MARKUS 11
11
I Yesus nusumu su Yerusalem dingang u kawawantughi
(Mat. 21:1-11; Luk. 19:28-40; Yoh. 12:12-19)
1Su tempo manandighi Yerusalem, i sire nahumpa u soang Betfage l᷊au Betania, sul᷊engehu Wul᷊uru Zaitun, su se'e I Yesus nuparenta u tumatuhu rarua patamai puhoro. 2I Yesus nangul᷊i si sirerua, “Tamai ko sarang kampong pai su tingongu e'e. Kere'e suapang i kumu nusumu su kampong e'e, i kumu sarung makawua pia ana u keledai simbau ko mborong ta nisakenangu taumata, mal᷊aiki, bukako keledai e'e dang bawa simai. 3Dang boko pia taumata makina si kumu nakurawe i kumu namuka keledai e'e, puhabari, ‘Mawu#11:3: Mawu: arako Tataghuange. mo mupake dang maehong sau i sul᷊enge.’ ”
4Tumatuhu I Yesus sirerua e'e apiru dimal᷊eng, dang nakarea ana u keledai simbau kal᷊aiki su tukaru wal᷊e su wiwihu ral᷊eng. Kute i sire rua namuka keledai e'e. 5Manga taumata ko rarisi su se'e kaul᷊ie nukina si sire, “Ei, kapukurange i kumu? Nakurawe ipilo ana keledai e'e?”
6I sire nusumimbahi kere ko seng nihabari I Yesus si sire. Manga taumata e'e namalang i sire pumbawa keledai e'e. 7Se tempo nurating I Yesus, pal᷊ukangu keledai e'e nimpahikang i sire su l᷊ikure dingang u juba sire, wuhue I Yesus nusumake su wawoe. 8Maul᷊i taumata ko nangumpahi juba ngi sire su ral᷊eng, pia ko l᷊ai nangaesi su tal᷊oara u ral᷊eng manga kahiko u kau ko nial᷊a i sire bou anseri. 9#Mzm. 118:26Manga taumata ko kal᷊al᷊enge su saruang l᷊au manga taumata ko katuhue bou l᷊ikure, kaul᷊ie kapusighonge, “Dalo su Mawu Ruata! Kasasal᷊amati, si sie ko nusumongo dingang u areng u Mawu! 10Kaumuri kararatuang-E ko sarung sumongo – kararatuang i Daud i upung i kite! Dalo su Mawu Ruata ko karangetange!”
11Panginsuenge I Yesus nurating u Yerusalem, bou e'e nusumu su Wal᷊e-Ngu Mawu. Su se'e I Sie nutuhung kaul᷊ie ko su sindihange. Kateho ual᷊ingu seng kal᷊ahuwinge, I Sie bou e'e nuwua sarang Betania singkahindo dingang sire mapulo dua tumatuhu-E.
I Yesus nangutoki kau ara
(Mat. 21:18-19)
12Ndai nal᷊ou, su tempo ngi sire karal᷊enge bou Betania, I Yesus nahutung. 13Bou marau I Sie nakawua kau ara singkau ko matubung raunge, inau I Sie tamai nusumandighi nutuhung kau e'e minsang pia wuange. Kateho su apang I Sie nurating u pungu kau e'e, I Sie ta nakawua aha u apa sulikuru raunge, watu u su tempo e'e mborong wal᷊inge tempo muwua. 14Bou e'e I Yesus nangul᷊i su kau ara e'e “Manita bou orasi i'i takoae sarang manga singkatau ko sarung kumang l᷊ai bou wuange!”
Manga tumatuhu I Yesus nakaringihi didato e'e.
I Yesus nusumu su Wal᷊e-Ngu Mawu
(Mat. 21:12-17; Luk. 19:45-48; Yoh. 2:13-22)
15Bou e'e i sire nahumpa u Yerusalem, dang I Yesus sau nakoa sarang Wal᷊e-Ngu Mawu. Su se'e I Sie nanita nanguseri Kaul᷊iu taumata muwawal᷊u dingang u mul᷊al᷊uang su tampa e'e. I Sie nangal᷊intuing manga meda ngu mananukari doi, dingang u kakaianengu mududagang paluma. 16Dang takoae sarang manga singkatau ko nipakawalang-E numbawa manga apa mul᷊umiu bou lilahi u Wal᷊e-Ngu Mawu e'e. 17#Yes. 56:7; Yer. 7:11Mbuhue I Yesus nanintiro manga taumata su se'e. I Sie nangul᷊i, “Su l᷊al᷊ung u Buki Susi kawawohe kiri i: Mawu Ruata nangul᷊i, ‘Wal᷊e-Ku sarung i sigho wal᷊eng pu kakal᷊iomanengang kaul᷊i u umati.’ Arawe si kumu kukoateng tampa u mul᷊uhampasi!”
