesus 'o tagi i'a da'a masai'i i'a ra ananga kiḏanga siḏi ua kara 'O ruba paga-pagara 'Ai biono tala toma tana'a, sababu 'Ai 'akala re sinyingara 'i kangela masala, re 'O manyiata ma betongo so'o ne: “ 'Ari Baba, na'o No nyengara sangisara nena-ne Na silalo'o ra Ngoi. Mada'a awa mete'e Ngoi 'ari mau, ḏuga-ḏuga mete'e Baba 'ani mau ḇato.”

40Togumu i'a, Yesus 'o maḏibo i'a Tai me-mete'e nga ḏu'ange re 'O sanga i'a ananga 'aḏi otu. Unanga 'o kanau ra Petrus, “Pa'i jam rimoi ḇato ngini nga'unu ua ni matahana ma'istiari mamete'e ra Ngoi?! 41Ni ma'istiari re ni manyiata, la awa ngini sanga bo-baja. Mode'e ninga roh mau 'a'a 'ori i'a ma banari mada'a ngini ni nga'unu ua, sababu ngini pai'i manusia ḇato dadi ni lamahana.”

42Soi moi moju, Yesus 'o tagi 'o manyiata ma betongo so'o ne: “'Ari Baba na'o sangisara nena-ne Ngoi balasu ta basono re silalo'o ra Ngoi 'i yoḏu'u, sieanga ḇato Baba 'ani mau 'i dadi.” 43Togumu i'a, Yesus dadunu 'o maḏibo i'a ra ananga re 'O sanga i'a ananga 'aḏi otu moju, sababu 'aḏi kakadungu siḏi woḏi.

44Soi moi moju, Unanga ya'u sisoi'i tala ananga re 'O tagi di'a manyiata ma soi ro'ange ma betongo ma tero sa'olo 'au nange-ge. 45Gena ḏua, Yesus dadunu maḏibo i'a Tai me-mete'e nga ḏu'ange re 'O kanau, “Ngini ni mangomasa re ni otu moju?! Oḏi'i ma 'orasa 'i ngadolo ḏua, Ngoi, Manusia ma Ngowa'a Nau'u sipula'a toma ngowa'a baraḏosa. 46Momi'i, ino ngene wo tagi! Oḏi'i! Unanga ga'a 'o sipula'a Ngoi toma ngowa'a baraḏosa, unanga gino!”

Yesus ananga 'U cako'o

(Mrk. 14:43-50; Luk. 22:47-53; Yoh. 18:3-12)

47Wakutu Yesus 'o ka-kanau moju, 'a Yudas 'o sapolo, unanga gena-ge 'o osama nyo-nyoimi ra Yesus 'ai me-mete'e nga nyagi moi re nga muḏiḏi. Re ngowa'a manga repe 'aḏi sapolo mamete'e ra Yudas, 'aḏi gasa manga samaranga re bu-butulu. Ananga gena-ge 'imam-'imam ma sae'e re Yahudi manga bi-biri'i ya'u soma'a. 48Nyangu moju, 'a Yudas 'o pula'a nana'o rimoi ra ananga re 'o kanau, “Ngowa'a ga'a ngoi tu dume, Unanga gena-ge ngini nu cako'o!”

49Re wakutu Yudas 'o sapolo, unanga 'o jau i'a ra Yesus re 'o kanau, “Tabea, Rabi!”#26:49 “Rabi” toma demo Yunani “Guru” di'a ngowa'a ga'a 'o sayanga ma jingi'i. Gena ḏua, unanga 'o dume Yesus 'ai bobongolo.

50Yesus 'a sangoro, “Wolo, si'a'a ḇato 'oru ga'a ngana mau na si'a'a.”#26:50 bolo “Wolo, di'a 'oru ngana no sapolo 'ane?!”

Ḏua ngowa'a repe 'aḏi jau i'a cako'o 'a Yesus.

