MARKUS 12
12
Papinintu pul᷊ahal᷊i awuhu anggori
(Mat. 21:33-46; Luk. 20:9-19)
1 #
Yes. 5:1-2
Bou e'e I Yesus nanita nangul᷊i dingang u papinintu su manga tumbonang u imam, manga meteru agama l᷊au manga pangaha u tau Yahudi e'e. I Yesus nangul᷊i, “Pia singkatau ko nusuang u anggori awuhu simpalang, bou e'e nipagare nge nal᷊iku. Bou e'e i sie nukal᷊i l᷊ohange guna ngu pamuhukang wua ngu anggori, bou e'e i sie nukoa wal᷊e dadiaga. Nasue e'e awuhi e'e nisewange su mulahal᷊i pirang katau, wuhue i sie nuwua sarang soa kowal᷊inge. 2Suapang seng temponge manipo wuang anggori e'e, taumata e'e nundoi u paparentange singkatau sarang koa i sire mulahal᷊i awuhi e'e, tadeau manarima bahageange. 3Kateho manga mulahal᷊i e'e naname paparentang e'e. Wuhue nipukul᷊i i sire, bou e'e niroi pakapul᷊e dingang u l᷊ima mapul᷊o. 4Sau bou e'e tataghuang u awuhu e'e nundoi u singkatau paparentange kowal᷊inge. Kateho paparentang e'e nidudu u manga mul᷊ahal᷊i e'e su timbo e'e, wuhue nitokol᷊i apiru nirohangeng. 5Tataghuang u awuhu e'e nusau nundoi u paparentang kowal᷊inge. Kateho paparentang e'e nipateng i sire. Dang maul᷊i l᷊ai paparentang kowal᷊inge ko koateng i sire turusi kere'e, pia ko nidudu dang pia ko l᷊ai nipate. 6I sai l᷊ai su orasi i'i ko botonge i karoi tataghuang awuhu e'e? Seng kate singkatau, e'e ko anae sisane ko i kukindaghie. Panginsuenge i sie mang nundoi anae sarang koa i sire mul᷊ahal᷊i e'e. Susipirange, ‘Tantu ana ku e'e mang adateng i sire.’ 7Kateho manga mul᷊ahal᷊i e'e kapudidatong i sire l᷊au i sire, ‘Ko seng i sie i'i tataghuang u pusaka e'e. Maite i sie pateng i kite, tadeau pusakae al᷊akeng i kite!’ 8Inau ana e nisame i sire, mbuhue nipate. Bangke nirume i sire sarang l᷊ikuru awuhi e'e.”
9Wuhue I Yesus nukina, “Apa sarung koatengu tataghuangu awuhu e'e? Nal᷊ahe i sie sarung sumongo dang mamate apang mulahal᷊i e'e, wuhue manarakangu awuhu e'e su mulahal᷊i ko wal᷊inge. 10#Mzm. 118:22-23I kumu tantu seng buae nubasa nasi i'i su l᷊al᷊ung u Buki Susi,
‘Watu ko ta napake su manga base wal᷊e
seng nakoa watu panitakenge.
11Ko i'i nikoa u Mawu,
wal᷊inge gampang sidadae!’ ”
12Kute u manga pangaha u taumata ngu Yahudi ko nakaringihi papinintu e'e, mundea ral᷊enge maname si Yesus, watu u i sire matitong u papinintu e'e i tarang I Yesus si sire. Kateho i sire mataku u taumata maul᷊i. Inau i sire nurumal᷊eng nanintang I Yesus.
Hal᷊i u pamamaehi balasteng
(Mat. 22:15-22; Luk. 20:20-26)
13Taumata ngu Farisi pirangkatau dingangi sire taumata ngi Herodes niparentang pangakal᷊i si Yesus dingang u mural᷊ahaghi kakina. 14I sire nusumongo sarang koa I Yesus dingang u nangul᷊i, “Tuang Guru, i kami matitong I Tuang matul᷊iri dang ta mundiangu tingihi i sai-sai. I Tuang manintiro mal᷊ahe hal᷊i u kao u Mawu Ruata guna ngu taumata, watu u I Tuang ta mutuhung pahesi. Ho, kenang ko i Tuang puhabari si kami, ‘Tumuhu atorang u agama ngi kite, botonge mamaehi balasteng si Kaisari arako ta? Apa mang mambeng i kite pamaehi balasteng arako ta?’ ”
15I Yesus seng matitong l᷊eo i sire, I Sie nusumimbahi, “Hakiwe i kumu mangakal᷊i si Sia? Kenang andaghi si Sia doi sal᷊aka simbau.”