18Manga tumbonang u imam dang manga meteri u agama nakaringihi didato e'e. Kute i sire manita mundea ral᷊enge tadeau mamate si Yesus. I sire mataku I Sie, watu'u manga taumata kaul᷊ie naherang nakaringihi tintirong-E.
19Seng kal᷊ahuwinge, I Yesus dingang u manga tumatuhu-E nanintang u soa e'e.
Tatintiro bou kau ara
(Mat. 21:20-22)
20Ndai karal᷊ounge mborong mal᷊uka-l᷊ukari, su tempo ngi sire nusumahe kau ara e'e, i sire nakawua kau e'e seng nahango sarang hamue. 21Bou e'e i Petrus nakatinaung apang ko nariadi silou su horo u e'e. Kute i Petrus nangul᷊i si Yesus, “Tuang Guru, kenang tuhunge! Kau ara ko nikutoki I Tuang e'e seng nahango!”
22I Yesus nusumimbahi, “Pangimangte su Mawu Ruata. 23#Mat. 17:20; 1Kor. 13:2Mambeng tingari i kumu botonge mudidato su wul᷊uri i'i, ‘Kasapua dang karume'e su l᷊auri!’ Kute hal᷊i e'e sarung koateng si kumu; asal᷊e i kumu ta mubingo, l᷊au i kumu mangimang himoneu apang ko nididatong i kumu e'e mang sarung mariadi. 24Ual᷊ingu e'e putinaungte i'i: Boko i kumu mukal᷊iomaneng dang mundo manga apa, pangimangte himoneu Mawu Ruata seng nangonggo u apang ko pundokang i kumu kute i kumu sarung manarima kaul᷊ie e'e. 25#Mat. 6:14-15Dang boko i kumu mukal᷊iomaneng, kateho madal᷊ai naung u su manga taumata singkatau, onggol᷊ete ampunge horo taumata e'e tadeau l᷊ai i Yamangu su sorga mangonggo u uampung kaul᷊i u dosa ngi kumu. 26[Boko i kumu ta mangonggo u ampunge su taumata kowal᷊inge, i Yamangu su sorga mang l᷊ai ta mangonggo u ampungu kaul᷊i u dosa ngi kumu.]”
Kakina hal᷊i u haki I Yesus
(Mat. 21:23-27; Luk. 20:1-8)
27I sire sau nusul᷊e sarang Yerusalem. Dang su tempo I Yesus kal᷊al᷊eng kapul᷊iku e su l᷊al᷊ung u Wal᷊e-Ngu Mawu, manga tumbonang u imam, manga meteri u agama dang manga pangaha u taumata ngu Yahudi nunusumongo sarang koa-E. 28I sire nukina, “Apa titae mukoa kaul᷊i u hal᷊i i'i? Ko i sai nangonggo u haki si kau?”
29I Yesus nusumimbahi, “Ia l᷊ai mo mukina sikumu. Simbahete dang Ia sarung muhabari si kumu dingang u haki i sai Ia mukoa kaul᷊i u hal᷊i i'i. 30I Yohanes nanahani dingang u haki i sai, Mawu Ruata arako taumata?”
31Bou e'e manga tumbonang u imam dang manga pangaha u tau Yahudi nanita nughaghighili i su tal᷊oara isire. Angkung i sire, “Boko i kite muhabari, ‘Dingang u haki u Mawu Ruata,’ I Sie ntihang mudidato, ‘Nakurawe i kumu ta mangimang si Yohanes?’ 32Kateho susa l᷊ai i kite muhabaru, ‘Dingang u haki u taumata.’ ” Watu u i sire mataku u taumata maul᷊i, watu'u Kaul᷊iu taumata mutuhung si Yohanes kere singkatau nabi. 33Inau, i sire nusumimbahi, “I kami wugha.”
Bou e'e I Yesus nangul᷊i si sire, “Boko kere'e, Ia l᷊ai mandiri muhabari si kumu dingang haki i sai Ia mukoa kaul᷊ie i'i.”
Currently Selected:
MARKUS 11: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