51'Age rema ngowa'a matengo ra Yesus 'ai me-mete'e manga sigolona, unanga gena-ge 'a tuono 'ai samaranga toma sarumu, kara 'a cafa 'imam 'agung 'ai budaka 'ai ngau'u singadolo 'i tola'a! 52Yesus 'o kanau Tai me-mete'e matengo gena-ge, “Dadunu na singosama 'ani samaranga toma sarumu, sababu ngowa'a mo-moini ga'a 'aḏi pake samaranga, ananga ḏuanga i'a ngowa'a ya'u sisengene reo samaranga ḏi'i. 53'Oru ngana no waro ua mangale na'o Ngoi to golo'o ri-riono tari Ḇaḇa, Unanga jau-jau 'o siḏingoto pai'i pasukana#26:53 pasukana rimoi: nyengara sordado nga cala rarama singadolo nga cala nyagi moi re cala romoḏiḏi. mala'ekata nga nyagi moi re nga muḏiḏi di'a riono Ngoi?! 54Mada'a na'o so'o gena, tantu ḏua 'i dadi ua 'oru ga'a ri sinubuata ḏua toma Boku 'Ofi-'Ofi ma dara mangale balasu 'i dadi ma tero so'o nena-ne!”

55Toma 'orasa gena-ge, Yesus 'o kanau toma ngowa'a kawasa gena-ge, “I'a sa'olo ngini ni sapolo re ninga samaranga re bu-butulu di'a ni cako'o ngoi ma tero sa'olo ngowa'a ma jira?! Ma wangere ma jelele i'a, Ngoi to tegoro di'a to doto'o ra Ma Jou'ongu Madutu 'ai Wala, mada'a ngini rini cako'o Ngoi ua!#Luk. 19:47, 21:37 56Mada'a balasu so'o nena-ne ḏua, la 'i mete'e 'oru ga'a nabi-nabi ya silefo pasala ḏua toma Boku 'Ofi-'Ofi ma dara.” Togumu i'a, 'Ai me-mete'e mo-moini matai wiḏi sisoi'i tala Unanga.

Yesus 'U sitalaḏi toma Mahkamah 'Agama

(Mrk. 14:53-65; Luk. 22:54-55, 63-71; Yoh. 18:13-14, 19-24)

57Ngowa'a ga'a 'aḏi cako'o Yesus 'aḏi gasa Unanga toma 'imam 'agung Kayafas 'ai wala. Toma ngi'i gena-ge guru-guru 'agama re Yahudi manga bi-biri'i raḏi malomu. 58Petrus, unanga 'o tu-tuu'u toma giḏanga ra Yesus singadolo toma 'imam 'agung 'ai wala ma soana. I'a da'a, unanga 'o osama toma soana re 'o tegoro mamete'e reo ngowa'a jaga. Unanga mau disa waro mo-moini 'oru ga'a ananga 'aḏi 'a'a ra Yesus.

59'Imam-'imam ma sae'e re Mahkamah 'Agama mo-moini 'aḏi disa sakisi sa-sakala, la 'aḏi singe-ngeta'a hukumu sengene ra Yesus. 60Kalaha 'age rema sakisi sa-sakala manga repe, ananga 'aḏi sanga 'ai sala dola moi i'a mai ua, ga'a 'i patasa Unanga sihukumu sengene. Ma ḏo-ḏogumu ngowa'a nga muḏiḏi, i'a toma biono. 61Ananga 'aḏi kanau, “Ngowa'a nena-ne 'o kanau, ‘Ngoi nyengara Ta siruba Ma Jou'ongu Madutu 'Ai wala, re toma wangere ro'ange nyengara Ta simomi'i.’ ”#Yoh. 2:19

62Ḏua 'imam 'agung 'o made'oso re 'o kanau ra Yesus, “I'a sa'olo Ngana no sangoro ua ananga manga gamamu gena-ge ra Ngana?” 63Mada'a Yesus pa'i 'o masiogoro ḇato.