16Kuteu i sire nangonggo doi sal᷊aka simbau si Sie. I Yesus dingang nukina si sire, “Ii gambari l᷊au areng i sai?”
“Kaisar,” sasimbahi i sire.
17“Ho, boko kere'e,” angkung I Yesus, “Onggo e si Kaisar apa ko koa i Kaisar, dang su Mawu Ruata apa ko koa u Mawu Ruata.”
I sire naherang nakaringihi si Sie.
Hal᷊i u puwawangung bou papate
(Mat. 22:23-33; Luk. 20:27-40)
18 #
Wuk. 23:8
Pirangkatau i sire bou komol᷊ang u tau saduki nusumongo sarang koa I Yesus. (I sire e'e manga taumata ko pia titong e uare taumata nate seng ta sarung muwangung.) 19#Ul. 25:5I sire nangul᷊i si Yesus, “Tuang Guru, I Musa namohe u atorang i'i guna ngi kite: ‘Boko singkatau koese mate dang takoae ana e, kute tuari nge mambeng mukawingu wal᷊unge e'e tadeau makaonggo u hintou su tau ko nate e'e.’ 20Pia i sire pitu tamahuari. Ko i akang nukawing, bou e'e nate takoae ana e. 21Bou e'e ko karuange nukawing dingang u wal᷊unge, kateho i sie nate l᷊ai takoae ana. Hal᷊i ko musul᷊ung nariadi l᷊ai su tuari nge katilunge, 22dang turusi kere'e sarang nurating u kapitunge. Panginsuenge tau kowawine e'e nate l᷊ai. 23Su tempo ngu taumata nate sau i puwangung, makoa kawing i sai tau kowawine e'e? Watu u i sie seng bua nipukawingang i sire pitu kaul᷊ie!”
24I Yesus nusimimbahi, “I kumu seng ta nakahino. Wal᷊ingu u i kumu ta nakahingang didato ngu Buki Susi dingang kawasa ngu Mawu Ruata. 25Boko manga taumata mate ko sau muwangung, i sire seng ta mukawing, kateho i sire sarung muwiahi kere mal᷊aikati su sorga. 26#Kel. 3:6Dang hal᷊i u taumata nate sau ipuwangung, i kumu mang mborong ta nakabasa su Buki i Musa hal᷊i u ghal᷊umue ko kahenange? Su l᷊al᷊ungu manga ayeti e'e kawawohe, ‘Mawu Ruata nangul᷊i si Musa, Ia I Mawu Ruata ngi Abraham, Mawu Ruata ngi Isak, l᷊au Mawu Ruata ngi Yakub.’ 27Mawu Ruata e'e wal᷊inge Mawu Ruata ngu tau ko nate. I Sie Mawu Ruata ngu tau ko wiahi. I kumu seng nusal᷊a kahingang!”
Parenta kahimbotongange
(Mat. 22:34-40; Luk. 10:25-28)
28 #
Luk. 10:25-28
Bou e'e nasongo singkatau meteru agama mundaringihi didatong I Yesus dingang u manga taumata bou komol᷊ang u saduki e'e. Meteru agama e'e nakawua si Yesus kere'e kapiange nusumimbahi su manga taumata e'e. Kuteu i sire nukina si Yesus. “Parenta sude'e ko kal᷊abokange bou kaul᷊i u parenta?”
29 #
Ul. 6:4-5
I Yesus nusumimbahi, “Parenta kahimotongange ko i'i: ‘Raringihe ko, ei i kumu tau Israel! Mawu Ruata ngi kite, Mawu e'e mang simbau.#12:29: Mawu Ruata ngi kite, Mawu e'e mang simbau: arako Mawu e'e ko Mawu Ruata ngi kite, kitang e'e Mawu. 30Kindaghite su Mawu Ruata ngi kumu dingang u kal᷊abo u naung ngi kumu, dingang u kaul᷊i u jiwa ngi kumu dang kaul᷊i u sipirang i kumu dang dingang u katatoghasi kumu.’ 31#Im. 19:18Parenta karuange ko i'i: ‘Kindaghie sinsul᷊ungu, musul᷊ung i kau kumindaghiu watangeng u sisane.’ Seng takoae l᷊ai parenta kowal᷊inge ko lebe l᷊abo bou parenta darua i'i.”
32 #
Ul. 4:35
Bou e'e meteru agama e'e nangul᷊i si Yesus, “Nuhino kahingang, Tuang Guru! Mang tingari apa ko nididato-Ngi Tuang: Mawu Ruata e'e ko Mawu Ruata mang simbau, dang takoae l᷊ai Mawu Ruata ko wal᷊inge. 33#Hos. 6:6Dang taumata mambeng kumindaghi u Mawu Ruata dingang u kaul᷊i u naunge dang dingang u kaul᷊i u sipirange dang dingang u kaul᷊i u katatoghase. Dang l᷊ai i sire mambeng kumindaghi u sinsul᷊unge kere watangenge si sane. E'e lebe kapia nge sul᷊ungu manumba sasumba ko itutung dang manga sasumba kowal᷊inge su Mawu Ruata.”
34I Yesus nakawua meteru agama e'e seng kere'e kapiange nusumimbahi. I Yesus nangul᷊i si sie, “I kau seng masandighi makoa tataho u umat u Mawu Ruata.”
Bou e'e seng takoae sarang manga singkatau l᷊ai ko wahani makina si Yesus.
Hal᷊i u Ratu mananal᷊amati
(Mat. 22:41-46; Luk. 20:41-44)
35Su tempo ngu kapanintiro nge su l᷊al᷊ung u Wal᷊e-Ngu Mawu, I Yesus nukina, “Kirapawe manga meteri u agama e'e botonge makapudidato himoneu Ratu manal᷊amati e'e ko hintou ngi Daud? 36#Mzm. 110:1Sumbal᷊i i Daud si sane – ual᷊ingu nipakasua ngu Roh u Mawu Ruata – nangul᷊i,
‘Mawu nangul᷊i su Mawuku:
Kangiangte su kuaneng-Ku#12:36: Kangiangte … kuaneng-Ku: tumuhu adatu tau Yahudi, ko nionggol᷊ang adati dang kawasa kumangiang su simbuka kuaneng.
sarang ia mukoa apang roka-U sumulung si Kau.’
37Inau boko Daud musigho ngu Ratu mananal᷊amati e'e Mawu, mariadi we kirapa Sie hintou ngi Daud?”
L᷊aingati tadeau pakatatiho su manga meteru agama
(Mat. 23:1-36; Luk. 20:45-47)
Taumata maul᷊i ko ene su Wal᷊e-Ngu Mawu e'e nal᷊uasi nakaringihi si Yesus manintiro. 38I Sie nudidato si sire, “Pakatiho su manga meteri u agama, Kao i sire rumal᷊eng dingang u juba mananandu dang makihaghi adateng su manga pasari. 39I sire mo su manga tampa mawantughi su l᷊al᷊ung u wal᷊e pukal᷊iomanengang dingang u su manga sal᷊iwang. 40I sire nangakal᷊i manga kowawine wal᷊u dingang u mamal᷊aho wal᷊enge. Dang tadeau manaka kakanoa i sire ko dal᷊ai e'e, i sire mukal᷊iomaneng mananandu-nandu. Hukumang i sire sarung mabuha!”
Sasumba ngu tau kowawine wal᷊u
(Luk. 21:1-4)
41Su tempo ngu kukaiang mutatingong u kasi u sasumba su l᷊al᷊ung u Wal᷊e-Ngu Mawu, Yesus kaputuhunge manga taumata ko mutaho u doi ngi sire su l᷊al᷊ung u kasi e'e. Maul᷊i taumata kala mutaho doi ngi sire maraul᷊i; 42Wuhue pia singkatau ko kowawine wal᷊u ko susa nusumongo l᷊ai. I sie nutaho u doi nge witu ko kaesi darua ko kadiokang u harigange. 43Kute I Yesus nukui manga tumatuhu-E bou e'e nangul᷊i si sire, “Tuhunge ko pakapia i'i: Tau kowawine wal᷊u susa e'e seng nutaho lebe maul᷊i sukasi bou kaul᷊i ko nitaho u manga taumata ko wal᷊inge. 44Watu u i sire kaul᷊ie nangonggo bou lebe nge kakala i sire. Arawe tau ko kowawine wal᷊u e'e maneng kere'e kasusa nge nangonggo u patiku kaul᷊i ko ene si sie – ko hino ngi i pake guna ngi puwiahi.”
Currently Selected:
MARKUS 12: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