Soi moi moju 'imam 'agung 'o sano ra Yesus, “Ra Ma Jou'ongu Madutu ga'a 'ahu-'ahu, sikanau ino ra ngomi mode-mode'e Ngana nena-ne 'O Kristus, Ma Jou'ongu Madutu 'ai Ngowa'a Nau'u, bolo ua?”

64Yesus 'a sangoro, “Ma tero sa'olo ngana no kanau. Mada'a 'elingi 'Ari demo nena-ne: ngini ḏuanga i'a ni oḏi'i Ngoi, Manusia ma Ngowa'a Nau'u, To tegoro ra Ma Jou'ongu Madutu 'ai giama ma kuwiḏa i'a, Unanga gena-ge 'Ai kuasa ma pari cua. Re Ngoi to sapolo ra Ma Jou'ongu Madutu toma kakamo ma re'u da'u diwanga tala!”#Dan. 7:13

65Gena ḏua, 'imam 'agung 'a 'acingi 'ai juba masiretene sababu 'o porata re 'o kanau, “Unanga 'o je-jengere Ma Jou'ongu Madutu sababu Unanga 'o kanau ‘Unanga re Ma Jou'ongu Madutu marimoi!’ Dadi paralu riwara sakisi. Nange-ne ngini mo-moini na 'isene masiretene 'Ai demo-demo ga'a sije-jengere Ma Jou'ongu Madutu.

66Dadi ninga 'akala ma sanga sa'olo?”

Ananga 'aḏi sangoro, “Unanga balasu 'o sanga hukumu sengene.”#Im. 24:16

67Ḏua, ananga ya obi'i 'Ai biono re 'U tutu'u. Re 'age ḏi'i rema ngowa'a ma lelegu 'U sata,#Yes. 50:6 68re 'aḏi kanau, “Na'o Ngana 'O Kristus, tai'i no disa waro re no siajele ra ngomi 'a guna ni sata Ngana!”

Petrus 'o soloto Yesus

(Mrk. 14:66-72; Luk. 22:56-62; Yoh. 18:15-18, 25-27)

69Wakutu Petrus 'o tegoro moju toma ḏuḏunu da'a soana, falalomu we-were'a matengo mo sapolo re mo kanau ra unanga, “Ngana nena-ne ḏi'i no mamete'e ra Yesus ngowa'a Galilea gena-ge!”

70Mada'a Petrus 'o masoloto ra ananga manga biono mo-moini re 'o kanau, “Ngoi ta waro ua 'ani maksudu 'oru!”

71Gena ḏua, unanga 'o tagi toma soana ma ngalana. Ḏua falalomu we-were'a ma lelegu mo oḏi'i 'a Petrus re mo kanau toma ngowa-ngowa'a ga'a 'aḏi tegoro 'age, “Ngowa'a matengo nena-ne ḏi'i 'o mamete'e ra Yesus toma limau Nazaret.”

72Ḏua Petrus 'o masoloto moju re 'o masisasi, “Mode-mode'e, ngoi to nana'o ngowa'a gena-ge ua!”

73Ti'ara mai nyangu, ngowa'a ga'a 'aḏi made-de'oso toma ngi'i gena-ge 'aḏi sapolo ra Petrus re 'aḏi kanau, “Tantu ḏua, ngana ḏi'i no osama nyo-nyoimi ra ananga, sababu 'ani demo ma lug̱o ma tero sa'olo ngowa'a Galilea.”

74Ḏua, 'a Petrus mulaingi 'o masisasi re 'o kanau, “Ngoi to nana'o ngowa'a gena-ge ua!”

Gena ḏua, namo 'i solene. 75Re 'a Petrus 'a si'elingi ie 'oru ga'a nange-ge Yesus ro kanau ra unanga, “ 'O namo 'i solene nyangu mada'a ngana reno soloto Ngoi soi ro'ange.” Petrus 'o tagi re 'o supu toma soana gena-ge, re 'o 'aḏi jomo-jomo.

Currently Selected:

Matias 26: SNT

Highlight

Copy